Pandecarme (Cangues d'Onís) - Asturianos - Canal Parda - Traviesos - H.orcada Miguel - Mesones - Caín (Valdión)

8 de Xunetu de 2010

Track: Pandecarme (Cangues d'Onís) - Caín (Llión)

Son les 5 de la mañana ya inda nun alboreció. Dempués d'una nueche ensín práuticamente durmir, tengo que llevantame pa facer, quiciás, lo que más ilusión m'aportaba de tol añu. Ya son unos meses preparando'l retu montañeru del añu y a la fin llegó, asína que tiro a duchame colos güeyos hinchaos de la mala nueche que pasé, y garro tolos trastos que preparé'l día anterior, pa pasar cuatro díes travesando la fastera d'Asturies más agreste, guapa y dura: Picos.

Metémonos nel coche, Toni, Simón y yo, col maleteru a reventar de mochiles, y tiramos pa Cangues d'Onís, pa desayunar y xuntanos colos collacios vascos (Fernan, Bittor y Mariano), Pangua (que llega sobáu sobremanera, jeje) y Cesar y Jose, que ya durmieren en Cangues pa nun madrugar tanto.

Dempués de los saludos y abrazos y del desayunu de turnu, empobinámonos con emoción, al menos yo, al puntu de partida de la travesera: El parking de Pandecarme, bien cerquina de la vega Enol. Nun ye la primer ruta que tien esti entamu: Mirador d'Ordiales - Picu Cotalba, asína que xubimos rápidamente a los Llagos de Cuadonga, y garramos la pista que sale del colláu Les Veleres hasta Pandecarme.

Faciendo los preparativos pa salir de Pandecarme

En Pandecarme escoyemos lo necesariu pa meter na mochila d'ataque, ya que por suerte nun tuvimos nesta primer estaya que cargar cola mochilona pa varios díes. Nunca agradeceremos lo suficiente a Mariano pol llabor que fizo nesta travesera faciendo de furgoneta-escoba con tolos participantes.

Al fin partimos del parking, facemos un camín perconocíu, como ye la ruta a Vegarrionda, pasando pol Pozu L'Alemán, la vega'l Güertu y la vega la Piedra, enantes de xubir pola canal de Canrasu hasta la Rondiella onde les vistes de los picos más altos del Cornión, y sobretou de Peñasanta d'Enol, faénos escaecer el calor reinante, qu'a les 9 de la mañana tábemos soportando.

Pasando pola Vega la Piedra y nel colláu Gamonal tres xatinos con Vegarrionda detrás

Caleyamos un pelín más, ya agüeyamos el refuxu de Vegarrionda dende'l colláu Gamonal, estráu de vaques, nesta domina del añu. Pasáu'l refuxu tenemos una fonte onde cargar d'augua, tema perimportante pol calor que facía, y porque en picos nun abunden les fontes onde atopar refrescu y la deshidratación ye de lo más peligrosu.

Xubiendo la Llampa Cimera col Porru Bolu y del colláu la Fragua hacia H.ou Santu

Pasamos l'antiguu refuxu, y a partir d'equí'l camín faese más pindiu, ya que tamos ganando altor pola Llampa Cimera, anque les vistes de dellos picos, qu'atópense casi inacesibles como'l Porru Bolu, faennos más pensar en como da-y preste dalgún día que nel desnivel que díbemos superar hasta'l colláu la Fragua (1915 ms).

Nesti colláu, dexamos a la manzorga'l Porru L'Altiquera y avanzamos paralelos a los Argaos en direición a Peñasanta y a la so Aguh.a, dafechu complicada dende la nuesa posición, pa posteriori torcer un pelín a la manzorga y facer una travesía ensín perder altor hacia'l H.ou de los Asturianos. Nesti camín, tenía un 2000 sin muncha importancia, pero taba tan cerquina que hubo que tiráse a por él, así que Simón y Pangua, diéronme compangu y ficimos cota na Xunciana de 2020 ms.

La Xunciana (2020 ms) y el grupu Peñasanta-Cebolleda

Baxamos lo más rápidu posible, y xuntámonos colos demás collacios, col güeyu puestu nos tres oxetivos del día (aparte de llegar a Caín) que yeren les Torres de los Asturianos, la Canal Parda y Los Traviesos (en dalgunos mapes como Travieses, o L'Alba).

Los 3 oxetivos ya nel puntu mira

Dempués de travesar el H.ou de les Cuestes, xusto enantes de metenos nel de los Asturianos desviámonos a la esquierda, pa entamar la xubida a la Torre los Asturianos (que gran nome h.oder, jeje). La xubida faise pola so vertiente más norte intentando evitar les parés más abruptes, y nun momentu vese a les clares una especie de canal que parte'l picu. Simón y yo, xubimos per esa canal, y arrodiamos les peñes más difíciles, pa finar xubiendo pola cara sur, y arribar a una primer cume, qu'a la fin sería la más alta de les dos. Los demás del grupu, xubieron esáutamente pol colláu que separa Los Asturianos de la Canal Parda, y esa mesma vía utilizamos pa baxar toos.

