Travesera Picos 2018 - 2019

13, 14, 15 y 16 Xunetu de 2019

Track: Travesera Picos 2018 - 2019

Nos años que llevamos de traveseres, tuviemos participación de tou tipu, entamando con muncha xente pal finde y quedando menos pal restu de díes, otres nes que fuimos constantes nel númberu anque esto siempre fué les menos y hasta dalguna na qu'entamamos un bon garrapiellu de xente y dempués del primer día de ruta, quedamos tres namái, jeje.

Partíemos de Poncebos con bon ánimu

Picos d'Europa 2017 - 2018

Del 3 de Setiembre al 8 de Setiembre de 2018

Track: Picos d'Europa 2017 - 2018

Nun soi a alcordame cuando, Ana y yo, planiamos tirar pa Picos una selmana a facer actividá, pero de xuru que la primer vegada que salimos al monte xuntos, na ivernada na Carba Valsecu, ya golíemos que díbemos del mesmu palu cañeru nel monte.

Alcuérdome bien un día, que quedamos pa trepar y preparar col mapa una posible circular, pero como siempre, demientres un cafetín, pasamos olímpicamente de trepar y centrámonos en dibuxar col maxín, cuales pudieren ser les diferentes estayes de la circular.

Entamábemos en Poncebos la tremenda circular

Travesera Picos 2017 - 2018

14 al 17 de Xunetu 2018

Pues un añu más, tornábemos a facer la folixa final de temporada cola Travesera Picos 2017 - 2018, pero fuera de la normalidá, esti añu díbemos colar hasta la montaña Palentina, col envís quiciábes d'alcontrar unes xornaes montunes onde primasen les ascensiones y non los pateos llargos en travesía.

La Travesera Picos 2017 - 2018 fizo camudar munches coses nel GM Xuan de la Borrina, baxando'l nivel de les rutes, anque tamién aidó muncho l'iviernu tan duru que tocónos sufrir esti añu n'Asturies, quedando munches de les rutes plantegaes nel grupu pa prau, faciendo a la escontra, rutes alternatives y de menor entidá montañera.

Primer día saliendo de Horcadas en Riaño

Travesera Picos 2016 - 2017

Del 8 al 11 de Xunetu de 2017

Track: Travesera Picos 2016 - 2017 

Otru añu más, afrontábemos el final de la temporada 2016-2017 nel GM Xuan de la Borrina y como non, facíemoslo cola nuesa mítica Travesera per Picos. Tengo que dicir, que nun fue'l meyor añu de monte, sobretou na parte final de la temporada y la Travesera diba ser el remate final.

La verdá, ye que cuando les coses déxense un pocu al debalu, pues acaben por pasar coses así. La mió desmotivación nel monte, dexaron los preparativos de la Travesera pa demasiáu tarde y llueu por mor del lleno nun refuxu, tuve que camudar los planes.

Bayurosu grupu nel entamu de la Travesera en Poncebos

Travesera Picos 2015 - 2016

Del 8 al 11 de Xunetu de 2016

Track: Travesera Picos 2015 - 2016

Un añu más, dende casi la formación del GM Xuan de la Borrina, facemos la traca final montuna cola Travesera de los Picos d'Europa. Cuantayá, díbemos dando los nuesos primeros pasos serios per tan nomáu tarrén de xuegu y agora cuéstame decidir per onde trazar les distintes estayes pa conocer daqué nuevo.

Siempre hai problemes, baxes y altes por llesión, por problemes pa tener dalgún día nel trabayu,... pero esti añu superáronse con creces, volviéndome llocu colos refuxos, menos mal que portáronse y finalmente llibramos les perres adelantaes, sin mayores contratiempos.

Grupu de salida del sábadu... tou yera cares sonrrientes

Con too, con más o menos xente, con pior o meyor tiempu, salieron grandes xornaes de monte, esfrutando los pocos o munchos que ficimos la Travesera día tres día, anque hai que dicir que fízose dura y dalgunos pueden dar fe.

