Atxarte (Durangaldea) - Alluitz

22 d'Abril de 2017

Track: Atxarte (Durangaldea) - Alluitz

Hai rutes, nes que según vas caleyando, ascendiendo, descendiendo, pasando les hores... nun yes a sintir otra cosa que plenitú. Plenitú total nel percorríu, plenitú total nel ambiente, plenitú total na belleza del llugar...

Y ye que nun pueu imaxinar, una ruta más perfeuta pa les hores de les que dimponíemos, ya que nes xuntances la parte montuna ye perimporante, pero tamién la parte folixera y tar nuna mesa d'alderique o tranquilamente nel pueblu de turnu tomando una cerveza, ye necesario enforma.

Poro, dar les gracies a Fernan y a Tito, por amosanos una ascensión entretenidísima, completa y que casi ensin querer faise hasta curtia de lo disfrutona. Agora, quédome cola sensación de que van tenelo complicáu p'alcontrar dalgo que lo supere jeje.

Puntu partida n'Atxarte (285 m)

El fechu ye que plantámonos n'Atxarte, onde la nomada escuela d'escalada, aparcando onde l'abandonada cantera. Ellí, preparámonos nun día calurosu, poro fue un placer facer la ruta en manga y pantalón corto.

Saldremos pasaes les 10 y media la mañana d'Atxarte, pasando al llau de la ermita y ascenderemos per guapu camín baxo les muries del Aitz Txiki, siempre a la solombra d'unes impresionantes fayes, hasta'l colláu onde sal el camín hacia la normal al Alluitz y Aitz Txiki pela canal d'Artola.

Ascendemos dende Atxarte al entamu de la canal de Kokuzkulu

Siguiremos más alantre, empobinándonos hacia'l colláu d'Asuntze per onde hores más tarde baxaremos, hasta topar la canal pela que tenemos l'envís d'ascender: la Kokuzkulu. P'alcontrala tenemos que fixar la mirada nel conu de deyección per onde argayen toles piedres de la canal.

A la so mandrecha, meterémonos nun sedu con una primer trepadina a la mandrecha pero bien ceo, tornaremos a la manzorga, pa facer una amplia envuelta, con dellos trepes entretenídisimos y pasín per una llambria que fai les delicies de los más atrevíos, pero que tamién pon al orde a los que van un pelín más xustos.

Trepes y travesíes van metiéndonos pali pali na xera montuna

Seremos toos a pasalo ensín mayores problemes y con unos pocos trepes más, meterémonos dafechu na propia canal de Kokuzkulu. Pel momentu, tol mundiu va bien, esfrutando, echando unes rises y van tan entreteníos que nun se dan cuenta, nin de lo pindio del tarrén y nin del desnivel que vamos ganando.

Percorreremos tola canal, nun tramu muncho más amable, hasta qu'esta va queriendo enzarrase pente les verticales paredes que caen dende la cresta del Alluitz. Como non, la qu'afita los güeyos y nun dexa nin parpadiar ye l'Inferniku Zubi o Cresta'l Diañu.

Vamos saliendo de la canal de Kokuzkulu pela manzorga

Dende lo baxo, nun somos a pescanciar como d'ancha sedrá la crestina, nin que pasos tendrá, pero veo a la xente que'l coral da-yos dalgún baltíu solo de pensalo. Intentamos quita-y fierru al asuntu, col envís que se relaxen y como non, la baxada pela normal n'Artola, siempre ta presente como plan B.

Desviamos la mirada del "pasu infernal" y la canal convídanos amablemente a abandonala, pela manzorga, lo cual fadremos empobinándonos a delles terraces que superaremos n'envueltes pa metenos finalmente nun pindiu canalizu con bones preses y un pasín d'apretar, que pue llibrase terraceando más pela manzorga.

Trepamos l'últimu canalizu y con vistes al Inferniku Zubi facemos cume

Fuera del canalizu, ya sólo quédanos caminar unos pocos metros hasta'l cumal del Alluitz (1034 m), qu'hai que dicir que fue de los últimos montes qu'ascendí, el que más prestoso fízoseme, pol percorríu, enllenu de trepes y per una canal, que tan sólo la so llargura, fainos pescanciar que nun tamos enmediu los Picos d'Europa.

Sele, esfrutaremos un ratín de tan guapu monte, que tanto fainos alcordar dellos cumales calizos d'Asturies y entamo a ver nes cares, ciertu esmolecimientu polo que vien darréu. Nun se bien, que-yos ta pasando pela tiesta a los collacios: unos emoción, otros mieu, otros... vamos ver que nos alcontramos... a saber.

Preciosu cumal el del picu Alluitz (1034 m)

Coles mesmes, entainamos colocando'l grupu de la meyor manera posible, con Fernan a la cabeza, yo enmediu p'aidar nos pasos y Tito controlando la reciella dende la cola. Crestiamos un pelín y vamos asomando'l focicu hasta ver el nomáu Inferniku Zubi del que tan sólo nos separa un destrepe per un canalizu.

