martes, 30 de noviembre de 2021

Tuíza Riba (L.lena) - Corrales - Prau L'Albu - Canalón Oscuru

24 d'Ochobre de 2021

Track: Tuíza Riba (L.lena) - Corrales - Prau L'Albo - Canalón Oscuru

Dempués de les vacaciones esguiladores per tierres catalanes, tornábemos a Asturies con ganes de dar dalgún pateín y continuar trepando lo más duro posible. Tamos al entamu de la temporada 2021-2022 y llueu de facer rutes más bien seliquines, vamos visitar una vegada más el macizu de Penubina, pa completar un cresteríu cenciellu pero coles meyores vistes de tol macizu.

La idega ye completar el cresteríu dende'l Fariñentu hasta'l Picu'l Canalón Oscuru, pero na realidá, como ya fice parte d'ello, nes rutes al Pie Ferreru y Prau L'Albu ya tengo na tiesta facer compañía a Benjamín y que'l restu'l grupu foguéese un pelín más y encume'l Fariñentu.

Tol grupu nel aparcaderu de Tuiza Riba (1225 m)

Saldremos a les diez de la mañana de Tuiza Riba, llueu de xuntanos casi toos en Campumanes pal cafetín de rigor. Esta vegada, tenemos nueva xente col grupu, Silvia que yera conocía de carreres pel monte y el so compañeru Pelayo, más dos perretes a sumar a Kíla, asina que travesaremos les cais de Tuiza un bon garrapiellu, hasta'l depósitu d'agua, onde garraremos senderu hacias Las Colgás.

Averámonos pali pali al Val.le Corrales nun día ablucante

Como ya ficiéramos n'ascensión al Fariñentu la nuesa intención ye ascender pel Val.le Corrales, asína que tiramos senderu p'arriba pasando pela fonte L'Aguilón hasta aportar al Güertu Los Pioyos, onde dixebrámonos en dos grupos, saliendo la mayor parte hacia'l Fariñentu y entamando una sele ascensión Benjamín y yo hacia'l Prau L'Albu.

Ensin priesa avanzamos hacia'l Prau L'Albu con increyibles vistes

El día ye de los de facer afición, cielu azul increyible, vistes pa toles direiciones y una temperatura agradable pa caleyar. Pali, pali vamos ganando altor y vamos dexando a la nuesa mandrecha'l Pie Ferreru y el Fariñentu, oxetivos de los nuesos compañeros y el Picu Siegalabá acompáñanos a la espalda cola Pena L.lana al so llau.

Aportaremos a l'arista que vien de los Comisos pa encumar el Prau L'Albu

Con tol día per delantre, arribamos a l'arista final hacia'l Prau L'Albu (2131 m) el cual encumamos, quedando ablucaos coles vistes. De frente, tenemos tola arista de Penubina a los Picos del Fontán, actividá que tengo pendiente cuantayá y qu'intentaremos abordar pa finales de la primavera.

Benjamín nel Prau L'Albu (2131 m) con tola arista de Penubina al Fontán

Al sur, a la ya nomada Penubina, apaez tamién la Pequena y la Pena Cerreos faciendo un triángulu bien guapu y anque paeza menor que los montes más altos, tola fastera dende Cuapalacios hasta'l Puertu Güeria o el val.le de Tuiza dende'l Meicín col cordal de la Val.lota detrás bien pagan la pena una bona güeyada.

Continuamos camín pelos Comisos hacia la parte final del crestéu

Siguiremos crestiando del Prau L'Albu, llueu de parar un ratín a tomar el sol descendiendo hacia Los Comisos per un canalizu evidente, saliendo a les pandes herboses, onde entreténgome ascendiendo tanto a L'Altu Los Comisos (2074 m) como lo que paezme que pudiera ser L'Altu La L.lera (2085 m) anque tampoco ye de muncha importancia.

Siguimos hacia'l Picu La Palazana coles guapes aguyes de la so redolada

Más importancia, fue alcontrar una covarata con salida hacia una posta de francotiradores de la guerra civil. Como podéis ver, les vistes hacia la Penubina son una pasada y l'abellugu p'afuracar facistes nun ye pior, viendo a la baxada, les marques de tiros na roca pa intentar matar a los apostaos.

Ascendemos al herbosu Picu La Palazana (2126 m)

Dexaremos los tiempos de la guerra civil, anque prestónos pola vida alcontrar esti requexín y siguimos travesía, llibrando un par d'aguyes col envís d'ascender el Picu La Palazana (2126 m), una panda herbosa y mui pindia que faísenos un pocu bola dempués d'andar engolaos peles cueves y picos de poca categoría.

Terminamos la crestería col puntu de mayor cota: Picu'l Canalón Oscuru (2142 m)

Restolaremos baxada de la Palazana y enllazamos bastante direutos cola ascensión final al Picu'l Canalón Oscuru, mayor cota de tola crestería (2142 m) y puntu final a les nueses andances. Equí, esperaremos un bon pedazu tomando'l sol y picando dalgo más y pa cuando entamamos la baxada, ya tenemos a los collacios baxando de la Palazana.

Baxamos de la Forgueta'l Portil.lín hacia'l Meicín per camín más que conocíu

Llueu de charrar colos compañeros, que vienen dalgo más cansaínos que nós, entamamos la baxada demientres encumen l'últimu cumal y aportamos a la Forqueta'l Portil.lín, onde una ñube de mosquitos, anímanos a continuar hasta'l refuxu del Meicín, onde hai una auténtica folixa montada.

Mítiques vistes dende'l Meicín, "refuxu-chigre" estráu de xente

Facía tiempu que nun paraba pel Meicín, anque sabía del bon facer de Tania y Gummo pa col negociu. La verdá ye qu'allories un pocu, per un llau ves muncha xente urbanita fuera de llugar, ya que xubir al Meicín a xintar ta convirtiéndose nun clásicu y eso traerá coses bones (arrimar a la xente al monte) y coses non tan bones (basura, pocu respetu pela ñatura).

Pero bono, si nun pues col enemigu, xúnete. Asina que tocó garrar una xarra de birra y sentase nuna peña a ver l'espectáculu col bocata, demientres la xente metíase pal cuerpu callos, fabada, güevos con patates... y con cantarinos y too, increyible jaja.

Terminamos la birra y descendimos a Tuiza pa completar una guapísima circular de malpenes 10 km, con +/-1100 m de desnivel acumuláu nun total de 7 hores y 20 min, anque podemos quita-y 1 hora de chigréu nel Meicín.

Camudando'l Camín dende Picu'l Canalón Oscuru

2 comentarios:

  1. Ya tuvimos dos vegaes nesa cuevina de los maquis y ye mui guapu'l sitiu y precioses vistes a Penaubina

    ResponderEliminar