Track: Vegabañu (Sayambre) - Dobra - Boca Corrobre - Vegarredonda - La Ercina (Cangues d'Onís)
Cuartu día de patéu per Picos dientro de la nuesa particular Travesera 2018 - 2019 y magar de pasar le pior nueche en muncho tiempo nun refuxu. Llevantarémonos dafechu reventaos, teniendo que tirar de diversos cafés y muncha comida pa intentar llevantar los ánimos de los tres participantes que quedábemos: Haritz, Alberto y yo.
Esta vegada nun había nin retiraes, nin xente nuevo a facenos compañía, los tres teniemos que ser capaces de completar la estaya que nos quedaba p'aportar a la furgo d'Haritz que taba a los pies del llagu la Ercina, colo que'l borrín col qu'alborecimos dábame a entender que cenciello nun diba ser.
Salimos de Vegabañu (1292 m) pente'l borrín
Aparte, la mió mente innovadora tenía un trazáu dafechu increyible pa esti caberu día y nun tenía na claro, si daba ser posible llevalu alantre. Aún así, los collacios salieron col meyor de los ánimos de Vegabañu, pa caleyar peles sos pistes y precioses viesques empobinándonos hacia'l Dobra como ya ficiéramos dende Sotu n'otru día xabaz de monte, nel que conocíeremos Valdecarombu pa travesar la fastera sur del Cornión.
Esta vegada queremos conocer otra canal d'accesu a la parte alta del Cornión, poro travesaremos el rigu Dobra, p'ascender hacia'l Chamozu, pero envede siguir como daquella vegada hacia Vegagüerta, la nuesa intención sedrá conocer un accesu hacia la Boca Corrobre, la cual conocemos de l'ascensión al Camperón.
Pasiamos peles increyibles viesques de camín al rigu Dobra
Poro, siguiremos un senderu que colgáu enriba'l valle'l Dobra, que pasando pel H.oyu los Castellanos, tien de dir ganando altor penriba les peñes de les Aguyaes hasta aportar al altor de Valdelasombra. Hasta equí, vamos ensin ver res del canalón del Agua que ye'l que queremos conocer, asina que tirando d'intuición y un track que pinté penriba'l mapa, entamamos a ascender a pinchu.
Cuando lo prepares nel mapa nun cuentes con un día d'esti xeitu, asina que nel intre intentes pescanciar que posibles escapatories pues alcontrar. Con delles na tiesta, plantego les duldes a los collacios y decimos que si p'arriba sigue zarráu va tocar dar a la vuelta a una hora concreta.
Buscamos camín dende'l Chamozu pel Canalón del Agua hacia la Boca Corrobre
Por suerte, siguiremos navegando pente'l borrín hasta que camiento, que tamos cerca de salinos del Canalón del Agua (si ye que tábemos ascendiendo per él) si queremos dar a la Boca Corrobre y non atopanos colos parés de la Garita Baxera.
Nel momentu precisu, aportamos al llugar onde creyemos que toca doblar hacia la manzorga, tando nel puntu de non retornu. Equí, per suerte, somos a salir del borrín una migayina y vemos la traviesa hacia un colláu que danos pasu hacia la Boca Corrobre... la cara d'allegría por salir a bien d'esta encerrona y sobretou'l descansu mental que supuso fue l'auténtica cume d'esta ruta.
Felices al salir del borrín y ver que vamos pel sitiu a la Boca Corrobre
Y como non, Picos ye así, dándote de regalu pola too valentía un mar de ñubes como poques vegaes. Tanto fue así, qu'aportamos dempués d'otra llarga tiradina hasta la Boca Corrobre (1925 m) tirándonos a descansar un cuartín d'hora, picar dalgo y camentar que posibilidaes teníemos de cara a continuar de ruta.
La sensación yera que nun diba desapaecer el borrín y dempués de 4 hores de ruta que llevábemos, ya nun podíemos xugar más col bon facer de mis tracks inventaos y menos volver a metenos ensin camín conocíu na fondura del borrín, que malpenes dexaba ver el cielu azul namái que penriba los 1700 m d'altor.
Navegando pelos H.oyos de Corrobre hacia'l H.ou Les Poces
La decisión taba clara, tocaba escaecer esos planes, mui ambiciosos d'otra miente y ganar un camín conocíu como yera'l de la travesía de Vegagüerta a Vegarredonda. Pa ello, tocaba navegar pente los h.oyos de Corrobre, ascendiendo hacia'l H.ou Les Poces, eso sí con un día nes altures p'alloriar.
El sitiu ye ablucante arrodiaos de grandes peñes na redolada Les Poces
Diremos esfrutando de cada pasu, del solín de los milenta cumales que nos arrodien, dende la xerra Mercader, que vamos dexando atrás, hasta dalgunos más cercanos nel tiempu como la Cabra Blanca, que na alcordanza del so averamientu, alcontraremos el senderu d'enllaz hacia Vegarredonda.
Garraremos el senderu que vien de Vegagüerta arrodiando la Torrezuela pembaxo
Esti senderu nun sedrá otru que'l que pasa pembaxo la Torrezuela, faciendo un caleyar muncho más amable que'l superior que pasa pela h.orcada L'Alba. Si sumamos les ganes llevar bon ritmu, esfrutaremos a tope del patéu hasta'l colláu Les Merines, nel que fadríemos les 6 hores y media de ruta, decidiendo parar al empar d'unes vaques a picar daque y descansar enantes d'entrar otra vegada na espesura del borrin.
Siguiremos cómodamente pasando peles Merines y baxando a Vegarrendonda
Nun tardaremos muncho nello y pocu más embaxo, al altor del Porru Bolu, ya taremos enmediu del ñublu, poro les vistes perderán el so protagonismu y ya tocará caleyar hacia una cervecina en Vegarredonda, pa continuar col refrescu, tol camín típicu hasta Pandecarme.
Descensu clásicu hacia Pandecarme pa desvianos hasta'l Bricial pa enllazar cola Ercina
Pero nun taba too fechu, ya que tendríemos de siguir patéu hasta la Vega d'Enol, onde garraríemos la ruta hacia'l llagu Bricial, que ya conociéramos en parte, cuando visitáremos el valle Resecu Fernan y yo unos cuantos años atrás, anque agora, daríemos la vuelta al picu Mosquital pa entrar al llagu la Ercina ensin ser capaces de ver nin tan siquiera l'agua.
D'esti xeitu, col día más gafu en cuanto a meteo, terminábemos la Travesera 2018 - 2019... magar de caleyar durante 9 hores y 50 min, la friolera de 23 km con un ascensu de 1460 m y un descensu de 1655 m
Camudando'l Camín finalizando la IX Travesera Borrina
No hay comentarios:
Publicar un comentario