Arteos (Ayer) - Culladiella - Grandes

22 d'Avientu de 2012

Track: Arteos (Ayer) - Culladiella - Grandes

Tamos nun barriu del pueblu d'Arteos nel conceyu d'Ayer y tenemos la intención de conocer un tramín del llargu cordal de L.longalendo, que va dende'l ríu Caudal hasta topase col cordal de Navaliegu, bien lloñe del so entamu.

Nesta ruta, saldremos de Xixón, Cantarero, Raúl y yo con Kíla, la cual como siempre, pásalu pelín mal nel coche durante'l percorríu pola minera a Mieres y d'ehí hasta'l desvíu a Morea n'Ayer, onde quedamos con Pangua y el so tíu, Miguel, que debuta nuna ruta con nós.

Magar del pinchu y el café, siguimos valle alantre, pasando pelos pueblos de L'Oyanco, Misiegos y La Cortina, pa namái topános col cartelu de Piñeres, alcontranos a la manzorga con una pindia y escondida pista que xube al pueblu d'Arteos.

Partimos del barriu del Beyo n'Arteos (587 ms)

Tendremos un ratín de pista formigonada, qu'envuelta tres envuelta, fadrános visitar los llugares d'El Puiblu y Los Solares, dexando nun crucie los pueblos de los Casares a la manzorga, pa pasar pol Pandiil.lu y nel Beyo, un par d'envueltes enantes d'Arteos, tenemos bon sitiu pa dexar los coches.

Por dalgún motivu, preferimos dexar los coches equí, camentando que ya llibráremos munchu desnivel col coche y teníemos ganes de caleyar, anque si nun m'alcuerdo mal, al menos un coche pue dexase n'Arteos ensín problemes.

Tramín pente'l Beyo y Arteos

Poro, a les 10 y media de la mañana, entamamos a caleyar garrando un camín a la mandrecha que sal al pocu de la última cabaña del Beyo. Esti camín xubirá pel valle d'Arteos y pisando bones cantidaes de fueya suelto, fadrános aforrar la llarga envuelta pela que xube la pista al pueblu d'Arteos.

Esti pequeñu pueblu, tien un llavaderu, dende'l cual garraremos un camín a la manzorga qu'en pindiu xubir, va meténos pela matona d'Arteos hacia los praos del Gumial, onde toparémonos con una sebe, que faínos bordiala hacia la manzorga.

Xubimos pel Gumial hacia'l mayáu d'Espines

Magar del bordéu la muria, tocará pasar del camín más llimpiu a una sienda pente los felechos y escayos, na que xubiremos altor a pinchu, abriéndose les vistes al valle del ríu Ayer. Esta sienda va dexános nel mayáu d'Espines onde hai una bona fonte onde echar un tragu.

Mayáu d'Espines (905 ms)

Vamos caleyando con tranquilidá, el día ta preciosu y sigún ganamos altura, les vistes ábrense al Aramo y al macizu d'Ubina, si miramos pal occidente, y a los altos d'Ayer si miramos al sur, poro tenemos unes ganes increyibles de siguir xubiendo pa ganar vistes al oriente y al norte.

Vistes perguapes del macizu de Penubina

Pa ello, saldremos de la fonte pela mandrecha bordiando la sebe que pieslla ún de los guapos praos d'Espines, y esta vegada per pista xubiremos hacia'l colláu d'Espines (927 ms). Del colláu, travesaremos una viesca de pinos, que tien de llevanos a monte baxo, onde al traviés de dellos cumales, crestiaremos hacia'l nuesu oxetivu, el Picu Culladiella.

Xubiendo hacia'l Picu Culladiella

Nel nuesu caleyar hasta la Culladiella, pasaremos pel colláu Cruces, onde ya fadremos l'ascesnu final que de forma cenciella pondrános nos 1104 ms del picu, demientres podemos observar les llarguísimes aristes que van dar al picu L'Esturbín.

Nel vértice del  Picu Culladiella (1104 ms)

Inda son la una menos diez, asína que magar de picotiar dalgo siguimos camín, ya que preferimos xintar dempués del siguiente oxetivu del día, el picu Grandes. P'aportar a él, tendremos un tarrén paecíu al del colláu d'Espines al Culladiella.

