Vil.lamayor (Teberga) - Braña'l Val.le - Peña Cruzada

1 de Mayu de 2021

Track: Vil.lamayor (Teberga) - Braña'l Val.le - Peña Cruzada

Finde de tiempu inestable y perfrío, nel qu'aprovechando que Charly llibra de currar el sábadu, proponemos una ruta na qu'a la fín, axúntense xente del grupu monte. Tenemos la mañana, pa facer dalgo, ya que llueu albídrase una tarde lluviosa, poro aprovechando que toi per Teberga intentando esguilar preparo l'ascensión al techu de Tameza: Peña Cruzada.

Entamamos saliendo de Vil.lamayor (857 m)

Nesti casu vamos salir dende Vil.lamayor, un pueblín bien guapu al qu'apórtase saliendo dende Entragu en direición Taxa. Magar del almuerzu, xubiremos hasta Vil.lamayor, onde alcontrámonos tol grupu, preparándonos pa caleyar baxo los paragües.

Caleyamos per camín hacia'l Saltu L'Agua

El día ta murniu enforma, ta orbayando y tamos a dos graos, asina que toca ponese a caleyar o dir a tomar un caldín, nun hai más opciones. Decidimos intentar la ruta, poro, travesaremos delles cais de Vil.lamayor empobinándonos al traviés d'un PR (pequeñu recorríu) que tien de llevanos hacia la Braña'l Val.le.

Conocemos la guapa Braña'l Val.le

El camín ye guapu, pasando per dalgun tramín de viesca y travesando la riega'l Saltu L'Agua, pa enllazar nun colláu cuarcíticu, con otra camín que vien dende Rimayor. Ellí, na Braña'l Campo, para d'orbayar, quitando dalgo de ropa pa facer delles envueltes hasta alcontranos coles cabañes de la Braña'l Val.le, dalguna con teitu vexetal.

Continuamos hacia'l colláu'l Pozu L'Oral

Saldremos de la braña per pista hacia les brañes de Rimayor, metiéndonos de plenu na ñube, onde aparte del borrín, entama a ñevar, lo cual fae esti tramu hacia'l colláu'l Pozu L'Oral, muncho más guapu anque mui fríu tamién. El caminar ye bien cenciellu pelos mayaos, asina que'l ritmu que llevamos fae aguantar meyor l'aneudóticu ñevar del primeru de mayu.

Entamamos l'ascensu a Peña Cruzada

Dende'l colláu diremos llaneando per pista hacia'l colláu Santa Cristina dexando la pista pa la Braña'l Pividal a la manzorga y el desvíu hacia Vil.lamayor de nuevu a la mandrecha, tomando nós, camín de frente, pa entamar la tendida ascensión per Caldueiru y Cuentera hasta los 1372 m de la Peña Cruzada.

Grupu nel cumal de Peña Cruzada (1372 m)

Dicir que nel intre, nun vimos res en denguna direición, ya que ficimos l'ascensión siguiendo'l track del collaciu Cienfuegos, anque lo que tenemos claro, ye que tuviemos muncha suerte, ya que reciéntemente quemara tol brezu y cotoya, pudiendo caleyar cómodamente per tola llarga cumera de monte.

Descendemos hacia la Veiga Cimera con vistes a los puertos de Marabiu

Sigue tan perfríu asina que descendemos apriesa hasta'l primer collaín onde garramos un senderu que baxa sele en diagonal hasta la Veiga Cimera. Por suerte, el día paez abrir un momentu, dexándonos acolumbrar tolos puertos de Marabiu y algamando un pelín d'orientación pa saber pa onde teníemos que siguir ruta.

Baxaremos pela Granda y L'Abedul hasta Vil.lamayor de nuevu

Na Veiga cimera, garraremos pista hacia la mandrecha que volvería hacia Santa Cristina, garrando un guapu camín a la manzorga que baxa pela braña la Granda hasta xuntase cola carretera que baxa de Marabiu en L'Abedul, aportando a la fín a Vil.lamayor de nuevu, onde damos por finalizau esti pequeñu pateín.

En resume, ruta mañanera de 11 km y 620 m de desnivel acumuláu, qu'en menos de 4 hores, nun día espeyáu daríanos pa conocer esta fastera n'arba pente los conceyos de Tameza, Grau y Teberga y que con un bon día, tien d'agasayanos con bones vistes, pero nel nuesu casu, valiónos pa tachar el techu de Tameza y pa facer fame pa un vermutéu con menú.

Camudando'l Camín na primavera tebergana