Track: Tuíza Riba (L.lena) - Portil.lín Cimeru
Un añu más, entamamos temporada nel GM Xuan de la Borrina y anque yo vengo totalmente en forma, dempués de pasar 6 díes patiando per Picos quise poner una ruta que tuviera un pocu de picante alpino pero que físicamente nun fuera esixente.
Asina qu'una vegada más, decidimos conocer un cumal nuevu del macizu de Penubina y nesti casu l'escoyíu sedría'l Portil.lín Cimeru o Portil.lín Oriental. Los Portil.linos son una serie d'escarnaos cumales que van dende la forqueta'l Portil.lín hasta'l picu'l Siete.
Salimos del pueblu montañeru de Tuíza Riba (1140 m)
L'arista de los Portil.linos ye una actividá alpina potente con ciertu grau de compromisu por mor de lo podre de la roca, pero l'Oriental o Cimeru, ensin escaecer ciertu peligru, da pa llevar con seguridá a un grupín medianamente curiosu.
Pa ello, como siempre, aportaremos a Tuíza Riba, magar del paséu pela Minera hasta Mieres y siguir autovía hasta Campumanes, onde echamos un cafetín y tiramos pela carretera 8 de L.lena, pasando pelos pueblos de Sotiel.lo, Espineo, Los Pontones, Teyeo, Rospaso, Tuíza Baxo y a la fin entramos en Tuíza Riba
Ascensión mítica al Meicín y d'ehí hacia la Forqueta'l Portil.lín
Son les 9 la mañana y salimos caleyando hacia'l Meicín, onde tenemos reserváu pa xintar una fabada y dar un entamu curiosu a la temparada. El camín hacia'l Meicín ye más que conocío y vamos charrando cola calma, quedándome a echar unes rises con Chus que facía tiempu que nun veía y que tenía intención de dar un paséu hasta los picos del Fontán.
El restu'l grupu sigue a bon ritmu tamién y llueu de pasar a confirmar los comensales de la fabada, siguimos camín hacia la forqueta'l Portil.lín pel Canalón Oscuru, aportando a la Forqueta'l Portil.lín magar d'un par d'hores de camín alegre.
Parada pa equipase penriba de la Forqueta (1947 m)
Pocu más arriba de la Forqueta, onde despedímonos de Chus, paramos a poner arneses por si vemos que se debe asegurar dalgún pasu. Lo que si que vemos necesariu namái entrar en tarrén más pindio ye'l cascu, ya que tirar piedres a la xente que va pembaxo ye mui, pero que mui normal.
La ruta ye clara, ya que namái pasar les primeres ramples herboses vemos un marcáu canalizu central, el cual acometemos con decisión hasta tornase este nuna vertical trepada hasta un hombru onde decidimos montar reunión p'asegurar a la mayoría de los compañeros.
Avanzamos decidíos hacia'l nomáu diedru onde montamos reu
L'hombru ye una escupidera terrible, teniendo montoneres de piedres nes repises, lo que dificulta movese con tranquilidá y manexar les cuerdes ensin tirar piedres al restu del grupu. Llueu, de varios morrillos esnalando al final del canalizu, Haritz y Jeni desisten y prefieren dar la vuelta p'ascender al picu'l Canalón Oscuru.
Los demás, van xubiendo ún a ún, demientres el restu colócose a salvo protexíos del canalizu como meyor pueden y ye qu'hai dellos morrillos que val más non miralos y nel hombru, hai que movese los xusto pa nun tocar nada.
Pasáu'l primeru puntu complexu relaxamos aldericando
Penriba l'hombru, con tol mundiu pasáu'l primer pasu, relaxámonos mirando les vistes y siguimos trepando per tarrén herbosu, nel qu'hai qu'andar sollerte de nun tocar nada feble tamién hasta aportar al siguiente pasín de l'ascensión: una travesía llateral penriba d'una llambria con cayida llarga y fatal.
Nun ye difícil, pero decidimos montar un pasamanos y que la xente vaya disfrutando del pasete aseguraos. Pali, pali, vamos pasando toos, asegurándonos que faen les maniobres correutes a mou de ferrata improvisada.
Siguimos trepando pa montar un pasamanos que nos lleve hacia'l cumal
La xente va soltándose y el tramu superior de trepes n'amiestu herbosu y peña, resulta mui entreteníu con un ambientín aéreu mui prestosu, como pue vese nes semeyes. Aún así, tenemos de siguir atentos a nun mover peñes, ya que tol tiempu la roca ye precaria y nun debemos garrar con más fuercia de la necesaria les preses.
Dacuando daremos media vuelta pa relaxar los nervios y les vistes hacia'l valle de Tuíza col borrín a lo baxo o al espeyáu valle de Cuapalacios cola Pena Ruea a lo llonxe, faen que les duldes iniciales del grupu escaézanse.
Grandioses vistes clásiques del macizu de Penubina
Con un pelín más d'esfuerzu, aportaremos a los 2220 m del Portil.lín Cimeru u Oriental onde descansaremos un bon ratu, esfrutando de les vistes de cumales cercanos como la Penubina grande, col crestéu pelos Castil.linos hasta'l Siete o hacia los picos del Fontán cola arista pel Crestón del Pasu Malu.
Cumal del Portil.lín Cimeru (2220 m)
Nun tenemos muncho más tiempu pa recreeanos, asína qu'entamamos el descensu con tol cuidadín del mundiu, adelantándome pa guiyar un pelín, hasta'l pasu de la travesía na llambria, onde quedámonos Jose y yo a desmontalo, magar de que pasara tol mundiu.
Más de lo mesmu fadremos nel canalizu vertical, onde decidimos que la mayoría rapele aprovechando que teníemos el tingláu montáu y así esfrutaben un pocu más de toes estes maniobres necesaries de conocer nel monte.
Descensu hacia la Forqueta'l Portil.lín y a xintar
Cola xente na Forqueta'l Portil.lín descansando, desmontamos la reunión del canalizu y siguimos baxada pa reuninos y descender tol canalón hacia'l Meicín lo más apriesa posible. Dalgún correnderu como Montse, tuvo con ganes de baxar a fueu y otros más tranquilos, pero aportamos toos a tiempu pa tomar unes cerveces enantes de la xinta.
Como siempre, la fabada n'abundancia y riquísima, entró estupéndamente y el tratu y el bon ambiente con Tania, Gummo y Alejandro son aseguraos. Poro, la sobremesa allargóse un pelín más de lo albidráu costando ponese en marcha pa baxar hacia Tuíza Riba de nuevo.
Fabada nel refuxu del Meicín
7 hores y 46 minutinos dempués aportaremos al aparcaderu de nuevo, contando claro ta, con una amplia y relaxada xinta nel refuxu, así que les hores de ruta, puen rondar más correuto les 5 hores y media aproximádamente.
En resume, ruta delicadina por mor del estáu de la roca y los trepes, que nos fadrá ascender un total de 990 m d'ascensión acumulada y percorrer unos 8 km, pero que si tamos d'andar pel monte más alpín nun supondrá la necesidá de llevar material (con grupu pequeñu sobretou)... anque como siempre, la seguridá lo primero, qu'al monte hai que poder volver pa contalo y pa facer más aventures.
Camudando'l Camín nel macizu l.linizu de Penubina
No hay comentarios:
Publicar un comentario