Vibuli (Ponga) - Seu Vibulines - Tuba - Peña Salón - Nochendi - Toyu - Baxeñu

1 d'Avientu de 2024

Track: Víboli (Ponga) - Seu Vibolines - Tuba - Peña Salón - Nochendi - Toyu - Baxeñu

Última ruta del añu col GM Xuan de la Borrina, enantes d'una inesperada por lo rápida intervención pa operame de la cadera, que llevábame machacando dende la selmana santa del 2023, pudiendo facer nestos tiempos muncha escalada y dalgo de monte pero con dolor abondo. 

Al llunes siguiente d'esta ruta per Ponga, tenía'l preoperatoriu colo que camentaba un mes mínimu de tranquilidá hasta la operación, pero esi mesmu día ufreciérenme operame al día siguiente, asina qu'ensin pensalo demasiáu fuimos p'alantre y nel mes d'Avientu quitáramos d'enriba la operación, tando nel intre, nel procesu de rehabilitación, col envis d'intentar tornar a l'actividá pa la primavera dafechu.

 

Salimos de la redolada de Vibuli nel aparcaderu de les Mesties (715 m)

Nesti primer día d'Avientu, aportábemos cola calma a Vibuli nel conceyu de Ponga, onde ya tuviéremos va dellos años ascendiendo a Sen de los Mulos y la Pica Subes y pasáremos bien cerquina na nuesa primer ascensión a la Peña Salón, dende les cercaníes de la puente Bidosa. Esta vegada la idega yera conocer los seos de Vibulines, que daquella nun yeren tan conocíos y escapáronse a la nuesa circular.

Pa ellos, almorezareos na Huera en Cangues d'Onís, pa siguir l'escobiu los Beyos alantre, que tantes rutes diónos durante estos años que llevamos faciendo monte per Asturies y más en concreto nos conceyos d'Amieva y Ponga. Xubirmeos pela foz de los Andamios en coche, lo que ya ye toa una aventura, ablucando col llugar y les parés que cayen a dambos llaos de la foz del rigu Vibuli.

 

Caleyamos hasta Vibuli pa empobinanos hacia los seos de la peñe Vibuli

La carretera aporta a una curva pronunciada cruciando'l rigu y al pocu alcontrámonos con un ampliu aparcaderu nes Mesties, poro, camentando nun molestar a los vecinos, dexamos los coches y preparámonos pa caleyar faciendo camín hasta Vibuli, onde tendríemos tamién aparcaderu curiosu al pie de la capiya y los horros beyuscos del pueblu.

Dicho esto, saldremos pel camín d'enriba la capiya, onde al pocu alcontramos cartelu marcándonos que vamos hacia'l sedu Vibulines, poro continuamos nesa direición, siempre con vistes hacia la fastera del H.ucantu y col sen enfotáu na peñe Vibuli, onde somos a ver la trazada de los sedos, muncho más marcada dende la instalación de pasamanos de cadena.

Pasamos el primer sedu entrando nun increyible canal d'accesu al segundu sedu

Salimos entós d'una viesca mozo a la faldera de la peñe Vibuli travesando una llera pa facer cuatru envueltes n'ascensu y ya garrar el primer sedu, preciosu, anque estraprotexíu al mió entender, que sácanos a un cantu pa dar accesu a la canal más increyible que viera, en cuanto a les posibilidaes d'escalada deportiva.

El senderu atraviesa'l valle la Peñe, dando vista al segundu y más ablucante sedu, pero nun pueu más que mirar pal mediu kilómetru de paré qu'asciende hacia la Peñe Vibuli y los doscientos metros que baxarán al rigu, con toles inclinaciones de muros a lo llargu de tola canal, lo que tando a 20 minutos del pueblu, tampoco ye que seya ninguna llocura plantegase trabayar equí cola calma.

 

L'ablucante segundu sedu de Vibulines pasando per una covarata

Sicasí, tenemos enfrente'l segundu sedu, munchu más guapu entá que'l primeru, entrándo-y a la primera envuelta, con escalones de piedra (un trabayu preciosu ganaderu) faciendo una envuelta a la esquierda pa metenos nuna covacha, onde queden restos de guardar ganáu, de la que saldremos per una repisa pelín pulida, anque anguaño, cola cadenona de pasamanos, nun hai peligru dengún nel pasu estrechu, pel qu'ascenderemos hasta salir a la parte alta del sedu.

La verdá, que paezme bastante esaxerada tola instalación, pero bono, si ye pa la tranquilidá de los ganaderos paezme bien, si ye pola dominguerada que vien conocer estos sedos, alcuéntrome con que los montañeros vienen xustamente a facer estos pasos y tolos pasamanos paécenme pelín innecesarios, pero bono, vivimos nos tiempos de la "accesibilidá" pa tol mundiu.

