Atxarte (Durangaldea) - Alluitz

22 d'Abril de 2017

Track: Atxarte (Durangaldea) - Alluitz

Hai rutes, nes que según vas caleyando, ascendiendo, descendiendo, pasando les hores... nun yes a sintir otra cosa que plenitú. Plenitú total nel percorríu, plenitú total nel ambiente, plenitú total na belleza del llugar...

Y ye que nun pueu imaxinar, una ruta más perfeuta pa les hores de les que dimponíemos, ya que nes xuntances la parte montuna ye perimporante, pero tamién la parte folixera y tar nuna mesa d'alderique o tranquilamente nel pueblu de turnu tomando una cerveza, ye necesario enforma.

Poro, dar les gracies a Fernan y a Tito, por amosanos una ascensión entretenidísima, completa y que casi ensin querer faise hasta curtia de lo disfrutona. Agora, quédome cola sensación de que van tenelo complicáu p'alcontrar dalgo que lo supere jeje.

Puntu partida n'Atxarte (285 m)

Iguria (Durangaldea) - Udalatx

16 d'Avientu de 2012

Track: Iguria (Durangaldea) - Udalatx

Segunda actividá de la Xuntanza Asturvasca 2012-2013 y anque la ruta del día anterior, nun tuviera porque pasanos factura, camiento que lo duro de les condiciones meteorolóxiques, si que la ficieron más dura de lo que nun entamu taba progamada. Poro, hai que ver como se comporten los músculos y ver si la cena y bébora de la nueche anterior nun mos pasó factura, jeje.

Sabemos que tenemos un ventanu de bon tiempu, hasta la una más o menos, asína que sumáu a que la ruta ye mañanera, al tener que tar a les 3 en Basauri, naguamos por tener suerte y nun moyanos col frente que vien dende l'occidente.

Semeya de grupu n'Iguria (212 ms) col Udalatx detrás nuesa

La ruta da comienzu, nel barriu d'Iguria, perteneciente al guapu pueblu d'Elorrio y más en concretu al llau de la carretera y del ríu Zumelegi, teniendo en tou momentu vistes de los 3 cumales del monte Udalatx. Al grupu que durmimos na casa rural, sumóse Iñaki, vieyu conocíu ya de dalgunes entraes de Camudando'l Camín.

Avanzamos per pindies pistes col Udalatx na frente

Con un día friucu nel valle, pero col cielu azul y la esperanza de nun tener un día como'l d'ayeri, garramos una pista, na que podemos esfrutar de l'arquitectura de los caseríos vascos, qu'impresionen poles sos dimensiones y les amplísimes fachaes.

Pasamos per delantre de dellos caseríos como'l de Goikotxea

La pista ye perpindia y faínos alcordanos de lo camináu ayer, poníendonos casi en filera, sobretou cuando abandonamos l'últimu caseríu, el Goikotxea, nel que garramos ya un senderu embarráu, que llévanos hacia'l monte Santa Luzia.

Del colláu d'esti monte, tendremos un par d'envueltes per pistes forestales, nel que'l cimeru protagonista ye'l barru, enantes de garrar al fin, un pindiu senderu, nel qu'abandonaremos la viesca de pinos, pa metenos nun tarrén más de monte con caliza.

Xubimos hacia'l colláu y foyos d'Allargain Haitza

Esto será un aliviu, ya que los tramos de pista, taben faciéndose pesaos y les pates cansaes nun furrulen bien nestos casos. Tan bien sentó'l cambiu de tarrén, que Paula, que diba tocada na parte baxa, animóse con xeitu a querer facer tol cresteríu del Udalatx coles sos 3 cumes.

Ún de les coses bones de los grupos grandes, ye que sigún les ganes d'aventurase, puédese escoyer la opción cenciella o lo más complexa. Nesti casu, siguimos les ganes de Paulina, Fernan, Iñaki, Bittor, Charly y yo, yendo pela faldera'l monte, Juanan, Amaia, Pangua, Rebe, César y Oscar.

