viernes, 17 de agosto de 2018

Iondokorta (Arratia-Nerbioi) - Monte Azero

22 Abril de 2018

Track: Iondokorta (Arratia-Nerbioi) - Monte Azero


Una vegada más llevantámonos nel refuxu del Baskonia Mendi Taldea en Iondokorta, con cierto clavel por mor de les bébores llocales y foriates que traximos. Hubo cachondéu la nueche anterior y l'encargáu del refuxu tuvo que mandanos a dormir casi cola guiyada.

Pero una mañana más, almorzamos, tomamos dellos cafés y tamos dimpuestos a dar un paseín pela redolada del parque natural del Gorbeia. Esti añu, el paséu sedrá más relaxáu si cabe y ye que camiento nun queden demasiaes opciones pa dende'l refuxu facer dalgún montucu pa enantes de la xinta final de la Xuntanza Asturvasca 2017 - 2018.

Puntu de salida en Iondokorta (720 m)

Como ye vezu nos domingos, axuntámonos munchoa más xente entá que'l sábadu nel que solemos meter un pelín más de caña. Asína qu'una bona representación d'ambos grupos de monte vamos salir de Iondokorta pela pista que xube hacia la fastera d'Arimekorta.

Ellí, aparte d'unes praderes enllenes de ganáu vacunu y caballar, alcontrámonos con dellos refuxos más de los milenta grupos de monte qu'hai n'Euskal Herria. A vegaes da muncho que pensar, l'afición al monte o más bien les facilidaes que tuvieron los grupos vascos, ya que sincéramente pocos grupos de monte n'Asturies tienen la suerte de poseer un refuxín o cabaña en dengún lláu.

Típicu paséu per pista hasta les praderíes d'Arimekorta

N'Arimekorta, faigo una vuelta enredor pa echar un vistazu a los montes que ya conozo, entamando pol Lekanda al noroeste, Aldamin y col Gorbeia detrás hacia'l suroeste y muncho más lloñe hacia l'Este, pero con una figura casi humana, tol cordal del Anboto que tan bien conocemos coles cresteries feches del propiu Anboto y la del Alluitz.


Pasaremos per Altamiñape pa siguir camín hacia'l Azero

Esta vegada nun tocaremos calizo tan increyible como'l del Anboto, al menos na parte superior, poro siguiremos caleyando per pista hasta cruciar penriba'l regatu de Dulau, onde ya pasamos a percorrer tol monte d'Azero que casi nun presenta desnivel hasta'l so puntu más altu a 968 m.

Cumal nesti modestu monte del Azero (968 m)

Ta siendo un paséu pertranquilu, asina como la cumera d'esti montucu que pente les fayes, fainos d'escusa pa sacar una semeya de grupu, al llau d'un buzón de forma tan llonxana a les sableres y la mar del Cantábricu.

Baxamos per guapos fayeos hacia'l rigu Zubialde

Dende'l Azero entamaremos un descensu per pista que va metése de nuevu nun ablucante fayéu, siempre col envís de descender hasta'l rigu Zubialde. Ellí, echaremos un vistazu a una covacha onde presenta un interesante ñacimientu y siguiremos esta vegada monte arriba hacia la cueva de Mairuelegorreta.


Tornamos a ascender per fayeos hacia la cueva de Mairuelegorreta

Ye ún de les coses prestoses de dir cola xente llocal, que preparen una ruta pa conocer hestoria del monte vasco. Nestes cueves, hubo reuniones clandestines, conciertos tradicionales y supongo que munchu hippismu en dalguna dómina.

Pela vera'l rigu Zubialde siguimos entreteníos pente les fayes

Dempués de la guapa visita con frontal a la cueva ya qu'adiéntrase munchísimu, vamos siguir a la vera'l rigu Zubialde, siempre a la so manzorga y yendo realmente por onde más guapu nos va paeciendo y siguiendo dalgún fitu alcontrarémonos de nuevu al altor del rigu Dulau que dexa les sos agües al Zubialde y nós, ponmos de nuevu en camín conocíu.

Dempués de travesar el rigu Dulau enllazamos cola xubida pa descender per Arimekorta

Dende equí y siguiremos de nuevu a Altamiñape y d'ehí a bon ritmu hasta Arimekorta onde desfadremos camín hacia Iondokorta, onde como siempre espérenmos el resto de collacios del Baskonia col vermú preparáu y la xinta a posteriori que pondrá puntu final a esta octava Euskoastur Biltzarra.

El paséu de 4 hores y 25 min fue la cuenta pa sudar un pelín y abrir la fame llevándonos a facer 12,1 km y superar un desnivel sele de 650 m positivos, quedándome claramente col ambiente cantábricu de cueves, agua y viesca.

Camudando'l Camín na nuesa segunda casa de Iondokorta

No hay comentarios:

Publicar un comentario