Ḥou de los Cabrones (Cabrales) - Torre Cerredu - Poncebos (Cabrales)

19 de Xunu de 2011

Track: H.ou de los Cabrones (Cabrales) - Torre Cerredu - Poncebos

Nun se esáutamente, cuantes vegaes desperteme esta nueche, anque rialmente nun foi de les piores que pasé nun refuxu. Fui a descansar abondo, pero como púseme de llau al ventanucu y tamos nes nueches más curties del añu, tuve claridá casi tola nueche, espertando más de lo naguao.

Aún así, llevanteme con ganes..., de mexar como non, pero tamién con ganes de ponéme a caleyar. Pamidega, que dalgunos collacios taben tamién coles mesmes ganes de ponése en marcha, o al menos Pangua, Carlos, Fernan, Bittor y yo madrugamos tolos que nos dexó la propia vida d'él refuxu.

Alborecemos con estes semeyes

Gracies a ello, alcontrámonos con paisaxes nel alborez p'alloquecer, y ye que cuantes oportunidaes na to vida tendrás de ver la lluna pente dos de les cotes de Dobresengos??? Poques supongo. Esta semeya prestóme pola vida, y al igual que les últimes güeyaes que tuve'l día anterior nesta ablucante fastera de los Urrieles.

Tamos nel refuxu del H.ou de los Cabrones, y selemente, entama l'actividá y paez que la xente va espertando... o casi tola xente, porque a César, Canta ya Iker, nun hai quien-yos saque del sacu, nin siquiera pa desayunar.

Semeya de grupu nel entamu de la ruta

Cuando a la fín, tamos preparaos pa entamar a caleyar son casi les 8 de la mañana, y el día a pesar de tar espeyáu y soleyeru, ta dalgo fríu, anque sabemos que magar de los primeros pasos, sobrarános la mayoría de la ropa.

Primeros pasos alloñándonos del refuxu del Ḥou de los Cabrones

La ruta que vamos siguir, ye bien cenciella no qu'en orientación refiérese, ya que saldremos del refuxu, y diremos bordiando'l H.ou de Cabrones pola manzorga col envís de xubir al colláu qu'hai ente'l grupu d'Aguh.as de Cabrones y una cota ensín nome de 2321 ms.

Con Dobresengos detrás y los Cuetos del Trabe al fondu

Esti tramu de camín fadráse per senderu calteniendo l'altor al traviés del Ḥou de los Cabrones, hasta entamar un pedreru que nos fadrá superar unos 200 ms d'altor del tirón. Ye un tarrén rotu, y hai que dir a la gueta del meyor pasu, pa nun dexar fuercies col continuu resbariar del pedreru.

Xubiendo pol pedreru y Bittor con Torre Cerredu

Menos mal, qu'a cada pasu que paramos, tenemos ablucantes cotes p'acolumbrar, ya sea mirando p'atrás colos Cuetos del Trabe, a la nuesa mandrecha con toles cotes de los picos de Dobresengos o xusto delantre nuesa, las Aguh.as de Cabrones y el propiu picu Cabrones, cola so arista noroccidental qu'amuésase pelín xabaz.

Colláu de pasu ente'l H.ou Negru y Cerredu y Labrouche, Saint Saud y el Torre Cerredu

D'esti colláu (45 min), pasaremos a arrodiar el Ḥou Negru, tamién pola manzorga, y otra vegada nun podremos más que contemplar nesti casu, la que sería l'ascensión normal al Picu Cabrones, pola arista sur, qu'empataría col nuesu oxetivu de güei: el Torre Cerredu, cota más alta d'Asturies y de Llión.

