martes, 11 de mayo de 2021

Avín (Onís)

8 de Mayu de 2021

Dende que viera la espublización de Victor Sanchez, d'una nueva escuelina d'esguilada n'Onís, andaba con ganes de visitala. A la fín, esti finde pudimos escapar pal Oriente y magar d'un vienres d'entrenu corriendo pel monte más un par de peguinos nas Cabadas a la última vía que me queda por facer, el sábadu yera'l día de conocela.

Averamientu guapu enforma con vistes al macizu del Cornión

Daben muncho calor, pero'l día alboreció mediu ñubláu, así que tiramos hasta ellí igualmente. Aportamos a Avín y xubimos tola pista hacia Cueva Rota, onde hai un bon aparcaderu, dexando les furgos bien pegadines a la valla pa dexar sitiu pa dar la vuelta a los ganaderos, ya que tamos a la boca d'una cueva quesera.

Pié de vía cómodu nun llugar increyible pa pasar el día

Preparámonos y salimos caleyando siguiendo los croquis de Victor, alcontrando ensin problemes pasu por pasu el senderu p'aportar al seutor. Dicir que'l paséu ye munchu más curtiu de lu pensáu y faise más llargu l'accesu en furgo pela pista que lo que vamos caleyar que ye guapísimu sobre tou, les vistes dende'l colláu Beranzas, si tomamos el camín de la manzorga.

Día de quedar pegáu de calor al paré nesta caliza abrasiva

Pa cuando aportamos al seutor, les ñubes van desapaeciendo y paez que la soleyera nun va dar tregua nin a nós nin a los perros que nun tienen solombra onde metese. Entamaremos a trepar peles víes de la manzorga, faciendo primeru yo y llueu Anna, Las Mantegas, que más bien ye 6b+ envede el 6a+/b que señalaba Victor.

Esfrutando nun paisaxe brutal de guapu y nunes víes intenses

Llueu, aprovechando qu'Andrea y Xurde montaren otres dos víes, continuamos llimpiándoles primeru H.orcadiellín (6a) y a lo postreru, Moandi, un 6a+ atómicu de buenu, con pasos llargos de presa bona, que fué la guinda final, enantes de colar por mor del calor y porque dalgún perru nun lo daba ya de tanto alendar.

Progresando na caliza del paré Beranzas

Coles mesmes, arrancamos mui ceo del seutor, pero hai que tener en cuenta que la Paré Beranzas, onde asítiase la escuela, ye Sur total, asina que tenemos qu'escoyer díes de ñublu o dómines del añu nes que caliente menos, ya que nun vamos tener solombra onde abelluganos.

Avín

Croquis modificaos por mi de la escuela d'escalada d'Avín, por mor de Victor Sanchez - Entretenimiento Vertical. Gracies y col so permisu.


                           ------------------------------------------------------------------------------

No hay comentarios:

Publicar un comentario