Ponte Bidosa (Ponga) - Peña Salón

30 d'Ochobre de 2011

Track: Puente Bidosa (Ponga) - Peña Salón

Ye bien ceo pola mañana, pero llevantámonos cola mesma ilusión qu'un guah.e'l día'l so cumple y lo más ablucante ye que los nuesos collacios vascos, llevantaránse asemeyáu a nós. Ente'l más mozu, Paula y el más veteranu, Josean (que Paco enfádaseme), sepárten-yos 40 años, y aún así vamos esfrutar por igual d'una prestosa ruta nel conceyu astur de Ponga.

Enantes, como non, teníemos per delantre un paséu en coche, pola autovía'l Cantábricu y la N-625, hasta Cangues d'Onís , onde diben xuntase los dos grupos. Per un llau, de Xixón, saliémos Pangua, Simón, Paula y yo. Demientres que de Basauri, veníen, Bea, Jose, Paco, Oscar y Fernan.

Semeya de grupu nel Puente Bidosa (297 ms)

Magar del desayunu, enllenu de presentaciones y alcordances, garramos la N-625, pasando pelos pueblos de Cañu y Tornín, y cruciamos el puente Dobra, pa entrar nel conceyu d'Amieva, onde travesaremos los pueblos de Buxil, Corigos, Pervís, La Vega Pervís y los Grazos onde topámonos col ríu Ponga nesti casu, y siguir camín pasando por Santiyán, Precendi, Les Vegues, Campurriondi, Ceneya y Rañes, onde metémonos de llenu nel Escobiu Los Beyos.

Pocu más alantre del desvíu al pueblu d'El Beyu, toparémonos cola Puente Bidosa, onde aparte de chigre pa les cañes postreres, tenemos el tabayón d'Aguasalíu y un bon aparcaderu pa dexar los coches.

Entamando la Senda'l Carteru o del Camín de Degüera

Unos minutinos enantes de les 10, tamos ya preparaos, p'aniciar el camín que nos trae a Ponga: L'Ascensión a Peña Salón. Pa ello, tendremos que caleyar unos 15 minutinos per carretera hasta l'entamu de la nomada Senda'l Carteru.

El nome correutu, ye'l camín o senda de Degüera, pero nun se sabe mui bien como algamó esti nome, aparte de que, de xuru que sí que tenía qu'usala dalgún carteru pa llegar al pueblu de Biamón, anque tola vida foi utilizáu polos habitantes de Biamón pa baxar hasta la vega'l ríu Seya.

Superamos dalgún pasu per pedreru pa salinos a la manzorga

Lo que rialmente importa, ye qu'esta senda ye tou un espectáculu. Encomencipia pindia dafechu, col envís de metése na canal de Degüera que llegaría hasta la Peñe L'Estarcoriu, pero xusto cuando metémonos nel pedreru, vamos travesalu hacia la manzorga, p'alcontranos con un senderu bien prestosu que traviesa la Mata Degüera, ganando altor selemente.

El Picu la Plana siempre presente

Como non, les vistes hacia los Beyos van quedando abaxo poquín a pocu y van abriéndose les vistes hacia les sos parés, destacando sobremanera'l Picu La Plana, qu'en direición hacia'l Pontón, va acompanganos durante gran parte de la ruta.

Dalgún pasín nun seu al que-y llantaron "cadenes de seguridá"

El día ta preciosu y el bon ambiente en tou momentu fai que sin danos cuenta pasemos per dalgún pasín aéreu sobreaseguráu con cadenes. Llueu, nos averaremos a la guapa Foz de Biamón enantes de xubir n'envueltes hasta'l puntu onde descubriremos el semiabandonáu pueblu de Biamón.

Aportando al guapu pueblu de Biamón

La entrada a esti pueblu nun pue ser más guapa, ya que pasaremos per un seu posando la vista más nel pueblín qu'en les caídes y arribaremos a Biamón (695 ms) , dempués d'una horina y cuartu de caleyar y con 400 ms ganaos de desnivel.

Cuando dixe semiabandonáu, ye porque paez qu'hai nicios d'al menos iguar delles cabañes, qu'espero sirva pa que nun desapaeza'l pueblu de too. Nestos camientos andamos, pasiando poles sos cais, hasta la parte más alta'l pueblu, onde travesamos un prau col envís de garrar agua nel llavaderu que vemos a lo lloñe.

Del llavaderu ascendemos per viesques d'ablanu nel camín de la Tobera

Magar de la recoyida d'augua, con un colorín ferrullentu, vamos intentar dar caza a Paco, que siempre gústase d'andar al menos un tramu de ruta solu pol monte. Esto fadrémoslo, al traviés del camín de la Tobera, el cual amosarános una viesca d'ablanu mayormente (Simón díxome qu'había más coses, yo de botánica...) al mesmu tiempu que nos fadrá xubir un bon desnivel hasta la guapa collada Ñochendi de 950 ms d'altor.

