Track: Trail Cabeza L'Arcu (Casu)
Web del Trail: Trail Cabeza L'Arcu (Casu)
Clasificaciones: Clasificaciones 2018
Dempués de la carrera de Reres, na que sintiérame especialmente bien, tornábemos al trail de Cabeza L'Arcu, nel que nun sé en que momentu dióme por apuntar, ya qu'a la selmana siguiente díbemos a pol primer trail llargu del añu, en Cangues d'Onís.
El casu ye, qu'axuntámonos dellos collacios, nun día perfríu y baxo l'amenaza de cambiu de percorríu durante la selmana, anque por suerte, nun fuera asína y pudimos esfrutar d'una carrera preciosa, con munchísima ñeve na parte alta.
Físicamente y mentalmente, nun diba del too convencíu, ya que les dos rutes del finde anterior, ficiéranme notar de nuevu'l piramidal nos entrenos d'esta selmana. Con pelín de mal rollu, entamamos la carrera a ritmos alegres empobinándonos hacia Los Arruos, onde somos caltener posiciones medianamente altes pero cola galga echada.
Como siempre salida abaruyada en Caliao
Nesta carrera tenemos el primer tramu d'ascensión hacia la collá L'Arcu, como'l más duru, o al menos, así me lo paez, ya qu'entama a facese delles envueltes en dalgunos tramos per un pindiu hormigón, qu'amuésame que vuelvo a les andaes col piramidal, cargándoseme enforma el xemelu drechu.
Intento nun facer muncho caso y aguantámonos el tirón, perdiendo dalguna posición qu'otra hasta aportar al tramu intermediu del valle l'Arcu, onde la ñeve fai actu de presencia de continuu y entamamos a probar l'agarre de les nueves Bushido de la Sportiva.
Pocu barru nel día de güei
Nun ye que se pueda garrar grandes ritmos, ya que correr evitando buelgues profundes y nun resbariar fai que seya casi imposible, pero voi viendo que les zapatilles tienen un cantéu perfectu nestes condiciones.
Ésto, dexarelu claru al pasar pela mayá L'Arcu, onde al fin ves tola pandona que queda por xubir y más esti añu, onde hai total inesistencia de senderu y fadremos l'ascensión a pelo abriendo buelga per tol entepechu.
Arruos p'arriba y Xulió p'abaxo
Nesta vegada, demientres veo a xente resbariar, l'últimu tramu d'ascensu fadrelu a bon ritmu y na baxada casi alloquezo de lo qu'agarren les playeres. Poro, tírome a lo xole pela ñeve, esfrutando como un rapacín y ganando munches posiciones, les perdíes na primer parte de la xubida y dalgunes más por mor de manexase bien nesti tarrén.Dempués de la primer parte de la baxada rapidísima, pasamos a la segunda onde la ñeve va desapaeciendo y onde alcontrámonos coles primeres plaques de xelu, que vamos llibrando como podemos hasta meter un fostión, nun mancándome muncho al cayer escontra la ñeve.
Vamos llegando fuerte a meta
Nun fuí l'únicu, ya qu'al aportar a meta, pude ver rodiyes, coldos,... sangrando, pero na mayoría de los casos, chapa y pintura y cara de pasalo podre de toes maneres. Esta vegada, hasta nin se me fizo duro'l tramu final de pindies caleyes hasta la meta, dándome una sensación falsa de venir con meyor tiempu que l'añu pasáu... coses del direutu.
A la fín, 8 minutinos más que l'añu pasáu y dalgunes posiciones pior, pero prestóme la carrera pola vida... otra cosa ye que la organización dea una sensación, de máximu beneficiu col mínimu gastu, ya qu'ensin agua caliente pa duchase, ensin un avituallamientu decende na meta, sólo-yos queda, tener un añu nel que nun tengan la suerte de qu'allume'l sol y los participantes vengamos muertos de frío en plenu febreru pa nun volver más.
Como siempre, dar gracies a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (MVFoto, Monchu Calvo, Miguel Rodriguez, Lastra, Gilber, ...)
---------------------------------------------------------------------------------------------
19 de Febreru de 2017
Track: Trail Cabeza L'Arcu (Casu)
Web del Trail: Trail Cabeza L'Arcu (Casu)
Clasificaciones: Clasificaciones 2017
Primer añu del trail Cabeza L'Arcu nel pueblu casín de Caliao y digo primer añu que se fai, pero toi seguru que nun va ser l'últimu porque ye una carrera increyible pa esta dómina del añu. Hai que dicir que'l día ayudó munchísimu, fresquín pero soleyeru y con unes vistes de diez, lo que fizo que'l percorríu conocíu per montañeros avezaos fuera más guapu si cabe.
Semeyes increyibles durante la carrera
La carrera va totalmente pel PR de la Cabeza L'Arcu y por tanto tien la guapura asegurada xubiendo pelos Arruos, ascendiendo hasta la collada l'Arcu y baxando pel valle Xulió. Nesti día, con un pocu ñeve na collada y muncha agua peles riegues fizo qu'esta carrerina de 14 km quedara pa l'alcordanza.
La xente del GM Xuan de la Borrina
Personalmente, disfrutela munchísimu, ya que dempués d'un par de carreres nes que salí demasiáu rápidu y llueu llegué pelín petáu de pates pa l'ascensión, esta vegada tomelu con calma y fuí ganando posiciones poquín a pocu na xubida pa baxar a saco como nunca lo ficiera hasta la posición 26 de la xeneral.
Los "petates" del roco dándolo too per Casu
Aparte de resultaos, fué un gran día con munchísima xente conocío corriendo pel parque de Reres como fueron los allegaos al GM Xuan de la Borrina, el Asgaya Team o los collacios d'escalada qu'animáronse a correr esta vegada y pasáronlo en grande.
Col Asgaya Team dempués de finar la carrera
Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Gilber, Agus Camino, Francisco Poli, Lastra, Trece Fotografías, Club Correr Asturias, Malgor,...)
No hay comentarios:
Publicar un comentario