Xarrio (Cuaña) - Pico Xarrio - Alto d'Abara

2 de Xunetu de 2011

Track: Xarrio (Cuaña) - Pico Xarrio - Alto d'Abara

Paez mentira que siendo la mio ma del occidente astur, nun m'averáse a facer dalgo de monte per esa fastera, y más teniendo una casa nel guapu pueblu mariñán de Ortigueira, nel conceyu de Cuaña.

Asína que, tando de finde per ellí, aprovechamos pa facer una ruta y xubir a un picu, que llevo viendo dende pequeñu y nel qu'enantes facíase una romería bien guapa: el Pico Xarrio. Nesti casu saldremos dende'l propiu pueblu de Xarrio, al qu'aportamos en 5 minutos, dende'l nuesu campu base, Ortigueira, pola Cñ-4, pasando pel pueblu de Mouguías primeru, y llueu per delantre del Hospital de Xarrio.

Partiendo de Xarrio (84 ms)

El pueblu de Xarrio, ta partíu pela carretera N-634 en dos, y nel nuesu casu vamos salir de la parte más alta, y más en concretu, del primer sitín qu'alcontremos p'aparcar cerquino de la antigua escuela.

Unos minutinos dempués de les 11 entamamos a caleyar, dempués d'alcontranos con unos cuantos pelegrinos que siguen la costa asturiana col envís d'aportar a Santiago. Nós, como tenemos la relixión de los montes, vamos peregrinar d'unu pa otru hasta que purguemos tolos pecaos que son munchos, jeje.

Siempre per pista hasta ver el final del Pico Xarrio

Nun tengo muncho más que cuntar, ya que dempués d'un par d'envueltes per carretera, vamos alcontranos con una pista que saldrá a la nuesa manzorga, y ya nun l'abandonaremos en tol camín, anque tendremos que tar atentos a garrar los ramales correutos, ya qu'esti picu ta cruciáu por varies pistes.

De toes formes, nun hai muncha pérdida y toes lleven al cumal, poro dempués de ganar cenciellamente altor durante casi ún hora, vamos alcontranos col vértice del Pico Xarrio y colos sos 375 ms.

Mirador del Pico Xarrio y vértice xeodésicu que lu encuma (375 ms)

Dempués de la visita al vértice de turnu, vamos pasar un ratín nel mirador que t'asitiáu pocu más al norte, y dende'l cual les vistes de la costa cuañesa y naviega son perprestoses. Tamos teniendo un bon día, y paez que la borrina costera inicial, entama a llevantar y podemos acolumbrar meyor tol paisaxe.

Ensín más, saldremos caleyando sin prisa, hacia'l prósimu oxetivu del día, L'Alto d'Abara, el cual ta estropiáu, por esi xermen d'anguaño que tanto tamos sofriendo los amantes de la montaña y el paisaxe astur: los putos molinos de vientu.

Alto d'Abara al fondu

Intentamos nun mirar muncho pa ellos, y baxamos per pista facilona del Pico Xarrio, hasta que topámonos cola carretera que xube al pueblu d'Abredo. Esti pueblu caltien una industria quesera perimportante, y ye mui encomendable probar los sos quesos y el perbono requexón que faen.

Pista de xubida a Abara

Podría falar de les antigües sendes o pistes que xuben al Alto d'Abara, pero tan mui estropiaes por mor, de les obres pa llantar los molinos. Asína que sin más, caleyamos primeru per carretera y llueu aprovechamos les pistes hasta aportar a lo más altu d'esti pequeñu cordal.

El vértice pente los molinos d'Abara y el Pico Xarrio a lo lloñe ya

Será una horina, lo que tardemos en facer tol camín dende'l Pico Xarrio a esta esti otru altu, el cual tien tamién mui bones vistes tanto del Cordal de Cuaña, al sur, onde tan les másimes cotes d'esti conceyu como de la costa cuañesa occidental y la franquina al norte.

Nel vértice xeodésicu del Alto d'Abara (450 ms)

Como pa dalgo teníen que valer los xigantes eólicos, sentámonos a la solombra que daben, pa xantar el bocata y descansar un ratín, ya que los nuesos pies llevaben andando ensín parar más de dos hores. Un ratín dempués, tendremos que siguir camín, faciendo la baxada d'esti altu de 450 ms nel sen contrariu al que trayíemos.

Abredo colos xigantes enriba y baxada pol monte d'Abredo

Nella, pasaremos pel pueblu d'Abredo, y nél, vamos garrar una prestosa pista, qu'ente ocalitos, dirá faciendonos baxar desnivel pel monte d'Abredo. Anque tengo un odiu pergrande a los ocalitos, nesti casu, yeren casi d'agradecer ya que nestes hores del día, el calor aprietaba abondo.

Siguimos baxando hasta alcontranos cola carretera

Nun tendremos perda nenguna, ya qu'al igual que na xubida al pico Xarrio, milenta pistes traviesen estos montes, pero toes lleven igualmente bona direición, y d'esti monte vamos aportar hasta la carretera Cñ-1.

Arribamos a Xarrio de nuevu

A pesar de dalgún camín, marcáu nos mapes que daríen un caleyar más prestosu, ensín tanto asfaltu, fuimos a saber a bona ciencia, que tan tapecios o cortaos por cultivos y acaban perdíendose. Poro, lo meyor ye siguir la carretera con paciencia, y esfrutar del caleyar travesando los pueblos de Meiro, A Esfreita, Folgueiras y Xarrio finalmente, que será'l nuesu puntu final de la ruta.

En resumen, foron unes 4 hores y 20 minutinos de ruta, anque perdimos dalgo de tiempu a la gueta de dalgún camín perdíu y nesti tiempu fuimos a caleyar 13 kms superando un desnivel acumuláu de 565 ms.

Camudando'l Camín dende'l Pico Xarrio

Nesta ruta fuimos a facer dos vértices xeodésicos de Cuaña: Pico Xarrio (375 ms) y Alto d'Abara (450 ms)

Ver progresos en: Retos montañeros