jueves, 6 de abril de 2017

Pigüeña (Somiedu) - Xerra de Pigüeña

26 de Febreru de 2017

Track: Pigüeña (Somiedu) - Xerra de Pigüeña


Cola ñeve nos altos y dempués d'esfrutala como ta mandáu na xornada anterior tornamos al monte col grupu montaña decidiendo facer dalguna ruta pel suroccidente, poro tiramos hasta Somiedu. La idega yera tornar al valle del Pigüeña que nun recibía una visita nuesa dende'l finde del Cornón y Cogol.lu Cebol.léu.

Esta vegada, quería conocer la fastera norte de Somiedu asina que tirámonos a conocer la Xerra Pigüeña, que tan bien nos amuesa col so arte descriptivu, el collaciu Cienfuegos. P'aportar a Pigüeña garramos autovía "Y" en direición Uviéu, pa siguir dempués en direición Grau pola As-63, hasta la salida de Cangas del Narcea.

Salimos de Pigüeña (625 m)

Equí tomaremos la As-15, travesando parte del conceyu de Salas y entraremos nel conceyu de Miranda, onde empobinarémonos pola As-227 hasta la so capital Balmonte, almorzando como siempre nel Hotel Cela.

Llueu toca siguir pela As-227, hasta'l pueblu d'Auguasmestas, onde améstense les augües del Pigüeña coles del Somiedu, y onde dexaremos l'anterior carretera pa tomar otra, que nos llevará val.le Pigüeña alantre, pasando polos pueblos de Santul.lanu y Pigüeña a la fín.

Ascendemos nun día preciosu per Chaneces hacia la Muezca'l L.laguazo

Nel pueblu, entrugamos onde podemos dexar los coches pa que nun molesten y salimos peles cais p'arriba hacia les cabañes de Chaneces. Una vegada que les pasamos, siguiremos pel senderu de Sulapena (pembaxo la peña... y que peña na que podía facese una escuelina d'escalada estupenda) hacia un colláu sola Pena Melera, onde tendremos de xubir per una amplia canal perdiéndose la sienda, hasta alcontrala na muezca'l L.laguazo (1082 m), salida ñatural al xerru la Cerra y acolumbrar la fastera de Pigüeces.




Siguimos tola xerra alantre per una viesca estraña pero mui guapa

Con casi tol desnivel direutu del día ganao, meterémonos dende la muezca a conocer el monte'l Gal.lo, per onde caleyaremos con calma, ya qu'esti monte ensin sienda clara, tien un puntu estrañu nel so sentir hasta que salimos al Chanu la Xerra onde tendremos vistes a los altos de Somiedu y Cangas del Narcea ñevaos.

Caleyamos dende'l Chanu la Xerra hasta'l Altu Las Gabuxas

Nesti Chanu, toparémonos con un bon camín que xunta dambes fasteres baxando hacia Las Veigas na del Pigüeña y hacia'l Chanu la Chanza na del Pigüeces. Nós tomaremos un ratín la del Pigüeces pa más tarde entamar l'ascensión penmediu'l fayéu del Gal.lo hasta los 1253 m del Altu Las Gabuxas. 

Guapu miradornel Altu las Gabuxas (1253 m)

Con un día de sol ablucante, bones vistes y la tranquilidá de que la ruta nun diba ser llarga, tiramos a descansar cuando casi nun yera nin la una. Xinta tranquila, casi siesta y mirar toles posibilidaes a facer na ruta, siendo la idega baxar a conocer la cueva Los Candanales pero tamos enriba los crestones de Las Claras y nun vemos claro poder crucialos llueu pa siguir hacia'l Chanu la Chanza.

Nesos camientos andamos cuando decido que por un día que nun mos metamos una xatada nun pasa nada. Asína que decidimos baxar direutos pel fayéu Gal.lo hacia'l Chanu la Chanza, pasando per llugares increyibles casi máxicos.

Descendemos hacia'l Chanu la Chanza y d'ehí a la Braña Pigüeces

Nel Chanu la Chanza, pararemos un ratín a sacar semeyes hacia'l Vildéu y al Picu'l Rubiu y siguiremos per un guapu senderu que crucia'l fayéu Rel.layos, dexando a la nuesa manzorga la val.lina la Gargantiel.la hasta topanos cola riega Pigüeces que darános camín cenciellu hasta l'asombrosa braña de Pigüeces que tuvo que vivir tiempos tremendos pol tamañu les sos cabañes.

Cruciaremos el ríu Pigüeces y meterémonos per un camín que faldea con cierta facilidá hacia Pigüeces nomáu Sula Pena la Viesca, hasta qu'aportamos a la val.lina'l L.lumbadeiro. Equí, paez que baxando la val.lina llégase a Pigüeces, lo cual viendo lo que venía darréu nun mos diba importar jeje.

