Santoña (Tresmiera) - Monte Bucieru - Caballo - Pescador - Mazu

1 de Mayu de 2024

Track: Santoña (Tresmiera) - Monte Bucieru - Ganzu - Caballu - Pescador - Mazu

Díes de vacaciones per Cantabria, tornando con tol gustu del mundu al valle del Riumiera, onde ya tuvieramos esguilando va tiempu, yendo esta vegada col envis, d'apalancanos tranquilamente nel camping Lunada, faciendo monte, esguilando y saliendo a andar en bici, en definitiva, a desconectar y descansar de munchos meses de trabayu.

Cola meteo, pelín repunante y llibrando más o menos como pudimos, hubo un día onde yera imposible esguilar ya que daba hasta ñeve pa Riumiera y decidimos baxar a la costa de Tresmiera, onde Silvia quería conocer Santoña pa xintar anchoes y yo de pasu, apetecíame patiar un pelín y facer un cumal cimeru del Cordal Cantábricu, independientemente del so baxo altor: la peña Ganzo.

 

Partimos de Santoña na sablera de San Martín (5 m)

Asina que plantámonos en Santoña, cola calma, aparcando la furgo na sablera de San Martín, baxo les muries del fuerte y saldremos per unes escaleres al alcuentru d'una sienda costera que da tola vuelta al monte Bucieru, pasando en primer llugar pel fuerte San Carlos, pa salir ya per senderu al propiu camín, col envís d'empobinanos hacia la punta'l Peón, onde algamaremos guapes vistes de la costa cántabra dende la boquera del Asón hasta l'Oriñón.

 

Caleyamos per sienda costera hacia la punta'l Peón

Pocu más alantre, na casa la Peña, vamos tener los cartelos qu'indiquen'l camín hacia los cumales del Bucierum pasando en primer términu per una antigua mina de fierru, que fai más interesante'l nuesu caleyar, pente les antigües escavaciones y muries enllenes de mofu, tou ello arrodiaos d'una viesca d'encines costera perimportante, siendo a toes lluces un llugar que paga la pena conocer.

 

Averámonos hasta'l cumal del monte Bucieru con vistes a la marisma de Santoña

Siguiremos felizmente pente la viesca, siguiendo con atención les marques y fitos esistentes, hasta salir a una pradería con vistes hacia la ría del Asón a un llau y pocu más arriba no más alto de la fastera oeste del Bucieru, onde alcontraremos ya, les vistes de tola redolada, dende la boquera del Asón hasta les marismes de Santoña y sablera de Berria.

 

Encumamos la Peña Ganzo (376m) puntu más altu del monte Bucieru

Tornaremos so los nuesos pasos hasta un desvíu, onde empobinámonos hacia'l puntu de más altor del monte Bucieru, la Peña Ganzo de 376 m, onde asítiase'l vértice xeodésicu y al qu'accederemos con un trepadina entretenida pa nós, anque non tanto pa Mia, que costó-y un pocu a la probe poder acceder hasta la parte más alta. Llueu de la semeya de turnu, dando por tacháu esti cumal cimeru del Cantábricu, toca tornar hacia la costa, ya que diba pasando'l día y les oportunidaes de xintar nel pueblu.

 

Baxamos del Bucieru hacia'l puntal del Caballu onde asítiense les nomaes escaleres

Poro, descendimos del Ganzo y bordiamos el cumal pel norte, siempre pembaxo d'unes muries que faen de la peña casi una fortificación y siguimos alcontrando senderos, navegando un pelín pente l'encinar hasta descender a unos foyos pelos qu'accederemos a una sienda qu'atraviesa tol monte Bucieru dende L'Oeste al Este, ye dicir dende Santoña hasta'l la punta'l Caballu, puntu más occidental d'esta península que ye'l monte Bucieru.

 

Baxamos al faru del Caballu y siguimos hacia'l del Pescador

Col camín ya bien asitiáu, ceo aportaremos al entamu del descensu hacia'l faru del Caballu, pernomáu nos últimos tiempos poles setecientes y picu escaleres qu'hai que descender y como suel pasar, ehí va tola borregada a baxar hasta'l faru, anque-yos dea un infartu pa xubir de nuevu. Nós, baxamos adelantando xente y aportamos al faru, que nun tien munchu que ver la verdá, porque guapu nun ye y llueu d'echar un triagu d'agua y esfrutar un pocu de la costa, tiramos p'arriba como aviones teniendo qu'aidar a unos neños a xubir, ya que diben llorando de cansanciu y les más nun taben pa muncho más.

 

Siguimos costa alantre pel faru del Pescador pa tirar hacia la fastera norte del monte Bucieru

Sacante d'estes coses de la masificación turística estúpida, aportamos a la sienda costera y mirando la hora, tardía ya pa xintar, decidimos facer la ruta completa caleyando hacia'l norte pela sienda siguiendo hasta'l faru del Pescador, onde esfrutamos d'una lluz y un collor del agua increyibles y decidimos garrar un camín que torna hacia'l monte n'ascensu, pa evitar una vueltona per carretera hacia la sablera de Berria.

 

Xubimos al monte Bucieru y descendemos pel fuerte del Mazu hacia Santoña

D'esti xeitu, travesaremos con un pelín más de desnivel la fastera norte del monte Bucieru y per un guapu camín pente praos ganaderos, pel norte de l'Atalaya, vamos descender un pelín hacia'l Mazu, llugar onde asítiase un fuerte de la dómina de Napoleón, al que-y facemos una visitina, paeciendo un llugar priváu y ya siguiremos pel camín de la Montaña, que fadrános pasar pela Casa Blanca con guapes vistes de Santoña, pa descender finalmente hacia la sablera San Martín pel fuerte homónimu, zarrando una circular de llibru.

En resume, ruta pelín inesperada, aprovechando la mala meteo pal sur, que sorprendiónos polo guapo del monte Bucieru, col so encinar y por tola costa de Santoña, algamando un percorríu de casi 13 km con +/- 955 m de desnivel acumuláu nun total de patéu de 5 hores clavaes.

 

Camudando'l Camín per Santoña