viernes, 14 de octubre de 2011

L.lindes (Quirós) - Pena Ruea

2 d'Ochobre de 2011

Track: L.lindes (Quirós) - Pena Ruea




Siempre que-y das una segunda intentona a una ruta viénente a la tiesta delles alcordances de l'anterior. Naquella ocasión, tocónos danos la vuelta por mor de la ñeve y un vientu xabaz que nun mos dexaba avanzar. Como agasayu pola llucha acaecía naquel día, pudimos esfrutar d'una xinta en casa Jamallo, onde probamos Carlos, Pangua, Simón y yo, l'afamáu pote de castañes, que tan bien merecía tien la fama.

Pero esta vegada, nun teníemos nada que nos fuera echar p'atrás. El tiempu yera inmeyorable, con día soleyeru, espeyáu y ensín vientu dalgunu que dificultara'l nuesu intentu de cumal. Nesti casu, cambiamos a Simón (que quedóse en casina coles sos neñes) por Cantarero, que ta mui dientro del ñucleu duru del GM Xuan de la Borrina.


Semeya grupal en L.lindes (927 ms)

Son les 10 y cuartu de la mañana, cuando tamos preparaos pa entamar la ruta. Atrás quedó, partir de Xixón, garrar la AS-I o minera, hasta topános en Mieres del Camín cola A-66 que nos dexaría en la Pola de L.lena. Ellí desayunamos perbien, y garramos la As-230 que nos fadrá xubir a la Col.la la Cobertoria dempués de pasar pelos pueblos l.lenizos de Palaciós, Piedracea y Armá.

Equí entramos nel conceyu de Quirós y deberíemos siguir per esta carretera hasta Santa Marina, pasando por Chanuces y Murias, pero como soi mui llistu y pensé que diba acortar dalgo, metíme pola carretera fedionda Qu-5, que fadríanos pasar unos gratos minutos de curva, curva y recontracurva, hasta aportar a Fresneo de Cortes, onde ya pola Qu-4, pasamos por Cortes enantes d'aparar el coche nel prau de la Ilesia de L.lindes.


Saliendo de L.lindes hacia la Mayá Vieya

Al fin, saldremos de L.lindes (927 ms) n'ascensu, y caleyaremos entre les cabanes de Los Turraos onde hai una fonte y munchu barru na pista. Lo de los Turraos camentamos que pudiera ser un enllaz a la rialidá que díbemos sofrir ya que'l sol apretaba a esta hora ya.

Siguimos, pel camín, que tien pinta de convertise en pista formigonada, ya que metieron escavadora... mal rollu... y bien ceo vamos separtános de la ruta a la Foiz Grande, pa garrar el ramal drechu que va a Pena Ruea y aportarános al primer puntu de descansu, la Mayá Vieya.


Travesando un fayéu impecable

Hasta esti puntu, tamos teniendo bona suerte, ya que vamos tapecíos del sol nel senderu y darréu vamos tar meyor inda, ya que tócanos travesar un fayéu ablucante, nel que paez que'l tiempu detiénse y la mente quier dise a otru mundiu de tranquilidá y ñatura. Ye otru d'estos requexos d'Asturies que faen nun querer tornar a la ciudá enxamás.

Magar d'esti luxu pa los xacios, salimos de la viesca delantre de la cabana del Manín, y el sol golpéanos nos güeyos con fuercia anque tamién amuésanos un rellumar de la caliza de Las Becerreras, que díznos que les fostilidaes cola roca tan averándose de secute.


Nel Manín ya entamamos a ver la caliza de cerca

Los nuesos pasos, fadránmos ascender hasta la Veiga Manín (1320 ms), onde los güeyos irremediablemente descansarán na visión de la Pena Arpín, que fai de paré sur de la Foiz Grande, anque como nun ye la nuesa xera, desviamos la mirada hacia'l puntu más alloñáu de caliza que vemos, ya qu'ese será'l nuesu destín.


Dexando la Veiga Manín embaxu

Asína que, dexaremos poquín a pocu abaxo, a la Veiga Manín y al traviés de senderos que retuércense llibrando dalguna cotoya qu'otra plantámonos na parte más vertical del averamientu a Ruea. Será, una especie d'escalera pela caliza, que fina no que nómase como'l Praón.


Averándonos con esfuerzu al Praón

Enriba'l Praón (1560 ms), ya vemos a la nuesa mandrecha tol cuchillar de Ruea, que ye práuticamente la vía normal d'ascensu, pero nun va ser el nuesu casu, ya que pretendemos facer más menos una circular dientro de lo que ye la Pena Ruea, cotando'l Baxu Ruea como ún dosmil más de Quirós.


