viernes, 22 de noviembre de 2019

Caín (Valdión) - Mesones - Piedralluenga - H.orcada Blanca - Aliseda - Ariu (Onís)

14 de Xunetu de 2019

Track: Caín (Valdión) - Mesones - Piedralluenga - H.orcada Blanca - Aliseda - Ariu (Onís)


Magar d'una nueche fina, fina de roncaera per parte de Alberto nel albergue, tocó llevantase pelín cansáu y ye qu'al día anterior, a lu tuntu, ficiera más esfuerzu del que camentaba, canal p'arriba y canal p'abaxo intentando alcontrar pasu hacia Dobresengros y ente eso y nun durmir demasiáu, llevantéme con una necesidá enorme de café pa despabilar.

Asina, qu'almorzaremos nel Albergue de Caín con calma, pero sin pasase, que tenemos per delantre una llarga xornada, que tien de llevanos hasta la Vega d'Ariu. Años atrás, teníemos esta mesma intención pero'l borrín truncónos l'intentu y tuviemos qu'optar per un plan B que nos llevase hasta Vegarredonda.

Partimos del pueblu de Caín (460 m)

Dacuando, dámonos cuenta que nun puede tar cualesquiera de refuxeru y menos sinon conoces la fastera na que te mueves. Alcuérdome de la discusión del refuxeru d'Ariu cola de Vegarredonda porque nun entendíen porque nun llegáremos al refuxu y camudáremos los planes.

Si pienses qu'Ariu llégase namái que dende los Llagos o dende'l Cares per Trea... mal vamos, los que conocemos Aliseda sabemos que nun ye bon sitiu pa metese con borrín y yo nun pensaba navegar pa enllazar Mesones con Ariu per esi llaberintu, por mui bien que lu conociera de pasar varies vegaes.

Facemos la canal de Mesones nun día de borrín xuguetón

Asina qu'una vegada más díbemos ascender dende Caín, llugar del que saliemos un pelín enantes de les 9 la mañana.Como siempre, Mesones, pesie a lo pindio de l'ascensión ye una gozada y esti branu caltenía un collor verde preciosu, que nos fizo esfrutar como guah.es en cada uno de los pasos.

Ya son munches vegaes les que baxé o xubí esta canal y sigue sorprendiéndome lo guapu del sedu Mesones, l'amplitú de la canal y sobretou les vistes que dende la mayada Mesones tenemos, poro parar un ratín a garrar aliendu y picar dalgo ye obligatoriu nesti puntu, con un día tan guapu como tenemos.

Dende'l mayáu Mesones desviámonos hacia'l H.ou Tres Piedralluenga

Siendo un clásicu ya, vamos desvianos pocu dempués de la mayada en direición al h.ou Tres Piedralluenga. Na primer travesera, descubriéramos esti pasu dende la H.orcada Miguel magar de facer varios cumales como Los Traviesos, la Torre la Canal Parda y el picu Los Asturianos.

Col pasu los años delles vegaes más pasé per ellí y casi siempre col borrín xugando con nós y como ya dixe nun ye bon sitiu pa que se meta. Nesti casu, la borrina andaba xugando y navegar pel h.ou terraciando fízose pelín llargu de cara al averamientu hacia los nuesos oxetivos... los dos cumales de la Piedralluenga.

Fadremos el llargu averamientu hacia les torres de Piedralluenga

La Piedralluenga ye una peña dixebrada per una h.orcada que paez cortada a cuchiellu, teniendo peles cuatru faces parés con cayíes bien llargues. La más baxa y oriental atacarémosla pela so parte más amable, la norte y pa ello tenemos que dir hacia la metá del paré onde un canalizu sedrá l'únicu puntu feble pa poder ascendela.

L'accesu al canalizu, ye per un terracéu perdescompuestu, siguiendo con una pedrera dientru'l canalizu que nos tien de llevar a un trepe mui espuestu al final del canalizu. Debemos trepar a la manzorga, con bones preses pero siendo mui vertical, casi tirando p'atrás y con munchu tautu a la hora d'apalancar de más.

Dempués de salir del pasu, alcontraremos un cordín p'asegurar o rapelar y entraremos nun tarrén espuestu, pero más cenciellu que la trepada anterior. Sicasí nun podemos tener nin un descuidu ya que la roca ta podre y el fostión ya ye pa colar pal otru barriu ensin llibrada posible.

