jueves, 16 de marzo de 2017

Alles (Valle Altu de Peñamellera) - Cabeza Liño

12 de Febreru de 2017

Track: Alles (Valle Altu de Peñamellera) - Cabeza Liño


Una nueva ruta más del GM Xuan de la Borrina na qu'escapamos pa tierres orientales nel Valle Altu de Peñamellera. Esta vegada y dende cuantayá tornamos a Cuera pa facer la Cabeza Liño, que ya conociera nuna travesía increyíblemente llarga dende Purón hasta Villanueva.

Esta vegada nun vamos ser tan animalinos y saldremos dende Alles nuna circular clásica dende les falderes sur de Cuera, ya que tolos pueblos tienen más menos una pista formigonada hasta brañes altes que tienen accesu de secute a la parte alta de Cuera.


En Alles (342 m) tenemos el nuesu puntu de partida

Asina, plantámonos n'Alles dempués del viaxe hasta Unquera pela autovía'l Cantábricu onde almorzamos como siempre y llueu siguimos carretera N-621 entrando de nuevu a Asturies per Buelles, El Mazu y Panes, pa pasar a la As-114 onde siguiremos hasta Niserias, desviándonos a la As-345 que fadrános pasar per Besnes y finalmente Alles.

Magar de los preparativos, saldremos d'Alles cruciando'l pueblu hasta salir pel barriu San Roque, garrando una d'eses pistes de Cuera, que fadrános ascender ensin mayores dificultaes que garrar un ritmu curiosu y nun cansar de pisar formigón d'envuelta n'envuelta.

Xubiremos per pista hacia Llandábanes

Aparte de mirar pente les ñubes, a la increyible Pica Peñamellera, alcontrámonos de sorpresa una marquesina a mou de mirador enmediu la pista. Nun somo a creyelo, asina que sentámonos a esperar pol bus pero como nun llegaba siguimos camín hacia la Ería Llandábanes.

Esti mayáu, con cabañes remocicaes que ya les quinxera yo de casa, va danos el siguiente pasu a tomar, que nun sedrá otru que garrar una canal a la so mandrecha que servirános pa llibrar el Paréu L'Ubricariu que'l Cuera tien a bien ponenos delantre.

Aportaremos a Llandábanes onde garraremos la canal de los Cobaxos

Superaremos la guapa canal de los Cobaxos, con dalgún pasín nel qu'hai que sofitase de les manes y aportaremos a les Barrielles, mayáu con cabaña y muries zarrando los praos colgaos penriba'l paréu L'Ubricariu, teniendo a la vista'l nuesu destín... la Cabeza Liño.

Ascensión final alcontrándonos con ñeve a la Cabeza Liño

Dende les Barrielles, garraremos el senderín más marcáu de los munchos qu'hai del ganáu y diremos ganándo-y tarrén pali pali, perpasando la llende nival faciendo'l caberu tramu hasta'l cumal una puquitina de ñeve cayida la nueche anterior.

Aportaremos a los 1173 m de la Cabeza Liño, dando vista a otros montes de Cuera como la Cabeza Torbina o a la mar, que nun día tan atristayáu ye quiciás lo que meyor yeremos a ver. Con un vientu fríu y molestu, decidimos colar col oxetivu cumpliu y ganes d'alcontrar un abellugu pa poder xintar tranquilos.

Cume na Cabeza Liño (1173 m)

Entamaremos el descensu, col envís d'averanos hasta la Braña Liño, onde gárrase la baxada más típica, pasando pelos Quesares hasta Aleso, pero nós vimos nel gps una posible canal más direuta y fuimos hacia ella aportando a un colláu, onde vemos como ésta desciendo de manera pindia pero posible.

Buscamos un descensu más direutu pa escapar de les ñubes


Según vamos baxando vamos viendo como la canal empindia pero siempre factible, anque andamos cola mosca tres la oreya, ya qu'hai un puntu nel que nun vemos continuidá. Al final, tuvimos lo que buscábemos... un pocu aventura en forma d'un murete d'unos diez metros.

Pudimos superalo toos, con dalgo de tensión, ya que mientres buscaba la forma de baxar tarrén yerbosu envede caliza pa Kíla, ella emperróse en dir pela caliza tres los demás y hubo que garrala al aire pel collar, teniendo al final el pior destrepe yo, pente tapinos y peña de mala calidá.

Toparémonos con una sorpresa en forma de corte pero superámoslo felizmente


Magar del destrepe, con tres variantes en tol grupu lo menos, paramos a xintar al pié de la muria, pa relaxar y porque ellí nun tiraba l'aire y siguimos al ratu col descensu al colláu Alesu. Dende'l colláu, baxaremos ya per bon senderu hasta la cabaña d'Alesu al llau de la riega Vellanco, onde garraremos pista de vuelta hacia Alles.

Descendiendo dende Alesu cómodamente per pista hacia Trespalaciu

Una vegada que ganamos la pista, descenderemos con calma, con dalgún amagu de ponese a orbayar, pero cola calma de llibrar el día, ya qu'en tola ruta malpenes nos moyamos un pocu na parte final de l'ascensión a Liño.

Ensin más, aportaremos a les primeres cases del pueblu de Trespalaciu, onde tendremos casi les meyores vistes sobre la Pica Peñamellera y onde garraremos la carretera qu'en malpenes un kilómetru devolveranos hasta'l centru de la capital de la Peñamellera Alta, Alles.


Aportando a Trespalaciu con vistes a la Pica Peñamellera


En resume, ruta típica de les ascensiones al cordal de Cuera, con muncha pista, pero con tarrén interesante na parte alta, que llevónos a percorrer durante 5 hores y media unos 12,5 km con un desnivel positivu acumuláu d'unos 1100 m aproximáu.

Ta la próxima...

Camudando'l Camín en Cuera

No hay comentarios:

Publicar un comentario en la entrada