Equipín de sofitu furgoneteru... así presta pola vida

Tanto, que dalgunos avezaos al monte esti añu, como Benjamín, siendo de los más animosos pa cualesquier ruta que propongamos, el segundu día de Travesera daba saltos d'allegría por poder abandonala y dirse a la so casina, jaja.

Vista típica de les aguyes de Peñasanta dende Vegagüerta

Y ye qu'esti añu, tuviemos la "suerte" de contar con Fernan en mou de mochileru, llevando la furgo de coche escoba. Sólo fue'l finde, pero diónos la oportunidá de cargar con mochila d'ataque nes dos primeres xornaes y eso notóse enforma.

Segundu día saliendo dende Cordiñanes

El percorríu trazáu yera novedosu en dos coses: facelo completamente circular per primer vegada y la segunda que'l nuesu camín diba llevanos hacia'l cordal Cantábricu, lo qu'hasta'l momentu nunca pasara en tolos años de Travesera.

Aportando a Santa Marina... magar d'otra estaya bien dura

D'otra miente, esti añu nin raspiamos casi un centímetru de tarrén asturianu, lo que llevónos a patiar y conocer los conceyos llioneses de Sayambre y Valdión, teniendo los aloxamientos en Sotu y Vegabañu de Sayambre y en Cordiñanes y Santa Marina en Valdión.

Tres supervivientes... quedaben pel cordal cantábricu

Como nota perpositiva: dar les gracies a la Pensión El Tombo, qu'anque serios tuvieron a bien danos un pelín de marxe, ya que'l primer día llegamos a la cena polos pelos, al igual que nel refuxu de Vegabañu, teniendo que duchanos dempués de cenar incluso.

Vegabañu tarde y pente'l borrín

Casu aparte tenemos col Albergue La Ardilla Real de Santa Marina, el cual sorprendiónos gratamente, tanto nel tratu, la cena y el bon ambiente que vivíase nel bar, cola única pega del almuerzu que yera pelín tarde pa una xera montañera como la que teníemos per delantre al día siguiente.

Salíemos con bien de ganes de Vegabañu

La nota mui negativa, fué la xinta en Sotu, qu'aparte de ser más secos qu'una mierda diéronmos una comida que nin un refuxu a dosmil metros. Tien coyones, que la cena de Vegabañu fuera de restallu y que nun pueblu póngante nel menú del día (cobráu caru) les mítiques albóndigues de perru que pues topate n'Urriellu cuando aquello ta que nun s'entra.

Acabóse'l suañu... perdifícil les condiciones pa la traviesa

Ciertamente... de pena l'Hostal Peñasanta... nun me verán per ellí na vida y más dempués de tener qu'abandonar los nuesos oxetivos na última estaya por mor de les condiciones tan males pa facer el traveséu de Peña Beza.

D'esti xeitu, fináremos la Travesera, ensín traveséu del últimu día y con una xinta permala pa rematar. Pero bono, esto ye asína, dos díes tiempu inmeyorable y otros en que'l borrín xugónos una mala pasada y ficimos lo que pudimos siempre dientro d'unos mínimos de seguridá.

Cansaos pero contentos en Sotu de nuevu... anque con un pocu de mal tastu

Una vegada más... dar les gracies a los collacios que participaron y a los que finalmente nun pudieron por dellos motivos: Fernan (por ideala anque nun pudieras caleyar nin un día), Mariano, Feli y Oscar pol sofitu y Bittor, que cayóse de la convocatoria a última hora, toos dende Euzkadi.

Dende Asturies, gracies a Alberto, Natalia, Benjamín, Zori, Richar, Dani y Haritz. Sé qu'esfrutastes de xornaes perbones de monte, anque sufriérais polo llargu del camín. Una alcordanza pa Charly, que por motivos de trabayu nun pudo asistir y a Cesar que tamién quedó fuera de la convocatoria a última hora.

