Ponte Bidosa (Ponga) - H.ucantu

20 de Febreru de 2016

Track: Ponte Bidosa (Ponga) - H.ucantu

Cuantayá que nun quedábemos Fernan y yo pa una escapada montuna y magar de dellos cambios na mió vida, facíame falta colar de Xixón, con Kíla pa llevala de monte a ella y pa llevame a mí, y que meyor qu'en compaña de Fernan, al que tengo qu'agradecer que Kíla durmiese na so casa en Colombres..

Pa onde tirar... pues nin siquiera decidímoslo nós, ya que diba venir otru collaciu vascu, Carlos y anque finalmente nun s'animó, sí que nos dexó la ruta a facer: el H.ucantu, auténticu balcón sol escobiu de los Beyos.

Enantes, como non, teníemos per delantre un paséu en coche pola autovía'l Cantábricu y la N-625, hasta Cangues d'Onís onde quedamos p'almorzar na Huera como vien siendo davezu. Magar del cafetín, siguimos pela N-625, hasta cruciar la ponte Dobra entrando nel conceyu d'Amieva.
 

Salimos de la Ponte Bidosa (290 m) 

Dende ellí, travesaremos los pueblos de Buxil, Corigos, Pervís y La Vega Pervís pa topanos col ríu Ponga nesti casu, y siguir camín pasando per Santiyán, Precendi, Les Vegues, Campurriondi, Ceneya y Rañes, onde metémonos de llenu nel Escobiu Los Beyos.

Pocu más alantre del desvíu al pueblu d'El Beyu, toparémonos cola Ponte Bidosa, onde aparte de chigre pa les cañes postreres, tenemos el tabayón d'Aguasalíu y un bon aparcaderu pa dexar los coches.

Preparámonos con calma, demientres echamos un vistazu a los milenta cables que crucien la vista hacia'l tabayón d'Aguasalíu. Nun me presten res les ferrates y nesti casu, aféase una vista perguapa del saltu d'agua, pero bono paez ser que pa unes coses dexen facer esta aberracion y pa otres...  nun se pueden descender barrancos... pena de País.

Pasamos per Robriellos al traviés d'increyibles siendes colgaes so los Beyos

Pues pente'l cableáu y el bon montaxe d'estructures, con rocódromu y too, too seya dicho, saldremos pel antiguu camín d'accesu al pueblu esaniciáu de Robriellos (Toponimia oficial) o Rubiellos (sigún les informaciones del últimu habitante) el cual alcontrámonos llimpiu y curiosu, a la escontra de les cabañes de Rubiellos quedando a la vista un únicu horru beyuscu en bon estáu.

Demientres díbemos en coche acolumbrábemos cotes perbaxes con ñeve y a la nuesa espalda, el Picu Carriá, fué la nuesa guía pa saber si podríemos tener ésitu o non nesta ascensión. Pel momentu, de Robriellos siguimos n'ascensu viéndose'l siguiente finxu nel camín, el colláu Cocoba.

Dende Cocoba (750 m aprox) tocará descender un pelín baxo los paredones de L'Impuevu, pa cruciar penriba la canal de la riega Llaganozos, onde magar perpasala alcontrarémonos coles primeres ñeves, quiciás enantes de lo deseyáu.

Pasaremos pelos collaos de Cocoba (740 m) y L'Estosu (897 m) col aumentu de la ñeve

Tamos enmediu d'una viesca y la ñeve nun dile, tando fonda y húmeda, poro lo meyor ye ponese les poláines porque tenemos trabayu dende los 800 m hasta los 1400 del H.ucantu. Preparaos, siguimos la sienda n'ascensu pente la viesca hasta otru impresionante colláu, el de L'Estosu, onde les vistes hacia los Beyos amuésense en tola so plenitú.

En L'Estosu, al par d'una cabaña esbarrumbada, entama'l festival de cumales, anque pel momentu destacaremos los más baxos como Peña Salón, penriba del pueblu de Biamón o la Pica Subes y Sen de los Mulos al otru llau de la foz d'El Cándanu.

Anque nun mos demos cuenta, dicir qu'estes siendes van colgaes so los parés que cayen hacia'l Seya, pero cuando vamos notar enforma esti xeitu, ye na travesía del Derrabáu, pente los collaos de L'Estosu y del Derrabáu.