Ganamos altor y apaez el grupu del Tapinón-Siegalabá

Nel intre, vamos tiranos, intentando tocar la menos caliza posible, hacia la caída a la Foiz Grande, ya que les vistes son ablucantes, y nun queremos perdeles. Pa ello, diremos superando praos pindios bordiando les afilaes peñes, hasta aportar a los Antiojos, que nun ye otra cosa que'l colláu de salida de la Cuesta Ruea, canal preciosa que xube dende la Foiz.


Nos antiojos con vistes acoyonantes sola Cuesta Ruea

Equí, nun podemos más que paranos, sentanos y esfrutar unos minutinos de les vistes. Embaxo nuesa tenemos tola Foiz Grande, enfrente tenemos al grupu del Tapinón, Siegalabá, Campanariu y Pena L.lana y un pelín más lloñe vemos ya tol marabayu de cumes dende'l Fariñentu, pasando pola Penaubina, Picos del Fontán,...


Ascendemos ensín priesa, el día ye perfeutu

Tamos encantaos cola ruta, coles vistes, col día... en definitiva cola Pena Ruea. Hai vegaes que nun ties nin ganes de facer cumal, porque l'ascensu ta siendo tan prestosu que date pena da-y fin a una ruta tan guapa. Casi, nun mos damos cuenta de que llevamos ya dos hores y cuartu caleyando.


Xubiendo al Baxu Ruea cola Pena Ruea a tiru tamién

Con galvana vamos siguir ascendiendo, esta vegada al traviés de la caliza, la cual ya ye imposible de llibrar. Cada pasu y cada metro que vamos xubiendo va amosándonos dalgo más... la montaña ye así. Cada metru más enriba que tamos, más cientos de metros de ventanu de visión que tenemos delantre.


Formación curiosa na caliza... Pangua dando amuesa del tamañu

Xubimos poles Coruxes y topámonos casi nel cumal del Baxu Ruea cola formación caliza, de la que Pangua fai midición. Ye abondo raro, y dános pa entretenos un pelín más, hasta qu'adelántome al grupu y aporto al estremu más occidental d'esti Baxu Ruea, rematáu per una trinchera de la guerra civil, que nun fai otra cosa que dame esi ventanu pol que tábemos naguando.


Queda dalgún facista per ehí??? Lo mesmu tenemos que tornar a les trincheres

Delantre nuesa, tenemos tol Puertu Agüeria y tolos cumales de la fastera norte del macizu d'Ubina. Casi nun se per onde entamar a dicir los sos nomes... de norte a sur, de sur a norte, dame igual. Que pasada!!!


Quien da más??? Vaya vistes d'Agüeria y del macizu norte d'Ubina

Casi ensín querer vamos percorriendo tol altu del Baxu Ruea. Digo bien, Baxu Ruea, porque nos mapes pon Vaso de Rueda y coses pol estilu. Equí tenemos una d'eses deformaciones toponímiques acastellanizaes, que munchos montañeros tomen como tal, ensín entrugase si eso ye así o non, o que más-yos da. Baxu Ruea, debaxu de Ruea, paez cenciellu o non??


Baxando del Baxu Ruea p'ascender a la Pena

Siguiendo la llínea de trincheres, facemos cumal del Baxu Ruea a 2095 ms, y baxamos hasta'l collaín que separa esti cumal, cola so ma caliza, la Pena Ruea. Siguimos ensín priesa, y enantes de facer l'escasu ascensu, siguimos acolumbrando les trincheres y faciendo alcordanza de como los nuesos güelos, defendieron Asturies y la llibertá del facismu. Yera nidiu, que dende esta posición dominabes tolos pasos del Puertu Agüeria.


Cumal de Pena Ruea (2148 ms)

Unos pocos minutos dempués ya tamos nos 2148 ms de la Pena Ruea. Que ganes-y teníemos a esta peñona. Con razón ye un de los montes más nomaos d'Asturies. Ta nun llugar privilexiáu, pelín separtáu de los demás cumales d'Ubina, y eso-y da un toque xenial, un mirador perfeutu de tolos demás.


Esfrutando del cumal algamáu nun día ablucante

Menos de 3 hores y media de ruta, dános esti cumal, qu'apocayá resistiérasenos. Nun queda más, que sentáse y esfrutalu, xintar el bocata y falar con tola tranquilidá del mundiu. Descansar ensín priesa ye lo que pídete'l cuerpu nesta enorme mole caliza que ye la Pena Ruea.


Entamando una baxada cenciella

Media hora de relax, dános pasu, a una baxada de la que nun teníemos mui claru como diba ser, ya que tenemos intención de baxar hasta Cortes y llueu garrar la carretera hasta L.lindes de nuevu. Sin embargu esta diba ser sele y fácil, como si'l karma montañeru, tuviera con nós en tou momentu.