Como siempre, vamos dexar unos datos a mou resumen y les correspondientes entraes del blog (que diré escribiendo lo más ceo posible):

Estaya 1: Sotu (Sayambre) - Cordiñanes (Valdión)

Duración: 12 h
Llonxitú: 20.9 km
Ascensu: 2090 m
Descensu: 2140 m


Estaya 2: Cordiñanes (Valdión) - Santa Marina (Valdión)

Duración: 11 h
Llonxitú: 12.6 km
Ascensu: 1740 m
Descensu: 1420 m

Estaya 3: Santa Marina (Valdión) - Vegabañu(Sayambre)

Duración: 10 h  y 20 min
Llonxitú: 25.5 km
Ascensu: 1755 m
Descensu: 1590 m

Estaya 4: Vegabañu(Sayambre) - Sotu (Sayambre)

Duración:  2 h aprox
Llonxitú: 6,2 km
Ascensu: 210 m
Descensu: 570 m

Totales:
 
Duración: 35 h y 20 min
Llonxitú: 65.2 km
Ascensu: 5795 m
Descensu: 5720 m

Travesera Picos 2014 - 2015

Del 4 al 7 de Xunetu de 2015

Track: Travesera Picos 2014 - 2015 

Como tolos branos, apaez ante nós el platu fuerte de la temporada, la travesera de Picos. Si l'añu pasáu sofriéramos una travesera gafa, ensin dengún día de bon tiempu, esti añu va ser tolo contrariu y durante los cuatru díes de travesía, el calor y el sol fueron de los mayores protagonistes, xunto al bon ambiente y el cansanciu fonderu.

Hai que dicir, qu'esti añu bien pudiera ser la travesera de más kilómetros de percorríu y na que los participantes fueron cayendo, unos por abandonar magar del fin de selmana y otros por delles llesiones.

Semeya de grupu con tol mundiu a tope de fuercies

Muncho tuvo que ver la primer estaya de la travesera, que facía conocer delles siendes mítiques ganaderes dende Arenas hasta'l pequeñu y guapu refuxu de la Terenosa, nes cercaníes de Pandébano.

Poro, llegaríemos a la Terenosa, fóndamente cansaos, tanto los más fuertes como los menos avezaos a travesíes de díes. Ésto, fizo qu'al día siguiente tán sólo siguíesemos a completar la travesera César, Fernan, Bittor y yo.

Paradina en Tielve nun día mui llargu y calurosu

En la Terenosa retiraríase Alberto con muncha pena y un cabréu importante, teniendo que baxar col restu del grupu, mui cansáu ya dempués del durísimu primer día. Aún así, gracies a la bona cena y el descansu algamáu nel refuxu de la Terenosa quinxeron ascender faciéndonos compaña hasta la Vega Urriellu, col envís de presentar los respetos al maxestuosu Picu Urriellu.

En la Terenosa xenial refuxu lloñe del barullu d'Urriellu

Ellí, despediríamonos penriba d'una borrina qu'a la postre fué un pilancu pal descensu per Cambureru y Valcosín, que según llegó a les nueses oreyes tresformóse nuna aventura pa munchos de los collacios del grupu por mor de lo moyao del tarrén.

N'Urriellu facemos la despedida de los del finde

Los restantes del grupu, esfrutaríemos d'un día inimaxinable pelos altores de los Urrieles, ya qu'alborecer con borrina baxa na Terenosa nun mos facía preveer pasar tantísimu calor nel nuesu camín hacia'l colláu H.ermosu.

Colláu H.ermosu amosando tola so guapura de vistes

A la segunda prestosa estaya, amestaríemos les novedaes del refuxu de H.ermosu pa completar un grandísimu día, ya que tener caña de cerveza y xarres de mediu llitru, da tolo que necesites cuando aportes con un secañu de los que faen hestoria.

