lunes, 4 de noviembre de 2019

Travesera Picos 2018 - 2019

13, 14, 15 y 16 Xunetu de 2019

Track: Non disponible entá

Nos años que llevamos de traveseres, tuviemos participación de tou tipu, entamando con muncha xente pal finde y quedando menos pal restu de díes, otres nes que fuimos constantes nel númberu anque esto siempre fué les menos y hasta dalguna na qu'entamamos un bon garrapiellu de xente y dempués del primer día de ruta, quedamos tres namái, jeje.

Partíemos de Poncebos con bon ánimu

Esta travesera dende l'entamu, ya yera un claru reflexu de la temporada 2018 - 2019, na tuviemos el menor númberu de salides de monte del grupu. Asina que con estes blimes díbemos ver si yeremos a facer la goxa, ye dicir, díbemos ver si yeramos capaces de facer los 4 díes con mui pocu entrenu nel día a día nel grupu.

Facemos una paradina lúdica en Bulnes

Sicasí, lo que más me motivó fue ver como varios participantes de la travesera, intentaron sumase los díes que pudieron, entrando nes distintes estayes como bien pudieron. De man, saldríemos Benjamín, Alberto y yo, faciendo una clásica ruta de conexión pente Poncebos y Caín, pero problemes físicos de Benjamín ficieron que tuviera qu'escapar pel Cares de vuelta pa casa.

Una mala xugada física dexábanos ensin Benjamín pa la siguiente estaya

En Caín esa tarde-nueche, sumaríense al mini grupu, Pepa y Jose, que veníen permotivaos p'algamar un cumal pocu ascendíu y que como ya contaremos nos resúmenes diarios, nun mos lo punxo na cenciello, tanto no físicu como no téunicu del propiu cumal.

Na segunda estaya entraben en xuegu Pepa y Jose

Sacante del cumal complexu, la ruta pente Caín y Ariu, diba facese llarga pero guapa enforma, conociendo los collacios, distintos pasos qu'entá nun conocíen siendo pa mín un placer enseña-yos estos requexos del Cornión.

Enmediu del Cornión esfrutando d'un día preciosu

Con cares de cansanciu llegaben Pepa y Jose hasta Ariu, pero cola felicidá de tener nel bolsiellu un cumal al que-y teníen bien de ganes y p'allegría de toos, n'Ariu, diba da-yos el relevu na Travesera, Haritz, que nun perdiera'l tiempu y tuviera en solitariu faciendo dalgunos montes pendientes como la Verdilluenga y tol cordal qu'aporta hasta la Peña'l H.ultayu.

Haritz entamaba su particular travesera n'Ariu

Como siempre, fué un placer pasar una nueche más n'Ariu, que pali pali, va convirtiéndose nun de los refuxos onde más a gusto toi y hai que dicir que de toles pernoctes d'esti añu, fue la meyor de toes ensin dubia, con un atapecer bien guapu como ye vezu nesta preciosa vega.

Despedímonos de Pepa y Jose pa siguir cola tercera estaya

Al día siguiente, despediríemos a Pepa y Jose que baxaríen per Trea de nuevu hasta Caín. Haritz, Alberto y yo, tendríemos per delantre una llarga etapa que tendría de llevanos hasta Vegabañu. Poca xente enllaza una travesía d'esti xeitu, pero tenemos que dicir que fué una ablucante xornada con un día perguapu pa patiar.

Haritz, Alberto y Berto Xuan acolumbrando tol central

El percorríu qu'escoyimos diónos la oportunidá de bordiar la Torresanta faciendo un trazáu increyible pasando un pelín de los tracks que teníenos preparaos y siguiendo un pocu l'instintu pente les dixabraes terraces y pasos que caen dende la fastera oriental de la cresta de Torresanta.

Perguapa tercer estaya que ficimos nunos tiempos perbonos

Nel pasu per Vegagüerta tuviemos que dar conseyo a varios montañeros, baxando a un grupín hasta cerca de Vegabañu, indicando a otros como descender a Cordiñanes per Capozu y aconseyando a una pareya pelín mayor que la so meyor opción yera quedase a durmir nel refuxu de Vegagüerta, viendo les hores que-yos quedaben de lluz.

Aportamos al refuxu onde pa fuxir del xentíu dedicámonos a la 1906

Dicir qu'esi día, aportamos a Vegabañu con una soba enriba potente y el baxón de ver el refuxu hasta los topes, ya facíanos albidrar que nun díbemos pasar la meyor nueche. Si podemos comentar que tuviemos una cena brutal, pero nin la duchina d'agüina frío pa relaxar nin les varies 1906 que tomamos, nos llibraron de pasar la pior nueche nun refuxu que tuve en años... vaya manera de roncar el personal.

La cuarta estaya recíbenos con un día borrinosu

La última estaya diba ser un desafíu, con un trazáu novedosu que tan sólo alcontré nel mió maxín, asina que llevantámonos cola permala noticia del borrín como compañeru de viaxe. Fadríemos nun actu de fé una ascensión impecable hasta poder salir penriba del mar de ñubes, teniendo claro que nun podíemos seguir navegando a ciegues el restu de la ruta, poro tuviemos que camudar los planes.

Hai dellos momentos nos que sólo echá-y valor faen que too salga bien

Según fuimos caleyando hacía un camín conocíu, díbemos viendo que la opción tomada yera la correuta, que tolos kilómetros y hores que nos restaben hasta'l puntu final de la Travesera, nel llagu la Ercina, diben ser casi imposibles d'abordar, poro contentos y cansaos al empar punximos el puntu final a esta 9ª Travesera Picos del GM Xuan de la Borrina.

Despedímonos encantaos y felices hasta la próxima travesera

Como siempre, vamos dexar unos datos a mou resumen y les correspondientes entraes del blog (que diré escribiendo lo más ceo posible):

Estaya 1: Poncebos (Cabrales) - Bulnes - Amuesa - Piedrabellida - Cuesta Duh.a - Tranvia - Caín (Valdión)

Duración: 10 hores
Llonxitú: 18
km
Ascensu: 1850
m
Descensu: 1700
m

Estaya 2: Pendiente

Duración:
--- min
Llonxitú:
--- km
Ascensu:
--- m
Descensu: --- m

Estaya 3: Pendiente

Duración:
--- min
Llonxitú:
--- km
Ascensu:
--- m
Descensu:
--- m

Estaya 4:  Pendiente

Duración:
--- hores
Llonxitú: --- km
Ascensu: --- m
Descensu--- m

Totales:
 
Duración: ---- min
Llonxitú: ---- km
Ascensu: ---- m
Descensu: --- m  

No hay comentarios:

Publicar un comentario