martes, 5 de julio de 2011

Vega Urriellu (Cabrales) - Cresta'l Rasu

12 de Xunu de 2011

Track: Vega Urriellu (Cabrales) - Cresta'l Rasu



Munchos fueron los camientos pa posibles rutes que ficimos el sabadu de nueche. De primeres, dende qu'entamáremos l'ascensu dende Sotres a la Vega Urriellu el xueves de tardi, teníemos na tiesta facer el domingu un ataque al conxunto de los Albos.


Un día más salimos de la Vega Urriellu (1955 ms)

Pero rutes como l'ascensión a la Torre Carnizosu o al Picu Urriellu del vienres y sábadu, ficieron en nós allugar un cansanciu fonderu. Poro, lo que menos queríemos facer, dempués de tres díes de mochiles cargaes con material, yera facer otra ruta qu'obligáranos a llevar cuerda. Asína que, al tiempu de meténos na cama teníemos pensáu xubir al Tesoreru si'l tiempu lu permitía.


Fernan, Iván y yo col Picu detrás

Otra cosa mui distinta foi lo que ficimos finalmente, ya que namái llevantanos, vimos que'l día nun taba pa munches allegríes, poro decidimos desayunar selino y mirar los mapes col envís de facer dalgo curtiu en tiempu, pa que nos diese tiempu a baxar a xintar en condiciones en dalgún pueblín de Cabrales.

La verdá ye, qu'al final fuimos a alcontrar dalgo qu'a posteriori pue valenos pa otres rutes, ya que col envís de restolar una cota col nome del Frailón, lo que ficimos foi alcontrar un pasu alternativu hacia la parte baxera de la Corona'l Rasu, y lo que ye más interesante hacia'l Llagu Rasu.


Entamamos a travesar la fastera de h.oos a la gueta del pasu

Ensín más, salimos del refuxu y caleyamos en direición hacia la Brecha de los Cazadores, pero dempués de la primer xubida, cuando baxamos otru pocu, desviámonos ya travesando dellos h.oos, al agüeyar a les clares un senderu que traviesa un pedreru hacia un seu de yerba.

Esí ye esáutamente, l'oxetivu d'esta ruta, poro magar de travesar estos h.oos caleyaremos pol pedreru paralelos a la paré de lo que nomé La Cresta'l Rasu, ya que toponímicamente nun ta definíu en nengún mapa de los que tuve revisando.


Aportando al colláu onde entama la cresta

Una vegada qu'aportamos al seu de yerba, vamos dir xubiendo casi sin utilizar les manes por dellos balcones hasta topános con un pedreru de xubida, pol que cuesta un pocu más xubir, pero que pue llibrase en dellos tramos tanto pola mandrecha como la manzorga onde hai dalgo de yerba con piedres más grandes.

En una hora clavada taremos nel colláu que d'accesu hacia la Corona'l Rasu penbaxu y lo que ye más interesante, hacia'l Llagu Rasu. Nós, d'esti colláu ya decidimos ganar tola cresta que nos llevaría hasta la salida de la Brecha los Cazadores, camentando que lo que díbemos facer sería'l Frailón que ponen munchos mapes.


Mirando pa la Cresta'l Rasu y el conxuntu d'Areneras-Albos

Hai que dicir, que tan solo cola vista que se tien so los Albos y Areneras ya paga la pena, xubir hasta esti colláu. Ensín mayores dificultaes, vamos crestiar con dalguna trepada fácil, a la gueta del puntu más altu de la cresta.


En plenu crestéu col Diente y Neverón d'Urriellu al fondu

Finalmente, unos 40 minutinos ye lo que costónos encumar los 2190 ms d'esta Cresta'l Rasu y tamién danos cuenta que'l nomáu Frailón tien pinta de ser, un picu qu'ellévase gayasperu sol mesmísimu Llagu Rasu. Supongo que ya decidimos que pa otra vegada que temos asitiáos nel refuxu de Vega Urriellu, tendríemos una visita casi obligada hasta esta cota conociendo'l llagu de pasu.


Final de la Cresta'l Rasu col so puntu más altu (2190 ms)

Con esto, quédanos namái, destrepar fácilmente d'esta cota, pa garrar la cercana Brecha los Cazadores y facer el descensu típicu de la Corona'l Rasu hasta la Vega Urriellu. Anque enantes d'ello, nun podemos resistinos a echar una güeyada al Diente d'Urriellu o dientes porque paecen los menos tres, y al tan prestosu Neverón d'Urriellu que bones allegríes y penuries diéranos a Fernan y a mi poco más d'un añu.


Baxando pola Brecha los Cazadores

Cuando aportamos al refuxu, apagamos el gps con 2 hores y cuartu de ruta nes que caleyamos 3,3 kms y superamos unos 360 ms de desnivel, anque lo que más prestónos foi conocer esi pasu hacia'l Llagu Rasu, que nun taba tan claru si yera posible.


Una preciosa vista de los cumales averaos a la Corona'l Rasu

Como se suel dicir, con esto, un bizcochu y pagar tolo que debíemos del finde nel refuxu, que nun yera pocu, volvemos a cargar les mochiles hasta enriba, pa facer la ya mítica baxada hasta Pandébano onde teníemos los coches.


En plena baxada vamos alloñando dellos cumales

De la ruta, podía decir que nun ye mui reseñable, pero por exemplu, ta bien facela si llegasti a la Vega Urriellu un día de tarde pa facer dalgo potente al día siguiente y hai que facer tiempu hasta la cena y se quier sacar unes bones semeyes del Picu, ya que la Cresta'l Rasu ta xustu enfrente.


Peña Maín y baxada hacia la Trenosa col día espeyáu dafechu

Ya durante toda la baxada a Pandébano, podré por primer vegada na mio vida, ver tol paisaxe, ya que toles vegaes que fice esta parte de la ruta ta con ñebla, o lloviendo, o con ñebla y lloviendo. Así qu'al fin, pude esfrutar, de la norte del Picu, de los Albos, de la viesca l'Acebucu, de la mayada la Trenosa, de Bulnes emparedáu por Peña Maín y el murallón d'Amuesa,... faciéndose ésta menos pesada de lo esperáu.


Bulnes ente Maín y el murallón d'Amuesa y la Trenosa colos Albos detrás

Tamién como non, tuviemos la suerte d'alcontranos cola xente de Burgos, que baxaba al so ritmu tamién d'un llargu finde nel refuxu d'Urriellu, ya que tamién llegaron de xueves nueche y colaben el domingu pola mañana.

Pa l'alcordanza quédanos a Iván y a mí, esta semeya que nos ficimos nel refu con Jorge, qu'echónos un bon gabitu na escalada al Picu Urriellu del sábadu.


Camudando'l Camín con Jorge que nos echó un gabitu nel Urriellu

Nesta ascensión ficimos un dos mil de Cabrales: La Cresta'l Rasu (2190 ms)

Ver progresos en: Retos montañeros

No hay comentarios:

Publicar un comentario