Nel remocicáu refuxu de H.ermosu entamaría la mayor aventura

La tercer estaya fue un auténticu infiernu pa un compañeru del grupu, siendo de xuru un de los retos mentales y físicos más fuertes que pueden superar una presona. Nun sólo'l percorríu fizo ponenos a prueba a toos, sinon el calor insoportable llevónos hasta la llende física, pasándolo realmente mal nel descensu hasta Caín.

Desfechos mental y físicamente aportamos a Caín

La tarde-nueche de Caín, como siempre relaxante y motivante polos comentarios de los paisanos caineh.os, llevónos dende un refrescu nel Cares pa los nuesos desfechos pies, hasta una cena relaxada con muncha recuperación de llíquidos espirituosos hasta casi la media nueche.

El Cares siempre ta presente nes traveseres

La cabera estaya ya dexaba fuera de control a Fernan y Bittor, que daríen un paséu tranquilu per Cares hasta Poncebos, desviándonos César y yo a conocer dalguna fastera más de les ablucantes canales de Picos.

Tocando'l vacíu na sienda'l Cares

Como tolos años, tan sólo nos quedaría ya la xinta final de Travesera, qu'esti añu diba ser en Camarmeña con vistes al Picu Urriellu, que despedíase de nós hasta que l'añu que vien tengamos a bien tornar per estos llares.

Qu'asina seya...

Homenaxe al ascensu del Sporting col Urriellu de fondu

Una vegada más... dar les gracies a los collacios que participaron esti añu: Fernan y Bittor dende Euzkadi y Alberto, Natalia, Zori, Richar, Carlos, César, Dani, Haritz y Paulina dende Asturies, qu'espero que l'añu que vien seya a animase.

Como siempre, vamos dexar unos datos a mou resumen y les correspondientes entraes del blog (que diré escribiendo lo más ceo posible):

Estaya 1: Arenas (Cabrales) - La Terenosa (Cabrales)

Duración: 12 h
Llonxitú: 22 km
Ascensu: 2475 m
Descensu: 1313 m


Estaya 2: La Terenosa (Cabrales) - Colláu H.ermosu (Valdión)

Duración: 11 h
Llonxitú: 15,5 km
Ascensu: 1970 m
Descensu: 1225 m

Estaya 3: Colláu H.ermosu (Valdión) - Caín (Valdión)

Duración: 9 h y 20 min
Llonxitú: 10.5 km
Ascensu: 620 m
Descensu: 2260 m

Estaya 4: Caín (Valdión) - Camarmeña (Cabrales)

Duración: 5 h y 20 min
Llonxitú: 13.5 km
Ascensu: 1130 m
Descensu: 1215 m

Totales:
 
Duración: 37 h 40 min
Llonxitú: 61.5 km
Ascensu: 6195 m
Descensu: 6013 m

Travesera Picos 2013 - 2014

Del 5 al 8 de Xunetu de 2014

Track: Travesera Picos 2013 - 2014

Quinta Travesera Integral de Picos del GM Xuan de la Borrina y esti añu, nin el percorríu, nin les ascensiones, nin el calor fue'l mayor de los nuesos enemigos... el mal tiempu que sofrimos llevóse la palma.

Magar de cinco años faciendo traveseres, descubriendo nuevos caminos, albidrando posibles futures traveseres,... tenía que venir el mal tiempu pa fadiar un pelín les nueses andances montunes y aún así, como cada añu, fuimos a sacar alantre estaya tres estaya hasta completar de la meyor manera posible la nuesa Travesera 2013 - 2014.

La totalidá del grupu na Quinta Travesera

Travesera Picos 2012 - 2013

Del 6 al 9 de Xunetu de 2013

Track: Travesera Picos 2012 -2013

Cuarta travesera integral de Picos del GM Xuan de la Borrina y una vegada más, vamos conociendo un pelín meyor esta brutalidá de sistema montañosu y tamién vamos conociéndonos a nós mesmos, como montañeros, coles coses bones y males.