Dexamos de llau las aguh.as de Cabrones y ya tenemos Labrouche de frente

Les parés de les dixebraes cotes que tenemos delantre nuesa son alloriantes dende la nuesa posición, poro, nun somos a imaxinar les caídes hacia'l Ḥoyo Grande. Nel nuesu puntu, ye una maravilla acolumbrar a la nuesa mandrecha las Aguḥas de Cabrones y el Picu Cabrones y a la nuesa manzorga, el contrafuerte del Torre Cerredu, formáu pola Torre de Labrouche y el Riscu Saint Saud.

Pasín aéreu pa dexar Cabrones detrás

Nesti arrodiu al Ḥou Negru, vamos tener un pequeñu pasu aéreu, si nun queremos baxar desnivel nel nuesu caleyar hacia'l colláu. Nun ye mui difícil, pero fai falta un pelín de decisión y confianza nos nuesos pies y manes, y sobretou nes botes y el so agarre sobre la caliza de Picos.

Con pocu más de paséu, pondrémonos nel colláu sol Ḥou Cerredu, xustu embaxo de la Torre Labrouche, dempués d'una hora y cuartu de camín. Nun llevamos gran ratu de ruta, pero esi pasín con ambiente d'antes, dexa a les clares como s'alcuentren los ánimos y a Cantarero ya-y agüeyo cierta poca confianza.

Nel colláu hacia'l Ḥou Cerredu y travesando un ñeveru hacia la base del Torre

Esta falta de confianza, va espoxigar enforma allimentanda por un erru "de los guíes", que metémonos pel camín equivocáu, averándonos de más a la base de la Torre Labrouche, lo cual faínos tener unos cuantos pasos de trepe per un canalizu, qu'acaba nun destrepe aéreu sol neveru que xube paralelu al contrafuerte del Labrouche hasta'l Torre Cerredu.

Estos pasos, faen que Canta y Carlos, qu'anque diba superándolos meyor, toquen a retirada, y desvíanse hacia'l colláu de nuevu al nun ver mui nidia l'ascensión. Ensín más, darréu tolos demás vemos qu'esi nun pue ser un camín seguru, y dámonos la vuelta hacia'l colláu tamién, y travesamos esi neveru pela falda del Ḥou Cerredu.

Tiro del Osu y Coello y Párdida y Picu Boada

Dempués d'unes cuantes vistes hacia cumales que cierren el h.ou, como la Párdida, Boada, Tiru L'osu o la Torre Coello, y unes cuantes conversaciones, convencemos a los Carlos pa que-y den una intentona más al Torre, y tol grupu tornamos al ataque, esta vegada dende la so base.

Trepando hacia'l Torre Cerredu y vistes dende la paré

Son les 10 menos 20 cuando al fin, tamos na base, y vamos partinos en dos grupos pa poder dar preste a esti cumal tan míticu. Per un llau, va xubir Fernan de guía, con Pangua, César, Bittor ya Iker, y d'otru llau, voi quedame yo más atrás, pa sofitar en tolo que pueda nes trepaes y los pasos con patiu a Carlos y a Canta.

Dende la base, vamos tener unes primeres trepaes fáciles, hasta aportar a un descansu, onde decidimos dexar les mochiles pa nun entorpecer l'ascensión. Namái, Fernan, llevará la mochila col envís de xubir dalgo d'augua, xinta y la cámara pa facer semeyes durante la xubida. Llueu daríemonos cuenta, qu'a Fernan agotaríase-y la batería de la cámara y que con ello quedábamonos ensín semeyes de tol ascensu. Menos mal, que dalguien llevaba'l móvil anque la calidá ye más bien probetaya. Coses que pasen...

Siguimos avanzando dexando'l Riscu Saint Saud y Labrouche embaxu

Del ñeru onde dexamos les mochiles, vamos avanzar hacia un ñeveru a la mandrecha, el cual sirvirános de guía, pa entamar quiciás la primer y más difícil trepada. Ye nesti trepe, nel que ganaremos un canalizu que nos fadrá salvar la primer parte del ascensu.

