jueves, 26 de diciembre de 2019

Recuerda (Tierras del Burgo) - Fresno de Caracena - Atauta - Montejo de Tiermes - Caracena

7 d'Agostu de 2019

https://www.mediafire.com/file/5wlqxop24ik2o60/Recuerda_-_Atauta_-_Montejo_-_Caracena.gpx/file Track: Recuerda (Tierras del Burgo) - Fresno de Caracena - Atauta - Montejo de Tiermes - Caracena


Fácil que llevara diez añinos ensin andar en bici en seriu y ye que la mala suerte d'un robu de mi bici, dexara esta afición pa prau sacante de dalgún paseín más tranquilu nel pueblu. Esta vegada, gracies a Miguel que llevaba picándome pa volver a da-y al pedal y prestábame la bici, desempolvé'l cascu, les zapatilles y el culote sobretou pa poder moveme nel restu de díes jeje.

Como non, el terrenu de xuegu sedrán les milenta pistes de tierra que tenemos en tierres sorianes y ye qu'aparte de pegar tiraes llargues corriendo, la bicicleta de montaña ye la verdadera protagonista pa facer deporte en Soria ya que práuticamente tenemos la suerte d'enllazar pueblu tres pueblu siempre per camín o carreteres mui pocu percorríes.

Partimos de Recuerda (899 m)


Salimos del nuesu pueblu, Recuerda, col castillu de Gormaz de fondu y empobinarémonos como tantes vegaes corriendo pel barrancu del Val hacia'l primer pueblu del día: Villanueva. Aportaremos a él pela so parte alta onde asítiense les sos bodegues y siguiremos per camín hacia'l siguiente pueblu que nun ye otru que Fresno de Caracena.

Hasta Fresno, conocemos bien el camín pero ya entramos en terrenu más desconocíu que nos tien de llevar hacia Inés. Nel intre, llevamos 10,5 km en 45 min, asina que con bon ánimu, buscamos la pista correuta primeru en xubida pa más tarde descender pente plantaciones de tou tipu de frutales hasta Inés, alcontrádonos con un pelín de futuru agrícola en Soria.

Facemos tramu siempre per pista hacia Inés

Dexaremos atrás les plantaciones de frutes d'Inés y siguiremos camín col envís d'entrar en fasteres de viñedos del caberu tramu de denominación d'orixe del Ribera del Duero, qu'alcuéntrase nos pueblos d'Olmillos y sobretou n'Atauta, onde alcuéntrense los llagares de más renome de Soria.

Pararemos n'Atauta, nun guapu mirador hacia los viñedos, intetando descansar pates, culo y tamién por picar dalguna barrina enerxética que nos recupere de los 34 km y dos hores y media de bici que llevamos enriba.

Continuamos esfrutando de fasteres de viñedos hasta Atauta

Sicasí, tenemos claro que fáltanos como mínimu la mitá ya que calculábeos unos 65 km de ruta, anque tenemos claro qu'agora vamos tener que xubir más desnivel ya qu'empobinámonos hacia Tiermes, casi na llende con Guadalajara.

Pel momentu, el trazáu sol mapa ta yendo de luxu pero pocu dempués de salir d'Atauta, tenía pensáu facer cota nun vértice xeodésicu, nomáu como los Llanos, pero la picardía de los agricultores fae que pasen el llabiegu pelos caminos comunales y alcontrémonos con un tramu terrible de portear la bicicleta.

Tramu abegosu onde perdemos pista hacia Morcuera

Con un pocu de mala hostia y la incomodidá de carretar la bici per tarrén inestable, somos a salir al camín orixinal siguiendo ya con comodidá hasta'l pueblu de Morcuera, onde alcontrámonos con dellos cartelos de Soria YA, que llucha pol futuru pa esta provincia escaecía de los gobiernos español y de Castiella.

