martes, 29 de junio de 2010

Val.le (Somiedu) - Muria Brava - Pena Orniz - Cuetalbo

20 de Xunu de 2010

Track: Val.le (Somiedu) - Muria Brava - Pena Orniz - Cuetalbo



Un añu más, paez mentira, finamos la temporada montañera "oficial", tornando a Somiedu, si ye casualidá o non, nun lo se, pero como siempre, prestar, presta. Esta vegada les intenciones iniciales yeran dar preste a la Pena Orniz, mayor cota de conceyu de Somiedu, pero al final tovimos una ruta dura, llarga y mui prestosa.

Como ye vezu cuando vamos por Somiedu, partimos del barriu de L'Outeiru pelín más arriba del pueblu del Val.le. Esta vegada'l sitiu de xuntanza y almuerzu sería na Pola, capital de Somiedu, onde nos xuntamos Simón, Carlos y yo, con Pangua, que venía direutamente. Pa llegar la Pola dende Xixón, garramos autovía en direición l'ocidente astur, hasta Pravia, onde tomaremos la As-16 hasta Cornellana y ehí, ya la As-15 y As-227 hasta Balmonte Miranda, pa siguir pela mesma carretera hasta Auguasmestas onde éntrase al fin nel conceyu de Somiedu, pa pasar polos pueblos de Xadriz, La Riera, Recueva, Castru y al fin a la capital, onde nuna carretera ascendente arríbase al Val.le.

Partiendo del barriu de L'Outeiro nel Val.le

Como dixe enantes, partimos d'un pelín más arriba del Val.le nel barriu de L'Outeiro onde hai un aparcamientu bien grande, anque si nun se molesta y hai sitiu, pue dexáse pelín más arriba nel cruce de Las Duernas, eso si, hai que ser curiosu dexando'l coche qu'hai tránsitu ganaderu y lo primeru ye lo primeru.

La ruta hasta'l L.lagu nun la voi comentar ya que fízelu l'añu pasáu na ruta a los Albos: Val.le (Somiedu) - L.lagu del Val.le - Picos Albos - L.lagos de Saliencia. Prefiero comentar l'atuendu que nos traxo Simón, que nun debió d'alcontrar un pantalón más llargu en tol decathlon y dexónos una semeya pa l'alcordanza. Tenía que dicilu, porque tuvimos riéndonos un bon ratu en tola ruta, jeje.


Simón "Livingstone" y sus pantalonzucos y el murallón d'Orniz

En tol camín al L.lagu fuimos viendo'l nuesu oxetivu frente a nós, viéndolo bien lloñe, pero güei tenía que cayer, asína que fuimos dando zapatu, p'arribar en hora y pocu a la oriella mesma del l.lagu. Ellí xintamos dalguna barrina cereales y empobinámonos al traviés d'un senderu que va xubiendo pela falda de los Albos hacia lo que nómase como Las Duernas, poniéndonos ensín dificulta a unos 1770 ms. Ellí ya acolumbrábemos, tol paisaxe de Las Morteras, el cuál axunta vegues verdes nesta dómina, con continues llombes y h.oos dando una forma de paisaxe llunar ablucante. Perdese equí ye mui fácil, así qu'hai que tener bien nidiu a onde nos diriximos.


L.lagu'l Val.le y Pena Orniz dende La Mortera'l Val.le


Vega bien prestosa y robezos na Mortera

Dempués d'alcontranos con dellos robezos, dalgo esmolecíos pola nuesa presencia, siguimos camín en direición al primer dosmil del día. Esta ye una llomba de pocu valor montañeru, pero que venía bien nel averamientu a la paré d'Orniz. El picu'l Val.le Calabazosa de (2010 ms), diba ponenos na posición perfeuta pa decidir cual diba ser el siguiente pasu: Si averanos al colláu de la Cuerria pa entamar el crestéu de la Muria Brava o tirar direutamente a la Vegadona, colláu que nos sirviría pa xubir a Torre Orniz y Pena Orniz.


Xubiendo al Picu'l Val.le Calabazosa
(2010 ms) y Los Albos dende esti


La decisión dependía de les fuercies de la xente ya que la ruta podría tornase mui llarga, pero mis poderes de convencer y meter en xareos a la xente sorpréndenme enforma, jeje. Asína que, tiramos a pola cresta de la Muria Brava, qu'entamaba cola primera ascensión al Cuetu Crespu.