Esguilando na Torre de los Asturianos (2278 ms) y nos dos pequeños cumales

Yera'l nuesu primer picu de la Travesera dempués de casi 3 hores de ruta, ya esfrutámoslo como tenía que ser, dándonos dalguna trepadina bien curiosa hasta los sos 2278 ms d'altor. Nun tuvimos demasiáu n'él, a pesar de les bones semeyes de Peñasanta qu'ufrecía.

Baxando de la Torre Los Asturianos

La baxada pola fastera de la Canal Parda, diónos a Simón y a mi pa pescanciar, que los demás del grupu tamién lu pasaron bien trepando pa xubir, jeje. La baxada axuntóse rápidamente a una nueva xubida a la Torre la Canal Parda, qu'al traviés de varies trepaes ensín demasiada dificultá pero mui prestoses (como la placa de la semeya), pusiéronmos nel cumal a 2356 ms.

Trepando a la Torre la Canal Parda (2356 ms)

Darréu de tar un ratín, nel cumal teníamos por delantre toa una baxada pola arista de la Canal Parda, empobinándonos al caberu retu, La Torre los Traviesos, a la que nuna xubida pindia y mui tendía llégase con cansanciu pero ensín dificultá, dempués de 4 hores y diez minutos.

Cumal de la Torre los Traviesos (2389 ms)

Tamos nel nuesu másimu altor del día (2389 ms), qu'amuesen vistes y paisaxes ablucantes dafechu. Da lo mesmu pa onde mirásemos, que nun tien desperdiciu, ya sea mirar pal H.ou de la Canal Parda y H.ou de la Capilla en direición los llagos d'Enol y la Ercina, o mirar el H.ou Santu y enriba d'él, el murallón de Peñasanta Castiella, o intentar dixebrar cada torre y picu del grupu de Peñasanta d'Enol, o los Urrieles na direición contraria con dellos picos más del Cornión debaxo,... da igual pa onde se mire ya qu'enamora de xuru.

Cumales del Cornión mirando pa los Urrieles

Peñasanta Castiella y cumales del Cornión

Magar de picar dalgo tranquilamente, dábemos pasu a lo desconocíu, nun teniemos mayores referencies de lo que queríemos facer. La intención yera baxar hacia la H.orcada Miguel y al traviés del H.ou tras Piedras Lluengas, enllazar cola canal de Mesones, ensín tener que dar tola vuelta al H.ou de los Asturianos, H.ou Santu, Boquete y canal de Mesones, dando una vuelta llarguísima y perdiendo munchísimu tiempu.

Baxando de la H.orcada Miguel al H.ou tras Piedras Lluengas

Nos díes anteriores, confirmáronme la posibilidá en Foropicos, asína que tirámonos a ello, y baxamos de los Traviesos a la H.orcada Miguel, pasu que queda ente'l Porru La Capilla y el Tiru La Llera, pa siguir baxando nesti casu pola ñeve, dexando siempre a la nuesa drecha los picos de Piedras Lluengas.

La baxada al final resultó llarga, pero ensín demasiaes complicaciones, sacante de dalgún resbariáu na ñeve, al dir en playeros de trekking. Dempués de trespasar dellos h.oos de tras Piedras Lluengas, y dalgún pasu de roca caliza, con destrepe fácil, aportamos al meyor mirador de Los Urrieles que nos pudimos imaxinar. Al pie de los Picos de la Robliza y la Torre Blanca, descubrimos el sitiu perfeutu pa xintar, los Colladinos a 1861 ms d'altor qu'acolumbraben en tola so grandura, el macizu más escarpáu de Picos, Los Urrieles, distinguiendo a les clares, picos como Dobresengos, Cabrones, Torrecerréu, Llambrión, Frieru ....

Ablucante visión del Macizu Central o Urrieles

Con dalgo más de fuercies y poca augua nes mochiles, fizimos l'enllaz por debaxo de Piedras Lluengas, hasta la canal de Mesones, la cual a pesar de tener bon senderu marcáu, poro podíase baxar rápidu, fízose completamente inmensa ya inclusu desesperante, al ver abaxo, mui abaxo Caín. D'otramiente, hai delles fontes onde garrar augua fresco y como non el paisaxe ye increible dafechu.

Baxando por Mesones con Caín a lo lloñe

Casi diez hores de ruta daben con nós, nel pueblu llionés de Caín, dempués de travesar tol macizu del Cornión, esfrutar de cuatru cumales de más de 2000 ms, y d'un día de sol y calor, que paez ser sigún cuntábenmos xente de Caín, foi pior inda nel propiu pueblu que nos altores nos que tuvimos.

Les sensaciones del día, dempués de salvar 1915 ms de desnivel acumuláu de xubida y 2515 de baxada, foron más que positives, anque camiento que toos teníemos na tiesta'l prósimu día, y la incógnita de como diben furrular les pates. Por si acasu, meteles nes xelaes augues del Cares aidó muncho, al igual que descansar con unes cerveces na terraza del albergue. Algamar el descansu na nueche, ya foi otra cosa, ya que'l calor fizo mui difícil la xera.

Continuará.... na segunda estaya

A descansar nel Albergue

Nesta primer estaya de la travesera ficimos 4 dosmiles de Cangues d'Onís: La Xunciana (2020 ms), Torre de los Asturianos (2278 ms) y la Torre de la Canal Parda (2356 ms) y Torre de los Traviesos (2389 ms) que tamién formen parte del club 111 de PicosVer progresos en: Retos montañeros