lunes, 26 de julio de 2010

Travesera Picos (2009 - 2010)- Estaya 3: Vega Urriellu (Cabrales) - Morra Carnizosu - Collá Bonita - Moñetas - Vegas de Sotres (Cabrales)

10 de Xunetu de 2010

Track: Vega Urriellu (Cabrales) - Vegas de Sotres (Cabrales)



Llegaba'l "descansu", na travesera. Yera'l día más floxu, pero les fuercies entamaban a tar bien xustes y otra nueche ensín descansar demasiáu va faciendo que'l cuerpu resiéntase por too. Afortunaos aquellos que duermen onde seya, porque l'eternu descansu sedrá pa ellos, jeje. Los demás vamos batiendo la vuelta rápida a cada cuartu d'hora.

Sacante d'esto, el día yera atractivu enforma, ya que da-y la vuelta'l Picu, xubir a la collá Bonita, conocer el circu del H.ou Treselpicu, yera suficiente pal tercer día, y a ello sumarémos-y una llarga baxada por las Moñetas hasta las Vegas de Sotres.


Nel Refuxu de Vega Urrielu col Neverón de fondu

Dempués d'almorzar, el día convidábanos a desperezanos y caleyar con un cielu azul y abiertu, que facía a Llorienzu pegar ya dende bien ceo. Ensín más garramos con puxu, la canal de la Celada arrodiando a ún Picu, ya estráu de xente naguando por da-y preste.


Na Canal de la Celada

Nel nuesu casu, nun la vamos tomar hasta'l final ya que teníemos un oxetivu enantes, que nun yera otru que la Morra Carnizosu, qu'al llau de los xigantes d'al lláu quédase nuna llomba, pero sus 2122 ms, márquenmela como un finxu más nos 2000 de Cabrales.


Trepando a la Morra Carnizosu

Asína qu'abandonamos progresivamente la canal de la Celada, y vamos arrodiando la Morra, ganándo-y altor poquín a pocu. Lo más normal sedría siguir xubiendo, en direición a un colláu debaxu de la Torre Carnizosu, y llueu facer la cresta ensín nenguna dificultá. Pero como suel picame, Fernan y yo tiramos trepada en direición a la cresta, al traviés de varies diagonales, ensín mayor problema qu'esfrutar de la propia trepada.


Nun momentu de la trepada a la Morra Carnizosu col grupu Areneras-Albos de fondu


A la fin, esperamos a que llegasen a la cresta tolos demás dende'l colláu, y xubimos a facenos la semeya de grupu col Urriellu, tres de nós. Les vistes del Cuera, tolos picos qu'arrodien el H.ou Treselpicu o'l conxuntu Areneras-Albos yera impresionante, al igual que la Peñe Castil, la cual dexónos fai pocu un tastu agridulce al xubila con tan mal tiempu y nun poder agüeyar nada.


Nel cumal de la Morra Carnizosu (2122 ms) col Picu de fondu


Circu'l H.ou Treselpicu al sur y el Cuera al norte

Darréu, baxamos al colláu dempués d'una hora d'andar dende l'aniciu y vamos llibrando'l H.ou y les parés que lu formen, pa dir ganando altor pente pedreros con mayor o menor dificultá sigún el momentu. Eso sí, les vistes del Picu son ablucantes enforma, y esa vía sur direuta, dame unos glayíos a la oreya, que nun se pue aguantar más. Habrá que poner fin a ese sufrimientu col picu en cuanto que xurda la ocasión.


Avanzando hacia la collá bonita

Con tol camín a la solombra, vamos faciendo pasu bastante rápidu y metémonos na xubida final a la collá bonita, ente resbalón y resbalón poles piedres, y cola Aguh.a Martínez y la Torre de las Colladetas enriba de nós. La verdá ye que ye un pasu mui, mui guapu, y al arribar, ábrese ante nós un pronunciáu descensu hasta'l corte'l riu Duh.e y el macizu d'Ándara al fondu.


Xubiendo cola aguh.a Martinez xixilando enriba

Ya tábemos nel mayor altor del día a 2385 ms, y solo llevábemos 2 hores y media de ruta, poro'l restante diba ser mui duru, polo llargu del descensu y porque agora nun había picu, torre nin morra, que nos escondiese del sol. De xemes en cuando, y nesta travesera dímonos mui bien cuenta, les baxaes son muncho más dures que les xubíes, y los motivos d'ello van dende, la falta de motivación qu'hai nelles, el cansanciu de l'anterior ascensu y sobretou pola retención de cuadriceps que se fae, cargando tol pesu nes rodilles.


Na collá Bonita (2385 ms) descansando

Asína pues (amiestu astur-vascu, jeje), tuvimos de descansu un bon ratu, xintando dalgo y falando de mil coses, nes qu'incluyimos posteriores rutes a dalgunos picos que tábemos acolumbrando. Dotramiente, otros del grupu ya taben atalantando una retirada a tiempu como posible vitoria, ya que nun diben demasiáu finos col pasar de los díes.


