martes, 20 de junio de 2017

Iondokorta (Arratia-Nerbioi) - Lekanda

23 d'Abril de 2017

Track: Iondokorta (Arratia-Nerbioi) - Lekanda


Segunda ruta de la Xuntanza 2016-2017, na que daremos un paseín mañaneru con ascensión al picu Lekanda. Pa ello, dempués del almuerzu, preparámonos nes afueres del refuxu del Baskonia y salimos caleyando pista un bon garrapiellu de montañeros.

Posando nel refuxu de Iondokorta (721 m)

Esta vegada, aparte de la mochila, llevábemos una bona resaca enriba y ye que la nueche fuera de les de restallu. Aún así, vamos ximielgando esos cuerpos como bonamente podemos y entamamos a sudar coles rampes hacia Arimekorta y col Llorienzu qu'a les 9 la mañana ya tien a bien apretar.

Ascendemos hacia Arimekorta baxo un día soleyeru

El camín hasta Arimekorta será calcáu al que ficiéramos na nuesa primer Xuntanza al Gorbeia. Pero esta vegada envede llibrar la paré norte del Aldamín pela so manzorga, vamos pasar embaxo d'ella, demientres ganámos-y vistes hacia'l refuxu de Iondokorta, col so banzáu y al fondu apaez tol cordal del Anboto.

Facemos tola travesía baxo l'Aldamin hacia Arraba-Elorria

La ruta nun tien denguna dificultá y diremos entreteníos, alcontrándonos con rebañaos de xente qu'asciende hacia'l Gorbeia. Nós, vamos nel sen contrariu hacia les camperes de Arraba-Elorria, onde a la fín, dempués d'una bona envuelta tendremos casi a tiru el cumal del Lekanda.

Ascenderemos hacia una forcadina pa garrar caliza hacia'l cumal

Siguiremos praos arriba hacia una evidente forcada, onde alcuéntrase'l puntu más feble de la muria caliza que llevántase delantre nuesa y una vegada que superamos un pequeñu canalizu, tendremos un par d'opciones p'ascender al Lekanda, escoyendo nesti casu, siguir pel crestéu siguiendo dellos fitos hasta los 1307 m del so puntu más alto.

Cume nel Lekanda (1307 m)

Dellos minutinos nel cumal, faciendo semeyes en xacíu con milenta cámares pa quedar toes de la manera y tiramos p'abaxo, siguiendo'l mesmu camín d'ascensu pero un pelín más pela mandrecha, ya que resulta más cómodu per una especie de vallina.

Descendemos cola vista puesta nel refuxu del Baskonia

Plantarémonos na forcadina que d'accesu al crestéu del Lekanda y tamién a una fastera kárstica tipu Cuera y descenderemos pelos praos hasta topanos cola pista que vien Arimekorta, siguiéndolo un pequeñu tramu y descendiendo xustu al llau d'un enorme xalé d'un grupu montaña.

Vamos alcontrando camín hasta dar cola pista que llévanos a Iondokorta

Del xalé baxaremos pelos praos, siguiendo'l sentíu más evidente, llibrando y cruciando les riegues que dan caudal al rigu Arratia. Una vegada que descendamos lo más pindio, toparémonos con un canal d'agua que siguiremos pa dar con una amplia pista que ya nun abandonaremos hasta topanos col refuxu del Baskonia en Iondokorta.

En resume... una rutina pa estirar les pates y sudar tola maldá de la nueche anterior que durante casi 4 hores y media, va facenos percorrer 10,6 km y superar 708 m de desnivel acumuláu. Anque lo más importante, ye que valiónos pa merecer otra estupenda fartura colos collacios del Baskonia Mendi Taldea.

Camudando'l Camín na caliza vasca

No hay comentarios:

Publicar un comentario