lunes, 2 de diciembre de 2019

Vega d'Ariu (Onís) - Boca'l H.oon - Mesones - Puertos de Cuba - Vegagüerta - Vegabañu (Sayambre)

15 de Xunetu de 2019

Track: Nun disponible

Alborecemos con un día preciosu na vega d'Ariu y güei, sí que dormí como un titán, tando la verdá, mui a gustu nesti refuxu, nel qu'almorzamos estupendamente enantes d'entamar un día más d'esta Travesera 2018 - 2019.

El plan pa esta estaya sedrá enllazar los refuxos de Vega d'Ariu y Vegabañu nuna llarga xornada que poca xente suel llevar a cabo. Pepa y Jose abandonen la Travesera satisfechos pola ruta y ascensión a la Piedralluenga del día anterior y Haritz, Alberto y yo, tamos preparaos pa la calcetinada que nos espera.

Semeya de grupu saliendo d'Ariu (1586 m) con un día preciosu

Una vegada más, repetiremos los 3 participantes que quedamos nesta travesera, un camín que ya entama a ser un clásicu nos miós pateos y nun sedrá otru que l'ascensión hasta la Boca'l H.oon. Ayeri mesmu, decidiéramos baxar pela H.orcada Blanca col envís de nun repetir percorríu, pero aún así, nun fai tanto tiempo que ficiera esti mesmu camín n'ascensión al Tiru la Llera o aguya de Miguel.



Facemos l'ascensión hacia la Boca'l H.oon... un d'esos llugares máxicos del Cornión

Aún así, la mió primer visita al H.oon d'Oliseda remóntase a dellos años atrás cuando ascendiéramos per primer vegada a les Torres de los Cabrones con descensu perguapu pela canal de la H.errera. Según vamos caleyando con un día preciosu, voi contándo-yos a Haritz y Alberto, les distintes ascensiones (Peñeblanca, Robriza...) y posibilidaes d'esta fastera y lo que me queda per conocer, pero siendo un día tan llargu prefiero nun facer esperimentos con gaseosa, asína que nos ceñimos a los oxetivos.

Facemos la traviesa hasta la collada Llombreras pa descender al H.ou Tres Piedralluenga

Y el nuesu oxetivu ye esfrutar d'un día monte de sol y bona temperatura, conociendo sobretou tola parte baxa de la Peñasanta y los Puertos de Cuba. Poro, una vegada que tamos na Boca'l H.oon, facemos la travesía baxo los cumales de les Torres de los Cabrones hasta aportar a la collada Llombreras.

Continuamos tres Piedralluenga hacia Mesones con increyibles vistes

Equí, nel entamu a l'ascensión de la Robriza, tendremos una preciosa vista de la Piedralluenga qu'ascendiéramos el día anterior y entama la búsqueda d'una baxada direuta al H.ou Tres Piedralluenga, pero namái que l'alcontramos enllaz terraciando hacia'l pasu hacia la H.orcada Miguel, viendo demasiáu espuesta un descensu direutu del que mirando a lo postreru nun sabemos si tendríemos pasu pel canalizu que baxa direutu.

Facemos travesía per Mesones pa bordiar per guapísimos pasos a la Peñasanta

Nel h.ou, baxaremos pel mesmu sitiu que xubimos el día anterior aportando a esi preciosu mirador de los Urrieles qu'hai baxo los parés de la Robriza y entraremos a navegar pela amplia canal de Mesones. Equí tenemos referencies d'una traviesa que va cercana al Boquete, pero nun tenemos intención de xubir tanto y baxaremos casi hasta'l mayáu de Mesones pa buscanos la vida per un mar de caliza.

Facemos la traviesa final hasta facer l'ascensu a los Puertos de Cuba

Ún de les coses más prestoses de Picos nun día claru, ye investigar, trazar col maxín una llinea que nos faiga avanzar lo más apriesa y cómodo posible y ser capaz de llevalo a cabo. Asina lo facemos y diremos de terraza en terraza per un caóticu pero mui prestosu tarrén hasta xuntanos cola filera de h.itos que vien dende'l Boquete que siguiéndolo nos llevará direutos al seu final que baxa ya pa los Puertos de Cuba.

Averámonos hacia Vegagüerta ablucando'l col paredón sur de la Peñasanta

Magar de parar una migayina a reponenos dempués de más de 5 hores de camin, nun llugar tan guapu como los Puertos de Cuba, onde nunca tuviera enantes, vamos continuar hacia Vegagüerta baxo los ablucantes parés de la Peñasanta. En Vegagüerta paramos a recoyer agua, ya que'l día de calor ta siendo perfuerte y terminamos con tol agua que llevábemos casi.

Despedímonos d'unos montes preciosos dende'l camín del Burru

Nun sólo tenemos que recoyer agua, sinon que tenemos que recoyer a dellos montañeros que nun saben mui bien per onde anden. A unos indicámos-yos como baxar hacia Capozu (mal asuntu si nun conoces), a otros nos los llevamos con nós hacia Vegabañu y a los últimos recomendámos-yos quedase a durmir en Vegagüerta ya que taben mui cansaos pa volver nel día hacia Vegarredonda.

Garramos la canal del Perru descendiendo hacia'l colláu'l Frade

Son coses rares que pasen, pero nun sé, dempués d'años d'andar pol monte, camiento que sin saber nun m'aventuraba tanto a lo que pudiera pasar. En fin, nós garramos camín a bon ritmu pel camín del Burru y enantes de garrar la canal del perru, decidimos ascender corriendo Alberto y yo hasta los Altos del Verde (2181 m) que tovía teníelos ensin ascender.

Tramu de viesca perguapu hasta la Vegabañu

Llueu, nel colláu del Burru descenderemos pente'l borrín pela guapa canal del Perru, viendo a tramos tola muria del seutor de la Bermeya, abandonando'l gris calizu de Picos pol verde de los praos de la fastera del Frade, onde ya tomaremos el descensu final pela viesca de Cuesta Fría hasta les praderes de Vegabañu onde daremos per finalizada esta tercera estaya en Picos con unes cuantes cerveces y una mui bona cena, que nun fizo que la nueche fuera terrible nun refuxu estráu de xente.

Camudando'l Camín nos puertos de Cuba

No hay comentarios:

Publicar un comentario