Uriés (Ayer) - Burrablanca - Cuetu Ventosu

 31 de Xineru de 2021

Track: Uriés (Ayer) - Burrablanca - Cuetu Ventosu

Primer día del añu 2021, nel qu'animámonos xente del grupu a salir a dar un pateín. Enantes anduviera en solitariu faciendo una prestosa ivernal al Picu Torre en Piloña, pero nesti finde, al menos Carlos y Carla tamién tenían ganes de salir a estirar les pates.

Nos últimos tiempos sigo faciendo "trabayu de campu" y tuviera repasando los Techos d'Asturies mirando dellos mapes. Nesi sen, siempre acabamos garrando idegues pa salides pel monte, gracies a esti trabayu y nel intre, ví que faltábame'l techu del conceyu de Mieres por ascender, asina que tiramos hasta'l pueblu d'Uriés n'Ayer, puntu de partida de la nuesa ruta.

Salimos del pueblu ayerán d'Uriés (612 m)

Con tola calma, entamamos a caleyar dende esti guapu pueblu, magar de les 11 y media de la mañana, esperando que pasasen les lluvies que la meteo albidraba pal alborecer. D'esti xeitu, fuimos a acertar de plenu, ya que dende l'entamu la ruta, tendremos una temperatura perafayaiza, demientres ascendemos per una cómoda pista, averaos al valle la riega Uriés.

Averámonos per pista hacia'l valle Uriés p'ascender al colláu'l Cuitu Celurriu

Al altor del Prail.lón, saldrémonos per camín a la mandrecha, ascendiendo per una guapa viesca hacia'l colláu'l Cuitu Celurriu (868 m). Nesti tramu, empataremos cómodos caminos con siendes a pinchu pel monte, ya qu'alcontramos torgues en forma d'árboles vencíos pola ñevadona de les últimes selmanes.

Ascendemos poles Tercies hacia la Cul.lá Caballos (1027 m)

Travesaremos tola guapa collada, con vistes a milenta montes d'Ayer (dende'l Torres a L'Esturbín, pasando per tola cuerda L'Eyu) y ya garraremos la pista qu'empobínase dende La Collaona. Con un andar cómodu, siguimos ascendiendo hacia la Cul.lá Caballos (1027 m) parándonos un ratín nuna especie de torruxón del que nun alcontré referencia denguna per interné.

Ascemos a la Burrablanca (1154 m) monte de más altor de Mieres

Dende la Cul.lá Caballos, tendremos l'ascensu final hacia'l cumal de más altor de Mieres, la Burrablanca, la cual va ponenos les pates a la moda por mor de les cotoyes qu'engalanen tola so faldera. Nun tien mayor dificultá, qu'intentar dir pelo más llimpiu, pero como ya comenté, lo verdadéramente guapu d'esti monte ye la so situación y les vistes que nos ufrez dende los sos 1154 m d'altor.

Crestiamos hacia'l col.láu Ablanéu pasando pelos Col.laínos

Esfrutamos un bon ratín del día, echándo una güeyada a la cercana ya imponente Penamea, xustu per delantre de les Peñes Sanes del Cornión y de milenta montes de la contorna del parque de Reres. Continuaremos crestiando, pero onde más llimpiu alcontramos el camín, descendiendo pelos Col.laínos hacia'l col.láu Ablanéu, onde paramos un ratín, pa ver cual sedrá'l meyor camín pa facer otra cota importante de Mieres: El Cuetu Ventosu.

Facemos ascensión al Cuetu Ventosu (1148 m) pente'l pinar

Hai que dicir, que lo mesmu que la ñeve franció árboles, tapeciendo dellos caminos, esta mesma aplastó'l monte baxo y podemos caleyar penriba d'escayos ensin mayores problemes. Aún así, vamos a facer l'ascensión al Cuetu Ventosu entrándo-y un pelín, pela so fastera sur, aprovechando un tarrén más llimpiu del pinar que lu pobla, hasta dar colos 1148 m del so cumal, pocos metros menos que la Burrablanca.

Descenderemos hacia la Felguerosa onde garramos de nuevu bona pista del anillu ciclista

El descensu del Cuetu Ventosu, fadrémoslu tamién pela faza sur, con tendencia hacia l'Oeste, teniendo munchu curiáu coles munches trincheres que tienen estos montes, con continos cortes nel tarrén. Con pocu más, daremos cola pista que va llevanos hacia la Felguerosa, atayando per un camín más tomáu y nesti puntu, garraremos de nuevu la pista del Anillu Ciclista, perbien caltenía y continuaremos sele hacia'l soleyeru pueblu d'Uriés.

Damos vista de nuevu al pueblín d'Uriés

 

En resume, ruta cortina que malpenes llevónos 4 hores, perfeutes pa conocer nun percorríu de 10 km con 670 m de desnivel, los dos posibles montes más altos de Mieres, quedándonos cláramente cola Burrablanca como cota superior al Cuetu Ventosu.

 

Camudando'l Camín dende lo alto de Mieres