Ye un trepe dalgo vertical pero con bonos agarres y piedra firme, colo qu'esguilaremos penriba del ñeveru y fadremos tol canalizu d'esquierda a drecha ensín mayores problemes hasta aportar a una curva, que nos fai, garrar el sentíu contrariu hacia la cume.

Cuetu de la Párdida y Neverón y Tiro L'Osu y Llambrión detrás

Penriba, paez dir too facilín, facilín y yo sigo colos Carlos, sele, anque Carlos va garrando soltura y fai los trepes meyor a cada pasu, demientres Canta, va pasándolo un pocu mal, sobretoo nos pasos más espuestos, pero aún así, colo que-y voi diciendo va tirando p'arriba.

La siguiente parte del ascensu, ye la que va de la curva hacia'l cumal y faese per dixebraos balcones siempre hacia la manzorga, y la mayor dificultá tará nel estáu de la roca, que ye dalgo más roto, y sobretoo qu'al avanzar xubiendo menos protexíos que pol canalizu, la esposición ye más grande.

Con un pocu más d'esfuerzu y un pocu más de nervios, los tres, Carlos, Canta y yo, aportaremos al que muncha xente pon como pasu clave, xustamente anterior al cumal del Torre Cerredu. Ye un pasu nel que ties qu'escoyer bordiar pela esquierda una barriga con ambiente nuna llambria o direutamente, trepar penriba de la barriga tirándose a la mandrecha.

Retu algamáu!!! Cumal del Torre Cerredu (2646 ms)

Pamidega, que ye muncho más fácil el trepe, y así lo facemos los tres, ganando los 2646 ms de la cume del Torre Cerredu. Una vegada que tamos nel vértice, paez que ya nos relaxamos un poquín más, sobretou Canta, que pasólo a cachinos mal, mal, pero sacólo alantre con unos pocos conseyos de como colocar manos y pies en dellos pasos.

Toi poniendo un pocu, l'ascensión al Torre Cerredu dende los güeyos de los menos esperimentaos en trepar, ya que si tuviera que dar la mio opinión, sería que ye una ascensión fácil, siempre y cuando escueyas bien el camín y nun se meta ún en nengún marrón. La roca... sinceramente taba meyor de lo que pensaba, y nun taba tan rota como camentaba que diba tar.

Son les 11 de la mañana, y ya pasaron 3 hores dende que saliéramos del refuxu de Cabrones, y más en concretu una hora y cuartu dende lo que podría ser l'entamu del ascensu a esta cota de Cabrales.

Baxando del Torre Cerredu

Sinceramente, toi feliz pola ruta y pol picu, pero sobretou por xubir con dos collacios y poder da-yos tol sofitu que pude durante l'ascensu, col ánimu de que sintiéranse lo más seguros posible y que lo pasasen lo meyor dientro del esfuerzu y los nervios normales.

En definitiva, tamos nel Torre Cerredu, cumal más altu de Cabrales, d'Asturies y posiblemente de Llión (digo posible, porque'l gps taba repunantucu y albidro que dióme una cota pelín baxa), y tamos bien, satisfechos y tranquilos como pa sacar delles semeyes con un móvil col que demos amuesa del nuesu llabor bien fechu.

Una media hora será lo que temos enriba esfrutando de les vistes, del ascensu y sobretou d'un finde nel que taba saliendo too perfectu a pesar de tar faciendo una ruta perdura. Pocu más, que picar dalgo de chocolate y frutos secos, más dalgún tragu d'augua y tiramos p'abaxo na mesma estructura de grupu.

Será Fernan, quien baxe con Iker, Pangua y César y yo quédome colos Carlos y con Bittor, al que nun-y presten muncho los destrepes. Baxo delantre, y voi guiyándolos hasta que vemos a un chaval, que ta metíu nun marronete y pídenos aída.