Perguapes vistes del Anboto

Asína que, dende esi colláu y foyos d'Allargain Haitza, onde separtámonos en dos grupos, ponémonos a ascender sele, hacia'l primer de los cumales del pequeñu cordal del Udalatx, de cuyo nome nun quiero alcordame o meyor ye práuticamente imposible d'alcordase, jeje.

L'ascensión?? Pues una maraviya, per un amiestu de yerba y caliza, cola inclinación perfeuta pa nun cansar y con una cueva de frente pa tar entreteníu y col Anboto detrás, con un cielu azul perguapu, que solo valía pa parar a facer semeyes una tres d'otra.

Dámos-y con ganes hacia'l cresteríu del Udalatx

El nome del cumal?? Pues, nómase el Atxaurrutxugane, jaja. Fácil de quedase con él. Camiento que Fernan, repitiómelu 5 o 6 vegaes y nun yera a caltenelo. Colo cenciellos que son los nomes asturianos... la llomba del nun se que, la cabeza nunseonde, el picu la nun se cuanto, jeje.

A tou esto, al pocu de facer el cumal, vemos qu'Oscar guió mal al grupu d'abaxo y sin querer taben toos casi a metá d'ascensión, poro César acabó xuniéndose al grupu nuesu demientres que los demás, tornaron so los pasos p'alcontrar de nuevu la bona senda.

Primer cume: Atxaurrutxugane (966 ms)

En fin, dexamos el Atxaurrutxugane y los casi mil metros que tien, pa meténos na parte más esfrutona del día, el tramu pente esti primer cumal y el segundu, el Erdikoatxa. Pa ello, tendremos una primer baxadina a un pequeñu colláu, con dalgún destrepe bien prestosu, pa llueu tornar a tocar caliza, n'ascensu con pequeños pasos de trepe y otros con dalgún toque de patiu, pero más de cara a la galería qu'otra cosa.

Esfrutamos del tramu de cresteríu más prestosu del día hasta'l Erdikoatxa

Veo la cara de Paula y ta pasándoselo teta. Y eso que'l vientu ta entamando a molestar, garrando fuercia, lo que nun mos presta demasiáu, ya que les ñubes más llonxanes paez qu'acérquense aidaes pel vientu, poro semeya de cumal nel Erdikoatxa de 1019 ms y a correr.

Cumal del Erdikoatxa (1019 ms)

Ye tan guapa y cómoda la cresta del Udalatx, qu'unos vienen y otros se van, ya que César apaeció pa xubir el primer cumal y Charly, notó problemes de rodiella na baxada d'éstiy prefirió pasar del ascensu al segundu, garrando del colláu, el senderu que más abaxo, llevaba tranquilamente al restu del grupu.

Tramu cenciellu pero con fonda baxada hasta'l colláu

Nós, tuviemos una baxada muncho más llarga al colláu pente l'Erdikoatxa y el Udalatx, que de primeres quitó-y un pocu d'ilusión a Paula, ya que notóse dalgo cansadina. Aún así, con calma xunímonos al grupu al altor de la cueva de Mari, que paez ser que una especuladora, ya que tien lo menos tres llares n'Euzkadi.

La cueva del Udalatx de Mari

Col últimu esfuerzu, garramos la cabera ascensión del día y anque paecía más pindia y más dura a lo lloñe, al final, xubióse como si na, faciéndolo al llau de Pangua y de Rebe, que tamién diba cansadina la probe, anque nun se-y diba resistir la cota más alta del día, el Udalatx de 1107 ms.

Ascensión final al Udalatx

Son casi la una menos cuartu de la tarde y llevamos 3 hores de ruta esautes, y como non, pa la semeya de cume, apaecen les ñubes con ganes de tapecer el cielu azul y h.odenos un final como se merecía, anque nun mos quitó les ganes de sonreir.

Cumal del Udalatx (1107 ms)

De cellebrar la cume a picar dalgo hubo mediu segundu, ya que paecía que taba la xente con fame. Asína qu'un descansu garrando fuercies y p'abaxo que Fernan ya veía que nun díbemos llegar a Basauri, pa poder facer la merecía xinta de fin de xuntanza.