Pasamos pela braña Pigüeces y faldiamos la xerra Pigüeña

Meterémonos, a xubir la val.lina pero a la escontra que'l collaciu Cienfuegos que paez que lu ficiera pela manzorga, nós ficímoslo pela mandrecha y fuimos hacia'l norte teniendo que superar dellos espolones del monte hasta aportar pembaxo d'una peña hasta la cabana del L.lumbadeiro.

Kíla y Sua amuesen el calor del día tirándose a la solombra y nós vemos como una ruta cenciella y placentera va tornase nun infiernu de felechos y escayos. Esto ye, porque penriba de la cabana vamos tener lo qu'antaño seríen los praos de los Falgueirales pero agora hai felechos pa importar y milenta siendes ensin xacíu que piérdense a cada pasu lo crucen.

Pasaremos con dificultaes pel L.lumbadeiro pa siguir hacia Freisnéu

Algamaremos a salir d'esi felechal separándonos en dos grupos, unos tirando monte arriba y otros siguimos faldiando intentando garrar xacíu a los senderos y caminos, que namái qu'alcontramos zarraos y tomaos de broza, teniendo que pasar penriba d'ellos lluchando con escayos, cotoyes y felechos enllenos de cabarres.

Finalmente, sedremos a aportar a un camín curiosu que diba dexanos na Cabana de Freisnéu, onde decidimos llamamos al móvil pa ver onde metiéronse los nuesos collacios, Benjamín y Pangua. Dicir nel intre, que dende la braña Pigüeces ya seya pol camín de la mandrecha'l ríu o pol que díbemos nós y nun garramos hasta'l final baxando a Pigüeces, son meyores opciones sinon queremos andar de bardial en bardial.

Ganaremos a la fín el camín de la Precida dando a la fastera del Pigüeña


Dende Pigüeces, de xuru qu'hai un bon camín hasta esta cabaña de Freisnéu y llueu podremos siguir el camín de la Precida qu'empata los pueblos dambes fasteres. Magar de comunicanos pol móvil, siguimos esti agradable camín, anque con pinta de perdese tamién, hasta oyer glayíos y xuramentos de los nuesos collacios que tan enmediu d'un burdiu y nun atopen salida cenciella.

Al cabo d'unos minutos, nos qu'apaecieron como si s'alcontraren con Lobezno y tuvieren charrando acalorádamente con él, siguiremos entre les rises de los que salimos meyor paraos, pero esti guapu camín con vistes a cordales de Tinéu, Belmonte y Somiedu que tenemos entá por esplorar, como son los de Quintana, la Cabra o Serrantina.

Siguiremos pel camín colgáu hasta'l guapu pueblu de Pigüeña

Finalmente, con un sol qu'abrasa per momentos aportaremos a Pigueña de nuevu, llueu de percorrer 13,3 km y superar un desnivel acumuláu aprosimáu de 925 m, nun total de 6h y 25 min, que tuviéronmos en picos de tranquilidá montañera y de lluchar como xabalís pel monte.

La próxima vegada más y meyor...


Camudando'l Camín en Somiedu

4 comentarios:

  1. Berto, esa xerra ye perguapa y tien dellos requexos que la faen una maraviella, como Los Candanales (ye bona pena que nun fuerias a baxar), el Altu las Gabuxas, o el L.lumbadeiro, pero los Falgueirales ye una encerrona de les gordes. Ya lo siento. Cuando la ficimos nosotros llevábamos a Orbayu que conozlo tou de esa fastera y cruciamos ensin problemes, pero ser ye muy mal terren y eso que agora nun ye lo peor. Imaxínatelo en xunu o xunetu. Con calor, como la ficisteis vosotros, peor enforma. Nun ye d´extrañar que Kíla y Sua buscaren la solombra.
    Vais tener que vovler a conocer Los Candanales, pero por Las Claras que ye una maraviella, o meyor tovía, por Las Oscuras, que esa lladera téngola ensin conocer.
    Un saludu

    ResponderEliminar
  2. Téngolo claro... nun conozo'l Vildéu nin el Picu'l Rubiu... así qu'habrá que volver per ellí. Eso sí, cuntóme daquién del pueblu qu'a vegaes l'osu usaba esa cueva d'abellugu... habría qu'asomar el focicu con curiáu jeje

    ResponderEliminar
    Respuestas
    1. Voy dicite la verdá. Algún collaciu nun sería la primer vegada que lu topara ellí. Pero nun ye sitiu pa ivernar. Igual pa abellugase del calor de la tarde, o dalguna nuechi que ande por la zona, pero cuando veas como ye la cueva, vas date cuenta que nun ye sitiu pa tar bien de tiempo darreu.
      El Rubio (da fechu Picu´l Prau Niseriu o Picu la Val.linona) ye perguapu y ties que conocelu. Anímate a facelu por la Val.linona. Pindia de coyones, pero guapo enforma.
      Un saludu

      Eliminar