Fernan y Benjamín adelántense y yo sigo detrás, controlando que la xente vaya cómodo. Sobretou, encárgome de Charly que suel pasalo mal nestes xeres montañeres. Veo la evolución per delantre, pasando ensin problemes Fernan y Benjamín hasta un bloque nel lo superen sentaos y nun me presta res ver como ximíelguense penriba'l bloque, camentando que dalguno va pasalo permal.

Asina que póngome pie por pie y man per man, con Charly durante'l descensu del canalizu nel qu'atrancase cola mochila y ponse daqué nerviosu. Llueu, alienda y sígueme con confianza faciendo en bavaresa tol pasu'l degorriu, dexando como non la menor cayida a la nuesa espalda.

Descendemos sele hacia'l Pasu'l Diablu pasando ensin problemes

Nun tenemos dengún problema y aportamos al bloque, onde mirando la repisa que tenemos embaxo, prefiero destrepala nun pasín con bonos agarres, faciéndolo mui tranquilu Charly, poniéndose a seguru con cara de felicidá.

Magar de tener a Charly a bon recaudu, plántome embaxo'l destrepe y tol mundiu va siguiendo los sos pasos, esfrutando finalmente del temíu y nomáu Inferniku Zubi, del cual fuimos dar bona cuenta, tol grupu.

Siguimos el crestéu del Alluitz pasando per Llarrano Urkulu Puntea (1012 m)

Llueu, toca remontar una bona trepada hacia Larrano Urkulu Puntea, na cual debemos andar sollertes, ya seya pela arista, que tien un bon aéreu, o per un canalizu más protexíu pero con un trepe guapu pa llibrar un bloque empotráu.

A partir del cumal del Llarrano Urkulu, sedrán costantes los trepes y destrepes mui cenciellos per tarrén amestáu, con baxaes y xubíes ya nun senderu marcaín y nel que si tamos avezaos a estos cresteos, diremos esnalando y esfrutando como nenos.

Ascenderemos al Zorrotza (1011 m) y siguiremos de folixa crestiando

Durante la travesía, desviarémonos hasta'l dixebráu cumal de Zorrotza (1011 m), aprovechando que faltaba xente más rezagao per aportar. Llueu, de facer cumal, Haritz, Richar y yo, tornaremos a la cuerda pela qu'avánzase ensin problemes.

Ensín problemes... a nun ser que los busques, ya qu'a cada espolón calizu qu'alcontrábemos decidíemos trepalu y siguir faciendo actividá. Ya puestos en faena, yera de recibu nun baxase del caballu en tol cordal jeje.

Diversión asegurada con dalguna esguiladina pasando per Llarrano Puntea (981 m)

A destacar sobretou, un trepe vertical guapísimu sobre caliza de primera y un destrepe nun bloque, que podía llibrase per una traviesa a la mandrecha del sen d'avance. Nesti puntu, tomo como anéudota la manía de los vascos d'usar les pates pa dar sofitu a pasos onde una moza nun ye a afitase.

Sedré yo, que tengo mentalidá de que la xente tien que ser capaz de superar los sos mieos y les dificultaes del camín per ún mesmu, pero son coses nes que nun alcuentro sentíu. Al mió entender, ye meyor dicir onde ties una presa o un pie, que nun dexar que la xente espoxigue per si mesma con demasiaes aides, sobretou si nun te lo tan pidiendo.

Baxamos de Llarrano a Asuntze onde descansaremos y xintaremos daqué

Reflesión aparte... siguiremos el nuesu camín, faciendo la cabera cota del crestéu, col Llarrano Puntea (981 m), onde había una plaquina n'alcordanza d'un montañeru del Baskonia, pa descender a la fín a les cabañes de Llarrano.

Equí, podríamos siguir camín con otru guapu crestéu hasta'l Anboto, pero como ya lu teníemos fechu d'otra Xuntanza, tocaba siguir per un senderu clarísimu hasta Asuntze, onde los más cagaprises ya taben tiraos nel prau, al igual que parte del grupu (Txutxi, Angel y Loli) qu'ascendieren al Urkiola Mendi y baxaren al puntu d'alcuentru.

Baxaremos hacia Atxarte ensin dexar de mirar el percorríu de la guapa canal de Kokuzkulu

Magar de la xinta, recuperación de llíquidos col agua ferruñosa d'Asuntze y casi siestina nel prau, tocaba tornar hacia Atxarte y con munches ganes, ya que'l calor taba siendo casi insorportable. Coles mesmes entamamos a descender lo más apriesa posible, primeru pela riega Ibaia y llueu pegaos a la d'Atxarte.

Nun pararemos namái que pa echar un vistacín a la nuesa querida y esfrutona canal de Kokuzkulu y pa ponenos a la solombra embaxo de dalguna de les enormes fayes que dan pasu al tramu final que tien de dexanos n'Atxarte magar d'unes 6 hores de percorríu.

6 hores... que dexen un tastu a grandísima actividá, sobretou a los menos avezaos a andar n'arba nos filos de les crestes, y unos 10 km y sobre 1000 m de desnivel acumuláu, que faen finar la ruta ensin un escesu de cansanciu y con ganes de más... monte o folixa... según seya'l día.

Ruta totalmente encomendable... si tamos visita per Euzkadi.

Camudando'l Camín n'Atxarte