miércoles, 14 de agosto de 2019

Caliao (Casu) - Los Arrúos - Picu Corteguerón - Les Campes

31 Marzu de 2019

Track: Caliao (Casu) - Los Arruos - Picu Corteguerón - Braña Vieya


De los grandes montes del parque natural de Reres, pocos me quedaben por encumar y a dicir verdá, tan sólo, paezme que'l Picu Corteguerón resistíase a les munches rutes que tenemos feches pelos conceyos de Casu y Sobrescobiu. Pa facelu, averarémonos al pueblu casín de Caliao (680 m), pel camín davezu saliendo de Xixón pela autovía minera y a l'altura de Llangréu, tomaremos el corredor del Nalón que traviesa los conceyos de Llangréu, Samartín del Rei Aurelio y Sobrescobiu.

Magar del cafetín y pinchu tortiella nel chigre de Rusecu, garraremos namái pasar el banzáu de Tañes, la carretera que nos empobinará a Caliao dempués de cruciar los pueblos de Coballes y La Encruceyada. L'aparcaderu de la ermita de San Antonio, sedrá'l nuesu llugar de salida pa empobinanos hacia'l más que míticu desfiladeru de los Arrúos.

Partimos del perguapu pueblu de Caliao (680 m)

A les 9 la mañana y con un día soleyeru anque dalgo frío, vamos salir cola calma, pa dir caleciendo pates pela pista que tantes vegaes percorrimos, hasta en carrera a la Cabeza L'Arcu, anque si tuviera que quedame con dalgún de los paseos per esti guapu paisaxe de rigu, vegues y pontes, sedría l'ascensión al picu Retriñón.

Facemos el míticu tramu de los Arruos hasta la Fontona

Naquella llarga xornada conociéramos llugares bien guapos, camudando esta vegada'l valle la Robre pol de Roxecu, pel qu'esfrutaremos de caleyar per una ablucante viesca hasta la mayada Roxecu onde les vistes ábrense, faciéndonos alcordanos que quiciábes tenemos pendiente tamién una ascensión al picu Torres dende esta fastera, conociendo quiciás los valles de L'Acebal o la Escosura.

Siguimos pel Valle Roxecu onde la viesca y les vistes son ablucantes

El verde y marrón camín de la yerba y la fueya, va dir pali, pali sigún vamos avanzando, camudándose pel blancu de la ñeve, la cual alcontraremos ya con cierta continuidá na fastera de los Moyones, pocu dempués d'un merecíu descansu nel mayéu de Llede, cola visión de tol cordal dende'l Torres, pasando pel Valmartín hasta l'Entrepicos que ficiéramos nuna de les xornaes de monte con pior tiempu que recuerdo.

Siguimos avanzando per Llede y los Moyones hacia'l colláu Ubales

Güei, nel intre, paez que diba aguantando pero unes ñubes prietes van dominando los cielos y nel nuesu caleyar baxo'l Picu Cascayón, de camín hacia'l colláu Ubales (1706 m), el ñublu acaba por metese dexándonos con unes vistes del restu del parque de Reres pelín probes, pa magar d'un esfuerzu de 4 hores y media.

Garramos la Xerra Cortegueru baxo una ñevada pelín inesperada

Ensín munches ganes de facer una visita al Ubales, entamamos l'ascensión al xerru del Cortegueru, col envís de facer cume nel so puntu más altu, el picu Corteguerón (1879 m), cosa que nun sedrá cenciello, teniendo que soportar una baxada de les temperatures xabaz, con ventisca incluyía, durante tol trayeutu hacia'l cumal.

Cume del Picu Corteguerón (1879 m)

Con 5 hores de ruta y 13 km de percorríu, nun perdemos muncho'l tiempu nel cumal, ya qu'hasta los perrinos métense por nós del fríu que fai, teniendo que descender lo antes posible, escoyendo l'arista más direuta hacia cotes baxes como ye la NE, que dempués de bones esquiaes ente mil rises peles Llanes, dexarános penriba del colláu La Canalina, a unos 1615 m d'altor.

Descendemos tola arista NE esnidiando pa intentar escapar de la ñube

Tovía escapando de la ñube, siguiremos descendiendo hacia la mayada Carricera, onde alcontraremos una perbona fonte, dándonos el puntu xustu pa xintar daqué, aprovechando que'l mal tiempu pasara de llargu. Dende equí, los nuesos pasos tienen de llevanos en descensu hacia'l mayáu Vallegu, onde entraremos nel valle Les Campes, lo que sedrá a lo postreru una ayalga a descubrir.

Baxamos per Carricera y Vallegu col ambiente caleciendo una migaya

Les opciones de baxada hacia los Arrúos son dixebraes, pudiendo baxar de Carricera per cualesquier vallina pente los picos Cerveriza, Coípu, Cobu o Castiellu, escoyendo nel nuesu casu conocer el valle Les Campes, perpasando'l picu Castiellu pela so mandrecha.

Bordiaremos el Castiellu pela mandrecha pa conocer el valle Les Campes

La verdá ye que nun soi a aldovinar cual sedrá'l camín más guapu, pero a nós, esti valle de Les Campes, formáu pente les peñes de Castiellu, Tres La Tayada y más baxo Valloria, son d'eses ayalgues qu'alcuentres simplemente por instintu, porque ties l'apetencia d'intentar baxar per ehí y que vas alcontrar un prestosu camín colgáu d'entamu, nesti casu y llueu una viesca de les que namora enforma.

Pequeñes ayalgues qu'alcuéntrense por instintu o casualidá

D'esti xeitu, diremos alcontrando paso pente la fonda fueya de la seronda tardía astur y pente'l verdi mantu de mofu que tapez les fayes y carbayos d'esta increyible viesca del Xerru Caín. Poro, esfrutando d'esti xabaz llugar, diremos poquín a pocu, alcontrando muries y sebes qu'amuesen la cercanía de dalgo de vida, aportando al Balséu y pocu más alantre a la vega Cándanu.

Enllazamos con bon camín p'alcanzar les Cases d'Abaxu

Dende Cándanu, ya pasaremos a caleyar per bona pista, pasando peles Cases d'Abaxu, enantes d'empatar en Fresnéu col camín clásicu del rigu Los Arrúos onde ya podremos relaxanos del too y esfrutar del cielu azul que bríndanos un final de ruta muncho más agradable que na parte cimera de la Xerra Cortegueru.

A la fín, les casi 9 hores de patéu per Reres amosaron una vegada más, que los montañeros tenemos un verdaderu paraísu nestos conceyos de Casu y Sobrescobiu, dándonos pa un patéu que rondó los 25 km y 1400 m de desnivel acumuláu positivu.

Camudando'l Camín aportando a Caliao cola peña Riegos enfrente nueso

No hay comentarios:

Publicar un comentario