Como siempre tocaba tomar decisiones y Fernan dixo, que teníemos que baxar corriendo nós a polos coches pa dir buscar a tol mundiu al puertu de Kanpazar. Así, que tirámonos toos abaxo pela cresta SE, encabezando Iñaki y Fernan, y yo quédome un pocu atrás ayudando a los que pior se menean nestos tramos.

Baxada pel crestéu SE del Udalatx

Cuando quiero dame cuenta, Paula, que suel dir mui tranquila nestos casos, paez que garró confianza con tol crestéu y tira p'abaxo como una lloca, al igual que Fernan ya Iñaki, que suponse que tenemos que baxar per delantre de los demás. Asína qu'adelanto a tol mundiu nun destrepe y a correr, acabo'l final de la cresta con Pau y despedímonos de la xente.  

A partir d'aquí, la llocura... baxada a fueu, corriendo, per un tarrén amiestu de yerba y caliza pero embarráu... vamos lo más peligrosu qu'hai, teniendo munchísimes papeletes pa mancase pero bien.

Descensu a fueu mui peligrosu por mor de lo humedu del tarrén

Como exemplu de la baxada, pueu dicir que xente que muévese de luxo n'estes xeres como Iñaki y Fernan, vilos cayer de culu, tres vegaes caún, anque por suerte sin mayores problemes que manchase y dalgún dolorín al día siguiente.

Nuna de les baxaes más rápides que fice nunca, a pesar de lo malo y peligrosu que taba, aportamos a la cantera de Kanpazar. Pero esto nun yera'l nuesu final, ya que teníemos que faldiar per pista tol cordal, hasta los coches.

Pasamos pela cantera y puertu de Kanpazar y faldiamos pembaxu l'Udalatx

De tou esti tramu, pocu que cuntar, namái que les fuercies diben xustísimes y l'esmolecimientu pola xente que dexamos atrás, al ver qu'entamaba a orbayar, diba n'aumentu a cada cuartu d'hora y a cada rampa que xubiémos y que llueu baxábemos corriendo hacia'l coche.

Aportamos finalmente al coche, pelín enantes de les 2 y media la tarde y sin mudanos la ropa, despedímonos d'Iñaki que tenía que colar tamién y tiramos como llocos hacia'l puertu a recoyer a la xente, baxo una lluvia mui intensa.

Dicímos-y alón a esti guapa peña

Cuando finamos el tramu de rally hasta'l puertu col coche, entro nel chigre qu'había allí y alcuéntrome tan solo a Bittor, César y Pau, metíendose pal cuerpu una cervezaca, jeje. Ensín dexar de tar nerviosu polos demás, percorrióme nel cuerpu un chispazu d'allegría y d'arguyu, al ver que Pau, baxara colos primeros como una campeona.

Tamién ella amosábalo na so cara, anque la ruta costára-y dalgún día de cansanciu fonderu, sabía qu'esfrutó crestiando pela caliza y baxando casi corriendo nun descensu téunicu y abegosu enforma. Son les grandeces de la montaña, saber que siempre podemos dar muncho más de lo que creyemos.

Finalmente, unos antes y otros un pelín dempués, toos fueron llegando dando puntu final a esta ruta, na que personalmente fice 11 kms en pocu más de 4 hores y media, teniendo que superar un desnivel acumuláu de 1120 ms.

Camudando'l Camín nes crestes vasques

Urkiola (Durangaldea) - Anboto

11 d'Avientu de 2010 

Track: Urkiola (Bizkaia) - Anboto

 

Nun se mui bien como entamar esta entrada montañera, y ye que póngome a escribir, y namái que me xurden pallabres d'agradecimientu pa los nuesos collacios vascos, pol tratu, por ser tan bona xente, por... tou en xeneral. En setiembre del añu pasáu, conocíamonos Fernan y yo, al traviés d'esti blogue miu, poro d'ellí a anguaño, tanto nós mesmos, como los nuesos respeutivos collacios, fuimos algamando una amistá como si conocíesemonos de tola vida. 

