13 de Xunetu de 2021
Track: Tarna (Casu) - Vega Baxu - Altu Ponga - Solafoz - Abiegos (Ponga)
Ún día más, continuamos na Travesera Casina-Pongueta de 2020-2021 quedando namái qu'Alberto y yo, pa terminar estos cuatru díes de patéu, dando final de nuevu en Bezanes. Magar del día anterior, nel que tuvimos qu'abortar pola meteo planes d'ascensión a la peñe Maciédome, quedándonos col maraviyosu descubrimientu de la fastera del valle Corralín y Solafoz.
Llevamos tres díes sofriendo l'abondosa vexetación astur, d'esti branu primaveral de lluvies y sol, poro tenemos claru, que nun podemos facer lo que teníemos en mente, sobretou, dempués del día anterior cola moyadura que pillamos.
Partimos d'Abiegos (516 m) con un día pelín murniu
D'esti xeitu, pelín cansaos de padecer nesta travesera, miramos mapa y decidimos dar la vuelta al Picu Tiatordos y continuar hacia Bezanes (Casu), ascendiendo cualesquier otru monte como la Becerrera, la Llambria o el Picu Cornielles.
Pa ello, salimos d'Abiegos en direición Tanda col envís d'empobinanos
hacia Taranes y xubir pela foz de la Escalada, pero topámonos con unos
cartelos qu'indiquen Tiatordos y por conocer per onde nos manda, los
siguimos viendo pocu a pocu como van llevándonos hacia Llames.
Entamamos camín hacia Tanda decidiendo camudar hacia Brañadosu
Aportaremos pues, a la base de la copa del Tiatordos en Llames y vemos un mantu verde, enllenu felechos, que tapiza'l nuesu primer plan. Anque ya lo descartáremos por tar moyáu'l paré de la Peña Suanciu, alegrámonos de nun tener que pasar per ehí y decidimos ya continuar hacia Pandellanza, dándo-y la vuelta a les Ñarices de Malhome, como ya ficiéramos na circular al Tiatordos dende Tarañes.
La vexetación nos funde per Brañadosu garrando una pingadura infame
Vamos pelín en mou trail, sólo caleyamos, moyándonos pembaxo, cola vexetación que lléganos hasta la cintura en dalgún puntu y penriba, ya que'l ñuberu tien a bien, echános un pocu d'agua más y facenos aportar a Pandellanza con una moyadura de llibru.
Continuamos dándo-y la vuelta al Tiatordos hasta la fonte Xerús onde descansamos
Desesperaos cola meteo, empatamos camín en Pandellanza cola mítica travesía Maciédome-Tiatordos aportando a la fonte Xerús, onde sentámonos a xintar, magar de 4 hores de bregada infame con felechos, ortigues y escayos. Les pates, nun son a contemplar un arañazu más, nin una ortigada y decidimos abortar cualesquier intentu d'encumar un monte.
El día dános un pelín de tregua cuando aportamos a la Mayá Tiatordos
La travesía que tamos faciendo, paga la pena por si mesma, anque nun vayamos del meyor humor posible. Aún así, esfrutamos un pocu de dalgún rayín de sol y de les vistes pente les ñubes de tola bayura de montes que tenemos na redolada.
Los nuesos pasos, llevaránmos dende Xerús hasta la Mayá Tiatordos pa continuar per bon senderu hasta la guapa mayada de Piedrafita, un mirador preciosu, dende'l que descenderemos baxo los parés calizos de la Carasca hacia'l colláu d'El Xuacu.
Pasaremos per Piedrafita en direición al colláu El Xuacu
Nel Xuacu, garraremos pista y mirando mapes del GPS trazaremos el nuesu descensu, hasta Capiella onde podríemos descender per pista hasta cerca de La Foz. Nós, vemos un senderín que sal tres d'una cabaña y llévanos perfeutamente hasta La Collada, onde tendremos descensu direutu hacia Bezanes.
Aventuramos descensu del Xuacu hacia Bezanes pela Collada
En la Collada hai qu'andar sollertes, ya que tendremos que garrar un camín pente urcies que xube un pelín nun primer tramu pa travesar el monte, teniendo como referencies les torretes lléutriques hasta'l Rebollar onde tendremos que travesar la xoven viesca, aportando a tramu más abiertu en Cueva Panes.
Bregamos un pelín y descendemos a Bezanes per Cueva Panes
Nesti tramu final, tocó un pelín bregar, anque de xuru que yendo finu, alcuéntrase camín cenciello, pero bono ye lo que toca, cuando vas penriba'l mapa y trazando camín so la marcha. A la fín, aportábemos a los caminos que vienen dende'l Cotu Anciu y damos coles nueses magullaes pates en Bezanes dempués de casi 8 hores de travesía pente Abiegos en Ponga y Bezanes en Casu.
En resume, terminábemos esta dura travesera, nel que la meteo y l'estáu tomáu del monte fué minándonos y faciéndonos camudar de planes contínuamente. De regalín, los 19 km d'esta última estaya con 1225 m de desnivel positivu y 1100 de negativu ya fué la guinda final.
Camudando'l Camín en Bezanes
No hay comentarios:
Publicar un comentario