Bezanes (Casu) - Monasteriu - Brañagallones (Casu)

10 de Xunetu de 2021

Track: Bezanes (Casu) - Monasteriu - Brañagallones (Casu)

Travesera, esa pallabra que resuena nes cabeces de los corredores pel monte y tamién nes de los miembros del GM Xuan de la Borrina, por mor, de les milenta aventures y grandes xataes que nos pegamos durante 4 díes per Picos d'Europa o pero onde decidamos esi añu.

Esta vegada, dempués de facer la ruta pela contorna de la Xerra de Brañapiñueli, gustárame tanto'l trazáu del rigu Monasteriu, que paecióme interesante repetir la ruta, terminando a dormir en Brañagallones, ya que nunca lo ficiéramos como grupu enantes.

Partimos de Bezanes (634 m) nun día ablucante

D'esti xeitu, saldríemos pelin enantes de les 10 de la mañana del aparcaderu de Bezanes, magar de facer dalgún tresvase de coches qu'otru pa posibles escapatories. El nuesu caleyar, llevarános per Sobrecastiellu, penriba la carretera, teniendo incluso que caminar dellos metros per ella, pa garrar otru camín que ya sí empobínanos pela Llana Pandu hasta la Corona, onde empatamos cola pista davezu que vien dende Belerda.

Calecemos les pates per camín y carretera hasta la Corona

Fadremos camín hasta la Gobia, onde tomamos el desvíu hacia Llin de la Gobia, llugar nel que cruciamos la riega Vallines, nel nuesu empobine hacia'l valle Monasteriu. Nel intre, ya golíemos, que la vexetación taba en plenu espoxigue, llibrando como podíemos les ortigues y felechos, col envís de nun topar demasiaes cabarres.

Entamamos a tener guapes vistes del Cantu L'Osu a un llau y Tiatordos y Les Príes al otru

 

Pasaremos per Llucencia, averándonos al valle Monasteriu nel mayáu de Trapa, onde les vistes de la  Peña Les Príes, el Tiatordos o la Peñe Maciéndome son de primer orde. Nesti puntu, entamó lo que diba ser un auténticu infiernu de vexetación, teniendo presente qu'a finales d'Abril pasáremos per equí como si nada, esta vegada un mundu de felechos de casi dos metros, diben facenos el camín perdifícil.

Bregamos como nunca pa pasar per Xabugu

 

Saldremos d'esti tramín de Xabugu, pa descansar un pocu les piernes nun hombrín, enantes de siguir camín, bregando pente cotoyes y felechos, hasta aportar a un bebederu, onde alcontramos el tramu, nel que perdiéramos camín na primavera. Esta vegada, yendo sobre avisu, nun ye que perdiéramos camin, ye que nun veíemos nin por onde pisábamos, costándonos una barbaridá aportar al tramu de cuarcita baxo los crestones que baxen de la Peña Brenosa.

El tramu más feu de tol camín tórnase'l más guapu pasando d'hombru n'hombru de cuarcita

Perpasamos el tramu de cuarcita, esfrutando de les vistes hacia la viesca de Reres, na redolada de Brañagallones, asina como albidramos lo lloñe que ta la Peña'l Vientu, que yera l'oxetivu del día. Intento facer continuar al grupu, pero'l calor y les continues bregaes, van metiéndome na tiesta que la ruta que tenía plantegada, raspia lo imposible a estos altores del día.

Continuamos hacia'l Collaín de los Madreñeros

Metémonos de nuevu, en plena viesca, alternando tramos más llimpios baxo los árboles, con bregaes per felechos, cotoyes y dalguna ortiga que lleva la rabia interna a base de bastonazos. Aportaremos al collaín de los Madreñeros, sabiendo que "tan sólo" quédanos la baxada hacia'l rigu Monasteriu y ellí veremos que facer según el tiempu que nos queda de lluz y sobretou p'aportar al refuxu a tiempu de duchanos y cenar.

Alcontrámonos con un mar d'ortigues y felechos na baxada al rigu Monasteriu

Entamamos la baxada y les cares de Simón y mía, que ya pasáremos per equí, dos meses enantes, son de risa nerviosa. Vemos un mar de felechos, escayos y ortigues, nuna vallina pela que se baxaba con total tranquilida. Definitívamente, pocu más podemos facer, que metenos a bregar a base de bastonazos y pisar tola broza que tenemos per delantre.

Aportamos al rigu Monasteriu onde refrescamos les pates y alliviamos el picor

La verdá ye que vos animo a visitar l'anterior entrada del valle Monasteriu, porque del Collaín de los Madreñeros al rigu Monasteriu, tardamos una hora pa facer un 1km, lo que fue mui desesperante y pa cuando aportamos al rigu, la belleza del llugar y meter les piernes a remoyar, ye l'únicu alliviu mental y físicu que necesitábemos.

Tocamos a retirada hacia Brañagallones pela viesca de Reres

Personalmente, guiar a un grupu numerosu per estes siendes, col camín tomáu y siendo un continuu bregar, ortigase y escayase, dempués de preparar con ciñu la ruta, imaxinándola, trazándola nos mapes y teniendo qu'abandonar tol grupu na primer escapatoria hacia Brañagallones, fue cuanto menos desilusionante.

Sele y llimpiu caminar hacia Brañagallones

Tardar en facer, casi un mesmu percorríu, 2 hores y 45 minutos más que dos meses enantes (de 4 a casi 7 hores), diz muncho de que nos alcontramos nel camín y lo que sufrimos p'aportar al rigu Monasteriu. Nun qudaba otra que relaxase, comer y garrar el camin primeru y pista dempués, que travesando tola viesca de Reres diba llevanos hacia Brañagallones.

Dicir, que nun lo conociera y prestóme, siendo al menos un relax mental, caleyar per amplia pista, baxo una viesca de cuentu mientres camentaba, que tocaba volver per esta fastera pa conocer el restu del trazáu que tenía preparáu. El grupu propón y el monte dispón, poro quedámonos con 16 km de percorríu en dalgo menos de 9 hores de camín con un desnivel acumuláu de 1125 m, muncho menos de lo que tenía nel maxín pa los aventureros.

 

Camudando'l Camín en Brañagallones