 

Munches foron les rutes que ficimos xuntos na temporada montañera pasada, y pa esta debíamos-yos una visita a Euzkadi pa facer dalgo de monte pel so país y esfrutar de los sos paisaxes, montes y viesques pero sobretou de la so xente y d'un xeitu asemeyáu al astur na forma de sentir y tomáse la vida. Sacante d'esto, camiento qu'al contrariu de devolve-yos una visita, tenemos agora una deuda pergrande, por tolo que nos ficieron vivir nun fin de selmana cuanto menos difícil d'escaecer. Intentaremos prepara-yos dalgo que nun quede mui por embaxo del altor que nos pusieron, anque camiéntolo mui complicáu. 

 

 

Xuntanza astur-vasca nel puertu d'Urkiola (730 ms)

 

Asína pues, salimos de Xixón (a les 7 la mañana, más o menos), en dos coches Carlos, Simón, Cantarero, Pangua, Cesar (que ya ye miembru del GM Xuan de la Borrina) y yo. Teníemos por delantre un viaxe llargu, y como siempre dir en dos coches da pasu a torgues como perdese, distintos ritmos de pisá-y al pedal, parar a tomar dalgo más tiempu del debíu por culpa la camarera,... poro llegamos más bien pelín tarde. Así que los saludos de rigor foron rápidos, y garramos carretera pa empobinamos al puertu d'Urkiola, d'au entamará la ruta que sirvirá pa visitar ún de los montes más míticos d'Euzkadi, l'Anboto Mendi. 

 

A los ya conocíos astures, sumáronse na ruta, xente más que conocío por nós, como Fernan, Tito, Bittor, Juanan y nuevos collacios como la compañera de Juanan, Amaia y Germán, col que tuve falando durante un bon tiempín na ruta, aprovechando'l so valir montañeru y escalador. Magar les 11:30 entamamos a caleyar, partiendo del aparcaderu d'esti parque natural d'Urkiola, qu'a estes hores ya ta estráu de coches. Ye dalgo ablucante enforma'l sentir que tien el pueblu vascu cola montaña, y non solo ye qu'abulte sorprendente, sinon que da una envidia sana pergrande. Nós, un sábadu pela mañana, aparte de tar de resaca, de xuru que nun somos a quien xuntanos más de 2 persones pa dir al monte y eso teníendolo como gran afición. 

 

Con esto toi diciendo, que la sensación que me llevé, foi que los vascos van a la montaña por cultura de pueblu y eso ye preciosu. A lo meyor, el 90% de los qu'andaben esi día cola intención de xubir al Anboto, nun tienen un enfotu tan grande na xera montañera como yo, pero son capaces de quedar colos collacios pa xubir a dellos montes vascos, que con tal cantidá d'ascensiones nun día, tórnense en sagraos dafechu. 

 

 

Entamando a caleyar selemente

 

Pasín a pasu, vamos contaxiándonos d'esti espíritu, y ente'l día prestosu que facía, y falar de corríu colos collacios vascos, damos bona cuenta, per praos verdes, del primer finxu del día, el Urkiola Mendi de 1003 ms, el cual ye un mirador perfeutu del Anboto hacia'l norte y del Gorbeia (oxetivu del prósimu día) hacia'l Sur. 

 

 

Col Anboto detrás y una semeya perguapa de los valles d'Araba

 

   

Semeya grupu nel Urkiola Mendi

 

Unes semeyes dempués, Fernan entaínanos a siguir caleyando, ya que ta faciéndose tarde, asína que baxamos un pelín hacia la "Fonte l'Ortigal" ("asuntzeko iturria", como me lo curro eh!, Fernan, jaja), onde nos alcontraremos con un helicóteru de la Ertzaintza, que salúdanos pasándonos al rasu les tiestes. Ye lo que tien que nos xuntemos vascos y astures, que nos xixilen dende'l cielu... 

 

 

"Cola muerte nos calcaños" baxando del monte Urkiola

 

Pocu dempués xubiremos hacia un colláu (Anboto-Oste, literalmente parte trasera del Anboto) onde aniciaremos l'ascensu al traviés d'un fayéu ("Pago" ye faya) pelín abegosu, polos escalones de piedra, lo que fadrá d'esta fastera'l monte, la parte más difícil de la ruta, pero la que más sorprendíos dexónos, y ye que nun paramos en tola xubida d'atopanos xente y más xente baxando, y había tantes muyeres como homes,... inclusu esisten los grupos de muyeres soles nel monte,... jajaja. Alloriaos quedamos... 