Descendiendo de la collá Bonita

Magar del descansu, entamamos la baxada con curiáu ya qu'al igual que la parte de la xubida a Bonita, la baxada tien roca suelto, y la pedrada de turnu al d'abaxu ta nel menú del día, asína que más val andar polo segáu.


Santana, Tiro Santiago y Tiro Navarro na primer semeya y Los Campanarios na segunda

Peña Castil y Cuchallón de Villasobrada

Como'l caminar na baxada nun ye pa tirar voladores, hai que distrayese colos paisaxes, los picos a dixebrar y los robezos qu'anden tol día enfriando'l culu nos neveros qu'inda sobreviven nesti macizu central.


Los robezos asitiaos nos neveros pa enfrescar un pelín

El camín a siguir hacia'l valle las moñetas, a dicir verdá nun ta demasiáu nidiu, a pesar de contar con dalgunos h.itos, y desviáse de la ruta preestablecía ye mui cenciellu por mor, de los milenta h.oos, llombes, etc... toos iguales. Así que pa dar un pelín d'emoción na baxada, tres de los diez del grupu tiraron pela manzorga na baxada d'una llomba y los demás pela mandrecha, y el resultáu foi nun volver a venos hasta Las Vegas de Sotres.


Valle de las Moñetas dende riba y baxo

Les distintes llamaes pel móvil y a glayíu llimpiu foron munches, así como les xubíes a llombes pa ver si nos veíemos, esperes pa ver si diben per detrás, etc... pa finalmente siguir baxando cagándose en too, xintar a mediu camín de mala hostia, hasta atopanos nas Vegas de Sotres, 4 hores y media dende la collá bonita, y probáblemente 2 hores y media dende que nos separtamos.


Las Vegas de Sotres y el riu Duh.e que les baña y a nós tamién, jeje

La cosa nun foi a más, y a pesar de mi mala hostia conocía pa estos casos, como ellos taben mui tranquilos cuando llegamos, pues dexóse'l comentar la xugada con unes cerveces en Sotres. Eso sí, enantes tuvimos un percance non esperáu y mui gratificante, como foi que'l Riu Duh.e tuviere d'un calecer pocu normal y les sos poces nesta vega, díesenos una sesión de spa, bañu y masaxe dignu de 3 díes al traviés de Picos.

A la fin, esta xornada de descansu, finó en poco más de 7 hores de ruta, na que descendimos 1440 ms y tan solo xubimos 580 ms d'acumuláo nos 8,4 kms en total. Lo corto de la ruta diónos pasu con mui bon gustu, a una tarde en Sotres, despachando xarres de cerveza como sinon costare y cenando nun chigre del pueblu, pa dir ya de nueche a vivaquear a les propies Vegas de Sotres.

Continuará.... na cuarta y cabera estaya

Nesta tercera estaya de la travesera ficimos 1 dosmil de Cabrales: la Morra Carnizosu de 2122 ms

Ver progresos en: Retos montañeros

6 comentarios:

  1. Realmente te entró muy mala hostia.!!!!!!
    Menos mal que también se te pasa rápido!!!!!!
    Camudando'l camin aurrera.

    ResponderEliminar
  2. Bah, el tema ye que pasa nun día de ñebla o dalgo así, y la liada pue ser de coyones. En fin, nun foi amás, porque nun tenía razón de ser. Y ye verdá a mi los cabreos se me van en nada.

    Ye que la ruta nun tenía muncho que comentar y había que poner dalgo, jeje

    ResponderEliminar
  3. Inmejorable broche final .. la subida ala Collá Bonita no la conozco y le tengo muchas ganas.
    Y non ye bueno enfadase Berto....
    Saludos

    ResponderEliminar
  4. Gracies Jonatan, pero inda nos queda un día y fue bien guapu, jeje.

    y lo d'enfadase ye por responsabilidá na montaña, non por otra cosa, jeje.

    Nun foi nada, una anécdota namás.

    ResponderEliminar
  5. Hola.

    Muy guapa la ruta. Fue una pena no ver el post en foropicos hasta hoy. También he descubierto, gratamente, tu blog. De Picos conozco poco y el 27-7 subimos 4 amigos. Ibamos a hacer Sotres- Vega Urriellu- Collada Bonita- Moñetas- Vegas de Sotres- Sotres; pero al conocer la zona sólo por reportajes se nos ocurrió preguntar en el Ref... y nos debieron ver flojillos para los pedreros y el laberinto de las Moñetas y nos enviaron a dar una vuelta enorme por Horcados Rojos, Aliva, etc. Al final nos salió una ruta de 13 h.

    Si me pudieses pasar el track para el dia que me vuelva a animar... te estaría muy agradecido.

    Saludos

    ResponderEliminar
  6. Munches gracies Aventura40. Al final me paez a mi que vos embarcaron nel refuxu, porque si llegáis facer lo que teníes en mente diba salir en menos tiempu de xuru.

    El track, como siempre lo ties al entamu de la entrada del blog, como en toes les entraes, debaxu de la fecha y enriba de los mapes.

    Un saludu y que te preste'l blog

    ResponderEliminar