Fadremos cumal na Piedralluenga Este (2269) y p'abaxo que ta pa matase

Con munchu procuru, saldremos a la crestería final onde posando les manes en dellos puntos algamaremos los 2269 m de la Piedralluenga Este. Son d'esos cumales onde casi nun te pues mover, ya que too se mueve, asína que semeya de rigor como bien podemos y p'abaxo qu'equí si que se cellebra'l cumal cuando t'alcuentres abaxo.

Ye más, Alberto prefirió non xubir ya que dende abaxo ya lo vió complicáu, pero hai que dicir de verdá, que ye un cumal pa coleccionistes y de los que más riesgu pudiera llevar, pol estáu de la roca y pol trepe vertical pa salir del canalizu, tanto que preferimos facer un arnés con un cordín de 30 m que llevábamos, p'aseguranos Pepa, Jose y yo nel destrepe.

Fináu'l destrepe, descenderemos pel canalizu con cuidáu de nun tirar piedres y desfadremos el camín hasta la morra onde quedara Alberto esperándonos. Picaremos y beberemos dalgo pa recuperar, continuando de secute hacia la H.orcada Miguel, onde tendremos pista llibre hacia'l cumal de la Piedralluenga Oeste.

Tomaremos aliendu y siguimos dende la H.orcada Miguel a la Piedralluenga Oeste

Lloñe de l'anterior cume, la Este ye bien cenciella y casi ensin poner una man so la peña, vamos avanzando nun ampliu crestéu con grandioses vistes pa tolos llaos. Como non, la Torresanta acompáñanos a la espalda pero nos últimos tiempos tolos cumales d'esta fastera del Cornión son collacios inseparables, como la Robriza, Torres de los Cabrones, Tiru la Llera o los Traviesos.

El grupu na Piedralluenga Oeste (2294 m)

Cellebramos esta vegada toos xuntos l'algame d'esta guapa peña y coles mesmes desfacemos el camín d'esta llarga arista, por dalgo ye Piedralluenga, col envís de parar na h.orcada Miguel a facer un descansu y xintar daqué más curiosu que n'anterior parada.

Nel intre, ya tenemos tolos oxetivos cubiertos, asína que cola calma y pa que'l restu'l grupu conozca otru pasu hacia Aliseda, vamos entamar a bordiar toles Torres de los Cabrones pela so manzorga, empobinándonos hacia la h.orcada Blanca.

Retiramos pente'l borrín hacia la H.orcada Blanca

Esti pasu, conociéralu con Fernan va unos tres años y daquella ascendiéramos la Pica La H.orcada que ye otru dosmil pelín escaecíu pero mui agradable de trepar. Dende la h.orcada namái que tendremos que descender per una canal-pedreru y ya taremos metíos en plenu xaréu calizu de la fastera d'Aliseda.

Dende lo baxo, acolumbramos la Verdilluenga a la que creemos que'l nuesu collaciu Haritz ascendió durante'l día de cara a xuntanse con nós n'Ariu pa continuar cola Travesera. El día, entama a xugar col borrín otra vegada, lo que nos diz que ye hora d'apurar el pasu pa nun enmarronase per Aliseda.

Travesaremos el llaberintu d'Aliseda-Ariu pa finar el día

Como siempre, por munches vegaes que pasemos, casi nunca soi a siguir el mesmu camín, así que ya nin m'esmolezo y tirando d'orientación aportamos con bon aciertu al camín que vien del Pozu'l H.itu, onde ya siguiremos el PR que tien de llevanos hasta Ariu.

Con 9 hores y 40 minutinos de ruta dábemos colos nuesos güesos nos bancos del refuxu d'Ariu y namái sentanos, los 15 km de percorríu, casi 2400 m d'ascensu acumuláu y 1100 m de descensu, nos golpiaba'l cuerpu de tal manera que sólo unes xarres de cerveza podían consolar.

Menos mal que les vistes n'Ariu, siempre faen que tol esfuerzu pague la pena... y que vayas a dormir pensando n'esfrutar nesti paraisu que ye Picos, paraisu que dalgunos siguen empeñaos en restrinxir, acotar y prohibir a los amantes del verdaderu montañismu.

Camudando'l Camín dende la vega d'Ariu

No hay comentarios:

Publicar un comentario