Ampliamos vistes hacia altes cotes de Casu y Ayer asína como pal Aramo

La única diferencia, ye que ya tenemos práuticamente toles vistes de los cumales más altos d'Ayer, anque quiciás, el picu Torres, ye'l que tien una presencia más importante, nun soi capaz de quitar la vista del Nogales, el cual, ta siendo como una astiella clavada... con una alcordanza especial pal so collaciu, el picu L'Osu.

Avanzaremos pel cordal de L.longalendo alantre

 Aún así, tenemos unes vistes por conocer, como son tolos cumales casinos,  poro siguiremos cordal de L.longalendo alantre, baxando lo primeru hasta'l colláu y mayáu de Cabéu, el cual cruciamos la sebe, teniendo que garrar d'un brazáu a Kíla, nes dos muries.

Mayáu de Cabéu

Nun falé práuticamente de la perrina, pero ye que ye como nun llevala. Va tranquila, conociendo tolo qu'arrodia la montaña. Goliendo toles plantes que salen al pasu o deprendiendo a beber augua nos regatos qu'alcontramos. En definitiva, va conociendo hasta les sos propies posibilades, saltando penriba d'escayos y pasando pembaxo cuando-y fae falta.

Realmente, ye una más del grupu y unes vegaes va con unu, y otres al pie d'otru y pesie que tien namái 3 mesinos, préstame enforma, ver como va moviéndose con munchísima soltura pel monte.

Caleyaremoss un bon tramín hacia'l Picu Grandes

Con pocu más, qu'unos cuantos xube-baxa de cumal en cumal y de colláu en colláu, aportaremos finalmente a los 1138 ms del Picu Grandes, el cual va dános ún de les visiones más guapes de la Peña Mea, que podemos tener con una paredón occidental mui potente.

Ablucante la Peña Mea dende'l Picu Grandes (1138 ms)

Tira dalgo l'aire y per primer vegada veo a Kíla cansadina, poro vamos baxar a dalgún mayáu pa poder xintar el bocata con tranquilidá y danos un descansu a toos, ya que llevamos a lo tontu 3 hores ensín parar. Poro, unos minutos mirando pa los montes de Casu y pal Cornión qu'apaez tres d'ellos y p'abaxo.

Últimu vistazu a la valle del Ayer y los altos que lu formen

Baxaremos siguiendo la llínea del Grandes hacia'l valle d'Ayer y garrando una especie de regueru, pente les cotolles, vamos acabar sentaos col bocata y tomando'l sol, na braña de Grandes, onde aún aguántase dalguna cabaña en pie.

Baxamos hacia les brañes de Grandes

Media horina y dimponémonos a siguir camín, baxando de Grandes, siguiendo senderos pocu claros hasta ganar una pista que ya nun perderíemos nel restu de la baxada. Este llevarános, penriba los praos de Grandes, xubiendo inclusu hasta un crucie, nel que garramos otra, qu'en baxada tien de llevanos per Graméu, hasta'l mayáu de Braña. 

Tendremos un sele descensu per pista hasta Arteos

Otra pista y otra baxada, sedrá lo que caleyaremos pa pasar penriba de les Barroses, empatando ya'l tramu final hasta Arteos, al cual salimos xustu na fonte, na qu'entamamos l'ascensu hacia Espines. Dende equí, pasamos del camín de fueya y facemos la llarga envuelta de pista formigonada hasta'l coche onde damos per finalizáu esti guapu paséu per cotes de la llende d'Ayer y Mieres.

Despedímonos del Torres n'Arteos

En resume, guapa ruta con vistes mui prestoses, pol allugamientu d'esti cordal L.longalendo, que túvonos entreteníos durante casi 5 hores, faciendo un percorríu de 10 kms y superando un desnivel positivu de 820 ms.

Espero que vos prestase.... tanto como a Kíla. 

Kíla camudando'l so camín pente la fueya

Ruta na que ficimos una primer visita al cordal de L.longalendo faciendo: Picu Culladiella (1104 ms) cuarta cota de Mieres y vértice xeodésicu y el Picu Grande que ye terce cota mierense.   

Ver progresos en: Retos montañeros