Tamos na diagonal hacia la curva, y el ta metíu nun ascensu direutu de la curva a l'arista cimera. Enantes, nos primeros pasos de la baxada, cruciámonos con dos que tan faciendo travesía hacia'l pasu final dende un llugar pelín raru, y doíme cuenta que ye ún d'ellos pero qu'ésti nun foi a facer esa trave, y que nun sabe nin como tirar p'arriba nin p'abaxo.

Tocóme dexar a los collacios a la espera, y tireme a degüeyu pa onde taba'l chaval, pa poneme debaxu d'él, ya indicái lo que tien que facer hasta'l pasu. Paez que ta más tranquilu, y faime casu, llegando hasta'l pasu final, onde-y glayo lo que tien que facer y llévalu alantre.

Tampoco ye que temos pa da-y llecciones de nengún tipu a naide, pero nun me paez de recibu, que dos persones tiren p'alantre, a sabiendes de que metiéronse nun marrón, y dexen al que menos controla atrás. Esti chaval tenía que tar bien nerviosu pa pedí-y sofitu a unos desconocíos, anque fizo lo que tenía que facer, cosa que nun ficieron los otros dos, que por facer la cume foron capaces de dexar solu a otra persona. Dame que camentar y muncho.... y vienme a la tiesta'l tema ochomileru... de que será la xente capaz de facer per ellí enriba.

Escapada a fueu pa xubir a la Torre Bermeh.a (2605 ms) col Torre Cerredu detrás

Pa cuando aporto a onde tengo a los collacios, miro p'abaxo y l'otra parte'l grupu ya ta nel ñeveru onde fina l'ascensión tala del Torre Cerredu y Fernan y Pangua van empobinándose hacia la Torre Bermeh.a. Nós, con mayor tranquilidá, vamos faciendo tolos pasos primero hacia la curva y llueu pol canalizu hasta'l ñeveru onde Carlos, Canta y Bittor, cada vegada más sueltos saquen ensín problemes tolos pasinos.

Tamos abaxo dempués d'unos 40 minutinos de descensu, y dexo a la xente, con Iker y César, demientres salgo corriendo al traviés d'un ñeveru y lliberáu de responsabilidá axeno, trepo a toda velocidá hasta ponéme al altor de Fernan y Pangua.

En pocu más de 10 minutos, y dempués de llibrar la cume de la Bermeh.a pola so mandrecha, bordiándola un pelín p'atacala dende un mirador increyible al Torre Cerredu, vamos facer la segunda cota de Cabrales y los sos 2605 ms.

Darréu, nun queda muncho más, que tornar al alcuentru de tol grupu, los cuales foron baxando poquín a pocu hasta les mochiles. De camín, alcontrámonos con otru grupu que va pal Torre Cerredu, y pedímos-yos un ibuprofenu pa Pangua, que lleva arrastrando molesties nuna rodiella dende'l día anterior y nel intre, taba siendo insoportable enforma.

Últimos destrepes col H.ou de Cerredu embaxo

Magar, de recuperar les mochiles, picamos dalgo más y siguimos baxando hacia'l H.ou de Cerredu, pa empobinanos al colláu que vien del H.ou Negru, col envís de garrar el camín hacia la Vega Urriellu.

Cincu hores dempués, tamos nesi colláu, y dexamos atrás les emociones de los ascensos al Torre Cerredu y a la Torre Bermeh.a. Ye agora, cuando paez que'l cansanciu acumuláu asítiase dafechu nes pates y na tiesta, que saben qu'inda queda munchu camín de percorríu hasta'l final del día.

Caleyando hacia los Albos

Tenemos un camín llargu, travesando'l Neverón d'Urriellu, hasta qu'aportamos a la H.orcada Arenera unos minutos enantes de les 2 de la tarde. Siempre nes baxaes viénense a l'alcordanza les rutes que me ficieron pasar pel camín que toi faciendo, y como non, l'ascensu al Neverón d'Urriellu y al Cuetu la Párdida céntranse en mi, como se que defechu, estes idegues tan tamién en Fernan o un cansáu ascensu a la Párdida tamién, nel que tuvo Carlos y Pangua el branu pasáu.