Sorpréndenos lo vien conserváu de delles cases, pero nun paramos muncho más, ya que tenemos ganes enforma de siguir hacia Montejo de Tiermes onde queremos facer la parada de bocadiellu. Lo que nun contábemos ye cola vueltona que dimos hacia Montejo, por querer pasar per unos cuantos pueblos más como son Quintana Rubia de Abajo y de Arriba.

Llarga tirada hasta Montejos de Tiermes per pistes en xubida

En azul, nel track, vos pinto los pocos km de carretera que garraríemos, pa salinos per un camín que nos llevaría a la pista de concentración que xune Quintana Rubias de Arriba con Montejo de Tiermes. Nós tuvimos que lidiar con caminos pelín abandonaos y vueltes innecesaries de pueblu en pueblu hasta dar cola pista, que siempre, en un picar costante hacia arriba tien de dexanos en Montejo.

Dicir qu'esti tramu fízoseme especialmente duro, con un pocu de vientu en contra y con munchos kilómetros enriba llegué un pelín tocáu a Montejo, onde una cervecina y un enorme bocata fueron dafechu necesarios pa recuperar de los 60 km y 5 hores y media de bicicleta que llevábemos enriba.
Merecíu descansu, bocata y cervecina


Magar de recuperar fuercies entraremos nun de los tramos más guapos, xubiendo de Montejo un pequeñu puertu, que nos llevaría a posteriori a una llarga y guapísima baxada hasta Carrascosa de Arriba, onde dempués d'un repechu terrible pa cruciar el pueblu y perdenos un pelín, saldremos a un tramu de camín téunicu preciosu que tien de llevanos hasta Valderromán.

Pesie al cansanciu y un cielu qu'amenaza con llover, tamos conociendo un montón de pueblos de la nuesa redolada (bono, un pelín más lloñe de la redolada), pero que ta faciendo pagar la pena l'esfuerzu y aún quédanos lo meyor ya que dende Valderromán ascenderemos per una pista que llueu nos fadrá descender hacia'l pueblu de Caracena.

Preciosu tramu dende Montejo hasta Caracena col so castillu

Quiciás yera'l puntu que tenía na mente como guinda del pastel, pero'l cansanciu nun mos dexó esfrutar del tou d'esta baxada hacia Caracena, onde nos recibió'l so castillu primeru, baxando per un camín, penriba de la foz de Caracena que conociéramos en selmana santa de patéu dende la Perera.

A Miguel los km y la ruta ya taba yéndose un pelín de lo planiáu, pero yo nun pude facer otra cosa qu'esfrutar de llegar en bici magar d'un kilometrada a un llugar tan especial como ye un castillu. Llueu de sacar delles semeyes, pasaremos per delantre de la ilesia prerrománica de Caracena y al altor de la puente a la salida del pueblu, decidiremos que lo meyor ye volver al pueblu per carretera.

Nun alcontramos bon camín y decidimo siguir per carretera dende Caracena a Recuerda

Llevábemos 77 km y 8 hores de ruta, el camín que teníemos marcáu, nun mos diéramos cuenta que yera pel que baxáremos caleyando en semana santa y eso suponía carretar a pie la bici hasta un altu y taba entamando a orbayar, poro la decisión taba más que tomada, ya que calculábemos tovía unos 20 km más y eso per carretera, pero camín se nos diba de les manes.

Pocu más tuvimos que falar, garramos carretera y a rodar, pasando per Carrascosa de Abajo primero y dempués una vegada más per Fresno onde decidimos siguir per carretera igualmente hasta Villanueva, pa siguir hasta'l crucie col Duero onde ficimos los caberos dos kms hasta Recuerda onde zarrábemos esta ruta semi-circular d'un total de 97 km y 1400 m de desnivel positivu que llevónos un total de 9 y 15 min, anque en movimientu fueron namái que 6 hores y 45 min.

Nun tuvo mal... pa llevar paráu diez años jajaja

Camundo'l Camín per tierres btteres de Soria

No hay comentarios:

Publicar un comentario