La Pesanca (Piloña) - Monte la Foz - Xerra Trallán - Serondu - Cubilones

23 de Mayu de 2021

Track: La Pesanca (Piloña) - Monte la Foz - Xerra Trallán - Serondu - Cubilones

La primavera n'Asturies, ye falar de verde y falar d'agua y esti añu, por mor del desxelu y les últimes lluvies, tenemos un verde tan intensu, que pasiar per una viesca nun día soleyeru, ye dalgo dafechu imprescindible pa cualesquier amante de la ñatura.

Y cuando quies sentir tol espoxigue primaveral a onde vas, pues a Piloña, como tantes otres vegaes. Enxamás, cansaréme d'encomendar esti conceyu pa facer monte n'Asturies, siempre menos visitáu que conceyos vecinos como Ponga o Casu.

Partimos del área recreativa de la Pesanca (420 m)

 

Esti día ficimos un grupín curiosu, poro tardamos un pelín en ponenos en marcha saliendo casi a les 9 y media, con una temperatura qu'invita a caleyar. Fadrémoslo saliendo hacia la pista que xube hacia les foces del rigu infiernu y a los poco metros, garraremos un camín que va facenos conocer tola viesca del monte La Foz.

 

Nun tuviera la suerte de conocer esti camín entá y tengo que dicir que fue una de les grandes sorpreses del día, siempre tendíu con bona caxa y faciéndonos ganar desnivel sele nunes envueltes bien curioses, que nos van dir faciendo travesar les vallines de L'Utra, Trescorrales y la riega la Foz hasta averanos hacia'l Cuetu Cuergu.

Travesamos per un preciosu camín tol monte La Foz

Al altor del Cuetu Cuergu, con vistes hacia los collaos de Treslafuente y Pandemules colos sos correspondientes montes como'l Maoñu y la Peñe Crespa, vamos aportar al colláu Senderón, con bon champán, onde enfréscase con xeitu Kíla.

 

Del colláu Senderón, pasaremos per tarrén abiertu hacia'l colláu Mediu, que danos vistes hacia'l norte, col picu Facéu presente. Ellí, siguiremos un senderín que métenos de nuevu na viesca, baxo les primeres peñes que caen dende la Xerra Trallán.

Aportamos al colláu Senderón pa siguir per tarrén más abiertu hacia la Xerra Trallán

 

Siguiendo dellos fitos vamos dir aportando al Foceyón, un llugar increyíblemente guapu, pela que trazaremos camín al llau de la riega Les Mules, xubiendo per onde meyor vamos viendo, siempre pel mediu la riega pa salir a la Corona Trallán, onde restolaremos senderu que nos dá accesu a la Pasada Trallán.

Averámonos hacia'l Foceyón, caberu tramu enantes de topar coles peñes de Trallán

Durante tola ruta, diba pensando nun llugar muncho más salvaxe en cuanto a lo perdíu de senderos, pero dende que salimos de la Pesanca, en dengún momentu hubo perda denguna y darréu, tamos nel pasu ñatural de la pasada Trallán, una preciosa forcadina que da salida hacia'l valle de Fresnedal.

 Conocemos la pasada Trallán pa metenos nel abegosu ascensu a la Peña Trallán

 

Na pasada, vamos separarnos, ya que sé que l'ascensión a la Peña Trallán ye abegosa, poro gran parte'l grupu va descender hacia la braña Copín pa siguir hacia'l colláu Colines. Mientres, Mario y Diego, van acompañame a bregar per cotoya baxa hacia la Peña Trallán.

Ascendemos trabayádamente a la Peña Trallán (1255 m)

Facía tiempu, que nun bregaba tanto agarráu a la broza, mirando'l meyor accesu hasta danos de frente col torruxón que ye'l cumal, teniendo que camudar de fastera, faciendo unes travieses colgaes sol Fasgueal, hasta dar tola vuelta defechu y entrá-y dende'l Sur a los 1255 m de la Peña Trallán.

