Track: Santianes (Ribeseya) - Altu La Teyadera
Dalgo más de 9 años fae que tuviéramos conociendo'l cordal de Cueva Negra y ye que como pasen los años. Daquella con más pelo na cabeza que na cara y agora al revés, pero siempre coles mesmes ganes d'andar pel monte.
Esta vegada nun vamos facer una actividá tan llarga y decidimos entrar al cordal de Cueva Negra pel valle de Peme dende Santianes, poro fadremos l'averamientu dende Xixón, siguiendo l'autovía'l Cantábricu hasta la salida de Lloviu y d'ehí hasta aparcar nel guapu pueblín de Santianes.
Partimos de Santianes a 13 m d'altor
La ruta marcada claramente, llevaranos nun continuu caleyar per pista, primeru a la mandrecha'l rigu Santianes, hasta cruciar pela ponte y pasanos a la manzorga, entamando pali a pali, a ponese pindia la pista.
El valle va encerráu pente'l pequeñu cordalín que fai xuntanza penriba la Cueva'l Tinganón col de Cueva Negra y tol cordal del Mofrechu, poro les vistes hasta que nun vayamos algamando altor, nun sedremos a teneles.
Ascendemos tol valle de Peme siempre per bona pista
Nun hai muncho que destacar, aparte de dir charrando y alcordándome de delles aventures pelos cordales costeros, que siempre dan munchu trabayu al ser un tarrén caliar con vexetación baxa y davezu mui brava, compuesta de cotoyes y escayos principalmente.
Pero pol momentu, lo únicu que tenemos desagradable y gafu d'aguantar pela pista, ye a los cazadores que miren de regüeyu pa nós y dalgunu qu'aparte de cazador yera guardia... supongo que civil, tien a bien, decime que tengo qu'atar a Kíla porque tamos enmediu d'una batida y pa enriba ye un perru de caza.
Dende'l colláu Fontanines xubiremos a pinchu hacia l'Altu la Teyadera
Como ye vezu, faigo'l casu xustu y namás que dexamos atrás a tola gandaya cazador, suéltola pa empobinanos pali pali al colláu Fontanines (509 m), onde tenemos pensáu atacar hacia la parte alta del cordal de Cueva Negra.
Dende'l colláu, restolaremos pente'l calizu y les cotolles, el senderu más abiertu pa dir ganando-y altor, dando al altu La Cueva, dende bordiaremos una primer cabeza y ya siguiremos ascensión hasta'l puntu más altu del cordal, L'Altu La Teyadera de (744 m)
Cumal de L'Altu La Teyadera (744 m)
Como siempr, les vistes de la costa astur son ablucantes, con tola rasa llanisca y ribeseyana a un llau y a otru, pero pal sur, onde tendríemos de poder ver los tres macizos, tenemos una boina de ñube baxa que nos dexa un pelín con fame de vistes.
Malpenes en dalgún momentín, apaeció'l Picu pa saludar y ceo volvió a tornar la ñube tapeciendo tol espeutáculu ñeváu. Aparte, a la ñube, xuntóse un vientu castrón, que fízonos siguir camín hacia'l siguiente oxetivu que yera'l Picu H.orovitaya
Crestiamos con calma hacia'l Picu H.orovitaya siempre con vistes a la mar
Esti picu de 723 m, coronáu per una montanera piedres, que paez ser, diba colocando un taxista de Ribeseya hasta que morrió. Supongo que caún tien les sos aficiones y la d'esti home yera ascender al H.orovitaya y dir poniendo un finxu que se vea dende'l pueblu.
Ensin más, decidimos escorrer del vientu y descendemos per una evidente vallina hasta dexar a la nuesa mandrecha'l colláu que tiraría hacia la cumera del Cabezu. Nel intre, camudaremos de sen, p'averanos hacia la boquera sur de la cueva'l Tinganón, la cual tenemos ganes d'acolumbrar dende riba.
Descendemos hacia Peme echando una güeyada a la cueva'l Tinganón
Y dicimos dende riba, ya qu'anque ye una cueva qu'entrándo-y dende Lloviu podríemos visitar con más o menos problemes, dende la entrada sur, nun tendremos eses facilidaes ya tendríemos de descender un pequeñu barrancu formáu pel rigu Lloviu.
D'esta miente, probablemente dexaremos esta actividá pal branu y queda na carpetina de pendientes de conocer, mientres siguimos el senderu colgáu penriba'l barrancu hasta dar coles primeres cases del pueblu de Peme.
Escaecemos el pueblu desaniciáu de Peme y vuelta pa Santianes
Paez mentira qu'a menos d'un kilómetru en llinea recta de la gran autovía del cantábricu tengamos un pueblu esaniciáu, pero asina ye Asturies... obres faraóniques y la vida de los pueblos morriendo cada día que pasa.
El nuesu camín, tamién diba llegando al so fin y magar de cruciar en Peme el rigu Lloviu, empatamos cola pista pela que xubiéramos dellos metros dempués y diba tocanos descender pel mesmu camín, cola mesma tranquilidá cola que xubiéramos delles hores enantes.
En resume, ruta en plan mañanera, pa facer un puquiñin de pata y con un día de bones vistes tendremos tolo que resume Asturies, mar y monte en tola so grandeza. Pa ello, tendremos de caleyar malpenes 11,3 km, faciéndose estos en 5 hores sele, superando un desnivel de 810 m d'altor.
Camudando'l Camín de paséu sele per Ribeseya
No hay comentarios:
Publicar un comentario