Belerda (Casu) - Monasteriu - Campiza - La Roza - Canalina - La Cabritera - Vallines

25 d'Abril de 2021

Track: Belerda (Casu) - Monasteriu - Campiza - La Roza - Canalina - La Cabritera - Vallines

Ruta que sacamos del bolsiellu de les pendientes, ya que tenía bien de ganes de conocer esta fastera del monte de Reres, dende cuantayá. Quiciábes, dende que tuviéremos faciendo una guapa ivernal al Visu La Grande ya viéramos a la baxada esos paredones de la xerra de Brañapiñueli, quedándonos pelin ablucaos polo vertical del xerrón pela so fastera norte.

D'esti xeitu, arrimámonos hasta Casu, parando como non, nel balcón de Redes en Rusecu a echar un cafetín, pa continuar hasta'l pueblu de Belerda, onde preparámonos pa entamar a patiar. Tamos cola mosca tres la oreya, por mor de les previsiones tormentoses pa la tarde y pola llargura la ruta.

Partimos de Belerda (655 m)

Salimos pueblu alantre, pa bien ceo, garrar una pista formigonada que nuna envuelta nos fai salir penriba'l pueblu, pa siempre nun pindiu ascensu, pasar peles cabañes del Pozobal primeru y La Corona dempués, hasta aportar a la Gobia, onde aparte de tener les primeres vistes del Cantu L'Osu y la pista que xube a Brañagallones, tenemos el nuesu desvíu hacia'l valle'l Monasteriu.

Ascendemos per pista hacia la Gobia pa salir hacia'l valle del rigu Monasteriu

 

Darréu, garraremos bon camín qu'en descensu tien de dir averándonos a la riega Vallines, la cúal cruciaremos en Llin de la Gobia, nun llugar que yera l'antesala a lo que nos diba esperar na ruta. Al otru llau de la riega Vallines, salimos de nuevu n'ascensu pasando pela Llucencia, entamando lo que sería un continuu de dir algamando colláu tras colláu travesando tola faldera de la xerra Brañapiñueli.

 Algamando vistes hacia los montes de Casu demientres faldiamos Brañapiñueli

 

Pasaremos pela Trapa, un mayáu con cabaña que danos vistes hacia cumales perconocíos por nós, como la Peña Les Príes, el Tiatordos o la Peñe Maciéndome. Continuarémos faldiando, pasando per un tramu pelín tomáu, pa tener que ñavegar intentando nun perder les siendes en Xabugu, anque con tomar la referencia de pasu nel siguiente hombru, vamos avanzando estupéndamente.

Tramu abegosu per Xabugu hacia los crestones cuarcíticos de Brañapiñueli

Vamos alloriando, con sólo pensar en caleyar pela pista de Brañagallones enfrente nueso y perder esta auténtica maraviya que tamos conociendo. Escaeceremos un pocu esos camientos y tamién les viesques, pa entrar nun tramu de cuarcita, que percorreremos pente vaporazu de calor y refresquín del vientu, sigún vamos avanzando de forcada en forcada.

Tramu escolingáu sol rigu Monasteriu hacia'l collaín de los Madreñeros

Lloñe de ser menos vistosu, tamos travesando monte baxo, pero nun camín escolingáu penriba'l rigu Monasteriu, oyendo a lo baxo, la fuercia con que baxa albidrando llugares d'increyible guapura nel so cursu. Por suerte, el camín faldiará baxo les canales que baxen dende Brañapiñueli, hasta arribar al colláin de los Madreñeros un increyible mirador sol monte de Reres.

Baxamos al rigu Monasteriu formáu pela mecedura de varies riegues en Cuefoz

Les vistes dende equí son p'alloriar, con cumales de la guapura de la Peña'l Vientu y el Cascayón, Les Rapaínes o más a la manzorga la xerra de Príes, pero quedámonos cola mecedura les riegues de la Campiza y Valdebezón que formen el Monasteriu, llugar al que baxamos decidíos y nun mos defrauda n'absoluto, decidiendo que ye'l requexu perfeutu pa xintar daqué y descansar de les 4 hores de ruta.

Continuamos ascendiendo pel valle de la riega Campiza

Nel intre, llevamos 4 hores de puru disfrute, de caminos d'esos que nos presten pola vida, escondíos, hacia llugares escaecíos nel tiempu, como amuésanos la ponte que crucia la riega la Campiza, pa siguir hacia Brañagallones o Mericurria. Menos mal que nun tenemos qu'usalu y vamos siguir el so cursu pela mandrecha, topándonos con una bayura de pequeños tabayones y pasos de gran belleza, asina como restos de senderu pelín altu sola riega.

Vamos saliendo de la Campiza hacia la braña La Roza

 

Nun puntu, decidimos cruciar la riega la Campiza col envís de travesar una enmarañada viesca hacia la enorme braña La Roza. La meteo, paez que va castiganos, tornándose'l ñublu'l protagonista nel restu'l día. Pel momentu, nun amenaza serio, pero diznos que nun paga la pena continuar hacia los xerros de Brañapiñueli, tomando como retirada una victoria segura.

Continuamos bon camín hacia'l colláu La Canalina

Esfrutaremos un pelín más cruciando la mayá la Roza, con munches cabañes nun estáu llamentable, camentando qu'antaño debía ser un llugar enllenu vida na dómina braniega. Ensin más, toca siguir ascensu, desdexando la parte alta de Brañapiñueli pa otra ocasión y empobinándonos hacia'l colláu la Canalina.

Travesamos hacia la collada Atambu pa baxar a la mayada Cabritera

Nesti colláu, alcontrámonos con una enorme pista que sigue hacia'l llagu Ubales, bordiando tola xerra'l Corteguerón que vendría dende'l pueblu de la Felguerina. Nós, al altor del cartelu indicativu, tenemos qu'agüeyar un senderín que va cortar un xerru calizu y que va llevanos a travesar diréutamente hasta la collada Atambos, na qu'algamaremos la increyible vista del mayáu la Cabritera baxo les brutales muries de la peña Brañapiñueli.

Entamamos guapa baxadina pela Cabritera hacia les Vallines

Pesie al picor de cabalgar esos crestones, que me produz la so visión, sabemos que nun debemos perder tiempu y tendremos que dexalo pa meyor ocasión, poro descendemos hacia'l mayáu la Cabritera, otru d'esos llugares con cierta fuercia, baxo los desplomaos parés de Brañapiñueli y continuaremos un guapu descensu pegaínos a la riega Les Vallines.

Empataremos per cómoda pista peles Vallines hacia'l camín a Belerda

Nel Gavilán, echaremos vista atrás, teniendo presente lo guapo de la baxada y garramos pista cómoda, que nos fadrá pasar al llau de les cabañes de Vallines, Roces, Porciles, Ducentes, Bories y Tabláu, onde pocu más alantre enllazamos cola pista pela que xubiéramos va delles hores.

 

Al pocu de dexar atrás el desvíu hacia'l rigu Monasteriu, oyemos una truena na fastera de Pendones y la ñube avanzando amenazante hacia nós. Simón y yo, que díbemos charrando sobre vieyos tiempos y futures rutes, entamamos a correr dexándonos cayer pela pista, alcanzando al restu del grupu y baxando toos a Belerda a fueu, ante la xarazada que cayó 5 minutos dempués d'aportar a la furgo.

En resume, ruta imprescindible pa conocer esta fastera central y menos conocida del parque de Reres, la cual nos tuvo esfrutando durante 9 hores de llugares perguapos, nun percorríu de 23 km con un desnivel positivu acumuláu de 1465 m.

Camudando'l Camín pelos montes de Reres