16 d'Abril de 2022
Track: Somosierra (Sierra Norte) - Cebollera Vieja - Cascada de los Litueros
Una selmana santa más, magar d'un viaxe esguilador per Cuenca averámonos hasta'l pueblín en Soria, pa pasar dellos díes cola familia, centrándome más en correr pel pueblu y en salir a facer dalgún dosmil del Sistema Ibérico o del Central, como nesti casu, averándonos esta vegada hasta Somosierra en Madrí, p'ascender la Cebollera Vieja o pico Tres Provincias (Madrí, Segovia y Guadalajara).
Ensin matanos a madrugar muncho, dempués d'un dia de fartures continues,
aportamos al pueblu de Somosierra a les 11 menos cuartu la mañana,
llueu de pocu más d'una hora de carretera dende Recuerda, más menos, el mesmu camín que llévanos dir hasta la fastera del Urbión, así que les opciones son bayuroses pa facer monte.
Magar d'un ratín de prestosu llanéu al solete, aportaremos a un puntu, nel qu'un fitu, indícanos que ye'l momentu pa garrar un pindiu senderín que tien de llevanos a la cimera'l cordal de Cebollera. Otra opción sedría continuar pel PR 23 pa garrar tola cordelera dende la Cebollera Nueva a la Vieja, pero viendo lo ventosu del día, na parte alta, meyor tar menos tiempu espuestu.
Dexaremos el senderu atrás, arribando hasta una pista que percorre tol cordal y ya, con tola ropa que tenemos diremos a bon ritmu hacia la Cebollera Vieja, siempre con vistes hacia'l Pico Lobo, qu'entá caltién, sobromanera na so fastera norte, ñeve abondo.
Con pocu más, ascenderemos hasta'l vértice xeodésicu de la Cebollera Vieja (2215 m), onde alcontramos a varios montañeros abellugaos del fríu vientu. Nós, fadremos dalguna semeya y entamaremos el descensu, tamién per bona pista, a tramos andando y a tramos corriendo, hasta engorilanos a correr na so mayor parte, demientres esfrutamos de vistes hacia Guadarrama y Peñalara.
Corriendo baxaremos tola pista hasta tener que siguir per un ampliu cortafueos que va dexanos finalmente, nun tramín de senderu, ya mui cerquina de la riega'l Chorro. Equí correremos otru tramín guapu de viesca y pegaos a la riega, ya va tocar andar sollerte pa siguir el senderu, siempre con tendencia a la mandrecha, siendo un de los tramos más guapos de tola ruta.
Baxaremos hasta la mesma riega del Chorro pa destrepar xunto a la Peña del Chorro, dándo-y vuelta y pudiendo acolumbrar tola belleza a la vuelta la peña, de la cascada de Litueros, onde ya topamos un garrapiellu turistes y dalgún grupín de barranquistes esfrutando d'esti día soleyeru, anque ventosu pa nós, en tola parte alta del cordal de Cebollera.
No hay comentarios:
Publicar un comentario