martes, 27 de junio de 2017

Pendones (Casu) - Maciédome - Pandellanza - Tiatordos

7 de Mayu de 2017

Track: Pendones (Casu) - Maciédome - Pandellanza - Tiatordos


Tamos en mayu, díes llargos y rutes llargues suel ser el denominador común nel GM Xuan de la Borrina. Plantegábanos Benjamín una de les sos rutes d'esti añu, xuntando la Peñe Maciédome y el Tiatordos pela preciosa viesca de Pandellanza y como nun podía ser d'otra manera tocaba facelo realidá.

Otra cosa ye cuantos del grupu taben dimpuestos a facer una xatada tala. La verdá ye que nun creo que fuera pola ruta en sí, pero xuntámonos más bien pocos pa intentalo y Zori ya tenía claro que diba ser muncho pa ella y d'otra miente, Jenni que ta entamando a venir de monte nin siquiera diba plantegáselo.

Entamamos en Pendones (765 m)

Asína que la realidá yera que Benjamín quería facer esta ruta y yo como siempre diba a acompañalu, cola mayor de les ganes, sobretou col envís de conocer la viesca de Pandellanza de la que tenía grandes referencies.

Como siempre p'aportar a Pendones dende Xixón, lo normal ye garrar la minera, hasta'l desvíu pa la cuenca'l Nalón travesando los conceyos de Llangréu, Samartín del Rei Aurelio, Llaviana y Sobrescobiu, siguiendo pela As-17, hasta'l conceyu de Casu, onde travesaremos los pueblos de Tañes, Abantru, Les Yanes, El Campu (capital), Sotu, Sobrecastiellu, Bezanes, El Castañéu y en la Pontonciella, desviarémonos al fin a Pendones, el nuesu puntu de partida.

Salimos de Pendones hacia la Llongar

Saldremos entós, dende l'aparcaderu de Pendones siguiendo'l PR que va hacia la Vega Baxu. Dempués del tramu aburríu de pista desviámonos, pasáu la fonte la Gargasa, per un senderín que nos meterá na preciosa viesca que lleva a la Llongar.

Según vamos caleyando, caún al so ritmu, nun pueu más que dir alcordándome de Nilo, que ficiéranos de guía na anterior ascensión al Maciédome. Agora, como siempre, llevamos a Kíla, que plácidamente va corriendo d'un llau pa otru como una chiflada.

Siguimos camín hacia Pandevilla (1355 m)

Namái salir de la Llongar, dexaremos atrás les fayes y saldremos per bon senderu a una fastera de monte baxo pel que diremos ganando altor y vistes. Dacuando, nun sé nin pa onde mirar, son tantos los montes de la redolada y tuvi la suerte de tar enriba de toos ellos, anque dende esti senderu la vista escápase dafechu hacia'l Cantu L'Osu.

Siguiremos camín hasta aportar a Pandevilla (1355 m), onde una vegada más, alcuérdome de Nilo, pola semeya tan prestosa que-y ficiera mirando pal Maciédome. En Pandevilla, paramos un puquiñín a xuntar el grupu, ya que vamos per delantre Montse, Benjamín y yo, pero ta costándo-y un pelín más al resto.

Facemos l'ascensión pela Pandona dende'l colláu Llagu

Dende Pandevilla, fadremos otru tramu más hasta'l perguapu colláu de Llagu, onde los restos de cabañes dan pasu a mirar de frente lo lloñe que ta'l Tiatordos. Otra paradina más y arrancamos hacia la xubida a la Peñe Maciédome, pero esta vegada fadrémoslo pela pandona sur que ye la ruta davezu.

Va dellos años, con un borrín fondu y restos de ñeve, tomáramos la decisión de xubir pel cresteríu, cosa qu'a Nilo nun-y prestó res y que viéndolo dende los años, supongo que tenía tola razón. El pasu los años y la esperiencia nel monte, fai tomar meyores decisiones normalmente y por ello, decidí ascender pela normal esta vegada.

Increyibles vistes dende'l cumal

Caún al so ritmu, diremos ganándo-y metros a la peñe, nun ascensu que nun tien mayor dificultá que siguir el senderu y tirar p'arriba. Según voi xubiendo doime cuenta que Benjamín y yo, vamos tener que colar ensin esperar a baxar xuntos porque va facésenos mui tarde.

La Peñe Maciédome (1989 m)

Poro, aportaremos al cumal de 1989 m en 3 hores y media, lo que fainos picar un pocu de comida, hidratanos y cuando aporta tol grupu a la Peñe Maciédome toca semeya grupal pa coles mesmes agarrar al paisanu y tirar pel cresteríu abaxo.


Baxamos pel entreteníu crestéu hacia Llagu de nuevu

Que decir de la crestería y de Benjamín, pues que creo que se lo pasó en grande. Nun tien mayores dificultaes pero sí que tien dellos tramos aéreos pelos que paez que vas esnalando. Ye más, alcontrámonos con un grupu de frente que veníen mui xustos de confianza, colo que tocó da-yos ánimos a sabiendes que ya pasaren lo pior.

