viernes, 10 de agosto de 2018

Xuntanza Asturvasca 2017 - 2018

21, 22 Abril de 2018

Un añu más, aportando Abril, preparámonos pa la Xuntanza Asturvasca (Eusko-Astur Biltzarra) y esti añu, llegamos a la conclusión de que tamos peragustos nel refuxu del Baskonia Mendi Taldea y poro, aceptamos el convite de cellebrar la Xuntanza, dos años siguios nes sos instalaciones.

Tamos falando de la octava xuntanza y segunda consecutiva n'Euskal Herria, teniendo añu tres añu, xente nuevo nestes hestories, tanto pela parte asturiana como pela parte vasca. De toes formes, siempre acabamos xuntándonos un bon garrapiellu de montañeros con ganes de conocer monte seya onde seya y eso ye lo que cuenta.

Preparaos pa la primer actividá de la Xuntanza en Madaria

Sábadu 21 d'Abril
Como siempre que vamos a Basauri, quedamos nel polideportivu, llegando esti añu pelín más tarde de lo normal, poro namái aportar, tenemos qu'arrancar hacia l'allugamientu que tien de llevanos hacia los montes d'Urduña.

El pueblu escoyíu pa entamar la ruta sedrá Madaria, onde tendremos de meter más trastos de los normales pa les nueses xeres montañeres, ya que vamos alcontranos, los que nos veamos con ganes pa tales hestories, con una ferrata, dalgo artesanal, pero una ferrata al final y mui divertida.

Madaria (Araba) - Ungino

Refuxu del Baskonia en Iondokorta

Magar del monte, tocaba mudase un puquiñín de ropa y dir a tomar unes cañes, txakolís o lo que meyor viéramos nel pueblu d'Urduña. Un par de chigres nos que tuviemos tiraos na cai, cola mayor de les calmes, valiónos pa decidir que tocaba dir un añu más hasta'l refuxu del Baskonia en Iondokorta.

Nun voi falar de la carretera pela que nos tocó dir, porque madre mía qu'afición a los badénes tienen per Bizkaia, jaja. Aún así, conocimos un montón de pueblos nos que sorprendióme l'ambiente qu'había en bien de restaurantes al pasu de la carretera.

Tradicional colocación de banderes nel refuxu

A la fín, aportaremos a Iondokorta y sucederánse los milenta abrazos, presentaciones de los nuevos y la relaxación de sentase y charrar nun llugar nel qu'alcontrámonos como en casa. Por turnos, diremos duchándonos, tomando unos culinos o cerveces, hasta que llega como tolos años l'apoteósica cena que nos brinden los munchos encargaos de la cocina.

Y ye qu'unos guíenmos a conocer montes y otros faen un trabayu increyible, que cuando llegamos al refuxu ya tienen casi tou preparáu y sólo podemos convida-yos a dellos culetes de sidra escanciando durante'l tiempu que faiga falta.

Domingu 22 d'Abril 

Un añu más, la cena y la postcena, fueron un éxitu y eso indica que'l domingu llevantámonos más bien resacosos. Poro, almorzaremos con cares mui pocu despiertes, ya incluso hai xente del nuesu grupu que nun ye nin a llevantase pa facer la rutina del domingu.

Segundu dia preoparaos pal paséu pel parque del Gorbeia

Con munchos de los montes de la redolada nel bolsiellu, Gorbeia, Aldamin, Lekanda... los nuesos collacios del Baskonia tuvieron qu'inventar una rutina que nos valiese un pocu pa sudar les bébores espirituoses de la nueche anterior.

Iondokorta (Bizkaia) - Azero

Magar de la ruta, nun hai res, que más preste que sentase a charrar cola xente, tomando una cervecina qu'equilibre'l cuerpu fuera del refuxu. Llueu de mudanos de ropa y los más llimpios duchase, compartiremos una vegada más mesa los miembros del Baskonia y del Xuan de la Borrina.

Xinta de despedía de la Xuntanza Asturvasca 2017-2018

Si hai coses que nun fallen, son los clásicos caparrones vascos y una vegada más vamos esfrutalos enforma. La fartura, les rises y el bon ambiente ya ye un clásicu, teniendo l'únicu problema en non poder pasase nin un pelo col vino, que tan bien fai compaña a esta xinta.

Darréu, vendrán les despedides, los planes pal añu que vien... que por desgracia o muncho cambien les coses o estos probitinos del GM Xuan de la Borrina, nunca nun sedrán capaces de devolve-yos el bon tratu y bon refuxu onde convidalos a pasar un finde montañeru asemeyáu.

Hasta l'añu que vien... seya onde seya... pero con tan bona compaña de xuru

Xente astur que vieno a disfrutar: Raúl, Carlos, Benjamín,, Montse, Pepa, Jose, Cantarero, Haritz, Jenni y Berto.
 
Xente vasco que trabayó y tamién disfrutó:
A la cocina Pedro y Edurne como xefes, cola aida d'Iñaki y Aitor, collaborando Raquel y los pinches de cocina: Mariano, Oscar

En la parte montañera del Ungino: Fernan, Paco, Juanan, Amaia,Txemi, Jose y Txetxu

Al Azero sumáronse a la compaña: Kike, Aurea, Bittor, Jose Antonio y Bea

No hay comentarios:

Publicar un comentario