Cuetu Crespu y la Muria Brava


Bien ceo averámonos al colláu de la Cuerria, pero ensín llegar al mesmu, entamamos a trepar direutamente al Cuetu Crespu, ensín mayor dificultá a pesar de tener dalgunes parés bien guapes, como a la que me pegué yo, pa sacar una semeya y dime una hostia como un campanu, ya que desprendióse l'agarre de la mandrecha y cayí a plomu hasta una terracina. Nun foi amás, l'asuntu pero'l sustu y la raspada col brazu drechu a la grieta nun me la quitó naide. Esto fízome tar sollerte de que la roca nun yera de bona calidá, poro anduve más precavíu de lo normal tanto nes mios aciones como no que taben faciendo los mios collacios.


Trepando al Cuetu Crespu (2044 ms) y enriba d'él cola Muria Brava detrás

Sacante d'esto, los demás xubieron ensín mayor dificulta per una grieta más fácil, y alcontrámonos enriba nos 2044 ms onde quedamos ablucaos colo "bravo" de la Muria Brava y so cresta compuesta por una paré vertical e inclusu de pendiente negativa en delles zones, que facíame duldar sobro la conveniencia de la decisión tomada facía media hora nel picu'l Val.le Calabazosa.

D'otramiente, si dalgo llevamos deprendíu nestos años, ye a qu'hasta que nun te metes nel propiu terrén o roca nun sabes que salides vas dir alcontrando a cada pasu. Poro, encomencipiamos a trallar pela roca, al traviés d'una cresta mui llarga y na qu'había que dir tomando decisiones poquín a pocu, con dalgún pasu espuestu y mui aéreu, nel qu'había qu'andar con muncho curiáu.


Hacia la Muria Brava y pasu h.odíu na so crestería

En tres hores tábemos nel Cuetu Crespu dende que saliéramos de L'Outeiru, y media hora más poníamos nel cumal de la Muria Brava a 2123 ms, que fae d'elli la cuarta cota de Somiedu. Equí ya víamos más cerquina'l nuesu oxetivu cimeru, Torre Orniz y dempués la Pena Orniz.


Nel cumal de Muria Brava (2123 ms) agüeyando La Muela, Torre Orniz y Pena Orniz


Baxamos d'esta pequeña cume, onde nun teníemos sitiu nin pa facer una semeya conxunta y enantes d'agüeyar la Torre Orniz dende'l colláu de la Verderona, alcontrámonos con un dosmil bien prestosu de facer, La Muela.

El nome-y vien que nin pintáu, ya que ye un rocón de parés llises, pero guetando un pocu vimos per onde xubir y trepamos toos menos Carlos que ya taba pelín cansáu. Les semeyes del cumal y la posterior destrepada son bien guapes dende baxo.


Na Muela (2120 ms) y destrepando d'ella


Agora ya sí, dende la Verderona tirábemos bien decidios a por Torre Orniz, pero metímonos nun mal camín y tuvimos que dar la vuelta, baxando pegaos pola so manzorga, y faciendo una travesía que nos dexase na metá ente la pena y la torre. Ellí ya, col l.lagu Congosto debaxo nuesa, entamamos a xubir con cierta distancia ya que Simón y Pangua diben por delantre y Carlos y yo, quedámonos un pelín per detrás, cosa que resultó permal, ya que con dellos metros por enriba nuesa, una llábana de espeutaculares dimensiones desprendióse de los pies de Pangua, y baxó esnalando hacia nós.

Nun foi un momentu mui agradable, nin muncho menos, ya llevábemos con esa pallabra de "piedra", tol día, p'avisar que cayía dalgo, pero siempre piedres pequeñes, que sí, que te pueden dar na tiesta y h.odete finamente, pero esto nun yera una piedrina que garró velocidá, yera una peñona d'una tonelada lo menos, que bien nos pudo aplastar. Yo tireme pa la esquierda a toa velocidá y llibreme polos pelos, porque cuando venía hacia mía lo facía nel aire, dempués d'un viaxe escontra otra roca que la partió en dos que se dirixieron hacia Carlos. Tovía nun se como fizo pa que-y pasáse una per ca llau, y que nun-y rozaren siquiera. Con dos güevos Charly.


