jueves, 23 de septiembre de 2021

Pirinéu 2020 - 2021

Del 4 al 11 de Setiembre de 2021

Dempués de casi 10 años, tornábemos al Pirinéu, con ganes de conocer llugares nuevos y tachar montes pendientes, centrándonos sobremanera nos 3miles cimeros del Pirinéu. Pa ello, un pocu taba preparáu tol viaxe entornu a l'ascensión a la Tuca d'Aneto, pero como siempre nel monte, les condiciones marquen el camín y nun diba ser distintu esta vegada.

El sábadu 4 arrancábemos dende Asturies, con tola calma del mundiu, parando a almorzar en primera instancia n'Unquera, onde diba conocer a Dani, compañeru de Mario que xuntábase a esti viaxe montañeru con munches ganes de monte, visitar pueblos y tastiar la gastronomía llocal.

L'equipu al completu pel Pirinéu

Continuaríemos camín hasta Basauri, onde realmorzábemos con Fernan y col equipu completu fadríemos el llargu viaxe hacia'l Pirinéu, con paraes en Puente La Reina y Ainsa, enantes de continuar hacia'l primer destín que yera'l Parc Nacional d'Aigüestortes i Estany de Sant Maurici.

Nel parque d'Aigüestortes i Estany de Sant Maurici

Aportaríemos a Barruera, el nuesu campu base particular, a tiempu de dar un pateín pel pueblu, tomar dalguna cerveza artesano y restolar pente los chigres les meyores opciones, tanto pa cenar como p'almorzar ceo pela mañana.

Semeya de los ablucantes estanys de Gémena

Al final, camping Boneta de Barruera, sedría'l nuesu meyor aliáu, tanto pa cenar, cerveciar, ducharnos y almorzar a les 8 la mañana enantes de salir a facer les nueses potentes actividaes nel parc d'Aigüestortes, que marcaron un pocu el devenir del grupu xunto a la meteroloxía.

Parc d'Aigüestortes i Estany de Sant Maurici:

Primer día: Caldes de Boí (Alta Ribagorça) - Cavallers - Pic de Comaloformo - Estanys de Gémena

Segundu día: Cavallers (Alta Ribagorça) - Punta Alta de Comalesbienes - Refugi Ventosa I Calvell

Magar de cumplir los oxetivos, tornamos un pelín hacia l'occidente, hasta'l pernomáu Ball de Benás, onde ya tuviéramos en 2010 faciendo delles actividaes bien prestoses. Esta vegada les nueses intenciones yeren facer tres 3miles cimeros del parque de Maladeta, pero tuviemos qu'abortar planes pela meteo, desechando l'ascensión a la Tuca d'Aneto.

Paseín peles guapes cais de Benás

De toes formes, nun mos aburrimos res y ficimos dos bones actividaes, quedándonos pa la primera ensin Fernan, ya que necesitaba descansar de les dos primeres xataes per Aigüestortes, acompañándonos na segunda actividá, enantes de qu'entrara la borrasca y sirviéndonos de perfeutu organizador, teniendo ya xestionáu, tanto la ducha del primer día nel camping Aneto como'l refrescante bañín na piscina municipal pal últimu día de batalla.

Imprescindible un bañín nes xelaes agües de la piscina de Benás
 
 
 
Viendo que nun cumpliéramos oxetivos del tou, decidimos camudar los planes d'entamu y dexar el restu del plan pa otra visita, así que con Fernan como esperimentáu guía, fuximos del mal tiempu, pa conocer el parque de los Valles Occidentales del Pirinéu. 
 
Poro, el quintu día, magar de les visites de tiendes en Benás, decidimos baxar hacia Barbastro, onde pudimos xintar increyible a base de tapéu, mercar dellos regalinos y continuar viaxe hacia los valles de Echo y Ansó.

Cellebrando'l dia d'Asturies con vistes hacia'l macizu d'Aneto-Maladeta

 
Monte ficimos, pero furgoneta chupamos enforma, ya qu'ente durmir nella y la cantidá brutal de kilómetros, p'andar d'un valle a otru ficieron una aventura este viaxe, anque hai que dicir que da gustu conducir pel Pirinéu, sobretou pel occidente, onde escapamos de les obres del Ball de Benás y ya díbemos per monte más "atlánticu", visitando ayalgues como'l pueblu d'Ansó, el primer día u Otsagabia, en Navarra, el segundu día.

Pasamos pel guapu pueblu d'Ansó entrando al parque de los Valles Occidentales

Dicir que finalmente, fue un aciertu total averanos hacia l'occidente, ya nun sólo por facer montes más seliquinos, tanto en hores, como en complexidá, sinon pol simple gustu de conocer estos valles, que lo únicu que pierden ye altor nos montes, porque ganen muncho en paisaxes, gastronomía y cultura.

Parque Natural de los Valles Occidentales: 
 
 

Camudando'l Camín pel Pirinéu románicu
 
En resume, nun tengo más que grandes pallabres pa esti viaxe, que si bien, nun algamé tolos oxetivos montunos preparaos, el puntu de visitar y conocer más valles del Pirinéu, pasando más tiempu nos pueblos y menos nos refuxos qu'otros años, fae más enriquecedora la visión global del viaxe, ensin quitá-y el méritu a la pura actividá montañera.

No hay comentarios:

Publicar un comentario