Y ye que cuando estudiamos un percorríu pa la Travesera, hai qu'albidrar per adelantáu lo que vamos sofrir, onde vamos meténos y en qué condiciones vamos tar pa cual o tal día. El nuesu maxín, camiento que diseñó pa esta Travesera unos oxetivos enforma ambiciosos y la propia montaña foi la que púsonos nel nuesu llugar.

Sicasi, nun too va ser coses males, por nun cumplir lo que teníemos na tiesta. Les meyores noticies, vinieron de la capacidá d'adautase a planes B ya inclusu C, y sobromanera a la capacidá de sofrimientu, nunes condiciones perdifíciles con munchísimu calor y munchísima ñeve, muncha más de lo camentáu.

Tolos participantes de la Travesera 2012-2013 con Monchu, Esther y Luis

Travesera Picos 2011 - 2012

Del 7 al 10 de Xunetu de 2012 

Track: Travesera Picos 2011 -2012

Tercer travesera integral de Picos del GM Xuan de la Borrina y como siempre siguimos sorprendiéndonos con esti macizu montañosu, ya qu'anque camentábemos que nun diba ser tan dura como les anteriores... al final, foron les kilometraes a la escontra de los desniveles lo que la fizo perdura. 

En comparanza con otros años: 2009-2010 y 2010-2011, esti añu queríemos conocer un pocu meyor la fastera sur de Picos y pa ello, tocaba caleyar per requexos tan guapos y estensos como'l seutor de la Bermeh.a nel Cornión o les Peñes Cifuentes nos Urrieles. Poro, anque nun teníemos na tiesta'l sufrimientu de grandes canales como Dobresengros o Mueñu, al tener los finales d'etapes más altos nel sur, nun fuimos a pescanciar a les clares lo que nos diba costar aportar a ellos, travesando de norte a sur los macizos.

 

Estos fuimos los entamadores de la Travesera 2011-2012

 

Tamién, como novedá esti añu, dibemos facer dos díes nel macizu del Cornión y tan solo unu nos Urrieles, amestando-y a la travesera, la xatada de percorrelu d'oeste a este nel tercer día, coles patuques ya cargaes de dos díes anteriores. Otra novedá importante yera tener que cargar los 4 díes cola mochila hasta enriba, ya que nun teníemos furgo que nos ficiese la xera del avituallamientu. Echamos de menos a Mariano, que facía esi llabor con tan bon humor, pero más que cola perda de pesu... por tener un pocu d'allegría cuando llegamos dafechu esfondaos nes distintes estayes de la travesera. 

 

Dicir qu'a cambeu, tuviemos la suerte de poder aloxanos nel refuxu de Vegabañu, non masificáu y con duchina d'augua caliente y ya nun dicir na comodidá del hostal de Posada o nel hotel d'Áliva... too hai que dicilo, sufrimos pero llueu descansamos, jeje.

 

Fuimos capaces de xuntanos toos estos

Y como siempre... nesto de les traveseres unos van y otros vienen.... Lesiones, trabayos, vacaciones... quítenmos xente per un llau y per otru nos lu devuelven. Esti añu, tornó al sufrimientu Simón y Carlos nun pudo pol trabayu, Pangua tuvo qu'abandonar nel primer día, Tito debutaba con dos díes y Bittor fizo un día menos de lo normal y César tan solo dos.... pero tuviemos les grates visites de Bea y Josean y de los nuesos collacios cántabros, Juan, Tino y Jóse. 

Al final... quedamos Fernan y yo... qu'echándo-y arguyu y quiciás poca reflexión al asuntu... fuimos a finala nun cuartu día, nel que'l tiempu nun quiso danos un pelín d'aliendu y fizo más penosu'l nuesu andar pel macizu d'Ándara... eso sí... tanto tiempu solos... fízonos tener más que planificada la próxima travesera, jeje.

 

Y acabamos frayaos los de siempre... gracies Fernan

 

Ensín más... dar les gracies a los participantes: Tito, Bittor, Simón, César, Pangua, Bea, Josean, Juan, Tino, Jóse y la norabona a nós... Fernan y Berto, qu'enriba de planificala tenemos el puxu de completala. 