Párdida y Boada y Torre Cerredu detrás

Y ye qu'a más frayada, más camientes como dibes los otros díes a la gueta d'un pocu d'aliendu. Como diciendo, que vas muncho meyor esta vegada que l'otra. Nel mio casu yera bien ciertu, pero tamién sabía qu'esta vegada nun me quedaba a durmir nel refuxu de Vega Urriellu y qu'había que facer una interminable baxada hasta Poncebos.

Aportando a la H.orcada Arenera y despidiéndonos del Torre

Los minutos pasen, y la fame ye xabaz nesti altor del día, poro fadremos lo más rápidu posible tol tramu de la H.orcada Arenera a la Corona'l Rasu, onde acolumbro un nuevu oxetivu montañeru, ya que dende'l día de la Cresta'l Rasu ya tengo nidiu cual ye'l Frailón de marres. Tamién toca, como non, enantes del pasu de la Brecha los Cazadores, da-y un saludu al Picu.

El naguáu Frailón del Rasu y el Picu saludándonos

En mediu d'un ambiente montañeru, escalador, domingueru,... un pocu de too, aportamos al refuxu, onde práuticamente desplomámonos na paré onde pegaba la solombra y tirámonos al bocata y a la cerveza como llobos esfamiaos.

Son 7 les hores de ruta, y tamos pelín fechos polvu de los dos díes y ye que'l día anterior fueron 8 hores tamien y quédanos camín por andar nel día de güei. Asína que nos tiramos 40 minutos sentaos nel refu, ensín les botes y tomando un pocu'l sol, hasta que decidimos siguir alantre cola baxada a Poncebos.

Primeros difíciles pasos del camín del H.ou Lluengu

Les primeres intenciones yeren baxar pol H.ou Lluengu hasta ganar la Canal de Cambureru y d'ellí a la de Valcosín, no que sería una de les rutes más clásiques de descensu o ascensu a la Vega Urriellu. El problema yera que Pangua nun tenía la rodiella pa tales descensos, asína que Carlos y Canta, decidieron baxar a Pandébano pola ruta normal, y d'ellí a Bulnes, mientres que los demás, si que nos fuimos a conocer esti descensu que cada día ta más escaecíu polo que pudimos ver.

Baxando polas Traviesas

Asín pues, arrancamos del refuxu de Vega Urriellu, sobre les 3:40 h y nos empobinamos al pedreru del H.ou Lluengu, alcontrándonos d'aniciu con unos pasinos pelín malos, al tener que travesar dellos h.oos y más en concretu unu, que tien un destrepe pelín feu.

Polo demás, en 20 minutos taremos metíos dafechu, nel llarguísimu pedreru que baxará polas Traviesas alternándose tramos de sol picante con otros de solombra qu'agradezse enforma. Nun ye una mala baxada, ya que podemos dexános esquiar pel pedreru, pero si que faise pesada. Nun me quiero imaxinar lo que será xubir per equí, un día que pegue Llorenzu con ganes... bufff.

Mah.ada de Cambureru

Polo demás, entretendrémonos coles parés de la Peña Las Cuestas a la nuesa manzorga, y sobretoo, coles vistes del Picu, a cada pasu que miramos atrás. Esto será hasta que ponémonos enriba la Mah.ada de Cambureru onde al fin, tendremos un cambeu de tarrén, pasando del pedreru al amiestu de piedra y yerba, muncho más sele pa los pies.

Baxando pola canal de Cambureru

A partir de Cambureru, escaeceremos esa pedrera abierta y tendremos ante nós, una estrecha canal muncho más prestosa, que n'envueltes acabará dexándonos nel H.ue Baxu, onde entamará otru valle o canal preciosu como ye'l de Valcosín.

