Brañagallones (Casu) - Cantu L'Osu - Tarna (Casu)

11 de Xunetu de 2021

Track: Brañagallones (Casu) - Cantu L'Osu - Tarna (Casu)

Segundu día de Travesera, alboreciendo con un día d'espatarrar y nel puru coral del parque de Reres. Almorzamos con calma, nel refuxu de Brañagallones, onde pasamos una tarde/nueche estupenda y vamos preparando les mochiles y organizando les despedíes de la xente, ya que dalgunos del grupu ya nun continuarán de travesía.

Benjamín y Natalia, pesie a dir sobraos físicamente, deciden baxar pela pista a Bezanes de nuevu y Carla ya Isa, van intentar ascender a la Peña'l Vientu, ya que'l nuesu destín, el Cantu L'Osu ya lu ficieron nun va munchu tiempu, tamién dende'l refuxu.

Partimos con un día brutal de Brañagallones (1245 m)

 

El restu (Alberto, María, Mario, Carlos, Simón y yo) vamos entamar a calecer pates saliendo del refuxu, non sin antes agradecé-yos el tratu, teniendo mui presente reservar pal Aniversariu del GM Xuan de la Borrina, nos próximos meses.

 

El camín hacia'l Cantu L'Osu, ta perbien marcáu, asina que vamos charrando y caleyando sele, demientres descubrimos tola belleza del senderu, con un tramín pela pequeña foz de Cerrosa, hasta salir hacia la mayada Ranéu, onde aparte de les guapes cabañes, entamaremos a tener unes privilexaes vistes de tol conceyu de Casu.

Averámonos hacia'l mayáu Ranéu pela pequña foz de Cerrosa

La verdá ye que con esti día, les vistes sorprenden y cumales que visitamos nestos años, apaecen ante nós, dende'l restu de la Xerra de Príes o en segunda fila Les Rapaínes, Peña'l Vientu y Cascayón, Corteguerón... y solo nesta fastera del parque de Reres.

 

En menos d'hora y media tamos nel Cantu L'Osu, ún de los más míticos montes d'Asturies y magar de los mensaxes y llamaes, de tamos toos bien, ya que nel refuxu de Brañagallones, nun hai cobertoria, vamos entamar a restolar pela xerra de Pintacanales el descensu pela Senda Ranéu.

Averámonos al Cantu L'Osu per cenciella ascensión

 

Pa ello, empobinánomonos hacia'l norte, pasando al llau de les Vallines de L'Osu, per onde ascendiéramos va munchos años dende Llaría. Continuarmeos hacia'l colláu L'Osu hasta topar la boca per onde vamos alcontrar l'entamu del sedu que ye esta senda Ranéu. 

Tol grupu nel cumal del Cantu L'Osu (1812 m)

 

Tenemos momentos de dulda, ya que nun lo ven claro, dellos collacios del grupu y tírome a mirar, viendo que báxase bien. Pa entós, Charly nun se ve físicamente y prefiere dar vuelta y baxar pela normal y siguir hacia Bezanes per pista.

Atopamos la guapa vallina y sedu que va facenos descender del Cantu L'Osu

 

Continuaremos con cuidadín de nun resbariar porque la vallina, ufrez les envueltes xustes pa descender con tendencia a la manzorga, siempre yendo hasta'l final del paré, ya que de frente les cayíes son fatales. Yendo con tientu, la verdá ye que tanto pa xubir como pa baxar ye más que factible, pero cola yerba moyao meyor nun tentar a la suerte.

Finaremos el tramu más finu y pindiu de la senda Ranéu y empobinámonos hacia una amplia pedrera onde vamos picar daqué a la solombra de la paré norte del Cantu L'Osu. Con tan guapu descensu fechu, vamos continuar peles Collaínes de Fuentes pasando a la manzorga del Xerru Fuentes hasta dar cola Collaína Baxu, onde hai que tar sollerte pa descender per bon camín hacia la mayada Cerréu.

Facemos tola Senda Ranéu aportando a les collaínes de Fuentes

 

Nós, coles pates aún picando del día anterior pel valle Monasteriu, quisimos dir de llistos, viendo que taba dalgo tomada la vallina a la mandrecha del Cuetón y tiramos hasta esti pa baxar pela so arista Este hasta Cerréu. Error, el tramu final ye insofrible pasando penriba d'argumes y cotoyes ensin tocar el suelu casi... terrible jaja. La baxada pela vallina, llevaríanos primeru per una pequeña viesca pa terminar nun senderu pente felechos... benditos felechos hasta la mayada Cerréu. 

 

Facemos un descensu infernal hacia la mayada Cerréu

 

Una vegada que tamos en Cerréu convenzo a los collacios pa nun baxar hacia L'Ablanosa y conocer otru valle, ya que les pates nun aguantaben un pinchu nin un arañazu más. Baxaremos pelos Pandos de Ramaona, pente urcies, "siempre con senderu" y entraremos nuna guapa viesca hasta aportar a la braña la Fumiosa onde decicidimos descansar un ratín.

 

 

Baxada seliquina hacia'l rigu Nalón dende La Fumiosa

Dende la Fumiosa, col banduyu rellenu, pasaremos al Colláu Pedrosu, pa descender pegaos a una riega hacia'l Campón, enorme prau como'l so nome indica, pa llueu conocer tol Valle'l Campón, onde caleyaremos animádamente hacia'l rigu Nalón, echándonos unes rises Alberto y yo, que conocíemos la sorpresa final que teníamos pa los collacios.

Aventura refrescante pa cruciar el rigu Nalón

 

Aportaremos, magar d'esfrutar muncho de la guapura'l valle al Escobiu Les Torres, onde podemos salir hacia la carretera pela puente'l Campón o dir echar un vistacín al derribáu Puente'l Mediu que fadríanos cruciar hacia la pista que vien dende L'Ablanosa ensin xubir a la carretera.

 

Na ruta al Cuetu Negru, fuéramos Alberto y yo a echar una güeyadina y quedáramos col recáu pa otru día, asina que nesta segunda estaya de la Travesera 2020-2021, quiximos baxar pel Campón pa cruciar el rigu Nalón y regalanos unes rises y un refresquín pa les mui dañaes pates.

Facemos tol camín a Tarna pel camín argayáu onde esperábenos Charly y muncha folixa

 

Con tol pescáu vendíu y faciendo apuestes de si Charly diba apaecer per Tarna pa un tercer día, facemos el camín al llau del rigu Nalón, topándolo munchu más tomáu y pelín más abegosu pelos argayos, que cuando visitáramoslu volviendo de la Vega Pociellu.

Con dalgún bastonazu qu'otru a les enormes ortigues que vamos atopando, aportamos a Tarna pelín enantes de les 5 la tarde, alcontrándonos con Charly, al que lu llevara Carlina (mil gracies) pa continuar de ruta un día más.

Nós, sentamos les nueses patines cansaes llueu de bregar pel monte otres 7 hores, con un percorríu de 11,5 km y superando un desnivel positivu de 815 m y un negativu de 1065 m, lo cual nun ye muncho pero dempués de la bregada del día anterior, va sumando, poro la duchina nos Apartamentos Tarna, les cerveces y la perbona cena nel Bar Nalón, fue mui d'agradecer.

Camudando'l Camín nel coral del Parque de Reres