Besarkada bat collaciu A lo caberu, dicir que l'añu que vien... vamos intentar que seya un pelín más humana la travesera y que nun mos dexéis solos nestes aventures tan ceo como esti añu.

Un añu más, vamos dexar unos datos a modo resumen y les correspondientes entraes del blog:  

Estaya 1: 

Pandecarme (Cangues d'Onís) - La Torrezuela - Vegagüerta - Perru - Vegabañu (Sayambre - Llión)  

Duración: 9 h y 20 min 

Llonxitú: 21 km 

Ascensu: 1700 m

Descensu: 1480 m

Estaya 2: 

Vegabañu (Sayambre - Llión) - Perru - Bermeh.a - Bufón - Posada (Valdión - Llión)  

Duración: 8 h y 45 min

Llonxitú: 14,5 km

Ascensu: 1260 m  

Descensu: 1665 m

Estaya 3:

Posada (Valdión - Llión) - Chavida - Frieru - Padiorna - San Luis - Áliva (Lliébana - Cantabria)  

Duración: 11 h y 5 min 

Llonxitú: 20 km 

Ascensu: 2250 m 

Descensu: 1530 m 

Estaya 4: 

Áliva (Lliébana - Cantabria) - Cámara - Lechugales - Siella del Caballu - Ándara - H.itu d'Escarandi(Cabrales) 

Duración: 9 h y 15 min

 Llonxitú: 19,5 km 

Ascensu: 1640 m 

Descensu: 2030 m 

Totales 

Duración: 38 h y 25 min  

Llonxitú: 74 km 

Ascensu: 6850 m 

Descensu: 6705 m 

Más nada, la prósima l'añu que vien.... eso de xuru.

Travesera Picos 2010 - 2011

Del 14 al 17 de Xunetu de 2011 

Track: Travesera Picos 2010 -2011

 

Segunda travesera integral de Picos del GM Xuan de la Borrina, y como non, nun va ser la cabera nin muncho menos, y ye que demientres tamos caleyando y descubriendo nuevos requexos de Picos, ya tamos camentando cual podría ser la siguiente travesera y que llugares, canales o picos podríemos facer el prósimu añu. 

 

Una cosina si que tenemos nidia,... l'avance nel sen montañeru que tuvo esta travesera. Paezme, que foi unos cuantos gradinos de dificultá y dureza más que la del añu pasáu, anque'l disfrute foi'l mesmu defechu. Una vegada más, nun tenemos más que pallabres d'agradecimientu pa Mariano, que tornó a ser el nuesu coche escoba, acompangáu por Oscar y que lloñe d'aburrise a la espera de que los montañeros aportemos al final de la ruta, siempre tenía una sorrisa y una cerveza qu'ufrecenos al venos llegar frayaos de tol día caleyando. 

 

Esti añu, tuviemos dalguna baxa qu'otra pero sabemos que pal prósimu añu tornarán a esti grupu d'alloriaos, que tan decidios a travesar los xabaces Picos, durante 4 díes, a pesar de los dolores de pates, pies, rodielles,... 

 

 

Tolos participantes de la Travesera 2010 - 2011

 

Gracies a los participantes: Bittor, Carlos, César, Pangua, Fernan y Berto Un placer tamién, contar el primer día con Bea y Josean, que ficiéronmos compaña nel ascensu a la Verdilluenga. A lo caberu, agradecer a Fernan la ilusión que tien, ya qu'un añu más planeó tola ruta conmigo y ya tien como yo na tiesta la prósima pal añu que vien. Besarkada bat collaciu

 

Vamos dexar unos datos a modo resumen y les correspondientes entraes del blog:  

 

Estaya 1: 

Llagu La Ercina (Cangues d'Onís) - Aliseda - Verdilluenga - Cuvicente - Trea - Caín (Llión) 