Siguimos abriendo buelga con curiáu pol tarrén pindiu hasta'l Derrabáu (1170 m)

Dicir, qu'en tola travesía, siempre abriendo una buelga fonda na ñeve, fuimos sollertes al estáu d'esta, ya qu'atopamos ábanos continos y sobretou a metá de traviesa, onde na semeya podemos agüeyar como un d'ellos esnaló hacia'l vacíu derrabando (toponimia acertadísima) penriba la llarga yerba.

Lllueu de trespasar el tramu de yerba tumbada y resbariosa, metímonos de nuevu nuna bona capa de ñeve, qu'anque con dalguna frañida tenía la suficiente consistencia pa dexanos aportar ensin mayores problemes hasta los 1170 m del colláu del Derrabáu.

Dalgo más de dos hores y media en facer casi mil metros de desnivel con 400 pela ñeve, amuésanos que nun tamos en mal estáu de forma, eso Fernan y yo, Kíla ye d'otru planeta y xubió, baxó, travesó pela ñeve como quiso hasta detrás de dellos robezos.

Les vistes nel Derrabáu son ablucantes ensín más... máxicu llugar

Paramos 10 minutinos a garrar aliendu y echar crema pal sol, porque taremos en Febreru, pero n'altor pica de coyones, Como non, nesti tiempu, qudamos embobaos cola presencia del Niah.u, al fondo los Beyos, col Frailón, Las Monxinas y demás cumales non conocíos, que cayen a pinchu dende la fastera de la Porra Valdepinu en canales perpindies.

Nel tiempu que tuviemos descansando, hasta en 5 ocasiones oyimos un ábanu cayer pa esta fastera vertical de los Beyos y espertamos del sueñu, convidándonos el más fuerte d'ellos, a salir cagando virutes hacia'l cumal del H.ucantu.

Tan sólo teniemos 200 m de desnivel, pero la ñeve tresformóse col calor y aparte de peligroso, taba blando, teniendo qu'escoyer cada pasu, trepada o travesía que decidíamos facer con curiáu. En total, tendríemos unos 3 o 4 enterraes hasta'l cadril, pero fuimos llibrando pali pali, hasta topar el puntu feble de la cornisa cimera del H.ucantu.

Una güeyada al trazáu p'aportar al H.ucantu y con xeitu p'arriba

Lo dicho, 50 minutazos pa facer esti tramu d'ascensu al H.ucantu, teniendo que lluchalo y bien, pero asina supo muncho meyor, esi tastu a sudu, nesti casu amestáu a la crema'l sol, lo cual dame un ascu de la hostia... pero con tastu a esfuerzu y sudu al final.

Nun ye'l mayor cumal d'esta fastera, nin muncho menos, ya que tres de nós, tenemos la Porra Valdepinu y más atrás el Cantu Cabroneru pero bono, yera'l nuesu oxetivu, por vistes pa los Beyos y sobretou pa los montes de Ponga y Reres al frente, destacando La Llambria, La Becerrera, Tiatordos, Maciédome, Zorru....

Cumal del H.ucantu (1387 m) col Valdepinu detrás

Nun pueu quedar ensín comentar qu'esta ruta descubrímosla como munches otres, gracies al blogueru Cienfuegos, gran referente del montañismu asturianu y que siempre amuésanos dalguna ayalguina d'esti estilu con siendes perdíes y cumales que nun llamen tanto l'atención pero que tienen más puxu qu'otros montes más altos.

Magar de tar 45 minutos de xinta, descansu, seque de calcetos y de pies por nun trayer les botes de ñeve, decidimos descender a la fastera contraria, averándonos primeru hacia'l cumal de la Cabritera, anque a metá camín entamaremos el descensu hacia'l valle formáu pela riega Gioves o Gubies.

Nun falaré muncho d'esti topónimu, ya que traxo un guapu alderique nun grupu de facebook, friki y llingüista, pero lo más interesante fué l'apaición nun testu antiguu d'un viaxe d'un inglés Joseph Townsed pel monte Gubies na fastera del Arcellanu, yendo otres teoríes tamién hacia'l términu Llueva, llugar onde almacénase agua.

