miércoles, 1 de diciembre de 2021

El Laboratoriu (Morcín)

21, 26 d'Ochobre de 2021

Continuábemos con una seronda seca pel momentu y aprovechábemos les últimes tardes enantes del cambeu d'hora pa salir a roca peles tardes, faciendo principalmente visites al Laboratoriu y a Arnea na Manzanea.

Pulga dando pegues d'encadene a la Roko's (su Rambla particular)

Siempre prestóme'l variar los tipos d'escalada, asína que tener proyeutinos de placa y de desplome en diferentes escueles, fai que puedas empatar díes siguíos d'escalada sin mayores problemes. Asiina que con tola motivación de la vuelta de Margalef, siguimos enfrascaos nel procesu d'encadenar víes.
 
Apretando en Roko's (7a+) de les últimes víes equipaes n'El Laboratoriu

Nesti casu, sigo col mió xeitu de llimpiar escueles, ensin saltar graos, poro metime a facer la Variante de Zihuatanejo, guapa vía de por sí, faciendo la primer parte de Zihuatanejo, vía que tuvo a Anna entretenida tamién, poro pudimos compartir pegues en parte, hasta que llevámonos los dos l'encadene de turnu.

Pegues a última hora col atapecer nel seutor

Nesi momentu, xurdió una via nueva a prebar, la Roko's, un 7a+ escaecíu nel que taba metíu'l Pulga, llimpiándola, sacando los pasos y motivándonos a otros munchos a probala. Una vía que nun tien na que ver col restu de víes del Laboratoriu, con pasos téunicos, movimientos y preses super fanátiques.

 
Ambientín munches tardes nel Laboratoriu

A la fin, enantes de la llegada de lluvies tamién pudímos llevala pal bolsiellu, faciendo nesti 2021 tres víes más del seutor, avanzando pali pali hacia graos más duros, pero siendo sinceros ye un seutor al que préstame dir dacuando y cuéstame motivar pa proyeutar, poro nun tengo priesa pa que vayan cayendo les víes poquín a pocu.

6 de Mayu de 2021

Primavera post-pandémica n'Asturies, na que nun paramos de trepar y tar tiraos nel monte, nun fuera que tornásemos a tar zarraos como l'añu anterior. Esti añu, volví a proponeme trepar en desplome, asina que'l Laboratoriu paecióme una opción bien válida, más agradecida a mi mou de ver que Priañes.

El primer día que fuí, probara con Xavi y Rúben la Sin Nombre, un 7b que ya probara cuanto ficiera Átomo va dos años. Esta vegada, sí que llegué a cadena bien y al segundu pegue ya me cayera saliendo del bloque físicu del mediu.

Trabayando la vía Sin Nombre del Laboratoriu (7b)

Nos croquis de la guía de Esaú, esta vía apaez de 7b+ y creo que n'otros más nuevos hasta de 7a+, pero a mi mou de ver, paezme un 7b sólidu al igual que l'Empalao, que tamién ficiera va dos añinos. La siguiente visita, montara la vía y al segundu pegue caí saliendo a cadena por nun tener mui clara la secuencia.
 
Una cagada terrible pero bastante clásica en munches de les víes del Laboratoriu, nes que sueles aportar a cadena con una inflada perimportante. Tan sólo, quedaba apaecer otru día pel seutor y con Iván, que montó la vía pa facer metros, ya pude da-y un pegue seriu pa calecer músculos y una vegada que llegué al reposu bien, tocaba dalo too ya intentar l'encadene.

Secuencia final y a volar saliendo a reunión
 
Salí del reposu cómodu y fice'l pasu físicu sin problemes, aportando al pasu a cadena, intentado salir col invertíu de dereches y viendo que la diba pringar volví a destrepar a reposar otru pocu y por suerte, Iván encendió la bombiella a tiempu, diciéndome que me llevantara del hombru, pudiendo llegar a cadena y encestar la cuerda na reunión al llímite dafechu.

Con esti encadene, anímome más a venir al desplome y ya tuve probando la travesía de Alma Gemela (7c) que dábame mal rollu, polos vuelos llaterales, viendo que se fae cómodu hasta'l reposu, poro, toca metese a probar la parte dura y proyeutar un puquiñín.

El Laboratoriu
 

                           ------------------------------------------------------------------------------
25 Marzu, 9 Abril, 21 Mayu de 2019

Que los desplomes y chorreres nun ye mi escalada favorita téngolo claro dende va tiempu, pero que diba tocar sometese en dalguna temporada si queríemos avanzar un puquiñín, tamién teníalo claro dende cuantayá.

Magar d'un iviernu atípicu n'Asturies con mui poca lluvia, alcontrámonos coles condiciones deseyaes durante la primavera pa poder esguilar nel Laboratoriu, teniendo casi defechu, toles víes seques durantes munchísimes xornaes que pasamos per ellí apretando duro.

