Picos d'Europa 2017 - 2018

Del 3 de Setiembre al 8 de Setiembre de 2018

Track: Picos d'Europa 2017 - 2018

Nun soi a alcordame cuando, Ana y yo, planiamos tirar pa Picos una selmana a facer actividá, pero de xuru que la primer vegada que salimos al monte xuntos, na ivernada na Carba Valsecu, ya golíemos que díbemos del mesmu palu cañeru nel monte.

Alcuérdome bien un día, que quedamos pa trepar y preparar col mapa una posible circular, pero como siempre, demientres un cafetín, pasamos olímpicamente de trepar y centrámonos en dibuxar col maxín, cuales pudieren ser les diferentes estayes de la circular.

Entamábemos en Poncebos la tremenda circular

El percorríu teníemoslo, sólo faltaba cuadrar feches, vacaciones, munches ganes y nun tener llesiones. Con tolo necesariu, vinieron les llesiones a facer presencia, poro tuve que dir controlando muncho col tema de la rotura nel xemelu y tamién con un mano qu'esgoncié por facer el faltosu corriendo.

Los que nun me conocen, nun saben lo burrín que pueu llegar a ser nesto del monte. Asína que dempués de probame n'ascensión a la Torre Cerredu, magar d'una selmana de romper y ver que nun tábemos mal del too y paecía qu'aguantaba la patuca, presentámonos con un mochilón de restallu pa pasar 6 díes patiando per Picos.

 Ascensión pente'l borrín nun de los díes más disfrutones

Dende'l primer momentu, ya de camín na furgo, fuimos de rises col envís d'esfrutar a tope y tolos díes qu'anduvimos pel monte y nos refuxos, podemos dicir que nun pasamos nin un mal momentu y los hubo durinos. Ye más, si tenemos que destacar dalgo, ye la facilidá cola que tomamos decisiones ya que la meteo nun mos lo puso nin muncho menos cenciello y nel intre, ye cuando'l calter de caún asoma'l focicu y suel haber complicaciones.

A pesar de la mala hostia que gastamos ambos, paez ser que compleméntase enforma, ya que nun mos tuvimos que dar de guiyadazos, anque apetezca dacuando jaja. Faigo estes referencies a la compañerina que tuve estos díes nel monte, porque si yo soi xabaz, ella ye cabritina enforma y ye capaz de facer que tenga que dar lo meyor de mí, anque vaya mancáu, tan sólo pa ser capaz de tar al altor.

Pasámoslo podre nel monte y nos refuxos

Si dalgo compartimos na forma de ver el montañismu, ye qu'aparte de la propia esperiencia na ñatura, el componente físicu ye perimportante, llegando a tener esi puntín de disfrute cuando te pones na llende física y mental y yes capaz de dar un pocu más si les condiciones así lo primen.

Pel momentu, con contávos la guapa circular que ficimos en 6 díes, ya tengo abondo, onde tuviemos que tirar d'esperiencia ya inxeniu pa camudar los planes iniciales, por mor de la meteo repunante que nos tocó sofrir.

Neña, falámoslo una y mil vegaes... contigo al fin del mundiu pel monte y d'una esperiencia increyible saldrán más nel futuru.

Resume de la circular per Picos 2017 - 2018:

Estaya 1: 

Poncebos (Cabrales) - Sollambriu - Estremeru - H.ultayu - Vega d'Ariu (Onís)
Duración: 8 hores y 20 min
Llonxitú: 16,5 km
Ascensu: 1950 m
Descensu: 450 m

Estaya 2: 

Vega d'Ariu (Onís) - Oliseda - Tiru La Llera - Mesones - Caín (Valdión)
Duración: 9 hores y 50 min
Llonxitú:15 km
Ascensu: 1015 m
Descensu: 2170 m

Estaya 3: 

Caín (Valdión) - Cordiñanes - Asotín - Argayu Congostu - Colláu H.ermosu (Valdión)
Duración: 7 hores y 50 min
Llonxitú: 14,5 km
Ascensu: 1760 m
Descensu: 160 m

Estaya 4:  

Colláu H.ermosu (Valdión) - Casares - Torreblanca - Cabaña Verónica - Áliva (Camaleñu)
Duración: 8 hores y 30 min
Llonxitú: 14,3 km
Ascensu: 1060 m
Descensu: 1445 m

Estaya 5: 

Áliva (Camaleñu) - Paredón d'Albu - Moñetas - Peñe Castil - Terenosa (Cabrales)
Duración: 9 hores y 10 min
Llonxitú: 14,8 km
Ascensu: 1435 m
Descensu: 1800 m

Estaya 6: 

Terenosa (Cabrales) - Peñe Maín - Cuetu Bierru - Tielvi - Poncebos (Cabrales)
Duración: 9 hores y 30 min
Llonxitú: 14,9 km
Ascensu: 715 m
Descensu: 1810 m

Totales:
Duración: 53 hores y 10 min
Llonxitú: 90 km
Ascensu:7935 m
Descensu: 7935 m