 

 

Xubiendo pol fayéu ente bilordios y rises

 

Finalmente aportamos a la cresta l'Anboto en media hora llarga, por mor, d'una tranquilidá suprema na xubida, parar a ver como va la xente, falar primeru con unu, dempués con otru,... de xemes en cuando presta dir a la montaña a pasar el día, ensín tomalo como deporte dafechu, que ye quiciás la visión que más averase al mio pensar. 

 

 

Descansando na cresta enantes de la xubida final

 

Nel intre, quedábanos namái un pequeñu esfuerzu final, con poca cosa de trepe, que-y daba dalgo de diversión al propiu monte. Nesti casu, tol grupu menos Amaia, que quedóse con delles mochiles abaxo, xubimos aína, pa dar cumal a esti guapu monte de 1320 ms. 

 

 

Últimos pasos enantes del cumal del Anboto Mendi (1320 ms) 

 

Dos hores y 20 minutinos daben con nós, nesta mítica cume d'Euzkadi, na qu'esfrutamos más del bon rollu ente collacios, que de la propia montaña, asína pues, semeyina de conxuntu, y baxamos rápidu, pa xintar dalgo onde taben les mochiles y siguir falando de mil coses más. 

 

 

Semeya de grupu nel Anboto 

 

Darreu de la xinta, lo pensáo yera facer la cresta dende'l monte Anboto al Elgoin dando-y un puxu más a la ruta, pero Fernan, pensaba que yera tardísimu pa llegar al refuxu del Baskonia onde fadríamos nueche. Menos mal que Tito y German, tuvieron más testerones, y al final ficimos la cresta toos menos, Juanan y Amaia, Carlos que taba mancáu d'angüeñes y Cantarero y Cesar que tamién prefirieron baxar pol fayéu de xubida. 

 

 

Delles semeyes de la cresta del Anboto al Elgoin 

 

La cresta defechu, nun tuvo muncho de complexu, pero dalgún pasín aéreu, y dalgunu más de trepaduca, pusieron el toque final al preste de los cumales del Elgoin (1235 ms) y el Kurutzeta (1203 ms) como puntos más altos del crestéu. Apriesa, finamos la baxada p'alcontranos colos demás collacios, y ya per una pista forestal arrodiar de nueu'l monte Urkiola, hasta aportar al aparcaderu onde dexáremos los coches cuatro hores y media enantes. 

 

 

La verdá ye que los 11 kms de ruta foron suficientes pa un día, nel que nun paramos un segundu dende qu'a les 7 la mañana tábemos saliendo de Xixón. Poro, eses 4 hores y media de ruta, con 870 ms de desnivel acumuláu, diéronmos les ganes perfeutes pa tomar una merecía caña nel primer chigre qu'alcontrásemos dempués de mudanos de ropa. Magar del chigréu de turnu, y les despedíes de la xente que tenía que cumplir delles xeres familiares y nun venía pal refuxu, tornamos a garrar el coche, y empobinamos poles carreteres vasques, hacia'l refuxu del Baskonia en Iondokorta. 

 

 

Nel refuxu del Baskonia Mendi Taldea 

 

Equí, ya si que quedámonos ensín pallabres, pa coles istalaciones que tien el Baskonia, pero sobretou col recibimientu y la cena que nos tenía preparada Mariano, al cual entre este fin de selmana ya'l sofitu que diónos na Travesera de Picos, vamos tené-y que facer un monumentu dende'l GM Xuan de la Borrina. La tarde-nueche que pasamos nel refuxu, nun pudo ser meyor, en tan bona compaña, con una cena tan bona y con tan bon ambiente. 

 

Que menos que poner nós, un par de caxes de sidra, de les cuales una voló esa mesma nueche col bon facer de los convidaos... Aún así, fuimos bonos, y a la una tábemos toos nes lliteres pa intentar como siempre durmir cola sinfonía davezu nos refuxos, el ronquido en do mayor... Al día siguiente inda teníemos más y meyor... 

 

 

Camudando'l Camín dende l'Anboto