Collacios apretando en distintes víes

Foron xornaes de rises, de compañerismu, de pegues fanáticos y de munchos encadenes. Pela mió parte, paezme que nel primeru de los díes que pasé per ellí al salir de trabayar, me llevé Cosa de Tres (7a/+) al flash, aprovechando que taba montada d'un pegue de calentamientu de dalguien.

Nun ye una vía mui real nesti casu, porque ye un bloquín parte cimera y na baxera, da varios descansos, poro vía de bloque final de cerrar cuatru coses ye más bien, el mió estilu y otres víes de más continuidá punxéronme nel mió sitiu bien ceo.

Una de les mayores lluchaes pa encadenar una vía que fice enxamás

Una d'elles fue l'Empalao (7b) que llevó varios a fueu totalmente hasta'l final cayendo na alto la vía, ya nel intre, cayendo na cadena cola vía dafechu encadenada pero con res de fuercia. Nel día del encadene, a puntu tuve de cayer nella otra vegada, pero per suerte pude enchufar la cuerda nel mosqueta de la reu, enantes de gritar el míticu pilla, jaja.

Tolos miós esfuercios y motivación, finaron nel últimu proyeutu como fué Átomo (7b+) que suponía xubir grau encadenáu y que conseguí encadenar, non dempués d'unos cuantos pegues, quedándome col pegue final, nel que nun sabes mui bien cómo, pero faes tolos pasos perfeutos y yes a reposar en llugares nos que nun te lo plantegares nel restu de les intentones a la vía.

L'antes y el dempués d'encadenar y xubir grau

En resumen, fuera esta temporada mui provechosa pal grupu que nos xuntamos, con primeros 7as, 7bs y 7cs pa tolos collacios d'escalada. Tamién fue mui provechosa pa los chigres de Santolaya en Morcín, que llevaron llargues xornaes de cerveces y pinchos por mor de los encadenes.

Tamién, como vien siendo vezu nesto de la escalada... perdimos un pocu de nós mesmos y tornamos al xuegu de semar pa dempués recoyer... ya veremos cuando y con qué vía, pero tornaremos a motivanos ya intentar xubir grau una vegada más.

                           ------------------------------------------------------------------------------


7, 8 de Mayu de 2018

Nun será porque nun lo intentamos, pero esti branu, les visites sucediéronse nel Laboratoriu en munchos díes, anque casi dengún día había unes condiciones nin mediu decentes pa esguilar. Con too, apretar nos desplomes enllenos de chorreres moyaes, fue'l pan de cada día nesta escuela.

Asediando a la mesma vía varios escaladores

La primer vegada que probé les víes, taba pingando casi tou, metiéndonos na Edad de Bronce (6b+), la cual nun taba en condiciones nin esi día nin nengún otru de los que pasé per ellí, jeje. Aparte, pude probar los dos llargos de la mítica Zihuatanejo (7a), pudiendo al menos conocela pa los díes siguientes asediala un pocu más.

Trabayando nel Empalao duramente

Nun yera l'únicu, ya que convirtióse nel recreu particular de dellos collacios, pa les tardes curties de finales de primavera namás salir de trabayar. Nun sé cuantos pegues costó, pero finalmente cayó, magar d'alcontrar los miós reposos favoritos y ye qu'eso d'empotrar rodiyes o tol cuerpu enteru ye clave pa estes víes de resistencia-fuercia.

------------------------------------------------------------------------------

11 de Marzu de 2016

Nesta tarde de visites... baxamos de Figares y detenémonos al par de la carretera, xustu enfrente de la cantera qu'asítiase, casi al altor del crucie d'entrada hacia Morcín y Riosa y la carretera que va pa Mieres.

Vista del desplomáu seutor dende la carretera

Dexamos el coche no más alantre posible, direición la Foz, nos aparcaderos y tendremos que caminar 1 minutu, hasta ver el seutor penriba les nueses cabeces. Sólo, hai que buscar un senderín que xube y alcontraremos una cuerda afitada pal tramu más pindiu hasta'l paré.
Revisando croquis demientres les chorreres pinguen agua enforma

Al igual qu'en Figares, dedicámonos a repasar les víes colos croquis na man. Esti añu, espero poder meteme nos sétimos con cierta allegría y doime cuenta que ye un buen llugar, pa deprender a esguilar en desplomes y d'una manera más deportiva y física.

Descendemos pela cuerda afitada hasta la carretera de nuevu

Viendo'l nivel de gotéu de les chorreres, columnes y casi estalactites que baxen pel paré, el Laboratoriu, necesita de munchos díes de vientu y calor, pa que les sos víes tengan un estáu mediu decente pa trepar.

Otru sitín al que visitar y dir dándo-y un meneu....

No hay comentarios:

Publicar un comentario