Descendemos a la mah.ada Xioves pel valle estráu de ñeve pero faciéndose bona buelga

El casu ye que la Gi d'aniciu dexábanos a toos un pelín confusos nel términu toponímicu, anque nel términu montañeru, a Fernan y a mí, costónos bien pocu decidir el camín, too tiesu hacia la cabaña de Gioves (Gubies) magar de facer unes "bolines" de ñeve na baxada.

Enmediu'l valle, siguiremos descendiendo a bon ritmu, anque con una pala de ñeve perfonda, faise duru siguir abriendo buelga y siemrpe diremos a la manzorga de la riega, la cual nos cruciamos hasta la mecedura cola riega de Lloés.

Llueu pasaremos pel H.orcáu la Villa, pente la Coroña'l Cuetu y el Xerrón d'Argüeru, onde topámonos con dellos caballos, que deciden siguinos pente los carrascos hasta que topámonos cola llende que diz qu'ellos nun deben siguir y nós debemos tiranos a lo xole hacia la riega L'Asprón.

Pasamos pel H.orcáu La Villa pa baxar hacia L'Asprón y aportar a Ribéi

Si digo qu'esta baxada con ñeve ye la mayor dificultá teúnica de la ruta debéis creyeme, ya que nun alcontramos llugar cenciellu pa ello y hai que dir con munchu curiáu p'aportar a la vera la riega L'Asprón, que pocu más alantre xuntarase cola de Lloés formando la de Reonda que baxará pela canal del Saltu la Lloba, conocida por barranquistes.

Dempués de dame un fostión finu destrepando d'una peña, na que resbarié cayendo de pié na ñeve con una bona arrastrada, siguimos a cruciar L'Asprón enantes de que se faiga un barrancu y xubiremos hacia una solitaria cabaña.

Detrás de la guapa cabaña, hai un crestón que nos separa de la mayada de Baenu, pero tien cortaos per tolos llaos menos xustu, na vertical de la cabaña onde tenemos la muezca típica per onde pasa'l senderu al otru llau del crestón.

Travesaremos Baenu hacia'l sedu La Cruz del Picu onde vemos a lo baxo El Beyu

Dende equí, ya tendremos vía llibre hacia les numeroses cabañes de Baenu, alcontrándoles toes elles en perbon estáu, nótase que dende Amieva hai bona pista hasta esta enorme mayada.Siguiremos faciendo camín pente la ñeve, tarreciéndola ya a estes altures de ruta... dalgo más de 6 hores.

Ensin más, abandonaremos Baenu y dexaremos nun cruce, onde la pista asciende hacia la collada d'Ordés, un senderín que baxa hacia los cortaos so la canal del Saltu la Lloba, siendo esti senderu el Sedu de la Cruz del Picu.

Descendemos tol sedu hasta aportar a una solitaria cabaña nel final del Saltu la Lloba

Paez increyible, pero entama con unes envueltes bien armaes y llueu tendremos un sele descensu en diagonal pembaxo de los parés del Cuetu del H.o, pa magar de cruciar un pedreru, baxar en más envueltes pel Argayu d'Entecueva hasta topanos con un llugar máxicu, al qu'aporten les agües de la riega Reonda.

Esta riega como ya dixe baxa pela canal del Saltu la Lloba, sumiéndose tamién en dalgún llugar p'apaecer nel tabayón d'Aguasalíu. Esti cayida ya la conocemos toos, pero menos xente conoz un pequeñu saltu pero preciosu al llau d'esta cabaña, onde tendremos una ponte pa cruciar la Reonda.

Ayalga final na baxada hasta la carretera... ablucante

Si nun fuera polo fría que tará, bien apetecía dase un bañu nes sos agües, pero siguimos alantre descendiendo per un guapu senderu que pasa primeru per una h.orcadina y llueu intérnase nuna viesca dende la que debemos tener curiáu coles piedres ya que podemos tirales dafechu na carretera.

Llueu de tocar asfasltu tendremos de caleyar dende la Ponte Rilluengu hasta Bidosa, dalgo menos d'un kilometrín pa completar los 10 km de ruta, que nun son munchos pero ye polo vertical del tarrén ya que superamos un desnivel acumuláu de 1480 nun total de 7 h y 50 minutos.

Que vos preste.... ruta más completa imposible.

Camudando'l Camín nos Beyos