Alto'l Palo (L.lena) - Penubina Pequena

7 d'Ochobre de 2012

Track: Alto'l Palo (L.lena) - Penubina Pequena

Son les diez y media de la mañana y tamos nel Alto'l Palo (1689 ms) na llende del conceyu de L.lena y Llión. Ye un día especial,... cuantayá que Pilar y Diego nun faen monte col grupu ya que tuvieron un tiempu llargu ocupándose de Nel, qu'a los 8 meses va facer la so primer ruta de monte col GM Xuan de la Borrina.

L'anterior vegada que tuvieron de monte, cuando solo yeren pareya envede tríu, foi na Pena'l Cuervu en Cangas del Narcea y ya pasó un añu y mediu, poro tamos encantaos del so tornar y vienen col xeitu d'acompañanos hasta onde'l neñu-y dé por portase bien.

Semeya de salida nel Alto'l Palo (1689 m)

P'aportar a esti puertu, saldremos de Xixón pela autovía minera, hasta empatar cola As-66 en Mieres del Camín, yendo como ye davezu hasta Campumanes, onde desayunamos y xuntámonos toos. Per un llau, tamos Pau y yo y per otru vienen Pangua, Rebe y Raúl, collaciu de Pangua que tamién debuta con nós, nesto de caleyar pelos montes.

El puntu de salida ye conocío por nós y foi entamu d'una ruta bien espeutacular como yera la de la Mesa, poro'l camín dende Campumanes sedrá al traviés de la L.le-8 pasando pelos pueblos de Sotiel.lo, Espinéo, Teyeo, Armá, Rospaso y a lo cabero Tuíza Baxo, pa siguir xubiendo altor pel puertu hasta los 1695 ms del Alto'l Palo.

Ascendemos pela mandrecha la Pena Vera

Vamos facer una ruta cenciella, pero con una ascensión perguapa a la hermana pequeña de la Penubina, asina que pa ello, baxamos un pelín pela carretera, col envís de ganar un pindiu senderu a la mandrecha de la Pena Vera, que pondrános no más alto, dando-y vista ya al nuesu oxetivu, la Penubina Pequena.

Na Veguina somos a ver les dos Ubinas, grande y pequena

Dende la nuesa posición las dos Ubinas, apaecen impresionantes, dándonos más ganes si cabe d'averanos hasta les sos bases. Pa ello, vamos tener un de los paseos más guapos que puen dase, al traviés de la Veguina y Veiga Candioches, les cuales son una auténtica preciosidá.

La Veiga Candioches per delantre y per detrás

La enormidá d'esta veiga, nun paez asustar a Nel que lloñe de ponese nerviosu decide echar un pigazu, mientres los demás, caleyamos sele hacia'l final de la veiga que ciérrase pente dos muries de caliza na riega de Riutuertu.

Finando la Veiga Candioches cola Penubina Pequena detrás

Güei, ye un día pa esfrutar de la ruta ensín prieses, así que paramos un cuartu d'hora a da-y a Nel un pinchín pa recuperar fuercies, ya que na xubida al Alto'l Palo, el probe marióse dalgo y echó tol desayunu penriba, jeje.

Ascendemos hacia'l valle Riutuertu

Magar de la parada, facemos un tramu nel que l'ascensu sedrá'l protagonista hasta que les peñes que piesllen la Veiga Candioches, zárrense dafechu, dexándonos namái, un pasín estrechu nel qu'usamos les manes pa trepar ensín mayores dificultaes.

Pasu más estrechu de la ruta

Dende equí saldremos al valle Riutuertu, onde la enorme mole SE de Penubina impresiona aún más, acompañándonos tamién a la nuesa mandrecha la guapa Pena Cerreos, que tanto nos prestó a Pau y a mí, ascender fai un añu.

Avanzamos a la base de la Penubina Pequena cola Grande y Cerreos presentes

El tiempu va pasando y tamos a los pies de la Ubina Pequena, onde'l picor de cume y lo bien que ta portándose Nel, fai que Diego tuviera na tiesta prebar a xubir hasta riba con él. Unos tira y afloxa de pareya y el guah.e que nun protesta, asína que p'alantre.

Entamamos l'ascensu demientres dalgún va esnalando en suaños

Entamamos a ganar altor pela faldera de la hermana pequeña y Nel como ve que va pa llargu, decide echar otru pigazu, demientres so pa y so ma, tiren p'arriba como si nun dexaren de dir de monte nin a una ruta. Tan nuna forma ablucante y déxenmos atrás a tolos demás.

Perentretenía xubida per canales y envueltes hacia'l cumal

Van sucediéndose los pindios praos, les travieses penriba de contrafuertes, les canales, les envueltes y na parte cimera del monte, vamos arrodiar pela mandrecha'l propiu cumal, p'acceder a l'arista norte, pasando primeru unes llambries nun pasu llateral y a lo postreru un pequeñu trepe.