Simón deleitándonos col pantalonín, jeje na xubida al cumal de Torre Orniz
(2181 ms)


Torre Orniz (2181 ms), camiento que será alcordada durante munches de les rutes postreres. Ehí tornamos a ñacer, y por ello, pelín blancos inda, ficimos semeya de rigor y tiramos el cortu crestéo a la Pena Orniz, onde descansamos, xintamos y nos relaxamos tolo posible. Esta pena de 2195 ms ye la mayor cota de tou Somiedu y les sos vistes bien pagan la pena, anque la so collacia, Torre Orniz, diéranos el mayor sustu de la nuesa vida.


En Pena Orniz (2195 ms) sanos y salvos cola ablucante Mortera debaxo

Dempués de 5 hores de ruta, fartucos de caleyar y de xintar decidimos tirar tovía hasta'l Cuetalbo, ya que nun tenía nenguna dificultá, y diba servinos pa garrar bon camín de vuelta'l coche. Así que baxamos de la Pena, y al llegar al colláu Orniz, xubimos a un piquín de 2049 ms qu'hai nel propiu colláu pa llueu crestiar, ensín dificultá hasta'l Cuetalbo demientres acolumbrábemos debaxo nuesa les fuentes del Sil.


Nel Picu'l Colláu Orniz (2049 ms) col Cuetalbo al fondu


La Pena Orniz
y Charly(gracies por toles semeyes) dende'l Cuetalbo (2074 ms)

Cansaos pero gayoleros, facíamos les 6 hores de ruta magar d'esti picu de 2074 ms, nomáu Cuetalbo, y ya "solo" quedábamos baxar y baxar. Esta vegada, la baxada sería bien guapa ya que teníemos que pasar por una braña típica vaqueira como yera Murias L.longas, pero enantes dexábamos a la nuesa mandrecha, pa otra ruta los Picos de la Mortera, ya que nun lo dábamos nin de coña. Pa otra quedarán, casi de xuru, qu'acompangaos de Pena L.lana.


Dexando de llau los Picos de la Mortera (pa otra serán)

El pasu pola Braña de Murias L.longas (non mui bien conservada), dionos una sorpresina más, al agüeyar dellos robezos pastiando selemente xunto a vaques. Una semeya bien curiosa que nos ufrez esti increible conceyu de Somiedu.


Robezos y .... na braña de Murias L.longas casi la mesma axilidá, jeje

La parte final de la ruta, faese al traviés de lo que se conoz como la ruta a la sombra hacia'l L.lagu, así que nun hai perda y siempre anque fáigase pesada y llarga, val pa comentar prósimes rutes, dicir lo cansaos que tamos, y riínos, agora sí, de la "piedra Orniz" que mos pudo aguar la ruta, siendo positivos.


Que lloñe queda Muria Brava y Pena Orniz ya
dende esti teitu del Veneiru

Bono, como dixe al entamu de la ruta, esta foi la cabera ruta "oficial" del GM Xuan de la Borrina, asína que los "borrinos" despedímonos hasta setiembre con una nueva temporada montañera, anque ficímoslo a lo grande con 8 h y media de ruta, 22 kms y 1520 ms de desnivel acumuláu.

Poco más que dicir, qu'esta foi otra gran temporada, y que'l nuesu nivel de montañeros va ganando puxu y calidá poquín a pocu, algamando desniveles perimportantes y rutes llargues y en dalgún casu dificultoses.

Agora namái quédanos plasmar esi nivel na nuesa I travesera integral de Picos, que fadremos en breve nos prósimos díes, pero esa ye otra hestoria. Saludos a toos y toes.


Camudando'l Camín dende Somiedu


Nesta ruta ficimos 8 dosmiles de Somiedu: Pena Orniz (2195 ms) como primer cota de Somiedu, Torre Orniz (2181 ms) como tercer cota y la Muria Brava (2123 ms) como cuarta, asína como La Muela (2120 ms), Cuetalbo (2074 ms), Picu'l Colláu Orniz (2049 ms), Cuetu Crespu (2044 ms) y el Picu'l Val.le Calabazosa (2010 ms)
Ver progresos en: Retos montañeros

1 comentario:

  1. una gran ruta, un rutón tio y la verdad ye que nos libramos de milagro de una buena pedrada.
    Ya hay ganas de que empiece la proxima temporada.

    ResponderEliminar