Track: Poncebos (Cabrales) - Bulnes - Amuesa - Piedrabellida - Cuesta Duh.a - Tranvia - Caín (Valdión)
Alborezo n'Arenas con un día pa dir de monte estupendo ya que'l día anterior tuviera esguilando de tarde un pocu en Pó y dempués de cenar, fuera pa la cama prontín, nótome descansáu y preparáu pa entamar la mió 9ª Travesera de Picos.
Dalgo qu'entamó como una idega pa conocer un tarrén que nin siquiera atrevíemos a pisar, fue pasando a ser una tradición que facía que tuviese que restolar pente mapes y tracks, pa intentar facer un percorríu novedosu añu tres añu.
Partimos de Poncebos (241 m) con tola ilusión
Como ya dixe na entrada resume, nun fue'l meyor añu montañeru del GM Xuan de la Borrina, asina que quiciás, nun preparé un percorríu demasiáu esixente nel intre, pero que si daba pa conocer llugares y pasos míticos dientro del entornu de los Urrieles y el Cornión, lo cual a los participantes d'esta travesera pensé que diba gustá-yos.
Magar d'almorzar n'Arenas, xuntarémonos Benjamín, Alberto y yo p'averanos hasta Poncebos, onde tendremos el puntu d'aniciu pa esta Travesera. Mi idega yera poner un pocu en valor, el camín antiguu que xune los pueblos de Bulnes y Caín, enllazando siempre per pasos y senderos colgaos dellos metros penriba del Cares.
Xubiremos la guapa canal del Texu travesando'l pueblu de Bulnes
Con bon ánimu, garramos ritmu caleyando hacia la puente la H.aya, onde cruciaremos el rigu Cares, pa garrar el camín que xube hacia Bulnes pela canal del Texu. Diremos a un ritmu tranquilu, intentando que Benjamín seya'l que lleve'l pasu a marcar, aportando al barriu altu de Bulnes onde decidimos parar a tomar una cañina, queriendo facer alcordanza de la primer vegada que'l grupu pasara per Bulnes.
Aquella vegada, na ascensión a la Torre Cerredu en dos díes, ficiéramos de camín al H.ou Los Cabrones, el Trabe Norte, pa dempués siguir camín hasta'l refuxu. Esta vegada, nun vamos xubir tan altos, pero sí que tendremos que comenos la mítica canal d'Amuesa, que daquella mancara enforma físicamente a un par de collacios.
La postrera canal d'Amuesa pasará factura en Benjamín
Esta vegada, somos menos y tenemos claro que Benjamín sedrá quien vaya poniendo ritmu, comenzando dempués del descansu, con muncho ánimo, siendo capaces d'adelantar a dalgún montañeru más, pero pali pali, voi viendo como la cuestona va faciendo'l so trabayu y acaba por atragantase munchísimu.
Alberto y yo, vamos sobraos, va 8 años esta canal paecióme durina, pero col pasu'l tiempu y conociendo como conocemos Picos, la canal d'Amuesa, nun ye más que media canal comparada con otres de la fastera del Cares.
Magar de xintar dalgo nel colláu Cerredu... Piedrabellida dictará sentencia
Llega un momentu, nel que Benjamín, tien que parar, pocu pembaxo de la fonte d'Amuesa, que malpenes tira agua y ya nun ye físicamente'l problema, tamién lo ye estomacal, colo que'l paisanu ta pasándolo permal.
Camiento pa mín, que nel colláu Cerredu, puede descansar un ratín y que llueu tendría tou baxada hasta'l Cares pa tirar pa Caín o de vuelta pa Poncebos pela sienda'l Cares. Pero a vegaes les baxaes, faénse pior que les xubíes y descender Piedrabellida, tamién se-y fae bola, decidiendo Alberto que baxa con él hasta'l Cares y que siga la ruta yo sólo.
Desviaréme pel H.orcáu Turoneru pa facer la travesía a la canal de Ría
Cláramente esta ye la meyor opción, ya que tengo claro que lo intrincáu del senderu que va hasta Caín nun ye apto pa facer neses condiciones físiques. A metá de Piedrabellida, despídome d'ellos y baxo corriendo col envís d'entrenar un pelín y ganar tiempu pa restolar dalgún pasu perdíu que tenía ganes de conocer.