 

Eso sí, les vistes ablucantes, dende la Ordaliega, La Frayada, Cuetón de les Travieses, Peñe Crespa, Maoñu, Les Vízcares nel puru coral de Piloña, Casu y Ponga, pero como dixi, paezme un cumal pa coleccionistes y pocu necesariu si nun hai ganes de marrones.

 

Descensu dalgo menos complicáu de la Xerra Trallán hacia Colines

Dempués de la engarradiella col mediu ñatural pola vía d'ascensu, continuamos crestéu a la gueta d'una baxada dalgo más afayaiza y alcontrámosla nuna forcadina enantes del siguiente torruxón, algamando una canalina herbosa pela que baxamos con cuidadín de nun resbariar.

 

Adelántome un pocu, dexando atrás a Mario y Diego, que tuvo un sustín y va dalgo mancáu de chapa y pintura, corriendo hacia Colines, onde lleven esperándonos munchu tiempu'l restu'l grupu. Dicir que dende que nos desviamos a pol cumal, hasta que llego al colláu Colines, el gps marca 1 hora y media de bregada montuna.

Continuamos camín dende'l colláu Colines hacia la Foz de Serondu

Axuntámonos toos de nuevo y vamos continuar al solín hacia la Foz de Serondu, otru pasín al que-y tengo ganes, anque la vista, vegada tres vegada, desvíase hacia la Foz del Molín, a la cual aportamos la primer vegada que conocimos la Foz de los Cubilones, pero nun vimos accesu cenciellu dende la so boca inferior.

Trespasamos la foz de Serondu pa siguir hacia La Felguerina per Brañanueva

 

Esta vegada, por mor del tiempu perdíu, nun m'arrimo a la superior y decidimos siguir hacia Serondu ensin paraes, pasando primeru pel Mayáu y les cabañes de Serondu, enantes d'entrar na propia foz, curtia pero guapa que danos accesu hacia la Brañanueva, onde tuviéramos xintando a la baxada de la peña La Becerrera va unos añinos.

Descendemos a pinchu hacia la Foz de los Cubilones

Coles mesmes, podríemos descender dende Brañanueva hacia los Cubilones pel camín qu'usáremos aquel día, pero por conocer un pocu más siguimos hacia La Felguerina, onde tendríemos descensu cómodu pel monte Corvera.

 

Nós, un pelín enantes de la Felguerina, vamos garrar descensu per lo más llimpiu que veamos per viesca y cuanto más al llau d'una riega meyor, ya que'l tarrén pegáu a la peña Los Duernos, ye muncho más incómodu de siguir y pelín resbariosu.

Esfrutamos del descensu pela increyible Foz de los Cubilones

Una vegada qu'aportamos a los Cubilones hai qu'andar sollerte nel primer tramu, cruciando'l rigu a la vera esquierda, nuna mecedura de riegues, pa llueu descender al propiu rigu, el cual ya nun abandonaremos, percorriéndolo nun descensu perentreteníu, nel qu'escaecemos el posible cansanciu que llevemos enriba.

Salimos a la mandrecha los Cubilones hacia'l monte Corvera

Magar de trepes divertíos, cruciar pente peñes resbarioses y sacar milenta semeyes a los tabayones y poces de la foz, esta vegada vamos salir hacia la manzorga, pa descender pel monte Corvera hasta la pista que vien de les foces del rigu Infiernu.

Espeutaculu pela pista del rigu Infiernu

Son munches les vegaes que percorrí esta pista pero en plena primavera cargada d'agua y verdor, parar a cada poza a sacar semeyes ye lo mínimu que podemos facer, siendo pesie a lo llargo de la pista y verdaderu placer de descensu final.

 

En resume, rutona de les que faen afición, na que desaconseyo ascender a la Xerra Trallán, por mor de lo abegosu del cresteríu, saliendo un percorríu de 16,5 km de guapura xabaz, con 1150 m de desnivel acumuláu primaveral nun tiempu de 8 hores de ruta d'esfrute total.

Camudando'l Camín perrúnamente per Piloña