Balmonte (Miranda) - Tabláu - Matacaliáu - Meruxal

13 d'Abril de 2024

Track: Balmonte (Miranda) - Tabláu - Matacaliáu - Meruxal

Una vegada más, teníemos ruta del GM Xuan de la Borrina y como siempre, tengo que preparar dalgo casi sobre la marcha pa facer una mañanera afayaiza, ya que varios son compromisos de la xente implicada, dándome cuenta que va tiempu que tenía na tiesta facer el picu Matacaliáu, dende Balmonte, capital del conceyu de Miranda.

Esti picu, asitiáu a la vera'l míticu camín rial de la Mesa, diba ser la cuenta, asina que quedamos con calma en Balmonte, pa tomar un cafetín y so les 9 y media la mañana, ya tábemos preparaos pa cruciar el rigu Pigüeña, travesando delles caleyes de Balmonte, hasta garrar la pista, angüaño asfaltada, hasta'l pueblín de Tabláu.

Partimos de Balmonte al llau del rigu Pigüeña

Dacuando, prepares rutes sol mapa y pasa esto, qu'atopes carreteres, pero nesti casu, nun son munchos kilómetros, asína que nin siquiera faise pesáu y vamos algamando desnivel cómodamente, demientres echamos un vistazu a la desfecha xerra de Bixega, estrada dafechu d'eólicos y que percorriéremos va dellos años, ensin remenbrances gayoleres.

Travesamos Tabláu con vistes a la xerra de Bixega

Travesaremos Tabláu nuna amplia envuelta y na parte alta del pueblu garraremos un camín a la mandrecha que n'ascensu va llevanos pela faldera'l monte la Queimada, onde asítiase un castru, pero nesta ocasión nun vamos conocelo, ya que'l camín llévanos al pueblu de Tiblós, onde viendo que nun llega accesu rodáu asfaltáu, alloriamos con que sí que tenga lluz pública y haya delles cases con buzón de correos, lo que sorpréndenos enforma.

Salimos de Tiblós hacia'l valle San Llaurienzu

Pasamos Tiblós, charrando de lo raro del llugar, hasta qu'aportamos a delles construcciones con pinta d'antigua minería, lo que fízonos pensar en que pudiera ser un pobláu mineru desaniciáu, dexando los nuesos camientos pa práu, pa centranos n'ascender pel valle Llaurienzu, que caltién un camín empedráu de gran valir, faciéndonos la nuesa ascensón munchu más entretenía, demientres esfrutamos de les vistes al picu Cervera, que xubiéramos cuantayá, nuna reunión de la Fempa.

Aportamos pali pali al colláu Llaurienzu onde la solana pega con ganes

Continuaremos camín alantre, siempre ensin denguna dificultá, sorprendiéndome na realidá lo guapu del picu Cervera y de toles vallines del Caleyu que xuben hasta él, siguiendo ensin más hasta la parte alta del valle, aportando a la fín, al colláu Llaurienzu, onde atopamos los carteles del GR del Camín Real y una carretera casi recíen asfaltáu, percorre tola cordelera tol cordal de Porcabeza, picu que xubiera con Benjamín con una ñevada brutal va unos añinos tamién.

Atacamos sin más miramientos el nuesu oxetivu: el picu Matacaliáu

Caleyaremos pocos metros de carretera y salimos per una portiella hasta'l Llanón del Recuerdo, onde entamaremos l'ascensu al nuesu oxetivu del día: el picu Matacaliáu, teniendo una primer parte cómoda de prau, pa tener que restolar camín más llimpiu hacia'l crestéu del picu, onde ya ensin dubia nenguna, preferimos dir trepando pel calizu enantes de bregar pente'l berizu y la cotoya en flor.

Cresteriu disfrutón ensin dificultaes hasta los 927 m del Matacaliáu

Vamos avanzando Pepa y yo, sorprendiéndonos lo curiosu d'un crestéu col que nun contábemos, demientres echamos un vistazu a los montes de Somiedu ñevaos, esperando un pelín polos compañeros, hasta poder xuntanos toos nel cumal de 927 m, onde atopamos el llugar más afayaizu posible pa poder xintar con tola calma, nun monte que paeciónos un maraviyosu mirador d'esti centru-occidente astur, que nos últimos tiempos ta dándonos delles rutes prestoses y munchu tarrén a conocer.

Facemos cumal nel Matacaliáu de 927 m penriba la capital de Miranda

Con tol pescáu vendíu y Benjamín, esfrutando d'una comida al sol y nel monte relaxáu, decidimos baxar ya que taba entamando a pegar el sol curiosino, asina que garramos arista contraria hacia la Segada y nel Chanu, vamos facer una amplia envuelta, col envís d'alcontrar baxada hacia'l valle la Cruz, pel que caleyaremos per guapos caminos y praos bien curiaos hasta la Infiesta, onde salímonos a la manzorga, pa siguir hacia'l pueblu de Meruxa.

Baxaremos del Matacaliáu hacia La Cruz pa siguir hacia Meruxa

Xubiremos a un pequeñu colláu y siempre per bonos caminos descenderemos hasta Meruxa, onde atopamos delles cases increyibles y garraremos ya camín en descensu pela manzorga d'una riega que travesaremos más tarde pa salir ya a pista que déxanos na Repenancia, onde ya vamos garrar carretera hacia Balmonte.

Dende Meruxa xintaremos más carretera de lo deseyáu hasta Balmonte

Por suerte, la carretera va na mayor parte tapecida del sol pente una guapa viesca, poro nun pasamos un calor xabaz, teniendo los momentos más abiertos pegaos a la pena Los Pericones, per onde márcase un senderu de monte hacia Courias, que nun tenía mala pinta, anque a nós quedábanos fuera de ruta.

Con pocu más, aportaremos al cementeriu de Balmonte y ya tendremos el tramu final llano, pegaos al rigu Pigüeña, onde sí que sofrimos un pocu'l calor brutal que facía, teniendo que parar nun llavaderu en Balmonte pa refrescanos enantes de siguir caleyando peles cais de Balmonte hasta los coches, onde mudámonos de ropa, pa tomar unes merecíes cerveces.

En resume, ruta circular bien guapa, a un monte con unes vistes xeniales de tola fastera de Balmonte, Gráu, Tameza que fízonos tar entreteníos durante casi 6 hores, mui rebaxables, nos 14 km de percorríu con un desnivel acumuláu de +/- 785 m.

Camudando'l Camín patiando per Balmonte