Desvíome hacia'l h.orcáu Turoneru, que ya conozo de facer a la escontra'l mesmu camín dellos años atrás y sorpréndome mirando pa la canal de Ría, qu'alcuéntrase baxo miós pies. Tengo que travesar esti enorme canalón p'averame hasta la collada'l Cuebre, pero nun pueu facer otra cosa que na parte baxera de Ría, mirar durante 5 min pa onde va unos meses alcontramos, Ana y yo, el primer tramu de ñeveru suciu que llevaríanos hasta l'ansiada collada l'Agua nuna ivernal increyible.
Que distintu ye tou en dómines distintes, malpenes pasaren 4 meses dende aquella aventura y agora toi sólu otra vegada y nun pueu más que sorreir al alcordame de cada momentu que vivimos. Ensin más, paro baxo la solombra d'un árbol del monte Cuebre y xubo a fueu hasta la collada (1016 m), continuando tola cuesta Duh.a corriendo hasta'l colláin del Descansu pa pensar que facer.
Xubiré a la collada'l Cuebre pa correr tola cuesta Duh.a
Nun voi mal de tiempu, asína qu'asómome al Robledal, col envís d'alcontrar un rastru que me lleve hacia la cueva de Trescámara qu'entá nun conozo. Baxaré como si fuese hacia la Tranvia y xusto al altor en que m'alcuentro, soi a ver una traza penriba d'un solitariu árbol.
Busco per onde tengo meyor descensu y ensin pensalo muncho, con pantalón curtiu de correr nun fué bona idega, métome per un senderu tomáu, pasando penriba l'árbol y aportando a un mirador guapísimu sola sienda'l Cares.
Con pocu más que siguir los rastros, alcuéntrome col arcu que ye esti abellugu de Trescámara y pocu más alantre, sigo travesando senderos aéreos que llévenme hasta delles cueves con cuerria pa zarrar al ganáu.
Baxaré pel Robledal a la gueta del senderu que va pa Trescámara
Ya pasé per dalgún tramu qu'otru pelín malu y les traces de senderu son perdifuses, asina que nun soi a alcontrar la baxada correuta a la canal de cámara que tien de llevame hasta Casielles, onde enllazaría cola parte baxa de Dobresengros hasta'l Cares.
Esta ye la teoría, pero la realidá fue qu'embarquéme nuna búsqueda infructuosa de camo salir hacia Dobresengros, cruciando delles pequeñes canales, xubiendo y xubiendo d'hombru n'hombru hasta que decido que toi xubiendo de más y que debería buscar otra alternativa.
A lo postreru, creo que la última xubida hasta'l hombru superior daríame baxada per una canal hasta Dobresengros, pero nun lo fice así y baxé per una canal hasta una h.orcadina (724 m) con posible accesu a la canal de Cámara de nuevu o hacia una escupidera que namái que vi como esnalaben les piedres, dime la vuelta porque taba tornándose peligrosu.
Alcanzo Trescámara y restolo posibilidaes d'escapatoria teniendo qu'abortar
Tuve un ratín intentando ver na h.orcadina una baxada hacia Cámara, viendo al fondu una traza de senderu, pero ante'l descensu vertical y la posibilidá de que se cortase la canalina na so parte final, decidí desfacer el camín hasta l'hombru que me llevase de nuevu a la canal que baxaba hasta Trescámara.
De nuevu, pasos aéreos, escayaes y de vuelta al Robledal pa enllazar col camín de la Tranvia que siendo bien conocíu faígolo en mui pocu tiempu, pasando a pillar augua a la H.uente Prieta y corriendo'l Cares hasta l'albergue de Caín onde esperábenme Alberto y los recién llegaos Pepa y Jose.
En resume, ruta clásica que nun se debería d'escaecer, porque ye una ayalga pa los que nos presten los senderos de pastores d'esti Cares. Nun fuí a completar la ruta que tenía pensada y aún así, el resultáu fue una ruta de 18 km y dalgo más de 10 hores con un desnivel acumuláu positivu, que dempués de retocar el track por pérdida de satélite, supongo que tará cerquino de los 1800 m.
Tornaremos...
Camudando'l Camín nos altos del Cares
No hay comentarios:
Publicar un comentario