Aportamos al cumal onde Nel ye'l xuguete de tolos montañeros

Ya n'arista, tendremos un par de pasinos con un pocu de vacíu y vamos da-yos la mayor sorpresa a un númberosu grupu de montaña, que nunca nun vieron a montañeru tan precoz n'aportar a los 2196 ms de la Penubina Pequena.

Cumal de la Penubina Pequena (2196 ms)

Como non, cola gayola de tar col guah.e a esos altores, tuviemos tres cuartos d'hora bien guapos p'alantre y p'atrás nel cumal, faciéndose semeyes los otros montañeros con Nel, ya inclusu la semeya de grupu d'ellos foi col minimontañeru (Gracies Melchor por pasámeles).

Dempués de les rises y demás, decidimos baxar d'una vegada del cumal y vamos facelo en dos grupos. Per un llau, Diego y Pilar, que ya van con priesa, baxen con Pau, Rebe y Raúl, pela mesma vía de xubida, mientres que Pangua y yo, vamos baxar pela arista norte a la gueta d'un par de dosmiles más del macizu.

Pangua y yo descendemos pela arista NO cola Penubina y la Pena Ruea vixilando

Asegurámonos de que la xente va baxando bien y paez ser qu'asina foi, dempués del primer tramu más delicáu y nós tirámonos arista abaxo ensín conocer el descensu. De primeres, destrepamos entreteníos ensín mayores dificultaes hasta qu'unos h.itos convídenmos a tirar hacia la vertiente SO.

Asína lo facemos nun primer tientu y llueu tornaremos a pasar al llau que mira p'Asturies, metiéndonos en plena arista hasta que quedamos nun tramu aéreu, nel que tendremos que destrepar un gran bloque calizu pa continuar arista alantre.

Los oxetivos delantre'l colláu Ronzón: Pena Solmichu y la Carba

Viendo ya los nuesos oxetivos, amenorgaos pola presencia de la gran Penubina, delantre del colláu Ronzón, vamos pasar totalmente a la fastera norte y tendremos varios destrepes per canalizos de yerba, nos qu'alcontramos dellos restos de h.itos que van guiyándonos hacia l'amplia parte final de l'arista.

Baxamos hasta los 2000 mil metros clavaos de la Pena Solmicho

Con poco más, vamos baxar hasta'l mínimu colláu de Solmicho y xubiremos los metros que llevanta sol colláu la Pena Solmicho (2000 ms), que dános unes guapes vistes de la cara norte de la Ubina Pequena, dándonos a entender lo enguedeyáu del so descensu.

Perguapa cara norte de la Ubina Pequena

 Otra carrerina va dexanos nel colláu Ronzón, onde trespasamos un zarru al llau d'una peñona y xubimos a fueu al últimu dosmil del día, La Carba, que nun ye más qu'otra peñona que paez un granu al llau de la mole de Penubina.

Tirámos-y a la Carba (2001 ms) nun caberu esfuerzu

Col trabayu fechu, baxamos de nuevu y empobinámonos per praos nuna rodiada a la Penubina Pequena hasta alcontrános nel valle de Riutuertu col restu del grupu: Raúl, Rebe y Pau. Magar d'entruga-yos que tal la baxada, siguimos alantre sele esfrutando de cada pasu.

Percorremos el camín que tien de xuntanos al restu del grupu

Diego, Pilar y Nel, ya entainaren hacia'l coche, por mieu a que'l guah.e-y diese por da-yos el viaxe de vuelta pero paez que-y presta salir na mochila al monte, ya que portóse perbien tamién. A ver si tenemos montañeru pa ratu, jeje.

Caballos na guapísima Veiga Candioches

Asína que nós, a pesar de la seca que sigue faciendo n'Asturies, travesaremos el guapu camín, que llevónos a conocer el cumal de 2196 ms de la Ubina Pequena, pela Veiga Candioches, hasta aportar al so puntu más altu onde tendremos la suerte de saludar a la Magrera y la Mesa una vegada más.

Les vistes hacia la Mesa ablucantes y el Alto'l Palo al fondu

El senderu de descensu al llau de la Pena Vera, va facénos a Pangua y a mi, tener que dir sólos hasta l'Alto'l Palo ya que los demás, nun-yos apetecía dar zapatu pel asfaltu hasta riba. Ye lo que tien, ser el conductor nestos casos, que siempre pringas de más.

En resume, guapa ruta na que percorrimos unos 11.3 kms y superamos un desnivel acumuláu de 750 ms, tardando un total de 6h y 15 minutinos, pero que bien pudiera valer pa una mañanera con fartura, ya que fuimos al ritmu d'un montañeru d'ocho meses, jeje.

Camudando'l Camín con Nel y los sos pas Pilar y Diego

Nest especial día de montaña ficimos 3 picos pertenecientes al club 58 d'Ubina: Penubina Pequena (2196 ms), Pena Solmil.lo (2000 ms)  y La Carba (2001 m)

Ver progresos en: Retos montañeros