Track: Madaria (Áraba) - Ungino
Tamos participando un añu más na Xuntanza Asturvasca 2017-2018, quedando a una hora moderada en Basauri, anque pa cuando llegamos toca colar hacia'l nuesu puntu de partida de la primer ruta del finde montuno.
El llugar de salida sedrá Madaria, na provincia d'Áraba, poro tendremos un entreteníu viaxe en milenta coches, alcontrándonos sobretou con munchísimu ciclista y ye que'l día taba pa ello. Aportaremos a Madaria y taremos en dimposición de salir a caleyar sobre les 11 y media, sicasí la ruta nun ye sea llarga precísamente.
Partimos de Madaria (453 m)
Dende'l primer momentu, tenemos bien claro, cual ye'l nuesu oxetivu, ya que la corona del Ungino vas tenela prestente en tou momentu. A bon ritmu, vamos ascendiendo primero per pista hasta un pelín penriba del Alto de Perrana pa dempués entamar a facer unes pequeñes envueltes pa empobinanos per un cómodu senderu hacia'l Portillo d'Atatxa.
Tol tiempu diremos caleyando baxo'l paré de la corona del Ungino, pela que creyemos ver milenta llinees d'escalada, pente los escaladores del grupu. Llueu de perpasar el ñacimientu del ríu Idas y enantes del portillo, ya tendremos de parar a preparar los trastos pa facer la ferrata del Ungino.
Dende l'entamu tenemos claru l'oxetivu del día
Ye una situación estraña cuanto menos, munchos del grupu simplemente xubirán al Ungino ensin facer la ferrata, teniéndolo a tiru piedra casi ya, mientres que'l restu, pa pasar un pelín d'emoción, vamos da-y la vuelta a tola corona mediu colgaos enmediu'l paré.
De los Borrinos, quédense ensin facer la ferrata, Haritz y Jeni que nun s'alcuentra mui allá, cediendo'l so llugar a Raúl y Canta, que nun teníen material pa ello. Hai nervios nes cares de dalgunos, que nun punxeron un arnés na so vida casi.
Primer tramu más espeutacular y téunicu del percorríu
Entamaremos caleyando pegaínos al paré, con unes vistes brutales de tola planicie d'Urduña y viendo que l'ambiente va ser espectacular. Los niveles de la xente son enforma distintos, poro vamos dividiéndonos en grupetos pa controlar a los menos avezaos a los aéreos y a escalar en xeneral.
La primer parte de la ferrata ye espectacular y quiciás la que más sensaciones y ambiente al vacíu tien de tol percorríu, asina mesmu tien les mayores dificultaes téuniques anque son mui moderaes. Dicir que podemos falar d'un percorríu totalmente factible ensin asegurar a nun ser por la roca que ye podre superior.
Siguimos esfrutando y pasando mieu a partes iguales
Diremos faciendo ordenadamente caún de los tramos, echando un cable, nun meyor dicho, a los que van necesitándolo. Pali, pali, van desapaeciendo los nervios y la xente va soltándose, anque nos destrepes, trepes y descuelgues de cuerda, nótase que falta un pelín d'esperiencia.
Cuando queremos danos cuenta, tamos no que sería l'intermediu de la ferrata o lo que ye lo mesmu, vamos abandonar la cara sureste del Ungino, lo que paecióme infinítamente más guapo. Enantes de siguir echaremos un descansín pa xuntar tol grupu, ver como vamos y que baxen les pulsaciones.
Facemos una reunión improvisada pa templar nervios
Una vegada que sentímonos preparaos pa siguir, doblaremos la esquina que da a la cara Este del Ungino, onde tendremos un ampliu tramu caminable ensin asegurar, onde namái que tenemos que tener cuidáu de nun resbariar colos tapinos.
La xente siguen bien atento y magar del tramu caminable, entraremos hacia la cara norte onde alcontrarémonos de nuevu con llargos pasamanos sobre la roca podrida. Nun tien denguna dificultá, pero debemos tener cuidáu onde nos agarramos porque se cae a cachos totalmente.
Segundu tramu más de tapinera pero con esposición tamién
Con unos cuantos metros más de diversión, diremos finando la cara norte p'averanos per una pequeña vira hacia'l colláu de la Fuente Ungino, teniendo que trepar una valla pa que'l ganáu nun tenga a bien tirase a lo xole p'abaxo.
Con unos pocos metros más, d'agradable paséu hacia'l cumal del Ungino, alcontrámonos col restu del grupu, ya fueran ferrateros o non y lo meyor de too ye que llevaben avituallamientu a base de vinu, chorizu y pan... mui d'agradecer ya que dalgún tenía bon secañu de los nervios, jeje.
Cumal nel Ungino (1092 m) nos montes d'Urduña
Magar de picar un pocu d'embutíu y dos traguinos na bota de vinu, caleyaremos los pocos pasos hasta los 1092 m del Ungino, onde fadremos la semeya de cume y la mítica col güeyu del paré, teniendo vistes hacia Madaria y una guapa sensación tando penriba del so arcu.
Ensin más, con tol pescáu vendíu. vamos descender hacia'l Portillo d'Atatxa, onde siguiremos camín, non sin antes, acompañar a Haritz a ver l'entamu de la ferrata, pa que supiera un pocu de que diba aquello y quitara un pelín esi picor de nun poder facela.
Tranquila baxada pela normal hasta Madaria
Nel intre, Jeni, alcontrábase munchísimu meyor, ya que viniera con unes décimes de fiebre y fuimos garrando camín a bon ritmu de nuevu hacia Madaria. La baxada, fízose comentando mil y una hestories y cola llingua con ganes de tastiar un pocu txakolí o una bona cerveza bien frío.
En resume, ruta bien entretenida pa facer nuna mañanina, teniendo munchu curiáu col estáu de la peña que ye pelín llamentable. Poro, cascu, arnés y dalgún ellementu p'asegurase ye necesariu, ya que por físicu nun mos va tumbar, colos sos 6,9 km aprox, 760 m de desnivel positivu y 3 hores y media d'actividá xubiendo y pongamos pocu más d'una hora pa baxar.
Camudando'l Camín nel güeyu del Ungino
No hay comentarios:
Publicar un comentario