Track: Pandecarme (Cangues d'Onís) - Cabra Blanca - Estribos - Forcadona
Dempués del entamu alpín de la primer ruta de temporada al Portil.lín Cimeru, quedamos con ganes de más actividaes picantones, pero esta vegada de día completu, asína que mirando'l calendariu del grupu, decidimos tirar al Cornión a la gueta d'aventura y una ascensión esixente.
A estes altures, col grupu montaña camín de los diez años d'esistencia, vamos conociéndonos toos y más menos sabemos hasta onde pue llegar cada miembru, tanto físicamente, como técnicamente, como lo más importante... mentalmente.
Somos un grupín bayurosu, anque los activos seyan la metá a lo sumo, que na diversidá tien el so puntín positivu, con xente que-y presta más el tarrén alpín, otros les viesques y la seronda, unos pateos más llargos, otros curtios y picantes... y a mí tócame amoldame a lo que me vaya cayendo.
El GM Xuan de la Borrina nel aparcaderu de Pandecarme (1048 m)
Amoldar, amóldome, pero cada día cuéstame más motivame si les rutes son clásiques y nun hai per onde da-y media vueltina de tuerca, anque suelo alcontrásela jeje. Nestos tiempos, Haritz ta echándome un gabitu, sacando un plan B pudiendo tener un par de opciones y que'l grupu salga igualmente anque faigamos rutes distintes.
Nesti casu, la ruta propuesta por Pepa yera ascender la torre La Cabra Blanca y pente'l llargu accesu y l'aerea ascensión, ya albidraba que nun yera pa tolos públicos. D'esta mena, Haritz propuso una circular a la Peñesanta d'Asturies o Enol dándo-y la vuelta pela collada Santa María, faciendo conocer un requexu preciosu del Cornión a muncha xente del grupu.
Asina que salimos toos xuntos de Pandecarme, empobinándonos hacia Vegarredonda, anque a dicir verdá toos xuntos non, ya que tuvimos un grupín que llegó más tarde y Pepa, Jose y yo, tuvimos qu'arrancar porque camentábemos una ruta mui llarga y non podíemos esperar si queríemos tener hores de lluz.
Diremos garrando ritmín hacia Vegarredonda, nun día con una temperatura prestosa enforma, parando a echar un café rapidín nel refuxu y a pillar agua, pa siguir a bon ritmu hacia la Llampa Cimera, desviándonos pembaxo del Porru Bolu arrodiaos del gris calizu y con un cielu azul ablucante.
Facemos tol camín hasta'l colláu les Merines pasando per Vegarredonda
Ascenderemos la Cuesta Cebolleda hasta'l colláu Les Merines (2035 m), onde como siempre destaca'l Requexón y detrás d'esti el picu Tiatordos. Ellí, echaremos un descansín, ya que Jose nótase cargáu y necesita pila en forma de barrines enerxétiques. Personalmente, nun toi de correr por culpa del xemelu pero vengo finu de les palices en Picos con Ana y eso nótase... voi con tola calma y esfrutando del día.
Baxaremos a la H.uente Prieta, echando un vistazu a posibles vivacs pa un posible plan d'escalada alpina y decidimos si bordiamos la Torrezuela penriba o pembaxo, decidiendo garrar esti últimu ya que pretendemos entrar a la Cabra Blanca ensin aportar al colláu Les Poces.
Averámonos hacia la Cabra Blanca bordiando la Torrezuela pembaxo
Nun guapu y rápidu caminar, damos preste al últimu espolón de la Torrezuela y el perfil amenzante de la Cabra Blanca apaece ante nós, colos sos collacios Los Estribos y tol xerru de las Garitas a continuación. Los baltíos del coral aumenten y el colmillu afílase, aumentando les ganes d'entrá-y a un cumal tan atrautivu.
Meterémonos de llenu nos h.oos de Corrobre, teniendo que descender dellos metros, pero'l camín va dexándose facer, llibrando de baxar de más al H.ou Les Poces. Con bona visión pente los tres, empobinámonos hacia un claru espolón NO que baxa dende la propia cume de la Cabra Blanca.