Perpasamos los sedos p'averanos hacia'l valle y mayada de Tuba

Con un bon tastu de guapa actividá anque sobreprotexía, entramos nel valle de Tuba, onde alcontrámonos col mayáu de Tuba, pel que teníemos intención de baxar hacia Casielles, pero finalmente garramos un senderín pela parte alta del mayáu, enllazando col camín del Llaciu que vien dende Casielles y que fadrános ascender hacia la Boya La Campiella (1190 m), onde aportaría'l guapu camín n'envueltes dende'l colláu Baxeñu.

Facemos cumal sele na Peña Salón (1245 m)

Dende equí, aparte de les increyibles vistes del Cornión al oriente, ganamos, tamién, vistes de tol parque de Ponga, colos sos cimeros montes (Tiatordos, Llambria enfrente nueso, dende la fastera de Tarañes) demientres facemos los caberos metros hasta la cumera de la Peña Salón (1245 m), ún de los montes con meyores vistes de Ponga.

Baxamos del monte Solpicu hacia Ñochendi pel camín de la Pedrona

En menos de dos hores de ruta tamos ya na Peña Salón, asina que decidimos picar daqué esfrutando de les vistes, hasta qu'un vientín dalgo molestu, quítanos el calor corporal y camentamos que lo meyor ye arrancar, asina que descendemos un pelín hacia l'oriente y garramos una vallina que va llevanos hacia'l monte Solpicu, perguapa viesca de fayes y carbayos, pela que descendemos pisando la fueya hasta qu'erróneamente, garramos un camín a mediu altor, que sácanos hacia La Pedrona onde tomamos camín que vien dende Casielles hacia la collada Ñochendi.

 

Facemos camín pel monte Condares dende Ñochendi hasta'l pasu del Toyu

Esti camín, ampliu pero tomáu dalgo pela cotoya, nun ye escesívamente atrautivu, poro si repitiera esta baxada, siguiría monte abaxo pela vallina hasta dar al monte Condares, onde vien el percorríu dende Ñochendi, evitando quiciás el tramu con menos interés de la ruta. Sicasí, dende la Pedrona, dimos vista al pueblín de Biamón y siguimos a Ñochendi, pa continuar hacia'l monte Condares caleyando cola calma pel senderu hasta'l míticu pasu del Toyu.

Aportamos al Toyu onde tendremos el sedu de descensu a la fastera occidental de Peña Salón

Esti pasín ya lo conocíemos de la nuesa primer ascensión a Peña Salón, lo que nun quita que seya un pasu bien guapu, entrando a esa cuevina'l Toyu y saliendo pel sedu de secute, baxo los paredones de la Peña Salón. Paez mentira, estos senderos ganaderos que busquen la única resquiebra na peña, pa poder devolar pente fasteres d'una peña y comunicar mayaos col pueblu o facer camín pente pueblos pela distancia más curtia.

Facemos el pasu pel Toyu pa siguir hacia la faza occidental de Peña Salón

Con toles "dificultaes" de la ruta ya terminaes, descenderemos hasta una colladina con vistes hacia los pueblos de Viegu y Fanu, restolando nes distintes collaes el senderu que tien de baxanos hacia la collada Baxeñu. Esta vegada usamos la colladina más baxa siguiendo un senderín pindiu, hasta faldear tola peña Salón, teniendo tramos más y menos tomaos hasta la collada Baxeñu, onde aparte de descansar un segundu, tendremos la clásica vista al Foracáu de la peña Vibuli.

Descendemos de Baxeñu hasta Vibuli ya per camín cómodu aportando pel cementeriu

Dende equí ya tendremos un marcáu camín, pel que descenderemos n'envueltes enantes d'entrar nuna viesca pela que siguiremos camín alantre, hasta atopar una pinda envuelta qu'en descensu ya formigonáu va dexanos de primeres nel cementeriu de Vibuli, pa dempués travesar con calma tol pueblín, enantes de tornar hasta l'aparcaderu de les Mesties.

Cola ruta finalizada, sentarémonos con calma nel bancu merenderu a camudar la ropa y a despedinos del perrín vecín de Vibuli, qu'acompañónos con tola felicidá del mundiu nes 4 hores y 15 min de ruta, guiyándonos a cada ún de los 10 km de percorríu, nel que superamos un desnivel acumuláu de +/-870 m.

Hasta la prósima...

Camudando'l Camín dende Vibuli