 

Duración: 11 h y 10 min 

Llonxitú: 20 km

Ascensu: 1560 m 

Descensu: 2150 m

 

Estaya 2: 

Caín (Llión) - Mueñu - Palanca - Llambrión - Colláu H.ermosu (Llión)  

 

Duración: 10 h y 45 min 

Llonxitú: 12 km 

Ascensu: 2550 m 

Descensu: 1000 m 

 

Estaya 3: 

Colláu H.ermosu (Llión) - Hoyu Oscuru - Cabaña Verónica - Vieh.a - Vidriu - Áliva (Cantabria)  

 

Duración: 8 h y 5 min 

Llonxitú: 15 kms

Ascensu: 1280 m 

Descensu: 1670 m 

 

Estaya 4: 

Áliva (Cantabria) - Grah.as - Prau Contés - Contés - H.ierru - Sotres (Cabrales) 

Duración: 6 h y 20 min 

Llonxitú: 15 km

Ascensu: 1190 m 

Descensu: 1810 m 

 

Totales 

Duración: 36 h y 20 min 

Llonxitú: 62 km 

Ascensu: 6585 m 

Descensu: 6630 m 

 

Más nada, la prósima l'añu que vien.... eso de xuru.

Travesera Picos 2009 - 2010

Del 8 al 11 de Xunetu de 2010

Track: Travesera Picos 2009 -2010

 

Primer travesera integral de Picos del GM Xuan de la Borrina, y al mio entender nun va ser la cabera nin muncho menos, a pesar de les munches incógnites que teníemos na tiesta, cuando tábemos preparándola. Nun sabíemos si seríemos a finalizala, nin cuantos díbemos finalizala, solo sé, que dempués de llevala a cabo, toos sabemos que sin Mariano, el nuesu coche escoba, nun podría ser posible. 

 

Dende equí mil gracies, por facenos un favor tan grande nos díes que nos acompangó. Tamién les gracies a tolos que la intentaron y que de xuru tan dispuestos l'añu que vien, a facer la siguiente llocura que se nos ocurra, porque prometemos que será como mínimu tan guapa, emocionante y dura como la d'esti añu. 

 

 

Tolos participantes de la Travesera 2009 - 2010

 

Gracies collacios: Mariano, Bittor, Jóse, César, Simón, Pangua, Toni, Raul y Canta A Fernan, poques gracies tengo que da-y porque ye tan culpable como yo, d'esta alloriada de travesera, así que pa la prósima preparámosla meyor inda. Besarkada bat collaciu

 

Vamos dexar unos datos a modo resumen y les correspondientes entraes del blog:  

 

Estaya 1: 

Pandecarme (Cangues d'Onís) - Asturianos - Canal Parda - Traviesos - H.orcada Miguel - Mesones - Caín (Llión) 

 

Duración: 10 h 

Llonxitú: 17 km

Ascensu: 1915 m

Descensu: 2515 m

 

Estaya 2: 

Caín (Llión) - Dobresengros - H.orcada d'Arenizas Bah.as - Arenizas - Vega Urriellu (Cabrales) 

 

Duración: 10 h 

Llonxitú: 14 km

Ascensu: 2450 m

Descensu: 940 m

 

Estaya 3: 

Vega Urriellu (Cabrales) - Morra Carnizosu - Collá Bonita - Moñetas - Vegas de Sotres (Cabrales)  

 

Duración: 7 h 

Llonxitú: 8 km

Ascensu: 580 m

Descensu: 1440 m

 

Estaya 4: 

Vegas de Sotres (Cabrales) - H.idiellu - Malatas - Ándara - Sotres (Cabrales)  

 

Duración: 6 h 

Llonxitú: 14 km

Ascensu: 1570 m

Descensu: 1590 m

 

Totales  

Duración: 33 h 

Llonxitú: 53 km

Ascensu: 6515 m

Descensu: 6485 m

 

Namái queda dicir, ta la prósima....