Terraciamos nun tarrén amestáu hacia la amplia vira de dreches
Nun entreteníu trepar, vamos averándonos a la base de la cara NO de la Cabra Blanca, onde nun mos queda otra qu'entamar una travesía hacia'l Este col envís de ganar la canalina qu'entra dende les lleres del h.ou y fai de separación pente Los Estribos y la Cabra Blanca.
La travesía tien dalgún puntu delicáu, con un tarrén amestáu de yerba y roca suelto, pero vamos ganándo-y el pulsu pali pali, hasta aportar a la vira qu'entra dende la canal que tien de llevanos hasta l'hombru d'acesu a l'arista final de la Cabra Blanca.
Aportaremos al hombru p'atacar el filu y posterior crestéu
Enantes d'atacar, dexaremos les mochiles y magar d'echar un traguín d'agua ascendemos caminando pela amplia vira hasta l'hombru onde xestionamos un trepe pa enllazar col filu curtiu d'arista que supón la mayor dificultá de la ruta.
Más menos, hai dos formes de pasar esti pasu d'unos 10 o 15 m de llargura, escoyendo Jose xubir a caballo, igual que Pepa y yo xubí n'adherencia hacia'l vacíu sol H.ou Les Poces, siempre con presa bona y esfrutando d'un pasete tan espeutacular.
Namái que son esos metrinos de filu con una roca pelín podre, ya que llueu l'arista ye amplia y con caliza perbona, pero ye lo que tien, esos metrinos pueden echar p'atrás a dalguien que nun tea avezáu al vacíu y los pasetes picantinos. Caleyaremos entós, los caberos pasos hasta'l cumal de 2320 m y nun pueu más que mirar atrás, onde vien Pepa, con una cara de felicidá brutal.
Cumal de la torre de la Cabra Blanca (2320 m)
Como presta que la xente tenga esi picor por ciertos montes, esi Ortzamendiren Sua, que siempre me decía Fernan, porque na realidá, sin sueños por algamar, acabamos perdiendo la ilusión y la motivación pa salir al monte, poro un cumal, siempre debe llevar a otru y si somos a acolumbralu dende'l recién conquistáu muncho meyor.
Esfrutaremos un ratín de les vistes, alcordándome d'ascensiones na redolada: Camperón per Ozania, Cotalba pel Canalón del Texéu, Torresanta con Fernan... pero tando xuntos los tres, nun podemos facer otra cosa qu'alcordanos del cresteríu pente la torre'l Torcu y les Tres Maríes nuna actividá na que lo pasáremos podre dafechu.
Descendemos y averámonos tamién hasta Los Estribos
Nun perdemos muncho más tiempu y entamamos a baxar, pa crucianos con dellos montañeros más, desfaciendo'l destrepe del filu con cuidadín y baxando la vira hasta les mochiles onde paramos a picar dalgo. Llueu del descansu, decidimos ascender a los Estribos, poro siguiremos el canalizu arriba hasta la h.orcada pente la Cabra Blanca y los propios Estribos.
Ensin dificultá, sacante les piedres sueltes, aportaremos a la h.orcada y por dalgún motivu, apeteznos trepar per un claru espolón de caliza compacta, onde alcontraremos dalgún pasín divertíu p'ascender, pero totalmente innecesariu nel descensu jeje, sobremanera cuando llíbrase tol espolón per un canalizu dalgo descompuestu a la nuesa mandrecha.
Cume de Los Estribos (2297 m)... nun se pa onde miramos pero quedó elegante
Echaremos unos minutinos nos 2297 m de los Estribos, sacando semeyes o direutamente tomando'l sol, hasta que toca volver al camín ya que quédanos una llarga vuelta por facer. De primeres, tocaba baxar a la canal y dende ella siguir descendiendo hacia la cemba de les Poces, teniendo equí un pasete vertical con roca mala.
