19 de Payares de 2022
Track: La Felguerosa (Ayer) - Picu Cutrifera - Monte Bustiello
Primer selmana d'iviernu, con ñevaes nes cotes altes, lo que llevó a buscar un requexín, una pequeña ventanina, pa poder salir al monte. Esta vegada, la xente nun fui mui positiva y tan sólo aventurámonos Charly y yo, tornando una vegada más, hasta'l cordal de L.longalendo, onde entá faltábenmos un tramu per conocer, xustu enriba de Morea, nel conceyu d'Ayer.
Les otres incursiones en L.longalendo, fueran más al oriente, entamando pelos picos Culladiella y Grandes, pa finalizar el cordal pela Burra Blanca y Cuetu Ventosu que ficímoslo nun va tantos años, siendo una costante nesti cordal, el caltenimiento de los mayaos ganaderos y calteniéndose en bon estáu una llínea de senderos pela propia cumera o falderes altes de L.longalendo.
D'esti xeitu, llueu del clásicu almuerzu en Mieres, onde compartimos coche, continuamos hasta'l valle del rigu Ayer, pa salir en Morea y facer un par de kilómetros hasta'l pueblín de la Felguerosa. Nun voi descubrir yo la fealdá que supuso la enorme industralización de les cuenques mineres, con crecimientos ensin xacíu de los grandes pueblos, pero sí que quiero destacar que namái que salímonos a les falderes de los cordales, alcontrámonos con pueblinos bien calteníos, onde por suerte, recuperánronse bona parte de les cases, a mou de segunda vivienda supongo, la mayoría d'elles.
Saldremos caleyando per detrás de la primeres cases del pueblu, saliendo a la mandrecha per un camín, qu'en varies envueltes, evitarános un bon tramu asfaltáu hacia'l camín a la L.linariega. A partir d'equí, garraremos una cómoda pista de tierra, que llevarános pente tramos de viesca cantábrica y guapos mayaos, como Los Heros y la L.lana'l Cordal, onde fadremos una amplia envuelta hacia'l mayáu de Pandoto.
Nesti mayáu, el día estrópiase metíendose la ñube y orpinando, poro decidimos nun facer más envuelta hacia Ortigalusu, garrando a pinchu un senderu bastante marcáu, que va dexanos primeru nel altu Pandoto, pa namás que garrar a la mandrecha senderu hasta los 1064 m del picu Cutrifera.
Encontrámonos una montonera cintes del Trail Santa Barbara d'Hunosa, per tola cumera'l cordal, que miramos la fecha y ye dientru de 15 díes, así que bono, na que dicir. Sacamos semeya, miramos la ñube pal sur, ponémonos chubasqueros mochileros y humanos... y desfacemos camín hacia l'Altu Pandoto, pa siguir cordal de L.longalendo alantre, col envís de conocer hasta'l siguiente vértice xeodésicu nel monte Bustiello.
El camín tan sólo tendrá, siguir el bon senderu esfrutando de les vistes hacia'l val.le Turón o hacia'l cordal de Ranero, con dalgunes falisgues de ñeve y demientres saludamos a los cazaores apostiaos na cumera'l cordal, pasaremos penriba de la Mayaína o Curuxea, hasta topar los 886 m del monte Bustiello.
Equí decidimos continuar hasta'l guapu Altu La Faya, un mayaón preciosu, pa xustu enantes de pisar los sos praos facer una envuelta y garrar un senderu bastante tomáu (lo únicu de tola ruta). La verdá ye que nun alcontramos manera de baxar más direutos, ya que cuando termines la envuelta y tas n'arista SO que baxa de Bustiello, el camín meyora y ya descenderemos cenciello hasta les cabañes de la L.lana Teyeres.
En Teyeres vamos esfrutar d'un tramu de travesía penriba del pueblín de Sinariego, onde atopamos cabañes, muries y caminos de gran valir ganaero, con esi puntu bien guapu, col mofu penriba les llábanes de los teyaos y de les muries, quedando encantaos con esti final de ruta, que va facenos pasar pela Casavieya, onde ya garramos una pista que vien de Sinariego y que llevarános hacia la Felguerosa de nuevu.
Esta pista, d'usu mineru antaño, supongo, va llaneando tranquilamente pasando per Rosamayor, hasta ponenos penriba'l pueblu, teniendo dellos desvíos per caminos hacia la Felguerosa o pudiendo enllazar cola L.linariega de nuevu si quisiésemos.
Nós garramos un camín, que fue dexándonos descender hacia La Felguerosa, entrando al pueblu pel barriu del Rasón, pa continuar caleyando pente les cases hasta dar de nuevu al aparcamientu, onde finamos esta ruta de 3 hores y 45 minutinos con un percorríu de 13 km y un desnivel de +/- 720 m.
No hay comentarios:
Publicar un comentario