Esta vegada, utilizamos esta canal de Cambureru pa baxar, pero'l final superior de la canal ta nes inmediaciones del Llagu Rasu colo que suponemos una ascensión d'una dureza brutal, colo que mirar p'arriba da hasta mal rollu de lo paliza que debe ser.

Nuna de les varies caídes d'augua de la canal de Valcosín

Dexamos atrás semeyante canal, y metémonos na primer parte de Valcosín. Esta será amplia, hasta que zárrase pa amosános dellos pasos con augua, que tienen hasta "cuerda fixa" pa poder llibralos. Defechu, nun sería mui necesariu pero agraderíase sobretou nuna dómina de posibles xeladas.

Tramu más abiertu d'esta prestosa canal

Pocu dempués d'esta garganta de Valcosín, vamos meténos nun tramín ampliu y nel que la yerba predomina nel senderu a lo que súmase la solombra tan fresquina y necesariu pa un día de calor.

Dempués del pedreru de H.ou Lluengu, estes dos canales, tan siendo un descubrimientu increyible. N'ascensu tienen que ser perdures, pero pa baxalos tan siendo guapes ya entreteníes a más non poder.

Final de la canal de Balcosín y el so tabayón

Como agasayu final, tendremos la vista dende riba de Bulnes al salir de la canal y sobretóu un tabayón con tol augua de la riega de Valcosín esnalando, pa finar empatando un pocu más allá col riegu del Toral, formando entre los dos el ríu Texu, que da nome a la canal que tenemos que baxar de Bulnes a Poncebos.

Colos ánimos mui cansaos na otra baxada de Pandébano a Bulnes

Foron dos hores y media andaes, dende la Vega Urriellu hasta Bulnes, onde tirámonos a la cerveza como'l que se tira a un salvavidas. Con esto y meter los pies, nel ríu fuimos a relaxanos a la espera de qu'aportase la otra parte del grupu, que sigún los nuesos cálculos taríen por Pandébano.

Y asína sería más o menos, ya que tardaron casi ún hora en llegar hasta'l chigre onde tábemos ya como si fuéramos parte del mobiliariu, jeje. En fin, dempués de les entrugues típiques de que tal esto o l'otru, vemos que vienen tan cansaos como nós, ya inclusu, muncho más, asína que tirámonos a pola canal final que va dexanos en Poncebos: la canal del Texu.

Baxando pola canal del Texu

Son les 8 y media de la tarde cuando los nuesos pies descansen nel parking de Poncebos. Cuantayá quedaron los primeros pasos partiendo del refuxu de Cabrones col nerviosismu d'atacar el míticu Torre Cerredu. La montaña ye así, siempre la baxada ye más dura que la propia ascensión, y nun queda otra que sufrir hasta aportar al coche.

En total, metímonos la soba de 12 hores y media d'actividá nos que percorrimos más de 18 kms superando poco más de 1000 ms d'ascensión acumulada pero lo que ye pior pa los pies, 2900 ms de descensu acumuláu.

Menos mal, que'l cansanciu solo foi l'únicu y normal problema que tuviemos en tol finde, porque lo demás foi ablucante, tanto pol respetu del tiempu con dos díes preciosos, como pol bon facer de la xente durante tola ruta y el bon ánimu nos bonos y malos momentos.

La ruta final del añu montañeru del Grupu Montaña "Xuan de la Borrina", foi un completu ésitu y nun soi a albidrar un meyor final. Así que'l prósimu añu más y meyor.... si se puede.

Camudando'l Camín colos Carlos en Torre Cerredu

Nesta ruta ficimos el Torre Cerredu (2646 ms): primer cota, dos mil y vértice xeodésicu del conceyu Cabrales, pertenez al club 111 de Picos y ye monte prestosu como ta mándáu, jeje. Como compangu tuvo a la Torre Bermeh.a (2605 ms) que ye segunda cota de Cabrales, dos mil y tamién pertenez al retu del Club 111 de Picos.

Ver progresos en: Retos montañeros