Magar de llibralu pel sitiu más afayaizu, destrepando un canalizu, travesaremos el neveru espatando dellos robezo y sin problema aportaremos al colláu Les Poces (2109 m), onde aviso a mis collacios de les mios intenciones de tornar a Vegarredonda pela Forcadona y el H.usantu.
Descensu al colláu Les Poces y salimos hacia la Forcadona
Llevo un tiempu revueltín personalmente y apetezme tener un tiempu pa mín, conocer dalgo de Picos sólo, colos miós camientos y a ser posible forciando'l xemelu pa probame, pero nun hai manera, si yo soi testerón a Pepa nun hai quien la gane, diciéndome que nun me dexa dir sólo sobretou con unes ñubes amenazantes que lleven revolotiando dende va una hora aproximádamente.
Resignáu, quédome ensin aventurina particular, pero contento por tener collacios tan castrones nel bon sentíu, que nun me dexen esnalar llíbremente jeje. Siguiremos pues, en grupín, descendiendo per una llerona pembaxo'l Tesu'l Torcu, hasta enllazar cola llera qu'asciende hacia la Forcadona.
Personalmente, nun conozo'l pasu pela Forcadona y Pepa y Jóse, teníen un recuerdu penosu de la llera que lu asciende, anque cuando aportamos a la forcada, los tres coincidimos en que paeciónos seliquino de xubir y perguapu, pudiendo dir echando una güeyadina a les distintes aguyes de la Torresanta, sobretou a la del Gatu, cola so forma tan atrautiva.
Travesamos la Forcadona y empobinámonos pal H.usantu
La Forcadona ye un llugar mui de Picos, con una trepada per un canalizu, na fastera sur, de peña compacta caliza, pa llueu salir a la fastera norte y alcontranos un ñeverón de nin se sabe cuantos metros de fondura, al que tenemos qu'aceder per un tarrén podre, descompuestu y nesti casu casi arenosu.
Como tamos como burros, echamos unes bones rises nos destrepes podres hacia'l ñeveru y como non, pa trepar al ñeveru dende la ribaya, facemos un pocu de palu-piolé pel paré hasta upanos enriba d'esti, onde tendremos una de les baxaes más divertíes y rápides que tuve enxamás, corriendo pel ñeverón hasta'l propiu H.usantu.
Magar de les rises, entamaremos un prestosu paseín pel H.usantu per onde pali pali, van camudando los collores del día col atapecer y tou vuélvese más relaxáu y más personal, teniendo esos instantes pa pensar no muncho qu'apórtanos el mundiu del monte a delles persones.
Agradable paséu dende'l H.usantu hacia Pandecarme
Al altor del colláu la Fragua, veo que la pila de Pepa y Jose t'apagándose, ya que sin querer llevo tol día llevándolos a un ritmín al que nun suelen tar avezaos, asína que falo con ellos y dígo-yos que voi baxar corriendo pa ver si dame tiempu a ver al restu'l grupu.
En diez minutinos, baxo corriendo tola Llampa Cimera corriendo y llego xustu a tiempu pa que'l restu del grupu coménteme que tal-yos fue na circular a la Peñesanta. Les cares son de pasalu perbien, prestándo-yos tol percorríu asina que quédome más tranquilu y echo una cervecina con Haritz y Jeni que deciden esperar ensin priesa por Pepa y Jose, pa baxar los 5 más tranquilinos.
Tan sólo quedaba tomar otra birra con Pepa y Jose que tuvieron que parar un ratín a descansar na Fragua y ya baxamos colos últimos rayinos del sol, dende Vegarredonda hasta Pandecarme onde finalizaríemos una de les rutes de día más potentes de los últimos tiempos.
En resume... ruta esixente téunicamente pa xente avezáo a andar per Picos y con llargu averamientu, tanto que salieron durante les 11 hores y media de ruta un total de 23,6 km de percorríu y desnivel acumuláu positivu de 1900 m... lo dicho esixente cuanto menos.
Camudando'l Camín descubriendo más cumales del Cornión
No hay comentarios:
Publicar un comentario