Arribando a la collada Ñochendi (950 ms)

Hai que dicir, qu'a pesar del esfuerzu, aportar a esti colláu con cabañes ye una pasada ya qu'ábrense les vistes muncho y tenemos enfrente nuesa peña Carriá y el cantu Veleru, asína como enriba nuesa la peña L'Estarcoriu que forma parte de la Xerra Biamón.

Ablucante mirador hacia'l Tiatordos y Peña Tarañes

Aún así, nun mos paramos muncho, ya que tenemos na tiesta una visión muncho meyor qu'ésta inda. Asína que xubiremos per senderu bordiando un espolón del cantu la Cerra, cume secundaria de Peña Salón y taremos nun increyible mirador del Picu Tiatordos pola so cara más xabaz, y d'unos collacios de lluxu, Peña Tarañes, Campigüeños y la Peñe Crespa.

Increyible fayéu nel monte Condares

Como estes vistes nun mos abandonarán durante un llargu ratu, meterémonos nel monte Condares pa esfrutar de les ancianes del llugar, unes fayes d'un tamañu ablucante y llegaremos al puntu que personalmente taba esperando: el pasu del Toyu.

El Toyu ye una xerra que ñaz, al igual que'l valle Casallellies que xube a Ñochendi, del ríu Santangustia y si queremos da-y la vuelta al so puntu más altu, Peña Salón, tenemos que travesar la so caída hacia les vegues onde asítiase'l pueblu de Viegu por dalgún llugar.

Delles semeyes del Pasu del Toyu cola so cueva

Esti llugar que de primeres nun somos a pescanciar, alcuéntrase siguiendo'l pequeñu senderu que baxa n'escalera hasta una cueva, y anque paeza que metémonos na boca'l llobu, travesaremos la escuridá aína y tendremos antes nós un seu, que paez más difícil que'l pasu de la cueva.

Baxada de la cueva a la canal de la Tuba

Como podéis ver nes semeyes d'enriba, práuticamente paez que nun hai baxada pero como siempre nestos casos, hai que dir poquín a pocu, y con ello, diremos pasando pegaínos a la paré n'envueltes y con curiáu baxaremos ensín mayores problemes. Eso sí, si ta dalgo húmedu, tar sollertes porque hai que baxar per una llábana que pue ser un auténticu tobogán.

Perguapes vistes hacia Viegu dende la base de Peña Salón

Esti seu, dexarános no que sería la fin de la canal de Tuba, teniendo agora que bordiar tola paredona del Toyu per un senderu de yerba llargo, hasta aportar a un collaín embaxu l'espolón de Peña Salón. Equí pararémonos, un ratín pa beber augua y picar dalgo, ya que'l día y les vistes de Viegu, la viesca Peloñu, la llende agreste con Casu (Tiatordos, Tarañes) y en xeneral de Ponga son alloriantes.

Arrodiando Salón cola cresta de Subes y Sen de los Mulos enriba Vibuli

A pesar de les casi 3 hores de ruta, inda quédanos un cachín p'algamar la cume de Peña Salón, ya que tenemos que siguir arrodiando'l paredón que tenemos enfrente nuesa, y ye qu'en llinea recta tendremos tan solo unos metros al cumal, pero n'altor sepártenmos d'ella unos 200 ms.

Asína que siguimos camín, esta vegada per un tarrén más abegosu, ya qu'intentamos nun baxar desnivel nel nuesu camín hacia'l Forcáu de Boya la Campiella. Nel intre, taremos quiciás na parte más gafienda d'avanzar, ya que por nun baxar al colláu Baxeñu pa garrar el camín que vien de Vibuli a la Boya Campiella, travesaremos tramos perpindios de cotoya baxa, pente mil y un sendes que paecen ser la bona.

Caleyando hacia'l forcáu de Boya la Campiella

Menos mal, que l'entretenimientu coles vistes hacia la Pica Subes y la cresta hacia Sen de los Mulos déxenmos sele nel seu armáu, que nun par d'envueltes pondrános nos 1204 ms del forcáu. La Boya la Campiella, ye'l pasu ñatural pente la Peña Salón y el conxuntu de peñes y forcaos formaos pola Peña La Campiella y les peñes de Vibuli o Vibulines.

Últimos pasos pa ganar l'arista a Peña Salón col Cornión de fondu

Dende esti forcáu, tendremos un andar cenciellu hasta'l cumal de Peña Salón, pero hai vegaes que nun se sabes si prefieres mirar p'alantre y caleyar o mirar p'atrás y dir de culu, ya que teníemos enfrente l'espectáculu del macizu del Cornión (Cotalba, Requexón, Peñasanta d'Asturies, Torre de la H.orcada, Torre d'Enmediu, Torcu, Peñasanta Castiella,...) y delantre'l Valdepinu y el Cantu Cabroneru. Ablucante.

Esfrutando de cada pasu hacia'l cumal

Aún así, siguimos alantre y xuntámonos toos nos 1247 ms de la Peña Salón, xustu a la una y media de la tarde y con pocu más de 3 hores y media andaes, poro la fame y les ganes de sentase yeren más que xosfiticaes.

