Aguamía (Llanes) - Costa de Llanes - Cuevas (Llanes)

5 de Marzu de 2016

Track: Aguamía (Llanes) - Costa de Llanes - Cuevas (Llanes)

Finde completísimu ya que teníemos la visita de los collacios vascos col envís de ver el partíu futbol pente l'Sporting y l'Athletic. Aparte, teníemos ruta col GM Xuan de la Borrina, pero'l tiempu yera perinestable pa intentar dalguna ruta nin tan siquiera alternativa a les de calendariu.

Asína que xuntámonos Bittor, Fernan, Ana, Benjamín y yo, con ganes d'aprovechar lo que se pudiera de la mañana y picar dalgo per Llanes. Pa ello, averámonos hasta Nueva onde almorzamos y fuimos dexar un coche hasta San Antolín, dexando otru más en Nueva por si les mosques.

Partimos penriba del Ríu Mía (18 m)

Col que nos quedaba, metímonos los 6 (Kíla cuenta que ye grande abondo, jeje) nel coche restante, garrando la N-634 desviándonos hacia La Pesa, pasando por Garaña y Llames, hasta dexar el coche nel caleyu d'accesu a la sablera d'Aguamía.

Dicir qu'esti ye un topónimu reventáu cláramente pel IGN y qu'esperemos recupérese como ta mandáu. Comentar tamién, qu'Aguamía ye quiciás la forma más usada en tierres ribeseyanes y llanisques, pero que fálase tamién de Ríu Mía pa Llanes y de L'Aguadamía pa Ribeseya.

Ablucante actividá nos bufones y nel Pozu las Grayas

El casu ye que nun fuímos los únicos que camentamos la furia del mar, poro tábemos bien de xente, dellos asturianos y munchos vascos per entes los bufones. El día taba perfeutu pa ello y por suerte, les ñubes yeren dalgo pasaxeres pela costa dexándonos momentos d'orbayu, sol ya inclusu xarazos.

Hai que dicir que tardamos media hora pa facer un kilómetru dende los bufones d'Aguamía hasta'l Pozu Las Grayas, lo qu'amuesa claramente les nueses intenciones de sacar semeyes y esfrutar de cada furacu na caliza pel que salía espluma, bufíos o agua la mar enforma.

Siguimos avanzando hacia la Punta Espines

Siguimos caleyando nesti casu hasta'l tramu de la Punta Espines, muncho más apriesa que l'anterior, desviándonos magar d'un gran bufón, hacia la rasa caleyando pel Camín d'Espines enantes de tornar a la costa al altor d'esta punta.

D'Espines siguiremos hacia'l Pandu, onde tendremos la suerte de sacar les meyores semeyes, ya que los cantiles yeren azotaos con fuercia descomanada, alcontrándonos con foles que superaben los 5 ms penriba'l cantil al españar.... ablucante.

Averámonos a los cantiles del Pandu onde les foles ruempen con furia xabaz

El día siguía aguantando, pero nun sabíemos entá per cuantu tiempu sedría, asina qu'apuramos el pasu pasando al llau del estrañu canal que ye la playa de Villanueva, averándonos llueu a los dominios de la Playa Cuevas, onde les miraes escapábense a la fastera de la ermita de San Antoniu, con constantes embestíes de la mar, xubiendo la espluma pelos bufones y penriba los cantiles.

Magar del espeutáculu, aportamos a la parte alta de Cuevas, onde los senderos enguedéyense un pocu y la broza y cotolla baxa, toma los senderos y domina a la caliza d'anteriores tramos. Paga la pena aportar hasta la punta pa ver como la mar entra en Cuevas, pero'l día déxase d'amenaces y entama a xarabatiar, asína que toca bregar pente les cotolles y baxar a Cuevas.

Esfrutamos de les vistes de San Antoniu enantes de baxar a Cuevas

Pa ello, pasaremos penriba'l cantil con vistes a los ivernaderos de cultivos marítimos, que paez ser nun furrula ya como too nesti país. Llueu de perpasar l'últimu invernaderu, el cantil pierde altor y alcontraremos una escalerina pela que descender xustamente hasta la puente que danos pasu hasta la carretera que lleva a Cuevas.

Ellí quedamos acoyonaos cola entrada de la mar na sablera. Paez talamente que va venir un tsunami y arrasar con tou, pero non... queda en na, españa contra los cantiles de los llaos y l'agua aporta sele hasta la oriella... increyible llugar esta Playa Cuevas.

En resume... moyaos, aportaremos a Nueva, pero cola allegría d'una mañana bien aprovechada nes casi 3 hores de camín, nos que percorrimos 6,5 km y superamos un desnivel xabaz de 100 m jeje... pero lo imporante yera alloquecer cola fuercia de la mar... un regalu pa los sentíos.

Ta la próxima...

Camudando'l Camín na Playa Cuevas