Coses del monte, unos deseando que finase la crestería y a nós, que fízosenos hasta corta jeje. Yo creo que por eso, Kíla xubió y baxó tres vegaes, pero nós nun teníemos muncho tiempo, asina que salimos de los dominios de la Peñe Maciédome y tiramos hacia'l colláu Llagu onde entamaría la sienda que traviesa la viesca de Pandellanza.

Conocemos el guapu senderu hacia la viesca de Pandellanza

Según vamos avanzando hacia la viesca les vistes son ablucantes, destacando aparte del Tiatordos, los guapos montes de Ponga (Recuengu, Zorru) y hacia l'occidente tamién destaquen los de Casu (La Senda, Cornielles, Becerrera, Llambria...).

Al metenos na viesca perdemos les vistes pero aumenten tolos demás sentios y ye qu'esti fayéu tien dalgo especial. Aparte de la guapura del senderín, qu'hasta'l final nun tien perda, tien un toque casi máxicu y tas sollerte a qu'animal pue salir pente los milenta árboles... nel nuesu casu fue un preciosu venáu.

Facemos tola travesía de Pandellanza embobaos col fayéu

Ficimos el camín casi en silenciu, nun facíen falta les pallabres pa decir lo guapo del llugar, simplemente tocaba caleyar sele pero ensin parar. Gustóme tanto, que tengo claro que cuando recupere y pueda correr en condiciones, voi volver pa esfrutar corriendo per esti monte.

Travesaremos Pandellanza ensin parar namás que dos minutinos, a que Kíla se refrescase na fastera de los Llagos, ya que'l calor apretaba y salimos de la viesca pa facer una amplia parada en la fonte Los Xeros, onde xintamos daqué, ya intentamos recuperar una migayina, con casi 6 hores de ruta nes botes.

Dempués de recargar piles metémonos na xubida al Tiatordos

Con agua fresco y dalgo nel banduyu entamamos l'ascensión al Tiatordos, buscando ganar pali pali tol desnivel que teníemos per delantre. Pocu tengo que cuntar de la enorme panda que ye la pala del Tiatordos... simplemente toca emburriar p'arriba al meyor ritmu que se pueda.

Entamaremos con fuercia, pero col pasu del tiempu y del desnivel ya veo que Benjamín va baxando'l pistón y vamos tomándolo con más calma. Aún así, va faciéndose prestoso alcontranos con muncho montañero y pa cuando aportamos a l'arista final anímolo pa finar dando preste a los 1945 m del monte más guapu d'Asturies pa muncha xente.


Ablucante tramu final del Tiatordos (1945 m)

El "monte perfeutu" diz la xente y nun seré yo quien-yos retruque tala afirmación. Préstame'l Tiatordos y muncho, poro nun me pesa que seya la tercer ascensión, anque esta tercera fué muncho menos abegosa que la de Taranes lo cual agradezco enforma.

Esfrutaremos un ratín del cumal y decidimos poner marcha p'abaxo, faciendo tol pesáu descensu pela pandona, dando esta vegada camín hasta la Mayá Tiatordos, onde descansamos un pocu, enantes de garrar sienda hacia la Foz de la Palombar.

Llarguísima baxada del Tiatordos hasta la mayada

A estos altores de ruta, vamos un pocu llentos, ya que pesen les hores andando y pararemos enantes d'entrar na propia foz na fonte, a garrar más agua y llavanos un pocu del sudu de la ruta. Benjamín aguantó como un titán esta esixente ruta, asína que paramos tol tiempu que necesitó enantes de siguir alantre.

Pasaron ya años dende que percorriera la Foz de la Palombar y ciertamente prestóme muncho tornar a pasear pelos sos praos enantes d'entrar na so entalladura, onde como recordaba, el pasu de los argayos coles crecides de la riega, camuda'l so aspeutu añu tres añu.

Tramu bien guapu pela Foz de la Palombar

Saldremos de la Foz de la Palombar, dempués de los últimos metros más descompuestos y ya con ganes de patear a bones zancaes pela pista, entamamos el penosu transitar hacia'l Sen de la Vara onde tenemos que facer dos llarguísimes envueltes pa garrar la pista final hacia Pendones.

Esta pista llevarános primeru a la vera la riega la Llábana y a posteriori garrará puxu pa convertise nel rigu Pendones, que ya nun mos dexará del so llau, hasta aportar al pueblu del que saliéramos fae más de 9 hores y media.

Baxada final hacia Pendones entreteniéndonos coles vistes y dalgún detalle artísticu

En resume, segunda ascensión al Maciédome y tercera al Tiatordos cola grata compañía de la xente del GM Xuan de la Borrina la cual esperábanos tomando una botellina en casa Juanín y sobretou faciendo este pequeñu retu con Benjamín que tuvo dafechu impresionante.

Les 9 hores y media de patéu durante los 18.5 km de percorríu y los 1863 m de desnivel acumuláu dicen a les clares, que nun yera una travesía pa tomala al debalu. Tenía de dise concienciao y controlando perfectamente'l físicu... poro mi más sincera norabona pal collaciu Benjamín.

2 comentarios:

  1. Una ruta de las que hacen afición, con dos clásicos imprescindibles!! Fantástica actividad! Un abrazo Berto!!

    ResponderEliminar