Cume de Peña Salón (1247 ms)

Casi 40 minutazos tuvimos nel cumal. Podría dar milenta razones: Que l'iviernu ta bien cerquino y ya nun se pue tar munchu tiempu enriba los montes o que yeremos muncha xente y ente'l bon rollu y tola xinta que teníemos tardamos en finar los bocates o que les vistes yeren ablucantes y había que facer mil semeyes o simplemente que tábase de lluxu na cume y nun daben ganes colar d'ellí.

Les distintes vistes dende esti privilexiáu llugar

Con pena, tuvimos que despedinos d'esta prestosa peña y de toles vistes que nos arrodien. Saludamos al norte al Pierzu y Carriá, al occidente al Tiatordos y Tarañes, un pocu más al sur a dellos cumales de Ponga na viesca Peloñu, como son el Rasu, el Recuencu y el Zorru y más alantrón les dos grandes peñes ponguetes: Ten y Pileñes y como non el Cornión al Occidente.

Preparándonos de nuevu pa baxar a la Boya la Campiella

Baxaremos de nuevu a la Boya la Campiella, onde comprobamos de nuevu que'l pasu ye tan antiguu qu'hasta los postes de lluz tamién van per ellí, y tamien acolumbramos cual va ser el nuesu camín de baxada, que nun ye otru que'l del Llacíu.

Garrando'l camín del Llacíu

Esti camín, que va dexanos nel pueblu de Casielles, de primeres baxa pegáu a la cresta que va de Peña Salón a la peña Cerrá, y baxa faldiando por senderu bien marcáu, p'a lo postreru, facer unes envueltes nel que predominen, les cotoyes más altes y les piedres sueltes nel senderu más de los deseáu.

Acolumbrando Casielles dende riba

Esta ye la parte más fea del percorríu, pero entaínamos p'aportar a la Forcadiella la Villa, onde tou esto camudará dafechu y tendremos embaxo nuesa'l pueblu de Casielles y les milenta envueltes de carretera que xuben a él, dende'l puente'l Cándanu y la foz de los Andamios.

Sitín curiosu pa descansar un pocu en Casielles (815 ms)

Distrayíos por esta semeya y por tornar a ver los Beyos, allugámonos nun plis al llau de la ermita de Casielles, onde descansaremos un ratín y echaremos un traguín d'augua dempués d'unos 45 minutos de baxada.

Senda hacia'l pueblu de la Caviella

Magar del descansu, siguimos alantre garrando'l camín qu'empobinaríase a Biamón, pero ceo vamos desvíanos a la mandrecha, pa garrar otra sienda qu'esta vegada si que nos lleva un pueblu dafechu desaniciáu, La Caviella.

Dexamos embaxu'l pueblu escolingáu

El pasu per esti pobláu, ye tou un agasayu pa los sentíos. Paga la pena entretenese agüeyando cada requexu y camentando onde t'allugáu esti pueblín. Con ello, algames que'l maxín faígate ver la dureza qu'antañu desprendía vivir nun llugar como esti, asitiáu nun paredón pindiu d'un beyu con caídes xabaces hacia cualesquier sitiu.

Averándonos de nuevu al escobiu los Beyos

Tanto ye'l despiste que tenemos pel pueblu, que perdemos un pelín el pasu bono, pente les sos caís y una vegada fuera de la Caveilla, tenemos que facer travesía a la mandrecha y xubir un pocu de desnivel, pa empatar col camín bono, que llevarános per guapes envueltes hacia los Beyos.

Mui cerquina del fin del camín de la Verganza

Esta cabera parte, sirve pa esfrutar de L'Escobiu Los Beyos, ya que de la que vas xubiendo pola senda'l Carteru o senda de Degüera, vas mirando p'arriba tol tiempu. Pero na baxada ye onde apréciase esi tayu que fai'l ríu Seya, dixebrando los conceyos de Ponga y Amieva.

Xintando asfaltu hasta'l puente Bidosa

Nel intre, finaremos esta senda nomada, camín de la Verganza y fadrémoslo xustu nel Puente La Verganza. Equí toparémonos de nuevu, cola N-625, la cual tendremos que siguir durante 2 kms aprox. hasta'l Puente Bidosa, tando sollertes de dir bien pegaínos a la paré, ya que ye una carretera mui transitada en fin de selmana.

Como nota toponímica dicir, qu'un beyu, ye un llugar perestrechu, una foz pente dos peñes, poro dicir Desfiladeru de los Beyos o L'Escobiu los Beyos, ye dicir una redundancia. Babayaes toponímiques, por nun saber o conocer el verdaderu significáu de los nomatos.

En resumen, una ruta preciosa de 13,2 kms, que nos fadrá conocer una ablucante fastera pongueta durante 6 hores y 50 minutos, superando 1400 ms de desnivel y conociendo un de los miradores d'Asturies más guapos nos que tuve: La Peña Salón.

Camudando'l Camín dende Peña Salón

Nesta ablucante ruta conocimos un monte prestosu astur: Peña Salón (1247 ms)
Ver progresos en: Retos montañeros