Baxando polas Col.ladiel.las

Poro, baxaremos primeru per senderu más pindiu a envueltes y llueu nas Col.ladiel.las, onde desapaez la caliza, travesaremos pindios praos, que pola so estensión, faénos caltener rares conversaciones ente nós, topándonos con una nueva forma de facer montaña y cultura.

Llamentable, l'espeutáculu de cuatru persones, faciendo rimes a lo Gloria Fuertes colos nomes toponímicos del monte. Nun lo recomiendo de nenguna manera, jeje.


Primeros pasos de baxada pola Foiz de Buseca

El casu ye qu'entre pih.aes de menor y mayor calibre, aportamos al colláu que separa'l monte Los Tienzos cola Foiz de Buseca, y con un pocu d'erru inicial, empobinámonos pel senderu que fadrá dir pola manzorga del Arroyu Buseca.


Charly con tol Aramo de fondu

La verdá ye que nun se, si yera'l calor o que, pero nun mos prestó demasiáu esta baxada, así que ficímosla lo más rápidu posible, pasando peles cabanes de Cabón, La Oxa Grande y la Fenil.lega, nes faldes de la Pena Grande y llueu bordiamos el Picón pola manzorga dando pasu tamién pola Mortera y la Campretona, hasta dar visión al fín del Pueblu de Cortes.


Una llarga baxada hasta Cortes

Rialmente, la baxada fízosenos llarga, llarga y a pesar de facer la mayor parte na solombra, ya que'l senderu va bien protexíu per árboles, la falta d'un airín que refrescase, fízonos pelín penosa y mui calurosa tola baxada.


Alloñámonos del guapu pueblu de Cortes col Gamonitiru de fondu

So les 4 y media la tarde, pisábemos les pistes de formigón que daben traviesu al pueblu de Cortes, y dempués de comprobar les guapes cases que formen esti pueblu, dexámoslu atrás rápidu al alcuentru de la carretera que nos tendría d'empobinar con un pocu de cuesta hasta'l pueblu vecín de L.lindes.


Caberos pasos de la ruta

Con suerte tamién, la carretera ye sombría, y podemos inclusu esfrutar de vistes del pueblu de Cortes col Gamonitiru enriba d'él, y tamién de les viesques de L.lindes que ya van teniendo esi color tan especial que-y da la seronda.


Canta nel pueblín quirosanu de L.lindes

Finalmente, 6 hores y 45 minutos foron lo que nos llevó facer los 15 kms de ruta, pa dar preste a esta penona tan ablucante, teniendo pa ello que superar unos 1380 ms de desnivel acumuláu. Poro, intentar llaváse un pocu na fuente, y averános hasta'l chigre-sidrería-parrilla del nuesu collaciu Juanín nel banzáu de Valdemuriu, pa tomar dalgo taba más xustificáu.


Camudando'l Camín dende'l Baxu Ruea

Nesti rutón ficimos 2 dosmiles quirosanos que pertenecen al club 58 d'Ubina: Baxu Ruea (2095 ms) y la Pena Ruea (2148 ms) que tamién ye vértice xeodésicu y monte prestosu astur
Ver progresos en: Retos montañeros

4 comentarios:

  1. que pasada de ruta tio como presto facela
    por cierto gran momento de rimas a lo gloria fuertes, era meyor que nos despeñaramos que seguir soltando chorraes.

    ResponderEliminar
  2. Guapa ruta Berto, Peña Rueda es una cumbre a la que ya subimos varias veces, tanto desde Lindes como desde Cortes, incluso viniendo del Meicín por los Fontanes antes. Así que que quieres que te diga, a mi me gusta mucho y nunca me cansa.
    Por cierto, cuando vuelvas, que volverás, la vuelta hazla por Collau Lingleo, Cardosina y Foz grande, a mi me gusta mucho mas.
    P.D. Seguimos esperando las ascensión a La Morra, jejeje
    Un saludo

    ResponderEliminar
  3. Estoy de acuerdo con Montxu, lo de la Foz Grande es para no perdérselo.
    A ver esa Morra.
    Un abrazu.

    ResponderEliminar
  4. Gracies Monchu y Fernan, polos comentarios.

    La Ruea va cayer más vegas de xuru, y si, quiero xubir esa Foiz Grande, llueu la canal de los Mirios a cima y dempués pol Cuchillar abaxu, siempre dende L.lindes. Ta planeáu.

    La Morra toca esta selmana, jaja.

    Un abrazu

    ResponderEliminar